“ວັນທີ 30 ເດືອນທັນວາ–ວັນທີ 5 ເດືອນມັງກອນ. ໜ້າຄຳນຳຂອງພຣະຄຳພີມໍມອນ: ‘ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 30 ເດືອນທັນວາ–ວັນທີ 5 ເດືອນມັງກອນ. ໜ້າຄຳນຳຂອງພຣະຄຳພີມໍມອນ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

Mormon writes on the gold plates

ວັນທີ 30 ເດືອນທັນວາ–ວັນທີ 5 ເດືອນມັງກອນ

ໜ້າຄຳນຳຂອງພຣະຄຳພີມໍມອນ

“ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ”

ການສຶກສາພຣະຄຳພີມໍມອນຂອງທ່ານສາມາດເພີ່ມພູນໄດ້ ຖ້າຫາກທ່ານເລີ່ມຕົ້ນ ໂດຍການອ່ານໜ້າຕ່າງໆທີ່ຢູ່ທາງໜ້າຂອງ 1 ນີໄຟ. ທ່ານພົບເຫັນຫຍັງແດ່ທີ່ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານ?

ບັນທຶກຄວາມປະທັບໃຈຂອງທ່ານ

ກ່ອນທ່ານຈະອ່ານເຖິງ 1 ນີໄຟ ບົດທີ 1, ກໍເຫັນໄດ້ຢ່າງແຈ້ງຊັດວ່າ ພຣະຄຳພີມໍມອນ ບໍ່ໄດ້ເປັນໜັງສືທີ່ທຳມະດາ. ໜ້າຄຳນຳຂອງມັນ ບັນຍາຍເບື້ອງຫລັງ ທີ່ບໍ່ເໝືອນໜັງສືເຫລັ້ມອື່ນໆ—ຮ່ວມທັງການມາຢ້ຽມຢາມຂອງທູດສະຫວັນ, ບັນທຶກຂອງສະໄໝບູຮານ ໄດ້ຖືກຝັງໄວ້ເປັນເວລາຫລາຍສັດຕະວັດ ຢູ່ຄ້ອຍພູ, ແລະ ຊາວໄຮ່ຊາວນາຄົນໜຶ່ງທີ່ບໍ່ມີໃຜຮູ້ຈັກ ໄດ້ແປບັນທຶກໂດຍອຳນາດຂອງພຣະເຈົ້າ. ພຣະຄຳພີມໍມອນບໍ່ພຽງແຕ່ເປັນປະຫວັດສາດກ່ຽວກັບຄວາມສີວິໄລຂອງຊາວອາເມຣິກາໃນສະໄໝບູຮານເທົ່ານັ້ນ. ມັນບັນຈຸ “ຄວາມສົມບູນຂອງພຣະກິດຕິຄຸນທີ່ເປັນນິດ” (ຄຳນຳຕໍ່ພຣະຄຳພີມໍມອນ), ແລະ ພຣະເຈົ້າເອງກໍຊີ້ນຳການອອກມາຂອງມັນ—ວິທີທີ່ມັນຖືກຂຽນ, ວິທີທີ່ມັນຖືກຮັກສາ, ແລະ ວິທີທີ່ມັນມີໃຫ້ໃຊ້ ໃນວັນເວລາຂອງເຮົາ. ປີນີ້, ເມື່ອທ່ານອ່ານພຣະຄຳພີມໍມອນ, ອະທິຖານກ່ຽວກັບມັນ, ແລະ ນຳໃຊ້ຄຳສອນຂອງມັນ, ແລ້ວທ່ານຈະເຊື້ອເຊີນພະລັງຂອງມັນໃຫ້ມາສູ່ຊີວິດຂອງທ່ານ, ແລະ ທ່ານຈະຮູ້ສຶກທີ່ຈະກ່າວຄືກັນກັບພະຍານສາມຄົນໄດ້ກ່າວ ຢູ່ໃນ ປະຈັກພະຍານ ຂອງພວກເພິ່ນວ່າ, “ເປັນສິ່ງທີ່ອັດສະຈັນຕໍ່ສາຍຕາ [ຂອງເຮົາ].”

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໜ້າວິເຄາະສະບັບຂອງພຣະຄຳພີມໍມອນ

ພຣະຄຳພີມໍມອນສາມາດເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານໃນພຣະເຢຊູຄຣິດໄດ້.

ໜ້າວິເຄາະສະບັບຂອງພຣະຄຳພີມໍມອນ ໃຫ້ຂໍ້ມູນຫລາຍກວ່າພຽງແຕ່ຊື່ປຶ້ມເທົ່ານັ້ນ. ໃນບັນດາສິ່ງອື່ນໆ, ມັນຍັງບອກເຖິງຈຸດປະສົງຫລາຍຢ່າງ ຂອງບັນທຶກທີ່ສັກສິດເຫລັ້ມນີ້. ໃຫ້ຊອກຫາຈຸດປະສົງເຫລົ່ານີ້, ແລະ ແລ້ວຂະນະທີ່ທ່ານສຶກສາພຣະຄຳພີມໍມອນ ໃນປີນີ້, ໃຫ້ສັງເກດເບິ່ງຂ່າວສານທີ່ທ່ານຮູ້ສຶກວ່າ ໄດ້ບັນລຸຈຸດປະສົງເຫລົ່ານັ້ນ. ຍົກຕົວຢ່າງ, ຂ່າວສານໃດແດ່ທີ່ຊ່ວຍທ່ານໃຫ້ຍອມຮັບ “ວ່າພຣະເຢຊູຄື ພຣະຄຣິດ ພຣະເຈົ້າຜູ້ສະຖິດນິລັນດອນ”?

ຄຳນຳຕໍ່ພຣະຄຳພີມໍມອນ

ພຣະຄຳພີມໍມອນ “ບັນຍາຍແຜນແຫ່ງຄວາມລອດ.”

ແຜນແຫ່ງຄວາມລອດ ເປັນແຜນຂອງພຣະບິດາເທິງສະຫວັນ ເພື່ອຊ່ວຍລູກໆຂອງພຣະອົງໃຫ້ໄດ້ຮັບຄວາມສູງສົ່ງ, ເໝືອນດັ່ງພຣະອົງ, ແລະ ມີຄວາມຊື່ນຊົມດັ່ງທີ່ພຣະອົງຮູ້ສຶກ (ເບິ່ງ 2 ນີໄຟ 2:25–26). ການຊົດໃຊ້ຂອງພຣະເຢຊູຄຣິດ ເຮັດໃຫ້ແຜນນີ້ເປັນໄປໄດ້, ແລະ ທຸກຄຳສອນ, ພິທີການ, ພັນທະສັນຍາ, ແລະ ພຣະບັນຍັດ ທີ່ພຣະເຈົ້າໄດ້ປະທານໃຫ້ ແມ່ນເພື່ອຊ່ວຍບັນລຸແຜນດັ່ງກ່າວ.

ຖ້າຫາກທ່ານປາດຖະໜາທີ່ຈະເຂົ້າໃຈແຜນແຫ່ງຄວາມລອດ, ມັນບໍ່ມີໜັງສືອື່ນໃດທີ່ດີໄປກວ່າພຣະຄຳພີມໍມອນ ທີ່ຈະອ່ານ. ມັນອ້າງເຖິງແຜນຂອງພຣະເຈົ້າ—ໂດຍໃຊ້ຫລາຍໆຊື່—ຫລາຍກວ່າ 20 ເທື່ອ. ລະຫວ່າງການສຶກສາຂອງທ່ານ ໃນປີນີ້, ໃຫ້ສັງເກດເບິ່ງເວລາທີ່ແຜນຂອງພຣະເຈົ້າ ຖືກກ່າວເຖິງ ຫລື ໝາຍເຖິງ ແລະ ສິ່ງທີ່ພຣະຄຳພີມໍມອນກ່າວກ່ຽວກັບມັນ.

ຕໍ່ໄປນີ້ແມ່ນກິດຈະກຳທີ່ຈະຊ່ວຍທ່ານເລີ່ມຕົ້ນ. ໃຫ້ອ່ານຂໍ້ພຣະຄຳພີດັ່ງຕໍ່ໄປນີ້, ແລະ ຂຽນຊື່ທີ່ແຕກຕ່າງກັນ ທີ່ເອີ້ນແຜນຂອງພຣະເຈົ້າ ລົງໄວ້: 2 ນີໄຟ 9:13; 11:5; ແລະ ແອວມາ 12:32–34; 24:14; 41:2; 42:15–16. ຊື່ແຕ່ລະຢ່າງເຫລົ່ານີ້ ແນະນຳຫຍັງແດ່ຕໍ່ທ່ານ ກ່ຽວກັບແຜນຂອງພຣະບິດາ?

“ປະຈັກພະຍານຂອງພະຍານສາມຄົນ”; “ປະຈັກພະຍານຂອງພະຍານແປດຄົນ”

ເຮົາສາມາດເປັນພະຍານເຖິງພຣະຄຳພີມໍມອນ.

ພຣະວິນຍານບໍລິສຸດສາມາດເປັນພະຍານຕໍ່ທ່ານວ່າ ພຣະຄຳພີມໍມອນແມ່ນຈິງແທ້, ແມ່ນແຕ່ຖ້າຫາກທ່ານບໍ່ເຄີຍເຫັນແຜ່ນຈາລຶກຄຳ ຄືກັນກັບພະຍານສາມຄົນ ແລະ ພະຍານແປດຄົນ ກໍຕາມ. ປະຈັກພະຍານຂອງພວກເພິ່ນ ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານແນວໃດ? ທ່ານຈະສາມາດ “ໃຫ້ [ຊື່ຂອງທ່ານ] ໄວ້ຕໍ່ໂລກ, ເພື່ອເປັນພະຍານຕໍ່ໂລກ” ເຖິງສິ່ງທີ່ທ່ານຮູ້ຈັກກ່ຽວກັບພຣະຄຳພີມໍມອນໄດ້ແນວໃດ? (“ປະຈັກພະຍານຂອງພະຍານແປດຄົນ”).

“ປະຈັກພະຍານຂອງສາດສະດາໂຈເຊັບ ສະມິດ”

ການອອກມາຂອງພຣະຄຳພີມໍມອນເປັນສິ່ງມະຫັດສະຈັນ.

ຖ້າຫາກມີຄົນຖາມທ່ານ ວ່າພຣະຄຳພີມໍມອນມາຈາກໃສ, ທ່ານຈະຕອບວ່າແນວໃດ? ທ່ານຈະບັນຍາຍເຖິງພຣະຫັດຂອງພຣະເຈົ້າ ໃນການນຳພຣະຄຳພີມໍມອນອອກມາແນວໃດ? ໂຈເຊັບ ສະມິດ ໄດ້ບັນຍາຍເຖິງການອອກມາຂອງພຣະຄຳພີມໍມອນແນວໃດ?

“ປະຈັກພະຍານຂອງສາດສະດາໂຈເຊັບ ສະມິດ”

ພຣະຄຳພີມໍມອນໄດ້ຖືກແປດ້ວຍວິທີໃດ?

ພຣະຄຳພີມໍມອນໄດ້ຖືກແປ “ໂດຍຂອງປະທານ ແລະ ໂດຍອຳນາດຂອງພຣະເຈົ້າ.” ເຮົາບໍ່ຮູ້ຫຍັງຫລາຍກ່ຽວກັບຂັ້ນຕອນການແປທີ່ມະຫັດສະຈັນນັ້ນ, ແຕ່ເຮົາຮູ້ວ່າ ໂຈເຊັບ ສະມິດ ເປັນຜູ້ພະຍາກອນ, ມີເຄື່ອງມືຊ່ວຍເຫລືອ ທີ່ພຣະເຈົ້າໄດ້ຕຽມໄວ້ໃຫ້: ກ້ອນຫີນໃສສອງກ້ອນ ທີ່ເອີ້ນວ່າ ອຸລີມ ແລະ ທຸມມີມ ແລະ ກ້ອນຫີນອີກກ້ອນໜຶ່ງ ທີ່ເອີ້ນວ່າ ຫີນຂອງຜູ້ພະຍາກອນ. ໂຈເຊັບໄດ້ເຫັນການແປຂອງອັກຂະລະທີ່ຢູ່ໃນແຜ່ນຈາລຶກ ເປັນພາສາອັງກິດ, ແລະ ໄດ້ອ່ານການແປອອກສຽງ ຂະນະທີ່ຜູ້ຂຽນບັນທຶກມັນໄວ້. ຜູ້ຂຽນຂອງໂຈເຊັບແຕ່ລະຄົນໄດ້ເປັນພະຍານວ່າ ອຳນາດຂອງພຣະເຈົ້າໄດ້ສະແດງໃຫ້ປະຈັກຢູ່ໃນການແປຂອງວຽກງານທີ່ສັກສິດນີ້.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

ໜ້າວິເຄາະສະບັບຂອງພຣະຄຳພີມໍມອນ

ບາງທີຄອບຄົວຂອງທ່ານສາມາດເລີ່ມຕົ້ນຈົດຂໍ້ພຣະຄຳພີ ຈາກພຣະຄຳພີມໍມອນ ທີ່ໄດ້ສ້າງສັດທາຂອງພວກທ່ານ “ວ່າພຣະເຢຊູ ຄືພຣະຄຣິດ” ແລະ ຈົດຂໍ້ອື່ນໆໃສ່ຕື່ມຕະຫລອດປີ. ນີ້ອາດເປັນເວລາທີ່ດີ ທີ່ຈະວາງແຜນເປັນຄອບຄົວສຳລັບການອ່ານພຣະຄຳພີມໍມອນ: ພວກທ່ານຈະເຕົ້າໂຮມກັນເພື່ອອ່ານ ໃນເວລາໃດ ແລະ ຢູ່ໃສ? ສະມາຊິກໃນຄອບຄົວແຕ່ລະຄົນຈະມີສ່ວນຮ່ວມແບບໃດ? ສຳລັບຄວາມຊ່ວຍເຫລືອເພີ່ມເຕີມ, ໃຫ້ເບິ່ງ “ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ” ຢູ່ທີ່ຈຸດເລີ່ມຕົ້ນຂອງແຫລ່ງນີ້.

ຄຳນຳຕໍ່ພຣະຄຳພີມໍມອນ

ສີລາສຳຄັນແມ່ນ ກ້ອນຫີນ ທີ່ມີລັກສະນະຄື ຫລີ້ມ ຢູ່ຈຸດກາງສູງສຸດຂອງປະຕູໂຂງ ທີ່ຍຶດຫີນກ້ອນອື່ນໆໄວ້ນຳກັນ. ເພື່ອຊ່ວຍຄອບຄົວຂອງທ່ານໃຫ້ເຂົ້າໃຈວິທີທີ່ພຣະຄຳພີມໍມອນ ເປັນ “ສີລາສຳຄັນຂອງສາດສະໜາຂອງພວກເຮົາ,” ທ່ານສາມາດສ້າງ ຫລື ແຕ້ມປະຕູໂຂງ ໂດຍມີສີລາສຳຄັນຢູ່ຈຸດກາງສູງສຸດ. ຈະມີຫຍັງເກີດຂຶ້ນ ຖ້າຫາກສີລາສຳຄັນຖືກຖອນອອກ? ຈະມີຫຍັງເກີດຂຶ້ນ ຖ້າຫາກເຮົາບໍ່ມີພຣະຄຳພີມໍມອນ? ເຮົາຈະສາມາດເຮັດໃຫ້ພຣະຄຳພີມໍມອນເປັນສີລາສຳຄັນຂອງສັດທາຂອງເຮົາ ໃນພຣະເຢຊູຄຣິດ ໄດ້ແນວໃດ?

ພຣະຄຳພີມໍມອນເປັນສີລາສຳຄັນຂອງສາດສະໜາຂອງເຮົາ.

“ປະຈັກພະຍານຂອງພະຍານສາມຄົນ”; “ປະຈັກພະຍານຂອງພະຍານແປດຄົນ”

ສະມາຊິກໃນຄອບຄົວຂອງທ່ານສາມາດຂຽນປະຈັກພະຍານຂອງເຂົາເຈົ້າກ່ຽວກັບພຣະຄຳພີມໍມອນ, ເຊັນຊື່ຂອງເຂົາເຈົ້າໃສ່ໃນນັ້ນ, ແລະ ຄິດຫາວິທີທີ່ຈະແບ່ງປັນປະຈັກພະຍານຂອງເຂົາເຈົ້າກັບຄົນອື່ນ.

“ປະຈັກພະຍານຂອງສາດສະດາໂຈເຊັບ ສະມິດ”

ໃນເລື່ອງລາວຂອງໂຈເຊັບ ສະມິດ, ມີຫລັກຖານໃດແດ່ທີ່ເຮົາພົບເຫັນວ່າ ພຣະເຈົ້າມີສ່ວນກ່ຽວຂ້ອງກັບການນຳພຣະຄຳພີມໍມອນອອກມາ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສຶກສາສ່ວນຕົວ

ຄຳສັນຍາຂອງສາດສະດາ. ປະທານຣະໂຊ ເອັມ ແນວສັນ ໄດ້ກ່າວວ່າ, “ຂ້າພະເຈົ້າສັນຍາວ່າ ເມື່ອທ່ານໄຕ່ຕອງສິ່ງທີ່ທ່ານສຶກສາ, ປະຕູສະຫວັນຈະເປີດອອກ, ແລະ ທ່ານຈະໄດ້ຮັບຄຳຕອບໃຫ້ແກ່ຄຳຖາມຂອງທ່ານ ແລະ ໄດ້ຮັບການຊີ້ນຳສຳລັບຊີວິດຂອງທ່ານເອງ” (“The Book of Mormon: What Would Your Life Be Like without It?” Ensign ຫລື Liahona, Nov. 2017, 62.