“ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ຄອບຄົວກຳລັງສຶກສາພຣະຄຳພີ

ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ

ການສຶກສາພຣະຄຳພີເປັນຄອບຄົວເປັນວິທີທາງທີ່ມີພະລັງ ທີ່ຈະຊ່ວຍຄອບຄົວຂອງທ່ານຮຽນຮູ້ພຣະກິດຕິຄຸນ. ການອ່ານຫລາຍ ຫລື ການອ່ານດົນ ແມ່ນບໍ່ສຳຄັນເທົ່າກັບການໃຊ້ຄວາມພະຍາຍາມຢ່າງບໍ່ປ່ຽນແປງ. ເມື່ອທ່ານເຮັດໃຫ້ການສຶກສາພຣະຄຳພີເປັນພາກສ່ວນໜຶ່ງທີ່ສຳຄັນຂອງຊີວິດຄອບຄົວຂອງທ່ານ, ແລ້ວທ່ານຈະຊ່ວຍສະມາຊິກໃນຄອບຄົວຂອງທ່ານ ໃຫ້ເຂົ້າໃກ້ຊິດກັບພຣະເຢຊູຄຣິດຫລາຍຂຶ້ນ ແລະ ສ້າງປະຈັກພະຍານຂອງເຂົາເຈົ້າ ຢູ່ເທິງພື້ນຖານຂອງພຣະຄຳຂອງພຣະອົງ.

ໃຫ້ພິຈາລະນາຄຳຖາມດັ່ງຕໍ່ໄປນີ້:

ທ່ານຈະສາມາດຊຸກຍູ້ສະມາຊິກໃນຄອບຄົວໃຫ້ສຶກສາພຣະຄຳພີດ້ວຍຕົວເອງໄດ້ແນວໃດ?
ທ່ານສາມາດເຮັດຫຍັງແດ່ເພື່ອເຊື້ອເຊີນສະມາຊິກໃນຄອບຄົວໃຫ້ແບ່ງປັນສິ່ງທີ່ເຂົາເຈົ້າຮຽນຮູ້?
ທ່ານຈະສາມາດເນັ້ນໜັກຫລັກທຳທີ່ທ່ານໄດ້ຮຽນຮູ້ຢູ່ໃນພຣະຄຳພີມໍມອນ ໃນຊ່ວງເວລາການສິດສອນແຕ່ລະວັນແນວໃດ?

ຈົ່ງຈື່ຈຳໄວ້ວ່າ ບ້ານເຮືອນເປັນສະຖານທີ່ ທີ່ດີເລີດສຳລັບການຮຽນຮູ້ພຣະກິດຕິຄຸນ. ທ່ານສາມາດຮຽນຮູ້ ແລະ ສິດສອນພຣະກິດຕິຄຸນຢູ່ທີ່ບ້ານ ໃນວິທີທາງທີ່ຫ້ອງຮຽນຂອງສາດສະໜາຈັກບໍ່ສາມາດເຮັດໄດ້. ໃຫ້ຮູ້ຈັກສ້າງສັນ ຂະນະທີ່ທ່ານຄິດຫາວິທີທາງ ທີ່ຈະຊ່ວຍເຫລືອຄອບຄົວຂອງທ່ານ ໃຫ້ຮຽນຮູ້ຈາກພຣະຄຳພີ. ໃຫ້ພິຈາລະນາແນວຄິດບາງຢ່າງດັ່ງຕໍ່ໄປນີ້ ເພື່ອສົ່ງເສີມການສຶກສາພຣະຄຳພີເປັນຄອບຄົວຂອງທ່ານ.

ໃຊ້ເພງ

ໃຫ້ຮ້ອງເພງທີ່ສະໜັບສະໜູນຫລັກທຳທີ່ສິດສອນຢູ່ໃນພຣະຄຳພີ. ພາກຫ້ອຍທ້າຍ ງ ຢູ່ໃນແຫລ່ງນີ້ ລວມທັງເພງທີ່ກ່ຽວຂ້ອງກັບຄຳສອນ ຢູ່ໃນໂຄງຮ່າງແຕ່ລະອາທິດ.

ຮູບພາບ

ຜູ້ຊາຍກັບເດັກນ້ອຍຜູ້ຍິງກຳລັງສຶກສາພຣະຄຳພີ

ແບ່ງປັນຂໍ້ພຣະຄຳພີທີ່ມີຄວາມໝາຍ

ໃຫ້ເວລາສະມາຊິກໃນຄອບຄົວ ທີ່ຈະແບ່ງປັນຂໍ້ພຣະຄຳພີ ທີ່ເຂົາເຈົ້າພົບເຫັນວ່າມີຄວາມໝາຍລະຫວ່າງການສຶກສາສ່ວນຕົວຂອງເຂົາເຈົ້າ.

ໃຊ້ຄຳຂອງທ່ານເອງ

ເຊື້ອເຊີນສະມາຊິກໃນຄອບຄົວໃຫ້ກ່າວສະຫລຸບດ້ວຍຄຳຂອງຕົວເອງ ເຖິງສິ່ງທີ່ເຂົາເຈົ້າໄດ້ຮຽນຮູ້ຈາກພຣະຄຳພີທີ່ພວກທ່ານສຶກສາ.

ນຳໃຊ້ຂໍ້ພຣະຄຳພີກັບຊີວິດຂອງທ່ານ

ຫລັງຈາກໄດ້ອ່ານຂໍ້ພຣະຄຳພີແລ້ວ, ໃຫ້ຂໍໃຫ້ສະມາຊິກໃນຄອບຄົວແບ່ງປັນວິທີທີ່ຂ່າວສານກ່ຽວຂ້ອງກັບຊີວິດຂອງເຂົາເຈົ້າແນວໃດ.

ຖາມຄຳຖາມ

ເຊື້ອເຊີນສະມາຊິກໃນຄອບຄົວໃຫ້ຖາມກ່ຽວກັບພຣະກິດຕິຄຸນ, ແລະ ແລ້ວໃຫ້ໃຊ້ເວລາຊອກຫາຂໍ້ພຣະຄຳພີທີ່ສາມາດຊ່ວຍຕອບຄຳຖາມດັ່ງກ່າວ.

ສະແດງຂໍ້ພຣະຄຳພີ

ໃຫ້ເລືອກເອົາຂໍ້ໜຶ່ງທີ່ທ່ານເຫັນວ່າ ມັນມີຄວາມໝາຍ, ແລະ ໃຫ້ສະແດງມັນໄວ້ບ່ອນທີ່ສະມາຊິກໃນຄອບຄົວສາມາດຫລຽວເຫັນມັນໄດ້ເລື້ອຍໆ. ເຊື້ອເຊີນສະມາຊິກໃນຄອບຄົວຄົນອື່ນໆ ໃຫ້ເລືອກຂໍ້ພຣະຄຳພີ ເພື່ອສະແດງ.

ຂຽນລາຍການຂໍ້ພຣະຄຳພີ

ນຳກັນເປັນຄອບຄົວ, ໃຫ້ເລືອກເອົາພຣະຄຳພີຫລາຍຂໍ້ ເພື່ອວ່າພວກທ່ານຈະໄດ້ສົນທະນາ ລະຫວ່າງອາທິດທີ່ຈະມາເຖິງ.

ທ່ອງຈຳຂໍ້ພຣະຄຳພີ

ໃຫ້ເລືອກເອົາຂໍ້ພຣະຄຳພີໃດໜຶ່ງ ທີ່ມີຄວາມໝາຍຕໍ່ຄອບຄົວຂອງທ່ານ, ແລະ ໃຫ້ເຊື້ອເຊີນສະມາຊິກໃນຄອບຄົວທ່ອງຈຳມັນ ໂດຍການກ່າວລຶ້ມຄືນທຸກວັນ ຫລື ຫລິ້ນເກມທ່ອງຈຳ.

ແບ່ງປັນບົດຮຽນທີ່ໃຊ້ສິ່ງຂອງ

ໃຫ້ຊອກຫາສິ່ງຂອງທີ່ກ່ຽວພັນກັບບົດ ຫລື ຂໍ້ທີ່ພວກທ່ານກຳລັງອ່ານເປັນຄອບຄົວ. ເຊື້ອເຊີນສະມາຊິກໃນຄອບຄົວໃຫ້ເວົ້າລົມກັນກ່ຽວກັບວິທີທີ່ສິ່ງຂອງກ່ຽວພັນກັບການສິດສອນຢູ່ໃນພຣະຄຳພີແນວໃດ.

ເລືອກຫົວຂໍ້

ໃຫ້ສະມາຊິກໃນຄອບຄົວປ່ຽນກັນເລືອກເອົາຫົວຂໍ້ທີ່ຄອບຄົວຈະສຶກສານຳກັນ. ໃຫ້ໃຊ້ ຄູ່ມືພຣະຄຳພີ (scriptures.ChurchofJesusChrist.org) ເພື່ອຊອກຫາຂໍ້ພຣະຄຳພີ ທີ່ກ່ຽວກັບຫົວຂໍ້.

ແຕ້ມຮູບ

ໃຫ້ອ່ານສອງສາມຂໍ້ເປັນຄອບຄົວ, ແລະ ແລ້ວປ່ອຍໃຫ້ສະມາຊິກໃນຄອບຄົວແຕ້ມບາງສິ່ງທີ່ກ່ຽວພັນກັບສິ່ງທີ່ພວກທ່ານໄດ້ອ່ານ. ໃຫ້ໃຊ້ເວລາສົນທະນາກ່ຽວກັບຮູບແຕ້ມຂອງກັນແລະກັນ.

ສະແດງຕາມເລື່ອງ

ຫລັງຈາກອ່ານເລື່ອງໃດເລື່ອງໜຶ່ງແລ້ວ, ໃຫ້ເຊື້ອເຊີນສະມາຊິກໃນຄອບຄົວສະແດງຕາມເລື່ອງນັ້ນ. ຫລັງຈາກນັ້ນ, ໃຫ້ເວົ້າລົມກັນກ່ຽວກັບວິທີທີ່ເລື່ອງເລົ່າກ່ຽວພັນກັບສິ່ງທີ່ພວກທ່ານໄດ້ປະເຊີນເປັນສ່ວນບຸກຄົນ ແລະ ເປັນຄອບຄົວແນວໃດ.

ແອວເດີ ເດວິດ ເອ ແບ໊ດນາ ໄດ້ສອນວ່າ: “ການອະທິຖານເປັນຄອບຄົວ, ການສຶກສາພຣະຄຳພີເປັນຄອບຄົວ, ແລະ ການສັງສັນໃນຄອບຄົວທຸກເທື່ອ ປຽບເໝືອນຮອຍໆໜຶ່ງ ໃນພາບຈິດວິນຍານຂອງເຮົາ. ບໍ່ມີເຫດການອັນໃດອັນໜຶ່ງທີ່ປະກົດວ່າ ໜ້າປະທັບໃຈ ຫລື ໜ້າຊົງຈຳ. ແຕ່ເໝືອນດັ່ງທີ່ຮອຍຂອງສີເຫລືອງ ແລະ ສີຄຳ ແລະ ສີນ້ຳຕານເຮັດໃຫ້ຮອຍສົມບູນ ແລະ ສ້າງໃຫ້ຜົນງານທີ່ດີເລີດເປັນທີ່ປະທັບໃຈ, ການກະທຳທີ່ເບິ່ງຄືວ່າເລັກໆນ້ອຍໆ ທີ່ສະໝ່ຳສະເໝີຂອງເຮົາ ກໍສາມາດນຳໄປສູ່ຜົນງານທີ່ສຳຄັນທີ່ສຸດທາງວິນຍານກໍໄດ້ຄືກັນ” (“More Diligent and Concerned at Home,” Ensign ຫລື Liahona, Nov. 2009, 19–20).