“ວັນທີ 27 ເດືອນມັງກອນ–ວັນທີ 2 ເດືອນກຸມພາ. 1 ນີໄຟ 16–22: ‘ເຮົາຈະຕຽມທາງໄວ້ກ່ອນເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 27 ເດືອນມັງກອນ–ວັນທີ 2 ເດືອນກຸມພາ. 1 ນີໄຟ 16–22,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ລີໄຮຫລຽວເບິ່ງເລຍໂຮນາ

Lehi and the Liahona [ລີໄຮ ແລະ ເລຍໂຮນາ], ໂດຍ ໂຈເຊັບ ບຣິກກີ

ວັນທີ 27 ເດືອນມັງກອນ–ວັນທີ 2 ເດືອນກຸມພາ

1 ນີໄຟ 16–22

“ເຮົາຈະຕຽມທາງໄວ້ກ່ອນເຈົ້າ”

ຂະນະທີ່ທ່ານສຶກສາ 1 ນີໄຟ 16–22, ໃຫ້ຊອກເບິ່ງຂໍ້ພຣະຄຳພີທີ່ປະທັບໃຈທ່ານ. ບາງຄົນມັກໝາຍສີໃສ່ຂໍ້ເຫລົ່ານັ້ນ ຢູ່ໃນພຣະຄຳພີຂອງເຂົາເຈົ້າ; ບາງຄົນມັກໝາຍເຫດໄວ້ຢູ່ຂອບໜ້າເຈ້ຍພຣະຄຳພີ. ໃຫ້ພິຈາລະນາວິທີທີ່ທ່ານຈະບັນທຶກຄວາມປະທັບໃຈທີ່ທ່ານໄດ້ຮັບ.

ບັນທຶກຄວາມປະທັບໃຈຂອງທ່ານ

ຂະນະທີ່ຄອບຄົວຂອງລີໄຮເດີນທາງມຸ້ງໜ້າໄປຫາແຜ່ນດິນແຫ່ງຄຳສັນຍາ, ພຣະຜູ້ເປັນເຈົ້າໄດ້ສັນຍາກັບເຂົາເຈົ້າວ່າ: “ເຮົາຈະຕຽມທາງໄວ້ກ່ອນເຈົ້າ, ຖ້າຫາກເຈົ້າຈະຮັກສາພຣະບັນຍັດຂອງເຮົາ” (1 ນີໄຟ 17:13). ເຫັນໄດ້ຢ່າງແຈ້ງຊັດວ່າຄຳສັນຍານັ້ນບໍ່ໄດ້ໝາຍຄວາມວ່າ ການເດີນທາງຈະງ່າຍ—ສະມາຊິກໃນຄອບຄົວຍັງບໍ່ເຫັນພ້ອມນຳກັນ, ຄັນທະນູກໍຫັກ, ແລະ ຜູ້ຄົນໄດ້ດີ້ນລົນ ແລະ ຕາຍກໍມີ, ແລະ ເຂົາເຈົ້າຍັງໄດ້ສ້າງເຮືອຈາກວັດຖຸດິບນຳອີກ. ເຖິງຢ່າງໃດກໍຕາມ, ເມື່ອຄອບຄົວປະເຊີນກັບຄວາມຍາກລຳບາກ ຫລື ເບິ່ງຄືວ່າເປັນວຽກງານທີ່ເປັນໄປບໍ່ໄດ້, ນີໄຟຮັບຮູ້ວ່າ ພຣະຜູ້ເປັນເຈົ້າບໍ່ເຄີຍຢູ່ຫ່າງໄກ. ເພິ່ນຮູ້ວ່າ ພຣະເຈົ້າ “ບຳລຸງລ້ຽງດູ [ຄົນຊອບທຳ], ແລະ ເຮັດໃຫ້ພວກເຂົາເຂັ້ມແຂງຂຶ້ນ, ແລະ ຈັດຫາທາງຊຶ່ງໂດຍທາງນັ້ນພວກເຂົາຈະສຳເລັດໄດ້ໃນສິ່ງທີ່ພຣະອົງບັນຊາພວກເຂົາ” (1 ນີໄຟ 17:3). ຖ້າຫາກທ່ານເຄີຍສົງໄສວ່າເປັນຫຍັງສິ່ງທີ່ບໍ່ດີຈຶ່ງເກີດກັບຄົນດີ ເຊັ່ນ ນີໄຟ ແລະ ຄອບຄົວຂອງເພິ່ນ, ແລ້ວທ່ານຈະພົບເຫັນຄວາມຮູ້ຢູ່ໃນບົດເຫລົ່ານີ້. ແຕ່ບາງທີສິ່ງທີ່ສຳຄັນຫລາຍໄປກວ່ານັ້ນ, ທ່ານຈະພົບເຫັນສິ່ງທີ່ຄົນດີ ເຮັດ ເມື່ອສິ່ງທີ່ບໍ່ດີເກີດຂຶ້ນ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

1 ນີໄຟ 16–18

ເມື່ອເຮົາຮັກສາພຣະບັນຍັດ, ພຣະຜູ້ເປັນເຈົ້າຈະຊ່ວຍເຮົາປະເຊີນກັບການທ້າທາຍ.

ບົດທີ 16–18 ຂອງ 1 ນີໄຟ ບັນຍາຍການທ້າທາຍຫລາຍຢ່າງ ທີ່ຄອບຄົວຂອງນີໄຟໄດ້ປະເຊີນ, ຮ່ວມທັງການຈັດການກັບຄັນທະນູທີ່ຫັກ (ເບິ່ງ 1 ນີໄຟ 16:17–32), ການຕາຍຂອງອິດຊະມາເອນ (ເບິ່ງ 1 ນີໄຟ 16:34–39), ການສ້າງເຮືອ (ເບິ່ງ 1 ນີໄຟ 17:7–16; 18:1–4), ແລະ ຄອບຄົວບໍ່ປອງດອງກັນ (ເບິ່ງ 1 ນີໄຟ 18:9–22). ນີໄຟໄດ້ຕອບຮັບການທ້າທາຍເຫລົ່ານີ້ດ້ວຍວິທີໃດ ທີ່ແຕກຕ່າງໄປຈາກການຕອບຮັບຂອງສະມາຊິກບາງຄົນໃນຄອບຄົວຂອງເພິ່ນ? ແມ່ນຫຍັງຄືຜົນສະທ້ອນຂອງການຕອບຮັບເຫລົ່ານີ້?

ມັນອາດເປັນປະໂຫຍດທີ່ຈະບັນທຶກສິ່ງທີ່ທ່ານພົບເຫັນໄວ້ໃນຕາຕະລາງ ທີ່ມີຫົວຂໍ້ ດັ່ງເຊັ່ນ: “ການທ້າທາຍ,” “ການຕອບຮັບຂອງນີໄຟ,” “ການຕອບຮັບຂອງຄົນອື່ນໆ,” ແລະ “ຜົນທີ່ໄດ້ຮັບ.” ທ່ານຄິດວ່າ ເປັນຫຍັງນີໄຟຈຶ່ງສາມາດຊື່ສັດຢູ່ເໝືອນເດີມ ເມື່ອຄົນອື່ນບໍ່ສາມາດ? ໃຫ້ພິຈາລະນາວິທີທີ່ຕົວຢ່າງຂອງນີໄຟ ແລະ ຄອບຄົວຂອງເພິ່ນສາມາດຊ່ວຍທ່ານກັບການທ້າທາຍຂອງທ່ານ.

ໃຫ້ເບິ່ງວິດີໂອທີ່ກ່ຽວພັນກັບເລື່ອງນີ້ ຢູ່ໃນວິດີໂອທີ່ກ່ຽວກັບພຣະຄຳພີມໍມອນ ຢູ່ທີ່ ChurchofJesusChrist.org ຫລື ຢູ່ໃນແອພ ຫ້ອງສະໝຸດພຣະກິດຕິຄຸນ.

1 ນີໄຟ 16:10–16, 23–31; 18:11–22

ພຣະຜູ້ເປັນເຈົ້ານຳພາເຮົາຜ່ານທາງວິທີນ້ອຍໆ ແລະ ງ່າຍໆ.

ເມື່ອພຣະເຈົ້ານຳພາຄອບຄົວຂອງລີໄຮເຂົ້າໄປໃນຖິ່ນແຫ້ງແລ້ງກັນດານ, ພຣະອົງບໍ່ໄດ້ໃຫ້ລາຍລະອຽດໃນແຜນການເດີນທາງ ໄປຫາແຜ່ນດິນແຫ່ງຄຳສັນຍາ. ແຕ່ພຣະອົງໄດ້ມອບເລຍໂຮນາໃຫ້ລີໄຮ ເພື່ອນຳພາຄອບຄົວຂອງເພິ່ນທຸກວັນ ເພື່ອມຸ້ງໄປຫາຈຸດໝາຍປາຍທາງ. ພຣະບິດາເທິງສະຫວັນໄດ້ປະທານຫຍັງໃຫ້ທ່ານ ເພື່ອເປັນການນຳພາ ແລະ ການຊີ້ນຳ? ທ່ານຄິດວ່າ “ດ້ວຍວິທີນ້ອຍໆ ແລະ ງ່າຍໆນີ້ ພຣະຜູ້ເປັນເຈົ້ານຳເລື່ອງອັນໃຫຍ່ຍິ່ງມາໃຫ້” ໝາຍຄວາມວ່າແນວໃດ? (1 ນີໄຟ 16:29).

ຂະນະທີ່ທ່ານອ່ານ 1 ນີໄຟ 16:10–16, 23–31 ແລະ 18:11–22, ໃຫ້ຄິດທີ່ຈະຈົດຫລັກທຳທີ່ສະແດງເຖິງວິທີທີ່ພຣະເຈົ້ານຳພາລູກໆຂອງພຣະອົງໄວ້ (ຍົກຕົວຢ່າງ, 1 ນີໄຟ 16:10 ສາມາດສິດສອນວ່າ ບາງເທື່ອພຣະເຈົ້ານຳພາເຮົາໃນວິທີທີ່ບໍ່ຄາດຄິດ). ທ່ານເຄີຍມີປະສົບການໃດແດ່ກັບຫລັກທຳເຫລົ່ານີ້?

ເບິ່ງ ແອວມາ 37:7, 38–47; ຄຳສອນ ແລະ ພັນທະສັນຍາ 64:33–34 ນຳອີກ.

If Ye Are Prepared Ye Shall Not Fear [ຖ້າຫາກພວກເຈົ້າຕຽມພ້ອມ ພວກເຈົ້າຈະບໍ່ຢ້ານກົວ], ໂດຍ ຄະລາກ ແຄວລີ ພຣາຍສ໌

1 ນີໄຟ 19:23–24; 20–22

ເຮົາສາມາດ “ປຽບທຽບພຣະຄຳພີທັງໝົດ” ໃສ່ກັບຕົວເຮົາເອງ.

ເອຊາຢາໄດ້ຂຽນເຖິງລູກຫລານອິດສະຣາເອນທຸກຄົນ, ແລະ ນີໄຟໄດ້ເຫັນວ່າ ສິ່ງນີ້ແມ່ນລວມທັງຄອບຄົວຂອງເພິ່ນໂດຍສະເພາະ—ແລະ ມັນລວມທັງທ່ານ (ເບິ່ງ 1 ນີໄຟ 19:23–24). ກ່ຽວກັບເລື່ອງທີ່ນີໄຟໄດ້ອ້າງເຖິງຖ້ອຍຄຳຂອງເອຊາຢາ, ປະທານເຮັນຣີ ບີ ໄອຣິງ ໄດ້ກ່າວວ່າ, “ຂ້າພະເຈົ້າໄດ້ອ່ານຖ້ອຍຄຳຂອງເອຊາຢາ … ຄາດວ່ານີໄຟໄດ້ເລືອກເອົາພາກສ່ວນຂອງພຣະທຳເອຊາຢາ ທີ່ຂ້າພະເຈົ້າ, ໂດຍທີ່ບໍ່ເປັນຫ່ວງກັບພາບໃນໃຈ, ສາມາດຮັບເອົາມັນເຂົ້າສູ່ໃຈ ຄືກັບວ່າພຣະຜູ້ເປັນເຈົ້າກຳລັງກ່າວກັບຂ້າພະເຈົ້າ” (“The Book of Mormon Will Change Your Life,” Ensign, Feb. 2004, 10).

ໂດຍທີ່ຄຳນຶງເຖິງຖ້ອຍຄຳຂອງປະທານໄອຣິງ, ໃຫ້ພິຈາລະນາຄຳຖາມເຊັ່ນດັ່ງຕໍ່ໄປນີ້ ຂະນະທີ່ທ່ານອ່ານ ບົດທີ 20–22:

1 ນີໄຟ 20:1–9.ສຳນວນໃດຢູ່ໃນຂໍ້ເຫລົ່ານີ້ທີ່ບັນຍາຍເຖິງລູກຫລານຂອງອິດສະຣາເອນ? ມັນບັນຍາຍກ່ຽວກັບເລມັນ ແລະ ເລມູເອນແນວໃດ? ມີຄຳເຕືອນ ແລະ ມີສິ່ງທີ່ຈະເອົາໄປນຳໃຊ້ຢ່າງໃດແດ່ ທີ່ທ່ານພົບເຫັນສຳລັບຕົວທ່ານເອງ?

1 ນີໄຟ 20:17–22.ພຣະຜູ້ເປັນເຈົ້າໄດ້ນຳພາລູກຫລານຂອງອິດສະຣາເອນໃນວິທີໃດ? ພຣະອົງໄດ້ນຳພາຄອບຄົວຂອງລີໄຮໃນວິທີໃດ? ພຣະອົງນຳພາທ່ານໃນວິທີໃດ?

ທ່ານພົບເຫັນຫຍັງອີກແດ່ ຢູ່ໃນ 1 ນີໄຟ 20–22 ທີ່ເຮັດໃຫ້ທ່ານຮູ້ສຶກຄືກັບວ່າພຣະຜູ້ເປັນເຈົ້າກຳລັງກ່າວກັບທ່ານ? ຄວາມຄິດເຫັນຂອງນີໄຟ ຢູ່ໃນ ບົດທີ 22 ຊ່ວຍທ່ານໃຫ້ເຂົ້າໃຈຄຳທຳນາຍຂອງເອຊາຢາແນວໃດ?

1 ນີໄຟ 21

ແມ່ນໃຜຄືເຊື້ອສາຍອິດສະຣາເອນ ແລະ ແມ່ນໃຜເປັນຄົນຕ່າງຊາດ?

ເຊື້ອສາຍອິດສະຣາເອນຄືລູກຫລານຂອງສາດສະດາຢາໂຄບ ຢູ່ໃນພຣະຄຳພີເດີມ, ແມ່ນໃຜທີ່ພຣະຜູ້ເປັນເຈົ້າໄດ້ຕັ້ງຊື່ໃຫ້ໃໝ່ວ່າ ອິດສະຣາເອນ (ເບິ່ງ ປະຖົມມະການ 32:28; 35:10; ເບິ່ງ ຄູ່ມືພຣະຄຳພີ, “ອິດສະຣາເອນ”) ນຳອີກ. ພຣະຜູ້ເປັນເຈົ້າໄດ້ເຮັດພັນທະສັນຍາບາງຢ່າງໂດຍສະເພາະກັບອິດສະຣາເອນ, ແລະ ລູກຫລານຂອງເພິ່ນຖືກນັບວ່າເປັນຜູ້ຄົນແຫ່ງພັນທະສັນຍາຂອງພຣະເຈົ້າ. ເຖິງຢ່າງໃດກໍຕາມ, ຫລາຍລຸ້ນຄົນຕໍ່ມາ, ພວກເຂົາຫລາຍຄົນໄດ້ຫັນໜີຈາກພຣະຜູ້ເປັນເຈົ້າ ແລະ ໃນທີ່ສຸດກໍກະຈັດກະຈາຍຢູ່ທົ່ວແຜ່ນດິນໂລກ.

ຄຳວ່າ ຄົນຕ່າງຊາດ ຢູ່ໃນຂໍ້ພຣະຄຳພີເຫລົ່ານີ້ ໝາຍເຖິງຜູ້ຄົນທີ່ຍັງບໍ່ໄດ້ຮັບພຣະກິດຕິຄຸນເທື່ອ (ເບິ່ງ ຄູ່ມືພຣະຄຳພີ, “ຄົນຕ່າງຊາດ”). ເອຊາຢາໄດ້ສິດສອນວ່າ ໃນຍຸກສຸດທ້າຍຄົນຕ່າງຊາດຈະໄດ້ຮັບພຣະກິດຕິຄຸນ ແລະ ຈະເປັນເຄື່ອງມືໃນການສິດສອນ ແລະ ໃນການເຕົ້າໂຮມເຊື້ອສາຍອິດສະຣາເອນ (ເບິ່ງ 1 ນີໄຟ 21:22; 22:8–12; ເບິ່ງ ເອຊາຢາ 60; 66:18–20 ນຳອີກ).

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

1 ນີໄຟ 17:1–6, 17–22

ບາງທີຄອບຄົວຂອງທ່ານສາມາດປຽບທຽບຄວາມແຕກຕ່າງລະຫວ່າງເລື່ອງລາວການເດີນທາງຂອງນີໄຟ ຢູ່ໃນຖິ່ນແຫ້ງແລ້ງກັນດານ (ເບິ່ງ 1 ນີໄຟ 17:1–6) ກັບເລື່ອງລາວຂອງພວກອ້າຍຂອງເພິ່ນ (ເບິ່ງ 1 ນີໄຟ 17:17–22). ທ່ານຄິດວ່າເປັນຫຍັງເຂົາເຈົ້າຈຶ່ງເຫັນເຫດການອັນດຽວກັນໃນວິທີທາງທີ່ແຕກຕ່າງກັນຫລາຍແທ້? ເຮົາຮຽນຮູ້ຫຍັງແດ່ຈາກນີໄຟກ່ຽວກັບການມີທັດສະນະທີ່ຊື່ສັດ?

1 ນີໄຟ 17:17–22; 18:9–16

ແມ່ນຫຍັງຄືຜົນສະທ້ອນຂອງການອິດສາບັງບຽດ, ການຂັດແຍ້ງ, ແລະ ການເວົ້າຈົ່ມ ໃນຄອບຄົວ? ເຮົາຈະເອົາຊະນະບັນຫາເຫລົ່ານີ້ໄດ້ແນວໃດ?

1 ນີໄຟ 19:22–24

ນີໄຟໄດ້ປຽບທຽບຂໍ້ພຣະຄຳພີໃສ່ກັບຄອບຄົວຂອງເພິ່ນ “ເພື່ອມັນຈະໄດ້ເປັນຜົນປະໂຫຍດ ແລະ ເປັນການຮຽນຮູ້ [ຂອງພວກເຂົາ]” (1 ນີໄຟ 19:23). ມີຫລາຍເລື່ອງ ຢູ່ໃນ 1 ນີໄຟ 16–18 ທີ່ຄອບຄົວຂອງພວກທ່ານສາມາດປຽບທຽບໃສ່ກັບຕົວພວກທ່ານເອງ. ບາງທີພວກທ່ານຄວນສະແດງຕາມເລື່ອງໃດເລື່ອງໜຶ່ງ ແລະ ສົນທະນາກ່ຽວກັບວິທີທີ່ຈະນຳໃຊ້ມັນໃນຄອບຄົວຂອງພວກທ່ານ.

1 ນີໄຟ 21:14–16

ຂ່າວສານຢູ່ໃນຂໍ້ເຫລົ່ານີ້ຈະຊ່ວຍບາງຄົນຜູ້ຮູ້ສຶກຖືກລືມໄດ້ແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສຶກສາສ່ວນຕົວ

ທູນຂໍໃຫ້ພຣະຜູ້ເປັນເຈົ້າຊ່ວຍເຫລືອ. ພຣະຄຳພີຖືກມອບໃຫ້ໂດຍການເປີດເຜີຍ, ແລະ ເຮົາຕ້ອງການ ການເປີດເຜີຍເພື່ອຈະເຂົ້າໃຈມັນແທ້ໆ. ພຣະຜູ້ເປັນເຈົ້າໄດ້ສັນຍາວ່າ, “ຖ້າຫາກເຈົ້າ … ທູນຖາມເຮົາດ້ວຍສັດທາ, … ແນ່ນອນສິ່ງເຫລົ່ານີ້ຈະເປັນທີ່ຮູ້ຈັກແກ່ເຈົ້າ” (1 ນີໄຟ 15:11).