“ການໃຊ້ ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ການໃຊ້ ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
ການໃຊ້ ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ
ແຫລ່ງຊ່ວຍເຫລືອເຫລັ້ມນີ້ແມ່ນສຳລັບໃຜ?
ແຫລ່ງຊ່ວຍເຫລືອເຫລັ້ມນີ້ແມ່ນສຳລັບທຸກຄົນ ແລະ ທຸກຄອບຄົວໃນສາດສະໜາຈັກ. ມັນຖືກກະກຽມໄວ້ເພື່ອຊ່ວຍທ່ານ ໃຫ້ຮຽນຮູ້ພຣະກິດຕິຄຸນ—ບໍ່ວ່າຈະເປັນແບບສ່ວນຕົວ ຫລື ກັບຄອບຄົວຂອງທ່ານກໍຕາມ. ຖ້າຫາກແຕ່ກ່ອນ ທ່ານຍັງບໍ່ໄດ້ສຶກສາພຣະກິດຕິຄຸນເປັນປະຈຳເທື່ອ, ແຫລ່ງຊ່ວຍເຫລືອເຫລັ້ມນີ້ສາມາດຊ່ວຍທ່ານເລີ່ມຕົ້ນໄດ້. ຖ້າຫາກທ່ານມີນິໄສສຶກສາພຣະກິດຕິຄຸນຢູ່ແລ້ວ, ແຫລ່ງຊ່ວຍເຫລືອເຫລັ້ມນີ້ສາມາດຊ່ວຍທ່ານໃຫ້ມີປະສົບການທີ່ມີຄວາມໝາຍຫລາຍຂຶ້ນກວ່າເກົ່າໄດ້.
ເຮົາຄວນໃຊ້ແຫລ່ງຊ່ວຍເຫລືອເຫລັ້ມນີ້ແບບໃດ?
ໃຫ້ໃຊ້ແຫລ່ງຊ່ວຍເຫລືອເຫລັ້ມນີ້ໃນວິທີໃດກໍໄດ້ ທີ່ມັນຈະຊ່ວຍທ່ານ. ທ່ານອາດພົບວ່າ ມັນເປັນຄູ່ມື ຫລື ສິ່ງຊ່ວຍເຫລືອ ທີ່ມີປະໂຫຍດ ສຳລັບການສຶກສາພຣະຄຳພີເປັນສ່ວນຕົວ ແລະ ເປັນຄອບຄົວ. ທ່ານກໍສາມາດໃຊ້ມັນສຳລັບການສັງສັນໃນຄອບຄົວນຳອີກ. ໂຄງຮ່າງບັນຈຸຫລັກທຳທີ່ສຳຄັນ ທີ່ພົບເຫັນຢູ່ໃນພຣະຄຳພີມໍມອນ, ຊຶ່ງແນະນຳແນວຄິດສຳລັບການສຶກສາ ແລະ ກິດຈະກຳ ສຳລັບບຸກຄົນ ແລະ ຄອບຄົວ, ແລະ ມີຊ່ອງວ່າງໃຫ້ບັນທຶກຄວາມປະທັບໃຈຂອງທ່ານນຳອີກ.
ທ່ານ ແລະ ຄອບຄົວຂອງທ່ານ ອາດສຶກສາພຣະກິດຕິຄຸນເປັນປະຈຳຢູ່ແລ້ວ. ຍົກຕົວຢ່າງ, ບາງທີທ່ານອາດອ່ານພຣະຄຳພີເຫລັ້ມອື່ນໆ ທີ່ນອກເໜືອໄປຈາກພຣະຄຳພີມໍມອນ ສຳລັບຫ້ອງຮຽນສາດສະໜາ ຫລື ຫ້ອງຮຽນໃນສະຖາບັນ. ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ ບໍ່ມີເຈດຕະນາທີ່ຈະເອົາມາປ່ຽນ ຫລື ເອົາມາແຂ່ງຂັນກັບສິ່ງທີ່ດີ ທີ່ທ່ານກຳລັງເຮັດ. ມັນອາດມີຫລາຍວິທີທາງ ທີ່ຈະຮຽນຮູ້ຈາກພຣະຄຳພີມໍມອນ ເປັນປະຈຳ ແລະ ຍັງສາມາດສຳເລັດເປົ້າໝາຍການສຶກສາພຣະຄຳພີເຫລັ້ມອື່ນຂອງທ່ານອີກ. ຍົກຕົວຢ່າງ, ທ່ານສາມາດອ່ານພຣະຄຳພີເຫລັ້ມອື່ນ ສຳລັບການສຶກສາພຣະຄຳພີເປັນສ່ວນຕົວ ແລະ ອ່ານພຣະຄຳພີມໍມອນກັບຄອບຄົວຂອງທ່ານ (ຫລື ໃນທາງກັບກັນ) ກໍໄດ້. ໃຫ້ເຮັດຕາມການນຳພາຂອງພຣະວິນຍານ ເພື່ອຕັດສິນໃຈກ່ຽວກັບວິທີທີ່ຈະເຂົ້າຫາພຣະຄຳຂອງພຣະເຈົ້າ ໃນການສຶກສາຂອງທ່ານເອງ.
ແຫລ່ງຊ່ວຍເຫລືອເຫລັ້ມນີ້ກ່ຽວຂ້ອງກັບສິ່ງທີ່ເກີດຂຶ້ນຢູ່ໃນສາດສະໜາຈັກແນວໃດ?
ໂຄງຮ່າງຢູ່ໃນແຫລ່ງຊ່ວຍເຫລືອເຫລັ້ມນີ້ ໄດ້ຖືກຈັດລະບຽບຕາມຕາຕະລາງການອ່ານໃນແຕ່ລະອາທິດ. ຈົ່ງຕາມເຮົາມາ—ສຳລັບຊັ້ນປະຖົມໄວ ແລະ ຈົ່ງຕາມເຮົາມາ—ສຳລັບໂຮງຮຽນວັນອາທິດ ຈະເຮັດຕາມຕາຕະລາງຢ່າງດຽວກັນນີ້. ເພື່ອສະໜັບສະໜູນຄວາມມຸ່ງໝັ້ນຂອງທ່ານ ທີ່ຈະຮຽນຮູ້ ແລະ ດຳລົງຊີວິດຕາມພຣະກິດຕິຄຸນຢູ່ທີ່ບ້ານ, ຄູສອນຂອງທ່ານຢູ່ທີ່ໂບດ ຈະໃຫ້ໂອກາດທ່ານເພື່ອແບ່ງປັນປະສົບການ, ຄວາມຄິດ, ແລະ ຄຳຖາມຂອງທ່ານ ກ່ຽວກັບຂໍ້ພຣະຄຳພີ ທີ່ທ່ານໄດ້ສຶກສາຢູ່ທີ່ບ້ານ.
ເພາະໂຮງຮຽນວັນອາທິດພຽງແຕ່ໄດ້ສອນເດືອນລະສອງເທື່ອເທົ່ານັ້ນ, ສະນັ້ນຄູສອນຂອງໂຮງຮຽນວັນອາທິດ ຈຶ່ງຕ້ອງໄດ້ເລືອກທີ່ຈະຂ້າມ ຫລື ລວມຫລາຍໂຄງຮ່າງເຂົ້າກັນ ເພື່ອໃຫ້ກົງກັບຕາຕະລາງປະຈຳອາທິດ. ສິ່ງນີ້ອາດຈຳເປັນຕ້ອງໄດ້ເຮັດ ໃນວັນອາທິດ ທີ່ບໍ່ມີຫ້ອງຮຽນຕາມປົກກະຕິ ເພາະມີກອງປະຊຸມສະເຕກ ຫລື ເພາະເຫດຜົນຢ່າງອື່ນ. ໃນວັນອາທິດເຊັ່ນນັ້ນ ທ່ານສາມາດສຶກສາພຣະຄຳພີມໍມອນຕໍ່ຢູ່ທີ່ບ້ານ.
ເຮົາຕ້ອງເຮັດຕາມຕາຕະລາງຢູ່ບໍ?
ຕາຕະລາງຈະຊ່ວຍທ່ານໃຫ້ອ່ານພຣະຄຳພີມໍມອນສຳເລັດກ່ອນທ້າຍປີ. ນອກເໜືອຈາກນັ້ນ, ການເຮັດຕາມຕາຕະລາງຄືກັນກັບຄົນອື່ນໆຢູ່ໃນຫວອດຂອງທ່ານ ສາມາດນຳພາໄປສູ່ປະສົບການທີ່ມີຄວາມໝາຍຢູ່ທີ່ໂບດໄດ້. ແຕ່ບໍ່ຄວນຮູ້ສຶກວ່າ ຕ້ອງເຮັດຕາມຕາຕະລາງ; ມັນພຽງເປັນສິ່ງນຳພາ ເພື່ອຊ່ວຍທ່ານສຶກສາເທື່ອລະເລັກເທື່ອລະໜ້ອຍ. ສິ່ງທີ່ສຳຄັນແມ່ນ ທ່ານກຳລັງຮຽນຮູ້ພຣະກິດຕິຄຸນເປັນສ່ວນຕົວ ແລະ ເປັນຄອບຄົວ.