“Appendix A: Para sa mga Ginikanan—Paghanda sang Inyo Kabataan para sa Bilog-Kinabuhi nga Paglakat sa Dalan sang Kasugtanan sang Dios,” Dali, Magsunod sa Akon—Para sa Puluy-an kag Simbahan: Doktrina kag mga Kasugtanan 2025 (2025)

“Appendix A,” Dali, Magsunod sa Akon—Para sa Puluy-an kag Simbahan: 2025

Appendix A

Para sa mga Ginikanan—Paghanda sang Inyo Kabataan para sa Bilog-Kinabuhi nga Paglakat sa Dalan sang Kasugtanan sang Dios

Tungod Sia nagapalangga sa imo, nagasalig sa imo, kag nakahibalo sang imo potensyal, ang Amay nga Langitnon naghatag sa imo sang oportunidad agud buligan ang imo kabataan nga magsulod kag magpadayon sa Iya dalan sang kasugtanan, ang dalan padulong sa kabuhi nga wala katapusan (tan-awa sa Doktrina kag mga Kasugtanan 68:25–28). Nagalakip ini sang pagbulig sa ila nga maghanda sa paghimo kag pagtipig sang sagrado nga mga kasugtanan, pareho sang kasugtanan sang bunyag kag mga kasugtanan nga ginahimo sa templo. Paagi sa sining mga kasugtanan, malipayon nga ibugkos sang inyo mga kabataan ang ila mga kaugalingon sa Manluluwas, nga si Jesucristo.

May madamo nga pamaagi nga ihanda ang inyo mga kabataan sa sining pagpanglakaton sa dalan sang kasugtanan, kag ang Amay nga Langitnon magabulig sa imo nga diskubrehon ang pinakamaayo nga paagi para mabuligan sila. Samtang nagapangayo ka sang inspirasyon, tandai nga indi tanan nga pagtuon nagakatabo sa naiskedyul nga mga leksyon. Ang matuod, kabahin sang nagapabaskog sang pagtuon sa panimalay amo ang oportunidad nga magtuon paagi sa ehemplo kag paagi sa ginagmay, simple nga pagtudlo—inang natural nga nagakatabo sa adlaw-adlaw nga pagpangabuhi. Pareho nga ang pagsunod sa dalan sang kasugtanan isa ka sige-sige, bilog-kinabuhi nga proseso, amo man ang pagtuon parte sa dalan sang kasugtanan. (Tan-awa sa “Home and Family,” Pagtudlo sa Paagi sang Manluluwas [2022], 30–31.)

Sa idalom amo ang pila ka mga ideya nga mahimo magdala sang dugang nga inspirasyon. Makakita ka sang dugang nga mga ideya sa pagtudlo sang mga kabataan nga Primary ang pangidaron sa “Appendix B: Para sa Primary—Paghanda sang Inyo Kabataan para sa Bilog-Kinabuhi nga Paglakat sa Dalan sang Kasugtanan sang Dios.”

Bunyag kag Kompirmasyon

Gintudlo ni Nefi nga ang “ganhaan nga sa diin [kita] dapat magsulod” sa dalan sang kasugtanan “amo ang paghinulsol kag bunyag paagi sa tubig” (2 Nefi 31:17). Ang imo pagpaninguha nga buligan ang imo kabataan sa paghanda para sa bunyag kag kompirmasyon magapahamtang sing mabakod sang ila mga tiil sa sina nga banas. Ining mga pagpaninguha nagasugod sa pagtudlo parte sa pagtuo kay Jesucristo kag paghinulsol. Nagalakip man ini sang pagtudlo kon paano naton ginapabakod ang aton mga kasugtanan sa bunyag paagi sa pag-ambit sang sakramento tagsa ka semana.

Ari ang iban pa nga balasahon nga makabulig sa imo: 2 Nefi 31.

Tagsa nga may eksperiyensya ka nga nagapabakod sang imo pagtuo sa Amay nga Langitnon kag kay Jesucristo, iistorya ini sa imo bata. Buligi sila nga maintiendihan nga ang pagtuo isa ka butang nga pwede magbakod nga magbakod sa bilog nga kabuhi. Ano ang mga butang nga pwede himuon sang imo bata para magpatubo sang mas mabaskog nga pagtuo kay Jesucristo antes sila bunyagan?
Kon ang imo bata makahimo sang sayop nga pagpili, mag-istorya sing masinadyahon parte sa dulot sang paghinulsol. Kag kon makahimo ka sang sala nga pagpili, iistorya ang kalipay nga nagaabot kon maghinulsol ka. Magpamatuod nga tungod nag-antos si Jesucristo kag napatay para sa aton mga sala, pwede kita maghinulsol adlaw-adlaw, mapatawad, kag makabaton sang gahum nga magbag-o. Kon magpangayo sang kapatawaran ang imo bata, magpatawad nga halog sa buot kag sing malipayon.
Sugiri ang imo bata parte sa imo bunyag. Magpakita sang mga litrato kag magpaambit sang mga handurawan. Iistorya kon ano ang imo nabatyagan, kon paano ka ginbuligan sang pagtuman mo sang mga kasugtanan sa bunyag nga mas makilala si Jesucristo, kag kon paano ka padayon nga ginabugayan sang imo mga kasugtanan sa imo kabuhi. Paisoga ang imo bata nga magpamangkot.
Kon may bunyag sa inyo pamilya ukon sa inyo ward, dalha ang imo bata para magtan-aw. Hambali sing ululupod kon ano ang nakita kag nabatyagan ninyo sang imo bata. Kon mahimo, istoryaha ang tawo nga ginbunyagan kag magmapangkot pareho sang masunod: “Paano ka nakahimo sining desisyon? Paano ka naghanda?”
Kon nakita mo ang imo bata nga nagahimo sang ila ginpangako nga himuon, maghatag sang sinsero nga pagdayaw. Hambali sia nga ang pagtuman sang mga pangako nagabulig sa aton nga maghanda sa pagtuman sang mga kasugtanan nga ginahimo naton kon bunyagan kita. Ano ang aton ginapromisa sa Dios kon ginabunyagan kita? Ano ang Iya ginpromisa sa aton? (Tan-awa sa Mosias 18:8–10, 13.)
Hambali kon paano ka ginbugayan sang pagpakumpirma kag sa pagkamiyembro sang Simbahan ni Jesucristo sang mga Santos sa Ulihing mga Adlaw? Halimbawa, paano ka mas naglapit sa Amay nga Langitnon kag kay Jesuscristo samtang nagaserbisyo ka sa iban kag samtang ginaserbisyohan ka sang iban? Buligi ang imo bata nga manumdom sang mga paagi nga magserbisyo kag magpabakod sa iban bilang miyembro sang Simbahan. Buligi man sila nga maeksperiyensyahan kag makilala ang kalipay nga nagahalin sa pagserbisyo.
Kon ikaw kag ang imo bata ululupod nga may sagrado nga eksperiyensya (halimbawa sa simbahan, samtang nagabasa sang balaan nga mga kasulatan, ukon samtang nagaserbisyo sa iban), iistorya sa ila ang imo espirituhanon nga mga nabatyagan ukon mga impresyon. Agdaha ang imo bata nga iistorya ang ila nabatyagan. Tandai ang lainlain nga mga paagi nga nagapakighambal ang Espiritu sa mga tawo, dala na ang pamaagi nga nagapakighambal Sia sa imo sing personal. Buligi ang imo bata nga makilala kag iistorya sa imo ang tinion nga mahimo nga nagakaeksperiyensyahan nila ang impluwensya sang Balaan nga Espiritu.
Hambali sing ululupod ang lainlain nga pamaagi nga mabatian sang mga alagad sang Ginuo ang Iya tingug. Hagara ang imo bata nga magdrowing ukon maghimo sang video kon paano nila mabatian ang tingug sang Manluluwas.
Himoa ang sakramento nga sagrado kag malipayon nga okasyon sa inyo pamilya. Iistorya sa imo bata kon paano ka nagatutok kay Jesucristo sa oras sang sakramento. Buligi ang imo bata nga magplano nga ipakita nga sagrado ang sakramento para sa ila. Halimbawa, ang pagpamati sa mga tinaga sang sakramento nga mga pangamuyo makapadumdom sa aton sang aton mga kasugtanan sa bunyag.
Madamo nga mga isyu sang Abyan nga magasin ang may mga artikulo, mga istorya, kag aktibidades nga makabulig sa mga kabataan nga maghanda para sa bunyag kag kompirmasyon. Tugoti ang imo bata nga magpili sang ila basahon kag malingawan upod sa imo.

Gahum, Awtoridad, kag mga Yabi sang Priesthood

Ang priesthood amo ang awtoridad kag gahum sang Dios nga paagi sini Iya ginabugayan ang Iya kabataan. Ang priesthood sang Dios ari sa kalibutan sa karon sa Ang Simbahan ni Jesucristo sang mga Santos sa Ulihing mga Adlaw. “Ang tanan nga mga miyembro sang Simbahan nga nagatuman sang ila mga kasugtanan—mga babayi, mga lalaki, kag mga kabataan—ginabugayan sang gahum sang priesthood sang Dios sa ila mga panimalay para pabakuron sila kag ang ila mga pamilya (Libro sang Pangkabilogan nga Pagsulundan: Pagserbisyo sa Ang Simbahan ni Jesucristo sang mga Santos sa Ulihing mga Adlaw, 3.6, Librarya sang Ebanghelyo). Ang ining gahum magabulig sa mga miyembro sa paghimo sang buluhaton sang Dios para sa kaluwasan kag pangkahitaasan sa ila personal nga mga kabuhi kag mga pamilya (tan-awa sa Pinili nga mga Bahin Halin sa Libro sang Pangkabilogan nga Pagsulundan: Pagserbisyo sa Ang Simbahan ni Jesucristo sang mga Santos sa Ulihing mga Adlaw, 2.2).

Kon ang mga lalaki kag mga babayi nagaalagad sa mga calling sa Simbahan, ginahimo nila ini upod ang awtoridad sang priesthood, sa idalom sang direksyon sang mga nagakapot sang mga yabi sang priesthood. Ang tanan nga anak sang Amay nga Langitnon—ang Iya mga anak nga lalaki kag Iya mga anak nga babayi—pagabugayan samtang mas nagadako ang ila pag-intiendi parte sa priesthood.

Ginabaton naton ang mga ordinansa paagi sa awtoridad sang priesthood. “Ang kaangay-angay nga mga lalaki nga miyembro sang Simbahan nagabaton sang awtoridad sang priesthood paagi sa paghatag sang priesthood kag ordinasyon sa mga palangakuan sa priesthood” (General Handbook, 3.4). Ang mga nagakapot sang mga palangakuan sang priesthood pwede nga pahanugotan sang nagakapot sa mga yabi sang priesthood sa paghikot sang mga ordinansa sang priesthood.

Para magtuon sing dugang parte sa priesthood, tan-awa sa Russell M. Nelson, “Espirituhanon nga mga Manggad,” Liahona, Nob. 2019, 76–79; “Mga Prinsipyo sang Priesthood,” kapitulo 3 sa Pinili nga mga Bahin sang Libro sang Pangkabilogan nga Pagsulundan: Pagserbisyo sa Ang Simbahan ni Jesucristo sang mga Santos sa Ulihing mga Adlaw.

Himoa ang mga ordinansa sang priesthood nga dalayon nga parte sang inyo kabuhi sa pamilya. Halimbawa, buligi ang imo bata nga maghanda sa espirituhanon para sa sakramento kada semana. Paisoga ang imo bata nga magpangayo sang bendisyon sang priesthood kon nagamasakit ukon nagakinahanglan sila sang kaumpawan ukon direksyon. Himoa nga batasan ang pagpakita sang mga pamaagi nga ginabugayan sang Ginuo ang inyo pamilya paagi sa gahum sang priesthood.
Samtang ululupod ninyo nga ginabasa ang balaan nga mga kasulatan, bantayi ang mga oportunidad para hambalan kon paano ginabugayan sang Dios ang mga tawo paagi sa Iya gahum. Iistorya ang imo kaugalingon nga mga eksperiyensya sang ginbugayan ka sang Dios paagi sa Iya priesthood. Para sa mga halimbawa sang mga bugay nga mabaton naton halin sa Dios paagi sa priesthood, tan-awa sa Libro sang Pangkabilogan nga Pagsulundan, 3.2, 3.5.
Tudloi ang imo bata nga pagkatapos sang bunyag, pwede nila mabaton ang gahum sang priesthood paagi sa pagtuman sang kasugtanan sa bunyag. Rebyuha sing ululupod ang mensahe ni Pangulong Russell M. Nelson nga “Espirituhanon nga mga Manggad” (Liahona, Nob. 2019, 76–79). Sugiri ang imo bata kon paano ang mga ordinansa sang priesthood nagdala sang gahum sa imo kabuhi.
Hambali ang pamangkot nga “Daw ano ang alagad sang Ginuo?” Basaha sing ululupod ang Doktrina kag mga Kasugtanan 121:36–42, kag pangitaa ang mga sabat. Tagsa nga matalupangdan mo ang imo bata (ukon ang iban nga tawo) nga nagagamit sang isa ka prinsipyo ukon kinaiya sa sining mga bersikulo, sambita ini.
Kon ginagamit mo ukon sang imo bata ang mga yabi para magbukas sang pwertahan ukon magpaandar sang salakyan, hatagi sang tion nga ikumparar ina nga mga yabi sa mga yabi nga ginakaptan sang mga lider sang priesthood. (Para sa kahulugan sang mga yabi sang priesthood, tan-awa sa Pinili nga mga Bahin Halin sa Libro sang Pangkabilogan nga Pagsulundan: Pagserbisyo sa Ang Simbahan ni Jesucristo sang mga Santos sa Ulihing mga Adlaw, 3.4.1). Ano ang “ginabuksan” ukon “ginasugdan” sang mga yabi sang priesthood para sa aton?

2:51
Where Are the Keys?
Priesthood authority and keys start the engine, open the gates of heaven, facilitate heavenly power, and pave the covenant pathway back to our Heavenly Father.
Kon ginaset apart ka para sa isa ka calling, hagara ang imo bata nga magtan-aw, kon posible. Tugoti ang imo bata nga makita ka nga nagatuman sang imo calling. Pwede ka man gani magpangita sang nagakabagay nga mga paagi nga makabulig sila sa imo. Ilaragway kon paano mo nabatyagan ang gahum sang Ginuo sa imo calling.

Pagpabunyag kag Pagpakumpirma para sa mga Katigulangan

Ang mga templo kabahin sang plano sang Amay nga Langitnon para sa Iya kabataan. Sa balay sang Ginuo, nagahimo kita sang sagrado nga mga kasugtanan upod sa Amay nga Langitnon samtang nagapartisipar kita sa sagrado nga mga ordinansa, nga tanan nagatudlo padulong kay Jesucristo. Ang Amay nga Langitnon nagtigana sang paagi nga ang tanan Niya nga mga kabataan makahimo sang mga kasugtanan kag makapartisipar sa mga ordinansa, dala na ang mga tawo nga wala makabaton sang mga ini sa sini nga kabuhi. Sa pagsugod sang tuig nga mag-12 anyos na ang imo bata, husto na ang ila edad para mabunyagan kag magpakumpirma sa templo para sa napatay na nga katigulangan (tan-awa man sa 1 Mga Taga-Corinto 15:29).

Magkadto sa balay sang Ginuo pirme kon itugot sang inyo sirkumstansya. Iistorya sa imo bata kon ngaa nagakadto ka kag kon paano ka ginabuligan sang templo nga makabatyag nga mas malapit sa Amay nga Langitnon kag kay Jesucristo.
Rebyuha kag hambali sing ululupod ang mga pamangkot para sa temple recommend. Makita mo ini sa mga pahina 36–37 sang Para sa Kusog sang mga Lamharon: Giya sa Paghimo sang mga Pagpili (2022). Iistorya sa imo bata kon ano ang nagakatabo sa interbyu para sa temple recommend. Ipakigbahin kon ngaa importante sa imo nga may ara ka sang temple recommend.
Basaha sing ululupod ang Malaquias 4:6. Hambali kon paano ang inyo mga tagipusuon maliso sa inyo mga katigulangan. Tun-i sing dugang ang parte sa inyo mga katigulangan paagi sa pagtuon sang inyo family history sing ululupod sa FamilySearch.org. Magpangita sang mga kaparyentihan nga napatay na nga kinahanglan bunyagan kag kumpirmahan. Ang ward temple and family history consultant makabulig sa inyo.
ChurchofJesusChrist.org.)

Pagbaton sang Bendisyon sang Patriarka

Ang bendisyon sang patriarka pwede nga mangin kuluhaan sang giya, kasulhay, kag inspirasyon. Unod sini ang personal nga laygay sa aton halin sa Amay nga Langitnon kag nagabulig sa aton nga maintiendihan ang aton wala katapusan nga pagkatawo kag katuyuan. Buligi ang imo bata nga maghanda sa pagbaton sang bendisyon sang patriarka paagi sa pagtudlo sa ila sang kahulugan kag sagrado nga kinaiya sang mga bendisyon sang patriarka.

Iistorya sa imo bata ang imo eksperiyensya sang pagbaton sang bendisyon sang patriarka. Pwede mo iistorya kon paano ka naghanda para magbaton sini, kon paano ka sini nabuligan nga mas maglapit sa Dios, kag kon paano ka Niya padayon nga ginagiyahan paagi sa sining bendisyon. Pwede mo man hagaron ang imo bata nga mag-istorya sa iban nga mga miyembro sang pamilya nga nakabaton na sang ila mga bendisyon sang patriarka.
Rebyuha sing ululupod ang mensahe ni Elder Randall K. Bennett nga “Ang Imo Patriarchal Blessing—Inspirado nga Pagtuytoy halin sa Amay nga Langitnon” Liahona, Mayo 2023, 42–43, 88–90). Iistorya sa kada isa kon ano ang inyo natun-an sa sining mensahe kon ngaa gusto sang Amay nga Langitnon nga makabaton kita sang bendisyon sang patriarka. Para mabal-an ang proseso sang pagbaton sang bendisyon sang patriarka, tan-awa sa Libro sang Pangkabilogan nga Pagsulundan, 18.17.
Kon may mga katigulangan ka nga nakabaton na sang mga bendisyon sang patriarka, basi makainspirar nga basahon ang iban sini upod ang imo bata. Para magpangayo sang mga bendisyon sang mga katigulangan nga patay na, mag-log in sa ChurchofJesusChrist.org, i-klik ang Tools sa naibabaw nga kanto sa tuo sang screen, kag pilion ang Bendisyon sang Patriarka.
Pagkatapos nga mabaton sang imo bata ang bendisyon sang patriarka, hagara ang bisan sin-o nga miyembro sang pamilya nga ara para irekord ang ila mga nabatyagan kag iistorya ini sa imo bata.

Pagbaton sang Endowment

Gusto sang Dios nga hatagan, ukon bugayan, ang tanan Niya nga kabataan sang “gahum halin sa kahitaasan” (Doktrina kag mga Kasugtanan 95:8). Nagakadto kita sa templo para magbaton sang aton kaugalingon nga endowment sing makaisa lang, pero ang mga kasugtanan nga aton ginahimo upod sa Dios kag ang espirituhanon nga gahum nga Iya ginahatag sa aton bilang kabahin sang endowment mahimo nga magbugay sa aton adlaw-adlaw sa aton mga kabuhi.

Magbutang sang litrato sang templo sa inyo puluy-an. Sugiri ang imo bata parte sa imo mga nabatyagan sa sulod sang balay sang Ginuo. Hambali pirme ang parte sa imo pagpalangga sa Ginuo kag sa Iya balay kag ang mga kasugtanan nga imo ginhimo didto. Magpangita sang mga oportunidad para makakadto sa templo upod ang imo bata para maghikot sang mga bunyag kag kompirmasyon para sa ila mga katigulangan.
temples.ChurchofJesusChrist.org Tugoti ang imo bata nga magpamangkot parte sa templo.
Samtang nagapartisipar kamo sang imo bata ukon nagasaksi sang iban pa nga mga ordinansa (pareho sang sakramento ukon pagbendisyon sa pagpang-ayo), hatagi sang tiyempo nga hambalan ang simbolismo nga ara sa ordinansa. Ano ang ginarepresentar sang mga simbolo? Paano ang mga ini nagapamatuod parte kay Jesucristo? Makabulig ini sa imo bata nga maghanda sa pagbinagbinag sang simboliko nga kahulugan sang mga ordinansa sang templo, nga nagapamatuod man parte kay Jesucristo.
Buligi ang imo bata nga matalupangdan kon paano nila ginatuman ang kasugtanan sa bunyag nga ginalaragway sa Mosias 18:8–10, 13. Buligi man ang imo bata nga matalupangdan kon paano sila ginabugayan sang Ginuo. Patuboa ang kompiyansa sang imo bata sa ila abilidad sa pagtuman sang mga kasugtanan.
Hambali sing hilway kag pirme kon paano ang imo mga kasugtanan sa templo nagagiya sa imo mga pagpili kag nagabulig sa imo nga mangin mas malapit kay Jesucristo. Pwede mo gamiton ang Pinili nga mga Bahin Halin sa Libro sang Pangkabilogan nga Pagsulundan: Pagserbisyo sa Ang Simbahan ni Jesucristo sang mga Santos sa Ulihing mga Adlaw, 27.2, para rebyuhon ang mga kasugtanan nga aton ginahimo sa templo. Kon nakabaton ka na sang endowment, sugiri ang imo kabataan kon paano ka ginabuligan sang temple garment nga madumduman ang imo mga kasugtanan upod kay Jesucristo.

Sacred Temple Clothing
From ancient times, men and women have embraced sacred music, different forms of prayer, religious vestments full of symbolism, gestures and rituals to express their innermost feelings of devotion to God.

Pag-alagad sa Misyon

Si Elder David A. Bednar nagtudlo: “Ang solo nga pinakaimportante nga butang nga imo mahimo para maghanda sa pagserbisyo amo ang mangin isa ka misyonero antes ka pa maglakat sa misyon. … Ang isyu indi ang paglakat sa misyon; kundi, ang isyu amo ang mangin misyonero kag mag-alagad sa bilog naton nga kabuhi sa bug-os naton nga tagipusuon, ikasarang, panghunahuna, kag kusog. … Nagahanda ka para sa bilog-kinabuhi nga pangmisyonaryo nga buluhaton” (“Becoming a Missionary,” Liahona, Nob. 2005, 45–46). Ang mga eksperiyensya sang imo bata nga mangin misyonero magabugay sa iya sa wala katapusan, indi lamang sa tion nga nagaalagad sila bilang misyonero.

Para magtuon sing dugang, tan-awa sa Russell M. Nelson, “Pagwali sang Ebanghelyo sang Paghidaet,” Liahona, Mayo 2022, 6–7; M. Russell Ballard, “Ang Pagserbisyo sa Misyon Nagbugay sang Akon Kabuhi sa Katubtuban,” Liahona, Mayo 2022, 8–10.

Ipakita kon paano ipaambit ang ebanghelyo sa natural nga pamaagi. Magbantay pirme sang mga oportunidad nga magpakigbahin sa iban sang imo mga nabatyagan parte sa Amay nga Langitnon kag sa Manluluwas kag sang mga bugay nga imo nabaton halin sa ginpanumbalik nga ebanghelyo sang Manluluwas kag bilang miyembro sang Iya Simbahan. Hagara ang iban nga mag-entra sa inyo pang-Simbahan kag pang-pamilya nga mga aktibidades.
Magpangita sang mga oportunidad para makaistorya ang imo pamilya sa mga misyonero. Hagara sila nga tudloan ang inyo mga abyan, ukon magtanyag nga tudloan nila ang mga tawo sa inyo balay. Pamangkuta ang mga misyonero parte sa ila mga eksperiyensya kag kon paano ang pag-alagad sa misyon nagabulig sa ila nga mangin mas malapit kay Jesucristo. Pamangkuta man sila kon ano ang ila ginhimo (ukon ila kuntani ginhimo) para maghanda nga mangin mga misyonero.
Kon nag-alagad ka na sa misyon, mag-istorya sing hilway kag pirme parte sa imo mga eksperiyensya. Ukon hagara ang mga abyan ukon mga miyembro sang pamilya nga nagserbe na sa misyon nga mag-istorya parte sa ila mga inagihan. Pwede man ninyo hambalan ang mga paagi nga nagpaambit ka sang ebanghelyo sa iban sa bilog mo nga kabuhi. Buligi ang imo bata nga magpamensar sang mga paagi nga pwede nila ipakigbahin ang ebanghelyo.
Hatagi ang imo bata sang mga oportunidad nga magtudlo sa inyo pamilya sang mga prinsipyo sang ebanghelyo. Pwede man magpraktis ang imo bata sa pagpakigbahin sang ila mga ginapatihan sa iban. Halimbawa, pwede ninyo hambalan ang mga pamangkot pareho sang “Paano naton ipakilala ang Libro ni Mormon sa tawo nga wala pa makabati parte sini?” ukon “Paano naton ilaragway ang kakinahanglan sang Manluluwas sa tawo nga indi Kristiyano?”
Buligi ang imo bata nga mangin komportable sa pag-istorya sa mga tawo. Ano ang pila ka maayo nga pamaagi sa pagsugod sang pag-istoryahanay? Paisoga ang imo bata nga tun-an kon paano mamati sa ihambal sang iban, intiendihon kon ano ang ara sa ila mga tagipusuon, kag magpaambit sang mga kamatuoran sang ebanghelyo nga mahimo magbugay sa ila mga kabuhi.
Magpangita sang mga oportunidad para sa imo bata nga magtuon parte sa iban nga mga kultura kag mga ginapatihan. Buligi sila nga kilalahon kag respetuhon ang maayo kag matuod nga mga prinsipyo sa mga ginapatihan sang iban.

Pagbaton sang Ordinansa sang Pagselyo

Sa templo, ang bana kag asawa mahimo nga makasal para sa wala katapusan. Nagakatabo ini sa ordinansa nga ginatawag “pagselyo” (sealing). Bisan pa nga ang ining ordinansa tinuig pa antes matabo sa imo bata, ang ginagmay, simple, sige-sige nga mga butang nga ginahimo ninyo sing ululupod sa sinang tinuig makabulig sa ila sa paghanda para sa sining matahum nga bugay.

Basaha sing ululupod ang “Ang Panimalay: Isa ka Proklamasyon sa Kalibutan” (Librarya sang Ebanghelyo). Ano ang ginatudlo sining proklamasyon parte sa kalipay sa kabuhi sa pamilya kag parte sa madinalag-on nga mga pag-asawahay? Upod ang imo bata, magpili sang isa ka prinsipyo nga nalista sa proklamasyon para tun-an. Pwede ninyo pangitaon ang balaan nga mga kasulatan nga konektado sa sinang prinsipyo sa Giya sa Balaan nga mga Kasulatan. Pwede man kamo magpahamtang sang mga lalab-uton nga ipangabuhi ina nga prinsipyo sing mas maayo sa inyo pamilya. Samtang ginatrabaho ninyo ang inyo mga lalab-uton, hambali sing ululupod ang epekto sang pagpangabuhi sina nga prinsipyo sa inyo pangabuhi sa pamilya.
Mangin bukas sa imo bata parte sa mga butang nga natun-an ninyo sang imo asawa/bana parte sa pag-angkon sang nasentro-kay-Cristo nga wala katapusan nga pag-asawahay kag ang mga paagi nga ginatinguhaan ninyo nga panamion pa gid ini. Kon kamo sang imo asawa (ukon bana) naselyohan sa templo, ipakita sa inyo bata paagi sa ehemplo kon paano ninyo ginatinguhaan nga tumanon ang inyo mga kasugtanan sa Ginuo. Istoryahi ang imo bata kon paano ninyo ginatinguhaan nga himuon ang Amay nga Langitnon kag ang Manluluwas nga sentro sang inyo relasyon kag kon paano Nila kamo ginabuligan (tan-awa man sa Ulisses Soares, “Magkatuwang upod sa Ginuo,” Liahona, Nob. 2022, 42–45).
Kon kinahanglan himuon ang mga desisyon sa pamilya, maghiwat sang pangpamilya nga mga konseho kag mga paghinambalanay. Seguroha nga ang mga opinyon sang tanan nga mga miyembro sang pamilya ginapamatian kag ginahatagan bili. Gamita ining mga diskusyon bilang oportunidad para ipakita ang maayo nga komunikasyon kag kaayo sa mga relasyon sa pamilya, bisan pa nga indi palareho ang panan-awan sang tagsa-tagsa.
Kon may indi pag-intiendihanay ukon kagamo sa pamilya, magpakita sang pagpasensya kag kaluoy. Buligi ang imo bata nga makita kon paano ang pag-atubang sang pag-inaway sa Cristohanon nga pamaagi makabulig nga maghanda sa iya para sa malipayon nga pag-asawahay. Basaha sing ululupod ang Doktrina kag mga Kasugtanan 121:41–42, kag hambali kon paano magamit sa pag-asawahay ang mga prinsipyo sa sining mga bersikulo.