“ຄຳສັນຍາຂອງສາດສະດາ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ຄຳສັນຍາຂອງສາດສະດາ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
ຄຳສັນຍາຂອງສາດສະດາ
ການສຶກສາພຣະຄຳພີມໍມອນຈະປ່ຽນແປງທ່ານ. ມັນຈະປ່ຽນແປງຄອບຄົວຂອງທ່ານ. ສາດສະດາຂອງຍຸກສຸດທ້າຍໄດ້ສັນຍາກ່ຽວກັບພະລັງຂອງພຣະຄຳພີມໍມອນ ນັບຕັ້ງແຕ່ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ໄດ້ຖືກຈັດຕັ້ງຂຶ້ນມາ. ໃຫ້ໄຕ່ຕອງບົດຄວາມດັ່ງຕໍ່ໄປນີ້, ແລະ ທົບທວນມັນເປັນປະຈຳ. ພອນຢ່າງໃດແດ່ໃນຈຳນວນພອນເຫລົ່ານີ້ ທີ່ທ່ານຢາກໄດ້ຮັບ? ຂະນະທີ່ທ່ານອ່ານພຣະຄຳພີມໍມອນ, ໃຫ້ຄິດທີ່ຈະບັນທຶກ ແລະ ແບ່ງປັນມັນໃຫ້ກັບຄົນອື່ນ ເຖິງວິທີທີ່ຄຳສັນຍາເຫລົ່ານີ້ໄດ້ເກີດເປັນຈິງໃນຊີວິດຂອງທ່ານ.
ສາດສະດາໂຈເຊັບ ສະມິດ: “ຂ້າພະເຈົ້າໄດ້ບອກພີ່ນ້ອງທຸກຄົນວ່າ ພຣະຄຳພີມໍມອນເປັນພຣະຄຳພີທີ່ຖືກຕ້ອງທີ່ສຸດໃນໂລກເໜືອກວ່າພຣະຄຳພີໃດໆ ແລະ ມັນເປັນທັງຫລັກສີລາສຳຄັນ ຂອງສາດສະໜາຂອງພວກເຮົາ ແລະ ມະນຸດທຸກຄົນຈະໄດ້ເຂົ້າໃກ້ພຣະເຈົ້າໂດຍການປະຕິບັດຕາມຄຳສັ່ງສອນຂອງພຣະຄຳພີນີ້ຫລາຍກວ່າປະຕິບັດຕາມໜັງສືເຫລັ້ມອື່ນໆ” (Teachings of Presidents of the Church: Joseph Smith [2007], 64).
ປະທານເອສະຣາ ແທັບ ເບັນສັນ: “ພຣະຄຳພີມໍມອນບໍ່ພຽງແຕ່ສິດສອນເຮົາເຖິງຄວາມຈິງເທົ່ານັ້ນ, ເຖິງແມ່ນວ່າຕາມຈິງແລ້ວ ມັນກໍເປັນເຊັ່ນນັ້ນ. ພຣະຄຳພີມໍມອນບໍ່ພຽງແຕ່ເປັນພະຍານເຖິງພຣະຄຣິດເທົ່ານັ້ນ, ເຖິງແມ່ນວ່າຕາມຈິງແລ້ວ ມັນກໍເປັນເຊັ່ນນັ້ນ ຄືກັນ. ແຕ່ມັນເປັນຫລາຍກວ່ານັ້ນ. ມັນມີພະລັງຢູ່ໃນພຣະຄຳພີ ຊຶ່ງຈະເລີ່ມຕົ້ນຫລັ່ງໄຫລມາສູ່ຊີວິດຂອງທ່ານ ໃນນາທີທີ່ທ່ານເລີ່ມຕົ້ນສຶກສາມັນຢ່າງຈິງຈັງ. ທ່ານຈະພົບເຫັນພະລັງທີ່ຍິ່ງໃຫຍ່ກວ່າ ເພື່ອຕ້ານທານກັບການລໍ້ລວງ. ທ່ານຈະພົບເຫັນພະລັງທີ່ຈະຫລີກເວັ້ນຈາກການຫລອກລວງ. ທ່ານຈະພົບເຫັນພະລັງທີ່ຈະຢູ່ໃນເສັ້ນທາງທີ່ຄັບ ແລະ ແຄບ. ພຣະຄຳພີນີ້ຖືກເອີ້ນວ່າ ‘ຖ້ອຍຄຳແຫ່ງຊີວິດ’ (ຄ&ພ 84:85), ແລະ ບໍ່ມີບ່ອນໃດ ທີ່ມີຄວາມຈິງຫລາຍກວ່າ ຢູ່ໃນພຣະຄຳພີມໍມອນ. ເມື່ອທ່ານເລີ່ມຕົ້ນຫິວກະຫາຍ ຖ້ອຍຄຳເຫລົ່ານັ້ນ, ແລ້ວທ່ານຈະພົບເຫັນຊີວິດເຕັມໄປດ້ວຍຄວາມອຸດົມສົມບູນຫລາຍຂຶ້ນເລື້ອຍໆ” (Teachings of Presidents of the Church: Ezra Taft Benson [2014], 141).
ປະທານກໍດອນ ບີ ຮິງລີ: “ອ້າຍເອື້ອຍນ້ອງທັງຫລາຍ, ຂ້າພະເຈົ້າສັນຍາກັບທ່ານໂດຍບໍ່ລັງເລໃຈວ່າ ຖ້າຫາກທ່ານຈະອ່ານພຣະຄຳພີມໍມອນດ້ວຍການອະທິຖານ, ບໍ່ວ່າທ່ານເຄີຍອ່ານມາແລ້ວຈັກເທື່ອກໍຕາມ, ຈະມີພຣະວິນຍານຂອງພຣະຜູ້ເປັນເຈົ້າເຂົ້າມາໃນໃຈຂອງທ່ານເພີ່ມເຕີມຫລາຍຂຶ້ນ. ຈະມີຄວາມຕັ້ງໃຈແນ່ວແນ່ຫລາຍຂຶ້ນ ທີ່ຈະດຳເນີນຊີວິດດ້ວຍການເຊື່ອຟັງພຣະບັນຍັດຂອງພຣະອົງ, ແລະ ຈະມີປະຈັກພະຍານທີ່ເຂັ້ມແຂງເຖິງການຊົງພຣະຊົນຈິງແທ້ຂອງພຣະບຸດຂອງພຣະອົງ” (Teachings of Presidents of the Church: Gordon B. Hinckley [2016], 233).
ປະທານຣະໂຊ ເອັມ ແນວສັນ: “ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າສັນຍາວ່າ ເມື່ອທ່ານສຶກສາພຣະຄຳພີມໍມອນດ້ວຍການອະທິຖານ ທຸກວັນ, ທ່ານຈະສາມາດຕັດສິນໃຈໄດ້ດີກວ່າເກົ່າ—ໃນທຸກວັນ. ຂ້າພະເຈົ້າສັນຍາວ່າ ເມື່ອທ່ານໄຕ່ຕອງສິ່ງທີ່ທ່ານສຶກສາ, ປະຕູສະຫວັນຈະເປີດອອກ, ແລະ ທ່ານຈະໄດ້ຮັບຄຳຕອບໃຫ້ແກ່ຄຳຖາມຂອງທ່ານ ແລະ ໄດ້ຮັບການຊີ້ນຳສຳລັບຊີວິດຂອງທ່ານເອງ. ຂ້າພະເຈົ້າສັນຍາວ່າ ເມື່ອທ່ານສຶກສາພຣະຄຳພີມໍມອນທຸກວັນ, ທ່ານຈະມີພູມຕ້ານທານສິ່ງຊົ່ວຮ້າຍທຸກວັນ, ແມ່ນແຕ່ໂຣກລະບາດຂອງຮູບພາບລາມົກ ແລະ ການຕິດແສດທາງຈິດໃຈອື່ນໆ” (“The Book of Mormon: What Would Your Life Be Like without It?” Ensign ຫລື Liahona, Nov. 2017, 62–63).