“ວັນທີ 13–19 ເດືອນມັງກອນ. 1 ນີໄຟ 8–10: ‘ໄດ້ຮັບສ່ວນໝາກໄມ້,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 13–19 ເດືອນມັງກອນ. 1 ນີໄຟ 8–10,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ພາບນິມິດຂອງລີໄຮກ່ຽວກັບຕົ້ນໄມ້ແຫ່ງຊີວິດ

Lehi’s Dream [ຄວາມຝັນຂອງລີໄຮ], ໂດຍ ສະຕີບເວັນ ຫລອຍ ນຽວ

ວັນທີ 13–19 ເດືອນມັງກອນ

1 ນີໄຟ 8–10

“ໄດ້ຮັບສ່ວນໝາກໄມ້”

ຂະນະທີ່ທ່ານອ່ານ 1 ນີໄຟ 8–10, ໃຫ້ພິຈາລະນາສິ່ງທີ່ຂ່າວສານຂອງພາບນິມິດຂອງລີໄຮ ກ່ຽວຂ້ອງກັບທ່ານແນວໃດ. ໃຫ້ບັນທຶກຄວາມປະທັບໃຈທາງວິນຍານທີ່ທ່ານໄດ້ຮັບ ໄວ້ໃນພຣະຄຳພີ, ປຶ້ມບັນທຶກ, ຫລື ແຫລ່ງຊ່ວຍເຫລືອເຫລັ້ມນີ້ຂອງທ່ານ.

ບັນທຶກຄວາມປະທັບໃຈຂອງທ່ານ

ຄວາມຝັນຂອງລີໄຮ—ພ້ອມທັງຮາວເຫລັກ, ໝອກແຫ່ງຄວາມມືດ, ອາຄານໃຫຍ່ ແລະ ກວ້າງຂວາງ, ແລະ ຕົ້ນໄມ້ ກັບໝາກທີ່ “ຫວານທີ່ສຸດ”—ເປັນການເຊື້ອເຊີນທີ່ດົນໃຈ ໃຫ້ຮັບເອົາພອນແຫ່ງຄວາມຮັກ ແລະ ການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດ. ເຖິງຢ່າງໃດກໍຕາມ, ສຳລັບລີໄຮແລ້ວ ພາບນິມິດນີ້ແມ່ນກ່ຽວກັບຄອບຄົວຂອງເພິ່ນນຳອີກ: “ເພາະສິ່ງທີ່ພໍ່ເຫັນ, ພໍ່ຈຶ່ງມີເຫດຜົນທີ່ຈະປິຕິຍິນດີໃນພຣະຜູ້ເປັນເຈົ້າ ຍ້ອນນີໄຟ ແລະ ແຊມນຳອີກ. … ແຕ່ ຈົ່ງເບິ່ງ, ຍ້ອນພວກເຈົ້າ, ເລມັນ ແລະ ເລມູເອນ, ພໍ່ຈຶ່ງຢ້ານກົວຢ່າງຍິ່ງ” (1 ນີໄຟ 8:3–4). ເມື່ອລີໄຮໄດ້ເລົ່າພາບນິມິດຂອງເພິ່ນຈົບແລ້ວ, ເພິ່ນໄດ້ຂໍໃຫ້ເລມັນກັບເລມູເອນ “ເຊື່ອຟັງຄຳຂອງເພິ່ນ, ເພື່ອພຣະຜູ້ເປັນເຈົ້າອາດຈະເມດຕາ ແລະ ບໍ່ປະຖິ້ມພວກເຂົາ” (1 ນີໄຟ 8:37). ເຖິງແມ່ນຖ້າຫາກທ່ານໄດ້ສຶກສາພາບນິມິດຂອງລີໄຮຫລາຍເທື່ອແລ້ວ, ແຕ່ເທື່ອນີ້ ໃຫ້ຄິດຄືກັນກັບທີ່ລີໄຮໄດ້ຄິດ—ຄິດເຖິງບາງຄົນທີ່ທ່ານຮັກ. ເມື່ອທ່ານເຮັດເຊັ່ນນັ້ນ, ຄວາມໝັ້ນຄົງຂອງຮາວເຫລັກ, ສິ່ງອັນຕະລາຍຂອງອາຄານໃຫຍ່ ແລະ ກວ້າງຂວາງ, ແລະ ຄວາມຫວານຂອງໝາກໄມ້ ຈະມີຄວາມໝາຍໃໝ່. ແລະ ທ່ານຈະເຂົ້າໃຈຢ່າງເລິກຊຶ້ງຫລາຍຂຶ້ນ ເຖິງ “ຄວາມຮູ້ສຶກທັງໝົດຂອງບິດາທີ່ປານີ” ຜູ້ໄດ້ຮັບພາບນິມິດທີ່ແປກປະຫລາດນັ້ນ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

1 ນີໄຟ 8

ພຣະຄຳຂອງພຣະເຈົ້ານຳພາເຮົາໄປຫາພຣະຜູ້ຊ່ວຍໃຫ້ລອດ ແລະ ຊ່ວຍເຮົາໃຫ້ຮູ້ສຶກເຖິງຄວາມຮັກຂອງພຣະອົງ.

ພາບນິມິດຂອງລີໄຮສະເໜີຄຳເຊື້ອເຊີນໃຫ້ຄຳນຶງວ່າ ເຮົາຢູ່ໃສ—ແລະ ເຮົາຈະໄປໃສ—ໃນການເດີນທາງສ່ວນຕົວຂອງເຮົາ ເພື່ອຈະໄດ້ຮູ້ຈັກພຣະຜູ້ຊ່ວຍໃຫ້ລອດ ແລະ ຮູ້ສຶກເຖິງຄວາມຮັກຂອງພຣະອົງ. ປະທານບອຍ ເຄ ແພ໊ກເກີ ໄດ້ສິດສອນວ່າ: “ທ່ານອາດຄິດວ່າ ຄວາມຝັນ ແລະ ພາບນິມິດຂອງລີໄຮ ບໍ່ມີຄວາມໝາຍພິເສດສຳລັບທ່ານ, ແຕ່ມັນມີ. ທ່ານຢູ່ໃນນັ້ນ; ເຮົາທຸກຄົນຢູ່ໃນນັ້ນ (ເບິ່ງ 1 ນີໄຟ 19:23). ຄວາມຝັນ ຫລື ພາບນິມິດຂອງລີໄຮ ກ່ຽວກັບຮາວເຫລັກ ມີທຸກສິ່ງໃນນັ້ນ … ໄພ່ພົນຍຸກສຸດທ້າຍຕ້ອງເຂົ້າໃຈການທົດສອບຂອງຊີວິດ” (“Lehi’s Dream and You,” New Era, Jan. 2015, 2).

ວິທີໜຶ່ງທີ່ຈະສຶກສາ 1 ນີໄຟ 8 ອາດເປັນການປະກອບແຜນຜັງ ຄືກັນກັບຕົວຢ່າງທີ່ສະແດງຢູ່ບ່ອນນີ້. ເພື່ອຈະເຂົ້າໃຈຄວາມໝາຍຂອງເຄື່ອງໝາຍຕ່າງໆ, ມັນຈະຊ່ວຍໄດ້ຫລາຍ ຖ້າທ່ານອ່ານເບິ່ງພາບນິມິດທີ່ນີໄຟໄດ້ຮັບ ຕອນເພິ່ນໄດ້ອະທິຖານຂໍຄວາມເຂົ້າໃຈກ່ຽວກັບພາບນິມິດຂອງບິດາຂອງເພິ່ນ—ເບິ່ງ 1 ນີໄຟ 11:4–25, 32–36; 12:16–18; ແລະ 15:21–33, 36 ໂດຍສະເພາະ. ຂະນະທີ່ທ່ານສຶກສາພາບນິມິດຂອງລີໄຮ, ໃຫ້ພິຈາລະນາສິ່ງທີ່ພຣະຜູ້ເປັນເຈົ້າປະສົງໃຫ້ທ່ານຮຽນຮູ້.

ເຄື່ອງໝາຍຈາກພາບນິມິດຂອງລີໄຮ	ຄວາມໝາຍ	ຄຳຖາມໃຫ້ໄຕ່ຕອງ
ເຄື່ອງໝາຍຈາກພາບນິມິດຂອງລີໄຮ ຕົ້ນໄມ້ ແລະ ໝາກຂອງມັນ (1 ນີໄຟ 8:10–12)	ຄວາມໝາຍ	ຄຳຖາມໃຫ້ໄຕ່ຕອງ ເຮົາຈະເຮັດສິ່ງໃດ ເພື່ອເຊື້ອເຊີນຄົນອື່ນໃຫ້ມາຮັບເອົາຄວາມຮັກຂອງພຣະເຈົ້າ?
ເຄື່ອງໝາຍຈາກພາບນິມິດຂອງລີໄຮ ແມ່ນ້ຳ (1 ນີໄຟ 8:13)	ຄວາມໝາຍ	ຄຳຖາມໃຫ້ໄຕ່ຕອງ
ເຄື່ອງໝາຍຈາກພາບນິມິດຂອງລີໄຮ ຮາວເຫລັກ (1 ນີໄຟ 8:19–20, 30)	ຄວາມໝາຍ	ຄຳຖາມໃຫ້ໄຕ່ຕອງ
ເຄື່ອງໝາຍຈາກພາບນິມິດຂອງລີໄຮ ໝອກແຫ່ງຄວາມມືດ (1 ນີໄຟ 8:23)	ຄວາມໝາຍ	ຄຳຖາມໃຫ້ໄຕ່ຕອງ
ເຄື່ອງໝາຍຈາກພາບນິມິດຂອງລີໄຮ ອາຄານໃຫຍ່ ແລະ ກວ້າງຂວາງ (1 ນີໄຟ 8:26–27, 33)	ຄວາມໝາຍ	ຄຳຖາມໃຫ້ໄຕ່ຕອງ
ເຄື່ອງໝາຍຈາກພາບນິມິດຂອງລີໄຮ	ຄວາມໝາຍ	ຄຳຖາມໃຫ້ໄຕ່ຕອງ

ເບິ່ງ David A. Bednar, “Lehi’s Dream: Holding Fast to the Rod,” Ensign ຫລື Liahona, Oct. 2011, 33–37 ນຳອີກ.

ລີໄຮກິນໝາກໄມ້ຈາກຕົ້ນໄມ້ແຫ່ງຊີວິດ. Tree of Life [ຕົ້ນໄມ້ແຫ່ງຊີວິດ], ໂດຍ ມາກັສ ອາລານ ວິນເຊັນ

1 ນີໄຟ 9

ເປັນຫຍັງນີໄຟຈຶ່ງເຮັດແຜ່ນຈາລຶກສອງຊຸດ?

“ຈຸດປະສົງອັນສະຫລາດ” ຂອງພຣະຜູ້ເປັນເຈົ້າ ໃນການໃຫ້ນີໄຟເຮັດບັນທຶກສອງຊຸດ ໄດ້ໃຫ້ຄວາມແຈ່ມແຈ້ງ ຫລາຍສັດຕະວັດຫລັງຈາກນັ້ນ. ຫລັງຈາກໂຈເຊັບ ສະມິດ ໄດ້ແປຕົ້ນສະບັບຂອງພຣະຄຳພີມໍມອນ 116 ໜ້າ, ແລ້ວເພິ່ນໄດ້ມອບມັນໃຫ້ມາຕິນ ແຮຣິສ, ຜູ້ໄດ້ເຮັດມັນເສຍ (ເບິ່ງ ຄ&ພ 10:1–23). ແຕ່ແຜ່ນຈາລຶກຊຸດທີສອງຂອງນີໄຟ ໄດ້ກ່າວເຖິງຊ່ວງໄລຍະດຽວກັນ, ແລະ ພຣະຜູ້ເປັນເຈົ້າໄດ້ບັນຊາໂຈເຊັບ ສະມິດ ໃຫ້ແປແຜ່ນຈາລຶກເຫລົ່ານີ້ ແທນທີ່ຈະກັບຄືນໄປແປສິ່ງທີ່ເສຍໄປນັ້ນ (ເບິ່ງ ຄ&ພ 10:38–45).

ສຳລັບລາຍລະອຽດເພີ່ມເຕີມກ່ຽວກັບແຜ່ນຈາລຶກ ທີ່ກ່າວເຖິງຢູ່ໃນ 1 ນີໄຟ 9, ໃຫ້ເບິ່ງ “ບົດວິເຄາະໂດຍຫຍໍ້ກ່ຽວກັບພຣະຄຳພີມໍມອນ”; 1 ນີໄຟ 19:1–5; 2 ນີໄຟ 5:29–32; ແລະ ຄຳຂອງມໍມອນ 1:3–9.

1 ນີໄຟ 10:2–16

ສາດສະດາໃນສະໄໝບູຮານຮູ້ເຖິງພາລະກິດຂອງພຣະເຢຊູຄຣິດ ແລະ ໄດ້ເປັນພະຍານເຖິງພຣະອົງ.

ເລື່ອງລາວກ່ຽວກັບພາບນິມິດຂອງລີໄຮ ໄດ້ສ້າງຄວາມປະທັບໃຈໃຫ້ກັບຄອບຄົວຂອງເພິ່ນ, ແຕ່ເພິ່ນຍັງມີຄວາມຈິງນິລັນດອນຢ່າງອື່ນອີກ ທີ່ຈະສິດສອນເຂົາເຈົ້າກ່ຽວກັບພາລະກິດຂອງພຣະຜູ້ຊ່ວຍໃຫ້ລອດ. ຂະນະທີ່ທ່ານອ່ານ 1 ນີໄຟ 10:2–16, ໃຫ້ຄິດກ່ຽວກັບວ່າ ເປັນຫຍັງພຣະຜູ້ເປັນເຈົ້າຈຶ່ງປະສົງໃຫ້ຄອບຄົວຂອງລີໄຮ—ແລະ ເຮົາທຸກຄົນ—ຮູ້ຄວາມຈິງເຫລົ່ານີ້. ໃຫ້ພິຈາລະນາສິ່ງທີ່ທ່ານສາມາດບອກຄົນທີ່ທ່ານຮັກ ເພື່ອເຊື້ອເຊີນເຂົາເຈົ້າໃຫ້ຫັນມາຫາພຣະຜູ້ຊ່ວຍໃຫ້ລອດ. ຫລັງຈາກໄດ້ສຶກສາພາບນິມິດ ແລະ ຄຳສອນຂອງລີໄຮແລ້ວ, ເຊັ່ນດຽວກັນກັບນີໄຟ, ທ່ານໄດ້ຮັບການດົນໃຈໃຫ້ຮຽນຮູ້ສິ່ງໃດ “ໂດຍອຳນາດຂອງພຣະວິນຍານບໍລິສຸດ”? (1 ນີໄຟ 10:17).

1 ນີໄຟ 10:17–19

ພຣະເຈົ້າຈະເປີດເຜີຍຄວາມຈິງຕໍ່ເຮົາ ຖ້າຫາກເຮົາສະແຫວງຫາການເປີດເຜີຍຢ່າງພາກພຽນ.

ທ່ານຈະຕອບຮັບແນວໃດ ເມື່ອທ່ານພົບເຫັນຫລັກທຳພຣະກິດຕິຄຸນ ທີ່ທ່ານບໍ່ເຂົ້າໃຈ? ໃຫ້ສັງເກດເບິ່ງຄວາມແຕກຕ່າງລະຫວ່າງວິທີທີ່ນີໄຟໄດ້ຕອບຮັບຕໍ່ພາບນິມິດຂອງລີໄຮ (ເບິ່ງ 1 ນີໄຟ 10:17–19; 11:1) ແລະ ວິທີທີ່ເລມັນກັບເລມູເອນຕອບຮັບ (ເບິ່ງ 1 ນີໄຟ 15:1–10). ເປັນຫຍັງເຂົາເຈົ້າຈຶ່ງຕອບຮັບໃນວິທີເຫລົ່ານີ້, ແລະ ແມ່ນຫຍັງຄືຜົນຂອງການຕອບຮັບຂອງເຂົາເຈົ້າ?

ໃຫ້ຄິດທີ່ຈະຂຽນກ່ຽວກັບເວລາທີ່ທ່ານຢາກຮູ້ຈັກວ່າ ຄຳສອນຂອງພຣະກິດຕິຄຸນເປັນຄວາມຈິງຫລືບໍ່. ຂັ້ນຕອນທີ່ທ່ານເຮັດຕາມເປັນຈັ່ງໃດ ເມື່ອປຽບທຽບໃສ່ກັບຂັ້ນຕອນທີ່ນີໄຟໄດ້ເຮັດ?

ເບິ່ງ 1 ນີໄຟ 2:11–19; ຄຳສອນ ແລະ ພັນທະສັນຍາ 8:1–3 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

1 ນີໄຟ 8

ສະມາຊິກໃນຄອບຄົວຂອງທ່ານອາດມັກການສະແດງບົດບາດກ່ຽວກັບພາບນິມິດຂອງລີໄຮ ຫລື ແຕ້ມຮູບ ແລະ ໃຊ້ຮູບພາບຂອງເຂົາເຈົ້າ ເພື່ອບອກກ່ຽວກັບພາບນິມິດ. ຫລື ທ່ານສາມາດສະແດງຮູບພາບທີ່ບັນຍາຍເຖິງພາບນິມິດຂອງລີໄຮກໍໄດ້ ທີ່ມີຢູ່ໃນບົດຮຽນນີ້ ແລະ ເຊື້ອເຊີນສະມາຊິກໃນຄອບຄົວໃຫ້ຊີ້ບອກຂໍ້ປີກຍ່ອຍ ແລະ ຊອກຫາຂໍ້ພຣະຄຳພີທີ່ບັນຍາຍເຖິງສິ່ງທີ່ມັນເປັນຕົວແທນໃຫ້. ທ່ານກໍສາມາດເບິ່ງວິດີໂອນຳອີກ ທີ່ບັນຍາຍເຖິງພາບນິມິດຂອງລີໄຮ (ເບິ່ງ ວິດີໂອກ່ຽວກັບພຣະຄຳພີມໍມອນ ຢູ່ທີ່ ChurchofJesusChrist.org ຫລື ແອພ ຫ້ອງສະໝຸດພຣະກິດຕິຄຸນ).

1 ນີໄຟ 8:10–16

ມີໃຜແດ່ທີ່ເຮົາສາມາດເຊື້ອເຊີນໃຫ້ເຂົ້າມາໃກ້ພຣະເຢຊູຄຣິດຫລາຍກວ່າເກົ່າ ແລະ ຮູ້ສຶກເຖິງຄວາມຮັກທີ່ຫວານຊື່ນຂອງພຣະອົງ? ເຮົາຈະເຮັດສິ່ງໃດ ເພື່ອ “[ຮ້ອງ] ຫາພວກເຂົາ”?

1 ນີໄຟ 9:5–6

ມີຕອນໃດແດ່ທີ່ເຮົາໄດ້ເຮັດຕາມພຣະບັນຍັດ ໂດຍທີ່ບໍ່ເຂົ້າໃຈເຫດຜົນຢ່າງຄັກແນ່? ເຮົາໄດ້ຮັບພອນແນວໃດ?

1 ນີໄຟ 10:20–22

ການເປິເປື້ອນທາງຮ່າງກາຍ ຄ້າຍຄືກັນກັບການເປິເປື້ອນທາງວິນຍານແນວໃດ? ເຮົາຈະສາມາດເຮັດຫຍັງໄດ້ແດ່ ເພື່ອໃຫ້ແນ່ໃຈວ່າ ເຮົາຈະສະອາດທາງວິນຍານຢູ່ເໝືອນເດີມ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສິດສອນຂອງເຮົາ

ພຣະຄຳພີກ່ຽວພັນກັບຊີວິດຂອງເຮົາແນວໃດ? ຫລັງຈາກໄດ້ອ່ານຂໍ້ພຣະຄຳພີແລ້ວ, ໃຫ້ເຊື້ອເຊີນສະມາຊິກໃນຄອບຄົວແບ່ງປັນວິທີທີ່ຂໍ້ພຣະຄຳພີກ່ຽວພັນກັບເຂົາເຈົ້າແນວໃດ. ຍົກຕົວຢ່າງ, ເມື່ອສະມາຊິກໃນຄອບຄົວຂອງທ່ານອ່ານ 1 ນີໄຟ 8:33, ເຂົາເຈົ້າສາມາດເວົ້າລົມກັນກ່ຽວກັບວິທີທີ່ຈະບໍ່ເອົາໃຈໃສ່ກັບຜູ້ຄົນທີ່ “ຊີ້ມືເຍາະເຍີ້ຍ.”