“ວັນທີ 20–26 ເດືອນມັງກອນ. 1 ນີໄຟ 11–15: ‘ມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 20–26 ເດືອນມັງກອນ. 1 ນີໄຟ 11–15,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ຜູ້ຄົນກຳລັງກິນໝາກໄມ້ຈາກຕົ້ນໄມ້ແຫ່ງຊີວິດ

Sweeter Than All Sweetness [ຫວານກວ່າຄວາມຫວານທັງໝົດ], ໂດຍ ມິແກວ ອັງແຮວ ກອນຊາເລສ໌ ໂຣເມໂຣ

ວັນທີ 20–26 ເດືອນມັງກອນ

1 ນີໄຟ 11–15

“ມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າ”

ທ່ານສາມາດເຫັນຕົວເອງຢູ່ໃນ 1 ນີໄຟ 11–15 ບໍ? ພຣະຄຳພີຂໍ້ໃດທີ່ມີຄ່າຫລາຍທີ່ສຸດຕໍ່ທ່ານ ແລະ ຄອບຄົວທ່ານ?

ບັນທຶກຄວາມປະທັບໃຈຂອງທ່ານ

ເມື່ອພຣະເຈົ້າມີວຽກງານທີ່ສຳຄັນໃຫ້ສາດສະດາຂອງພຣະອົງເຮັດ, ພຣະອົງມັກຈະມອບພາບນິມິດທີ່ສຳຄັນໃຫ້ສາດສະດາ ເພື່ອຊ່ວຍເພິ່ນໃຫ້ເຂົ້າໃຈຈຸດປະສົງຂອງພຣະເຈົ້າສຳລັບລູກໆຂອງພຣະອົງ. ໂມເຊໄດ້ເຫັນພາບນິມິດກ່ຽວກັບ “ແຜ່ນດິນໂລກນີ້, ແລະ ຜູ້ອາໄສຢູ່ໃນນັ້ນ, ແລະ ຟ້າສະຫວັນນຳອີກ” (ໂມເຊ 1:36). ອັກຄະສາວົກໂຢຮັນໄດ້ເຫັນປະຫວັດສາດຂອງໂລກ ແລະ ການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ (ເບິ່ງ ພຣະທຳພຣະນິມິດ). ໂຈເຊັບ ສະມິດ ໄດ້ເຫັນພຣະບິດາ ແລະ ພຣະບຸດ (ເບິ່ງ ໂຈເຊັບ ສະມິດ—ປະຫວັດ 1:17–18). ລີໄຮໄດ້ເຫັນພາບນິມິດທີ່ສະແດງໃຫ້ເຫັນການເດີນທາງ ທີ່ເຮົາຕ້ອງເດີນໄປຫາພຣະຜູ້ຊ່ວຍໃຫ້ລອດ ແລະ ຄວາມຮັກຂອງພຣະອົງ.

ດັ່ງທີ່ມີບັນທຶກຢູ່ໃນ 1 ນີໄຟ 11–14, ນີໄຟໄດ້ເຫັນການປະຕິບັດສາດສະໜາກິດຂອງພຣະຜູ້ຊ່ວຍໃຫ້ລອດ, ໄດ້ເຫັນລູກຫລານຂອງລີໄຮໃນອະນາຄົດ ຢູ່ໃນແຜ່ນດິນແຫ່ງຄຳສັນຍາ, ແລະ ໄດ້ເຫັນຈຸດໝາຍຂອງວຽກງານຂອງພຣະເຈົ້າ. ພາບນິມິດນີ້ຊ່ວຍກະກຽມນີໄຟສຳລັບວຽກງານທີ່ຢູ່ຕໍ່ໜ້າເພິ່ນ, ແລະ ມັນສາມາດຊ່ວຍທ່ານກະກຽມຄືກັນ—ເພາະພຣະເຈົ້າມີວຽກງານໃຫ້ທ່ານເຮັດ ຢູ່ໃນອານາຈັກຂອງພຣະອົງ. ທ່ານເປັນຜູ້ໜຶ່ງໃນບັນດາ “ໄພ່ພົນຂອງສາດສະໜາຈັກຂອງພຣະເມສານ້ອຍ” ທີ່ນີໄຟໄດ້ເຫັນ, “ຊຶ່ງກະຈັດກະຈາຍໄປຕາມຜືນແຜ່ນດິນໂລກ; ແລະ ພວກເຂົາມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າໃນລັດສະໝີພາບອັນຍິ່ງໃຫຍ່” (1 ນີໄຟ 14:14).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

1 ນີໄຟ 11

ພຣະເຈົ້າໄດ້ສົ່ງພຣະເຢຊູຄຣິດມາ ເພື່ອສະແດງໃຫ້ເຫັນເຖິງຄວາມຮັກຂອງພຣະອົງ.

ເພື່ອຊ່ວຍນີໄຟໃຫ້ເຂົ້າໃຈເຖິງຄວາມໝາຍຂອງຕົ້ນໄມ້ນັ້ນ ທີ່ບິດາຂອງເພິ່ນໄດ້ເຫັນ, ທູດອົງໜຶ່ງຈຶ່ງໄດ້ສະແດງໃຫ້ເພິ່ນເຫັນ “ພຣະບຸດຂອງພຣະບິດາຜູ້ສະຖິດນິລັນດອນ” (1 ນີໄຟ 11:21). ສິ່ງນີ້ໄດ້ເຮັດໃຫ້ນີໄຟສະຫລຸບວ່າ ຕົ້ນໄມ້ນັ້ນເປັນຕົວແທນໃຫ້ແກ່ຄວາມຮັກຂອງພຣະເຈົ້າ. ແຕ່ພາບນິມິດຍັງບໍ່ສິ້ນສຸດເທົ່ານັ້ນ. ຂະນະທີ່ທ່ານອ່ານ ແລະ ໄຕ່ຕອງ 1 ນີໄຟ 11, ທ່ານພົບເຫັນຫຍັງແດ່ທີ່ຊ່ວຍທ່ານໃຫ້ເຂົ້າໃຈວ່າ ເປັນຫຍັງພຣະເຢຊູຄຣິດ ຈຶ່ງເປັນການສະແດງອັນສຸດຍອດເຖິງຄວາມຮັກຂອງພຣະເຈົ້າ?

ເພື່ອຮຽນຮູ້ກ່ຽວກັບເຄື່ອງໝາຍຢ່າງອື່ນໆໃນຄວາມຝັນຂອງລີໄຟ, ໃຫ້ເບິ່ງ 1 ນີໄຟ 11:35–36; 12:16–18; ແລະ 15:21–30.

ເບິ່ງ ໂຢຮັນ 3:16 ນຳອີກ.

1 ນີໄຟ 12–13

ພຣະຜູ້ເປັນເຈົ້າໄດ້ກະກຽມວິທີທາງສຳລັບການຟື້ນຟູ.

ນີໄຟຈະບໍ່ມີຊີວິດຢູ່ຈົນເຫັນຫລາຍສິ່ງທີ່ເພິ່ນໄດ້ເຫັນຢູ່ໃນພາບນິມິດຂອງເພິ່ນ ເກີດເປັນຈິງ. ທ່ານຄິດວ່າເປັນຫຍັງມັນຈຶ່ງສຳຄັນຕໍ່ນີໄຟທີ່ຈະຮູ້ກ່ຽວກັບສິ່ງເຫລົ່ານີ້? ເປັນຫຍັງມັນຈຶ່ງສຳຄັນຕໍ່ ທ່ານ ທີ່ຈະຮູ້ກ່ຽວກັບສິ່ງເຫລົ່ານີ້? ບາງທີທ່ານຄວນຖາມຄຳຖາມນີ້ທຸກເທື່ອ ທີ່ທ່ານອ່ານກ່ຽວກັບບາງສິ່ງທີ່ນີໄຟໄດ້ເຫັນ ຢູ່ໃນພາບນິມິດຂອງເພິ່ນ.

ຕໍ່ໄປນີ້ແມ່ນເຫດການບາງຢ່າງ ທີ່ນີໄຟໄດ້ເຫັນ: ອະນາຄົດຂອງຜູ້ຄົນຂອງເພິ່ນ (ເບິ່ງ ບົດທີ 12), ການຕັ້ງຖິ່ນຖານຂອງຊາວອາເມຣິກາ ແລະ ການປະຕິວັດຂອງຊາວອາເມຣິກາ (ເບິ່ງ ບົດທີ 13:12–19), ການປະຖິ້ມຄວາມເຊື່ອອັນຍິ່ງໃຫຍ່ (ເບິ່ງ ບົດທີ 13:20–29), ແລະ ການຟື້ນຟູພຣະກິດຕິຄຸນ (ເບິ່ງ ບົດທີ 13:32–42).

1 ນີໄຟ 13:1–9; 14:9–11

“ສາດສະໜາຈັກໃຫຍ່ ແລະ ໜ້າກຽດຊັງ” ທີ່ນີໄຟໄດ້ເຫັນນັ້ນແມ່ນຫຍັງ?

ແອວເດີ ດາລິນ ເອັຈ ໂອກສ໌ ໄດ້ອະທິບາຍວ່າ “ສາດສະໜາຈັກໃຫຍ່ ແລະ ໜ້າກຽດຊັງ” ທີ່ນີໄຟໄດ້ບັນຍາຍ ເປັນຕົວແທນໃຫ້ແກ່ “ທິດສະດີ ຫລື ອົງການໃດໆ ທີ່ຕໍ່ຕ້ານຄວາມເຊື່ອຖືພຣະເຈົ້າ. ແລະ ‘ການເປັນຊະເລີຍ’ ທີ່ ‘ສາດສະໜາຈັກ’ ນີ້ປະສົງນຳມາສູ່ໄພ່ພົນຂອງພຣະເຈົ້າ ຈະບໍ່ແມ່ນການເປັນຊະເລີຍທາງຮ່າງກາຍ ແຕ່ເປັນຊະເລີຍໃນຄວາມຄິດຜິດ” (“Stand as Witnesses of God,” Ensign, Mar. 2015, 32).

1 ນີໄຟ 13:12

ຜູ້ຊາຍທີ່ນີໄຟໄດ້ເຫັນ ຜູ້ຊຶ່ງພຣະວິນຍານ “ກະທຳຕໍ່” ເພື່ອໃຫ້ອອກໄປ “ໃນຜືນນ້ຳອັນກວ້າງໃຫຍ່” ນັ້ນແມ່ນໃຜ?

ນີໄຟໄດ້ເຫັນວ່າ ພຣະວິນຍານບໍລິສຸດຈະດົນໃຈ ຄຣິສໂຕເຟີ ໂຄລຳບັສ ໃຫ້ເດີນທາງໄປຫາອາເມຣິກາ. ວັນທີ 14 ເດືອນມີນາ, 1493, ທ່ານໂຄລຳບັສ ໄດ້ຂຽນກ່ຽວກັບການເດີນທາງນີ້ວ່າ: “ຜົນໄດ້ຮັບທີ່ຍິ່ງໃຫຍ່ ແລະ ຍອດຍ້ຽມເຫລົ່ານີ້ ບໍ່ໄດ້ຖືວ່າ ຂ້າພະເຈົ້າເຮັດດ້ວຍຕົວເອງ … ; ໃນສິ່ງທີ່ສະຕິປັນຍາຂອງມະນຸດ ບໍ່ສາມາດເຂົ້າໃຈໄດ້, ພຣະວິນຍານຂອງພຣະເຈົ້າຈະປະທານໃຫ້ມະນຸດ, ເພາະພຣະເຈົ້າມັກຈະຮັບຟັງຄຳອະທິຖານຂອງຜູ້ຮັບໃຊ້ຂອງພຣະອົງ ຜູ້ຮັກກົດເກນຂອງພຣະອົງ ແມ່ນແຕ່ເບິ່ງຄືວ່າເປັນໄປບໍ່ໄດ້ກໍຕາມ” (The Annals of America [Encyclopedia Britannica, Inc., 1976], 1:5).

1 ນີໄຟ 13:20–42

ພຣະຄຳພີຂອງຍຸກສຸດທ້າຍໄດ້ນຳ “ຫລາຍຢ່າງທີ່ແຈ່ມແຈ້ງ ແລະ ມີຄ່າ” ກັບຄືນມາ.

ນີໄຟໄດ້ເຫັນຢູ່ໃນພາບນິມິດວ່າ ພຣະຄຣິສຕະທຳຄຳພີ—ຊຶ່ງເພິ່ນໄດ້ບັນຍາຍວ່າເປັນ “ບັນທຶກຂອງຊາວຢິວ”—ຈະມີ “ຫລາຍຢ່າງທີ່ແຈ່ມແຈ້ງ ແລະ ມີຄ່າຖືກເອົາໄປຈາກ [ມັນ]” (1 ນີໄຟ 13:23, 28). ເຖິງຢ່າງໃດກໍຕາມ, ເພິ່ນກໍຍັງໄດ້ເຫັນວ່າ ພຣະເຈົ້າໄດ້ນຳສິ່ງເຫລົ່ານີ້ກັບຄືນມາ “ໜັງສືເຫລັ້ມອື່ນ”—ນັ້ນຄື ພຣະຄຳພີມໍມອນ ແລະ ພຣະຄຳພີເຫລັ້ມອື່ນໆຂອງຍຸກສຸດທ້າຍ (ເບິ່ງ 1 ນີໄຟ 13:39–40). ມີຄວາມຈິງທີ່ມີຄ່າຢ່າງໃດແດ່ທີ່ພຣະຄຳພີມໍມອນຊ່ວຍເຮົາໃຫ້ເຂົ້າໃຈຫລາຍຂຶ້ນ? ຊີວິດຂອງທ່ານແຕກຕ່າງໄປແນວໃດເພາະຫລາຍຢ່າງທີ່ແຈ່ມແຈ້ງ ແລະ ມີຄ່າ ທີ່ໄດ້ຖືກນຳກັບຄືນມາ?

ພຣະຄຳພີມໍມອນໄດ້ຟື້ນຟູຄວາມຈິງຂອງພຣະກິດຕິຄຸນ ທີ່ໄດ້ສູນເສຍໄປລະຫວ່າງການປະຖິ້ມຄວາມເຊື່ອ.

ເບິ່ງ “Plain and Precious Truths,” Ensign, Mar. 2008, 68–73; Russell M. Nelson, “The Book of Mormon: What Would Your Life Be Like without It?” Ensign ຫລື Liahona, Nov. 2017, 60–63 ນຳອີກ.

1 ນີໄຟ 15:1–11

ພຣະຜູ້ເປັນເຈົ້າຈະຕອບເຮົາ ຖ້າຫາກເຮົາທູນຖາມດ້ວຍສັດທາ ດ້ວຍໃຈທີ່ອ່ອນໂຍນ.

ທ່ານເຄີຍຮູ້ສຶກວ່າ ທ່ານບໍ່ໄດ້ຮັບການເປີດເຜີຍສ່ວນຕົວບໍ—ວ່າພຣະເຈົ້າບໍ່ໄດ້ກ່າວກັບທ່ານ? ນີໄຟໄດ້ໃຫ້ຄຳແນະນຳຢ່າງໃດແດ່ກັບພວກອ້າຍຂອງເພິ່ນ ເມື່ອເຂົາເຈົ້າຮູ້ສຶກເຊັ່ນນີ້? ທ່ານຈະສາມາດນຳໃຊ້ຄຳແນະນຳຂອງນີໄຟໃນຊີວິດຂອງທ່ານແນວໃດ, ແລະ ທ່ານຈະສາມາດໃຊ້ຄຳແນະນຳຂອງເພິ່ນ ເພື່ອຊ່ວຍຄົນອື່ນແນວໃດ?

ເບິ່ງ ຢາໂຄບ 4:8; ແອວມາ 5:46; 26:21–22 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

1 ນີໄຟ 11–14

ຂະນະທີ່ຄອບຄົວຂອງທ່ານອ່ານບົດເຫລົ່ານີ້, ໃຫ້ຢຸດເປັນບາງຄັ້ງ ແລະ ຖາມຄຳຖາມເຫລົ່ານີ້: ນີໄຟໄດ້ເຫັນຫຍັງແດ່ຢູ່ໃນພາບນິມິດຂອງເພິ່ນ ທີ່ເຮັດໃຫ້ເພິ່ນດີໃຈ? ແມ່ນຫຍັງທີ່ເຮັດໃຫ້ເພິ່ນໂສກເສົ້າ? ເປັນຫຍັງ?

1 ນີໄຟ 13:20–42

ເພື່ອຊ່ວຍສະມາຊິກໃນຄອບຄົວໃຫ້ເຂົ້າໃຈຄຸນຄ່າຂອງຄວາມທີ່ “ແຈ່ມແຈ້ງ ແລະ ມີຄ່າ” ໃນພຣະຄຳພີມໍມອນ, ໃຫ້ປຽບທຽບຂ່າວສານທີ່ຖືກຂຽນໄວ້ຢ່າງແຈ່ມແຈ້ງ ກັບຂ່າວສານທີ່ຖືກຕັດເປັນຕ່ອນໆ. ເປັນຫຍັງພຣະບິດາເທິງສະຫວັນຈຶ່ງປະສົງໃຫ້ຄວາມຈິງຂອງພຣະອົງ ຖືກສິດສອນຢ່າງແຈ່ມແຈ້ງ? ສະມາຊິກໃນຄອບຄົວສາມາດສະແດງປະຈັກພະຍານກ່ຽວກັບຄວາມຈິງບາງຢ່າງທີ່ “ແຈ່ມແຈ້ງ ແລະ ມີຄ່າ” ທີ່ເຂົາເຈົ້າໄດ້ຮຽນຮູ້ຈາກພຣະຄຳພີມໍມອນ.

1 ນີໄຟ 14:12–15

ເປັນຫຍັງເຮົາຈຶ່ງ “ມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າ” ເມື່ອເຮົາດຳລົງຊີວິດຢ່າງຈິງໃຈຕໍ່ພັນທະສັນຍາຂອງເຮົາ ທີ່ໄດ້ເຮັດໄວ້ນຳພຣະເຈົ້າ?

1 ນີໄຟ 15:8–11

ປະສົບການໃດແດ່ທີ່ຄອບຄົວຂອງທ່ານສາມາດແບ່ງປັນ ເມື່ອເຂົາເຈົ້າ “ທູນຖາມພຣະຜູ້ເປັນເຈົ້າ”? ເຮົາຮຽນຮູ້ຫຍັງແດ່ຈາກຕົວຢ່າງຂອງນີໄຟ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສຶກສາສ່ວນຕົວ

ໃຊ້ແຫລ່ງຊ່ວຍເຫລືອການສຶກສາ. ໝາຍເຫດທີ່ຢູ່ທາງລຸ່ມໜ້າປຶ້ມ, ຄູ່ມືຫົວຂໍ້, ແລະ ແຫລ່ງຊ່ວຍເຫລືອອື່ນໆ ກໍໃຫ້ຄວາມຮູ້ຕື່ມອີກກ່ຽວກັບພຣະຄຳພີ. ຍົກຕົວຢ່າງ, ໝາຍເຫດທີ່ຢູ່ທາງລຸ່ມໜ້າປຶ້ມ ຊ່ວຍທ່ານໃຫ້ເຂົ້າໃຈກ່ຽວກັບ 1 ນີໄຟ 14:20–21 ແນວໃດ?