“ວັນທີ 6–12 ເດືອນມັງກອນ. 1 ນີໄຟ 1–7: ‘ເຮົາຈະໄປ ແລະ ເຮັດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 6–12 ເດືອນມັງກອນ. 1 ນີໄຟ 1–7,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ຄອບຄົວຂອງລີໄຮເດີນທາງໄປໃນຖິ່ນແຫ້ງແລ້ງກັນດານ

Lehi Traveling Near the Red Sea [ລີໄຮເດີນທາງຢູ່ໃກ້ທະເລແດງ], ໂດຍ ແກຣີ ສະມິດ

ວັນທີ 6–12 ເດືອນມັງກອນ

1 ນີໄຟ 1–7

“ເຮົາຈະໄປ ແລະ ເຮັດ”

ນີໄຟໄດ້ບັນທຶກ “ເລື່ອງຂອງພຣະເຈົ້າ” (1 ນີໄຟ 6:3). ຂະນະທີ່ທ່ານສຶກສາບັນທຶກຂອງນີໄຟ, ໃຫ້ເອົາໃຈໃສ່ຕໍ່ເລື່ອງຂອງພຣະເຈົ້າ ທີ່ທ່ານພົບເຫັນ, ໂດຍສະເພາະຄວາມປະທັບໃຈຈາກພຣະວິນຍານ.

ບັນທຶກຄວາມປະທັບໃຈຂອງທ່ານ

ພຣະຄຳພີມໍມອນເລີ່ມຕົ້ນດ້ວຍເລື່ອງລາວຂອງຄອບຄົວທີ່ແທ້ຈິງຄອບຄົວໜຶ່ງ ທີ່ໄດ້ປະເຊີນກັບບັນຫາຫຍຸ້ງຍາກແທ້ໆ. ມັນໄດ້ເກີດຂຶ້ນ 600 ປີ ກ່ອນ ຄ.ສ., ແຕ່ອາດມີບາງສິ່ງຢູ່ໃນເລື່ອງນີ້ ທີ່ອາດຄ້າຍຄືກັນກັບຄອບຄົວໃນທຸກວັນນີ້. ຄອບຄົວນີ້ໄດ້ມີຊີວິດຢູ່ໃນໂລກທີ່ນັບມື້ນັບມີຄວາມຊົ່ວຮ້າຍຫລາຍຂຶ້ນເລື້ອຍໆ, ແຕ່ພຣະຜູ້ເປັນເຈົ້າໄດ້ສັນຍາກັບເຂົາເຈົ້າວ່າ ຖ້າຫາກເຂົາເຈົ້າຈະຕິດຕາມພຣະອົງ, ແລ້ວພຣະອົງຈະນຳພາເຂົາເຈົ້າໄປຫາບ່ອນທີ່ປອດໄພ. ໃນລະຫວ່າງການເດີນທາງນັ້ນ ບາງເວລາກໍດີ ແລະ ບາງເວລາກໍບໍ່ດີ; ເຂົາເຈົ້າໄດ້ປະສົບກັບພອນ ແລະ ການມະຫັດສະຈັນ ທີ່ຍິ່ງໃຫຍ່, ແຕ່ເຂົາເຈົ້າກໍມີການໂຕ້ຖຽງ ແລະ ການຂັດແຍ້ງກັນຫລາຍພໍສົມຄວນ. ໜ້ອຍເທື່ອທີ່ພຣະຄຳພີຈະກ່າວຢ່າງຍືດຍາວເຖິງຄອບຄົວທີ່ພະຍາຍາມດຳລົງຊີວິດຕາມພຣະກິດຕິຄຸນ: ພໍ່ພະຍາຍາມດົນໃຈຄອບຄົວຂອງຕົນໃຫ້ມີສັດທາ, ພວກລູກຊາຍຕັດສິນໃຈເອງວ່າ ຈະເຊື່ອພໍ່ຫລືບໍ່, ແມ່ມີຄວາມຢ້ານກົວສຳລັບຄວາມປອດໄພຂອງລູກໆ, ແລະ ອ້າຍນ້ອງກັນ ປະເຊີນກັບຄວາມອິດສາບັງບຽດ ແລະ ຄວາມຂັດແຍ້ງກັນ—ແລະ ບາງເທື່ອໄດ້ໃຫ້ອະໄພກັນແລະກັນ. ສະຫລຸບແລ້ວ, ມັນມີພະລັງທີ່ແທ້ຈິງ ໃນການເຮັດຕາມຕົວຢ່າງເລື່ອງສັດທາທີ່ຄອບຄົວນີ້—ເຖິງແມ່ນດ້ວຍຄວາມບົກຜ່ອງຂອງເຂົາເຈົ້າ—ໄດ້ສະແດງໃຫ້ເຫັນ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

1 ນີໄຟ 1–6

ພຣະຄຳພີມີຄຸນຄ່າຫລາຍ.

ຫົກບົດທຳອິດຂອງພຣະຄຳພີມໍມອນບັນຈຸຂໍ້ອ້າງອີງຫລາຍຢ່າງ ຕໍ່ໜັງສືທີ່ສັກສິດ, ບັນທຶກທີ່ສັກສິດ, ແລະ ພຣະຄຳຂອງພຣະຜູ້ເປັນເຈົ້າ. ຂະນະທີ່ທ່ານອ່ານ 1 ນີໄຟ 1–6, ທ່ານໄດ້ຮຽນຮູ້ຫຍັງແດ່ກ່ຽວກັບພຣະຄຳຂອງພຣະຜູ້ເປັນເຈົ້າ ວ່າ “ມີຄຸນຄ່າຫລາຍ”? (1 ນີໄຟ 5:21). ຂໍ້ພຣະຄຳພີເຫລົ່ານີ້ສິດສອນທ່ານຫຍັງແດ່ກ່ຽວກັບພຣະຄຳພີ? ທ່ານພົບເຫັນຫຍັງແດ່ທີ່ດົນໃຈທ່ານໃຫ້ຄົ້ນຄວ້າພຣະຄຳພີດ້ວຍຄວາມຕັ້ງໃຈຫລາຍກວ່າເກົ່າ?

1 ນີໄຟ 1:7–15

ພຣະຄຳພີມໍມອນເປັນພະຍານເຖິງພຣະເຢຊູຄຣິດ.

ຈຸດປະສົງທີ່ແທ້ຈິງ ທີ່ມີກ່າວຢູ່ໃນໜ້າວິເຄາະສະບັບ—ເພື່ອໃຫ້ທຸກຄົນຍອມຮັບວ່າ ພຣະເຢຊູຄືພຣະຄຣິດ—ພຣະຄຳພີມໍມອນເລີ່ມຕົ້ນດ້ວຍພາບນິມິດອັນແປກປະຫລາດຂອງລີໄຮ ເຖິງພຣະຜູ້ຊ່ວຍໃຫ້ລອດ. ທ່ານຮຽນຮູ້ຫຍັງແດ່ກ່ຽວກັບພຣະເຢຊູຄຣິດ ຈາກສິ່ງທີ່ລີໄຮໄດ້ເຫັນ? ວຽກງານບາງຢ່າງທີ່ “ຍິ່ງໃຫຍ່ ແລະ ໜ້າອັດສະຈັນ” ຂອງພຣະຜູ້ຊ່ວຍໃຫ້ລອດໃນຊີວິດຂອງທ່ານ ມີແນວໃດແດ່? (1 ນີໄຟ 1:14).

1 ນີໄຟ 2

ເມື່ອເຮົາສະແຫວງຫາ ແລະ ໄວ້ວາງໃຈໃນພຣະຜູ້ເປັນເຈົ້າ, ແລ້ວພຣະອົງຈະສາມາດເຮັດໃຫ້ໃຈຂອງເຮົາອ່ອນລົງ.

ເຖິງແມ່ນວ່າ ເລມັນ, ເລມູເອນ, ແລະ ນີໄຟ ທັງສາມໄດ້ເຕີບໃຫຍ່ຂຶ້ນຢູ່ໃນຄອບຄົວດຽວກັນ ແລະ ເຄີຍມີປະສົບການທີ່ຄ້າຍຄືກັນ, ແຕ່ກໍມີຄວາມແຕກຕ່າງກັນຫລາຍໃນເລື່ອງທີ່ເຂົາເຈົ້າຕອບຮັບການຊີ້ນຳຈາກສະຫວັນ ທີ່ບິດາຂອງເຂົາເຈົ້າໄດ້ຮັບ ຢູ່ໃນບົດນີ້. ຂະນະທີ່ທ່ານອ່ານ 1 ນີໄຟ 2, ທ່ານສາມາດບອກໄດ້ບໍວ່າ ເປັນຫຍັງໃຈຂອງນີໄຟຈຶ່ງອ່ອນລົງ ຂະນະທີ່ໃຈຂອງພວກອ້າຍຂອງເພິ່ນແຂງກະດ້າງ. ທ່ານອາດຄິດກ່ຽວກັບຄຳຕອບຂອງທ່ານເອງນຳອີກ ຕໍ່ການຊີ້ນຳຈາກພຣະຜູ້ເປັນເຈົ້າ, ບໍ່ວ່າຈະເປັນຜ່ານທາງພຣະວິນຍານບໍລິສຸດ ຫລື ສາດສະດາຂອງພຣະອົງ. ເມື່ອໃດທີ່ທ່ານຮູ້ສຶກວ່າ ພຣະຜູ້ເປັນເຈົ້າໄດ້ເຮັດໃຫ້ໃຈຂອງທ່ານອ່ອນລົງ ເພື່ອວ່າທ່ານຈະຮັບເອົາການຊີ້ນຳ ແລະ ຄຳແນະນຳຂອງພຣະອົງ ດ້ວຍຄວາມເຕັມໃຈ ຫລາຍກວ່າເກົ່າ?

1 ນີໄຟ 3–4

ພຣະເຈົ້າຈະຕຽມທາງໃຫ້ເຮົາເພື່ອເຮັດຕາມພຣະປະສົງຂອງພຣະອົງ.

ເມື່ອພຣະຜູ້ເປັນເຈົ້າໄດ້ບັນຊາລີໄຮ ແລະ ຄອບຄົວຂອງເພິ່ນ ໃຫ້ໄປເອົາແຜ່ນຈາລຶກທອງເຫລືອງຈາກລາບານ, ພຣະອົງບໍ່ໄດ້ໃຫ້ຄຳແນະນຳໃດໜຶ່ງໂດຍສະເພາະ ເຖິງວິທີທີ່ຈະບັນລຸພຣະບັນຍັດຂໍ້ນີ້. ສ່ວນຫລາຍມັນຊິເປັນແບບນີ້ແທ້ໆກັບພຣະບັນຍັດຂໍ້ອື່ນໆ ຫລື ການເປີດເຜີຍສ່ວນຕົວ ທີ່ເຮົາໄດ້ຮັບຈາກພຣະເຈົ້າ, ແລະ ສິ່ງນີ້ອາດເຮັດໃຫ້ເຮົາຮູ້ສຶກວ່າ ພຣະອົງຮຽກຮ້ອງ “ເລື່ອງຍາກ” (1 ນີໄຟ 3:5). ສິ່ງໃດທີ່ດົນໃຈທ່ານກ່ຽວກັບການຕອບຮັບຂອງນີໄຟ ຕໍ່ພຣະບັນຊາຂອງພຣະຜູ້ເປັນເຈົ້າ, ທີ່ພົບເຫັນໃນ 1 ນີໄຟ 3:7, 15–16? ມີຫຍັງບໍທີ່ດົນໃຈທ່ານໃຫ້ “ໄປ ແລະ ເຮັດ”?

ຂະນະທີ່ທ່ານອ່ານ 1 ນີໄຟ 1–7, ໃຫ້ຊອກຫາວິທີທີ່ພຣະເຈົ້າໄດ້ຕຽມທາງໃຫ້ລີໄຮ ແລະ ຄອບຄົວຂອງເພິ່ນ. ພຣະອົງໄດ້ກະທຳສິ່ງນີ້ສຳລັບທ່ານແນວໃດ?

ເບິ່ງ ສຸພະສິດ 3:5–6; 1 ນີໄຟ 17:3 ນຳອີກ.

1 ນີໄຟ 4:1–3; 5:1–8; 7:6–21

ການຈື່ຈຳວຽກງານຂອງພຣະເຈົ້າ ສາມາດເຮັດໃຫ້ເຮົາມີສັດທາທີ່ຈະເຊື່ອຟັງພຣະບັນຍັດຂອງພຣະອົງ.

ເມື່ອເລມັນ ແລະ ເລມູເອນ ຮູ້ສຶກຢາກຈົ່ມ, ທຳມະດາແລ້ວ ເຂົາເຈົ້າມີນີໄຟ ແລະ ລີໄຮຢູ່ໃກ້ ເພື່ອຊຸກຍູ້ ແລະ ຕັກເຕືອນເຂົາເຈົ້າ. ເມື່ອທ່ານຮູ້ສຶກຢາກຈົ່ມ, ການອ່ານຖ້ອຍຄຳຂອງນີໄຟ ແລະ ລີໄຮ ສາມາດໃຫ້ຄຳແນະນຳ ແລະ ທັດສະນະທີ່ມີຄ່າໄດ້. ນີໄຟ ແລະ ລີໄຮໄດ້ພະຍາຍາມຊ່ວຍສະມາຊິກໃນຄອບຄົວຂອງພວກເພິ່ນ ເພື່ອສ້າງສັດທາໃນພຣະເຈົ້າ ແນວໃດແດ່? (ເບິ່ງ 1 ນີໄຟ 4:1–3; 5:1–8; 7:6–21). ທ່ານຮຽນຮູ້ຫຍັງແດ່ຈາກຕົວຢ່າງຂອງພວກເພິ່ນ ທີ່ສາມາດຊ່ວຍທ່ານໃນເທື່ອໜ້າ ເມື່ອທ່ານຄິດຢາກຈົ່ມ ຫລື ຢາກກະບົດ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

1 ນີໄຟ 1–7

ຕະຫລອດທົ່ວ 1 ນີໄຟ 1–7, ທ່ານສາມາດຊຸກຍູ້ສະມາຊິກໃນຄອບຄົວ ໃຫ້ສັງເກດເບິ່ງວ່າ ສະມາຊິກໃນຄອບຄົວຂອງລີໄຮ ແລະ ຊາໄຣຢາ ປະຕິບັດຕໍ່ກັນແນວໃດ. ເຮົາຮຽນຮູ້ຫຍັງແດ່ຈາກຄວາມສຳພັນເຫລົ່ານີ້ ທີ່ສາມາດຊ່ວຍຄອບຄົວຂອງເຮົາ?

ນີໄຟ ແລະ ຄອບຄົວຂອງເພິ່ນນັບຖືຖ້ອຍຄຳຂອງສາດສະດາ.

1 ນີໄຟ 2:20

ຫລັກທຳຢູ່ໃນ 1 ນີໄຟ 2:20 ຖືກອ້າງເຖິງເລື້ອຍໆຕະຫລອດທົ່ວພຣະຄຳພີມໍມອນ. ສະມາຊິກໃນຄອບຄົວຂອງທ່ານຈະສາມາດນຳໃຊ້ມັນກັບຊີວິດຂອງເຂົາເຈົ້າ ໃນຂະນະທີ່ພວກທ່ານສຶກສາພຣະຄຳພີມໍມອນນຳກັນ ໃນປີນີ້ແນວໃດ? ບາງທີພວກທ່ານຄວນເຮັດໂປສເຕີ້ນຳກັນ ທີ່ກ່າວເຖິງຄຳສັນຍາຂອງພຣະຜູ້ເປັນເຈົ້າ ຢູ່ໃນຂໍ້ນີ້ ແລະ ສະແດງມັນຢູ່ໃນເຮືອນຂອງພວກທ່ານ. ມັນສາມາດເປັນສິ່ງເຕືອນໃຈ ທີ່ຈະສົນທະນາກັນເປັນບາງຄັ້ງ ເຖິງວິທີທີ່ພວກທ່ານໄດ້ເຫັນພຣະຜູ້ເປັນເຈົ້າຊ່ວຍໃຫ້ຄອບຄົວຂອງພວກທ່ານຮຸ່ງເຮືອງຂຶ້ນ ເມື່ອພວກທ່ານຮັກສາພຣະບັນຍັດຂອງພຣະອົງ. ໃຫ້ຄິດທີ່ຈະຈົດປະສົບການເຫລົ່ານີ້ ໃສ່ໃນໂປສເຕີ້.

1 ນີໄຟ 2:11–13; 3:5–7

ບາງທີຄອບຄົວຂອງທ່ານອາດໄດ້ຮັບຜົນປະໂຫຍດຈາກການສັງເກດເຫັນຄວາມແຕກຕ່າງຂອງການຕອບຮັບ ຂອງເລມັນກັບເລມູເອນ ແລະ ການຕອບຮັບຂອງນີໄຟ ຕໍ່ພຣະບັນຊາຂອງພຣະຜູ້ເປັນເຈົ້າ. ເຮົາສາມາດຮຽນຮູ້ຫຍັງແດ່ຈາກ 1 ນີໄຟ 2:11–13; 3:5–7 ກ່ຽວກັບການເວົ້າຈົ່ມ? ເຮົາຈະໄດ້ຮັບພອນຢ່າງໃດແດ່ ເມື່ອເຮົາໃຊ້ສັດທາ?

1 ນີໄຟ 3:19–20; 5:10–22; 6

ຂໍ້ເຫລົ່ານີ້ສາມາດດົນໃຈຄອບຄົວຂອງທ່ານໃຫ້ບັນທຶກເຫດການ ແລະ ປະສົບການທີ່ສຳຄັນ ຈາກຊີວິດຂອງພວກທ່ານໄວ້. ບາງທີພວກທ່ານຄວນເລີ່ມຕົ້ນມີບັນທຶກຂອງຄອບຄົວ, ທີ່ຄ້າຍຄືກັນກັບບັນທຶກທີ່ນີໄຟ ແລະ ລີໄຮມີ ກ່ຽວກັບປະສົບການຂອງຄອບຄົວຂອງພວກເພິ່ນ. ທ່ານຈະຮ່ວມຫຍັງແດ່ໄວ້ໃນບັນທຶກຂອງຄອບຄົວ?

1 ນີໄຟ 7:19–21

ແມ່ນຫຍັງທີ່ປະທັບໃຈເຮົາ ກ່ຽວກັບຕົວຢ່າງຂອງນີໄຟ ຢູ່ໃນຂໍ້ເຫລົ່ານີ້? ຄອບຄົວຂອງເຮົາໄດ້ຮັບພອນແນວໃດ ເມື່ອເຮົາ “ຍົກໂທດໃຫ້ [ກັນແລະກັນ] ຢ່າງເຕັມໃຈ”?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສິດສອນຂອງເຮົາ

ສຶກສາພຣະຄຳພີຢ່າງສະໝ່ຳສະເໝີ. ສິ່ງສຳຄັນຢ່າງໜຶ່ງທີ່ມີຄວາມໝາຍ ໃນການສິດສອນຢູ່ໃນບ້ານ ແມ່ນການຫາໂອກາດ ເພື່ອຮຽນຮູ້ຢ່າງສະໝ່ຳສະເໝີ ສຳລັບຄອບຄົວຂອງທ່ານ. ປະທານທອມມັສ ແອັສ ມອນສັນ ໄດ້ສອນວ່າ, “ການສຶກສາຢ່າງເອົາຈິງເອົາຈັງເປັນເວລາສັ້ນໆຈະບໍ່ມີປະໂຫຍດເທົ່າກັບການສຶກສາທຸກໆມື້ ແລະ ການນຳໃຊ້ຂໍ້ພຣະຄຳພີໃນຊີວິດຂອງເຮົາ” (“Be Your Best Self,” Ensign ຫລື Liahona, May 2009, 68).