“ວັນທີ 3–9 ເດືອນກຸມພາ. 2 ນີໄຟ 1–5: ‘ພວກເຮົາມີຊີວິດຢູ່ຕາມທາງແຫ່ງຄວາມສຸກ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 3–9 ເດືອນກຸມພາ. 2 ນີໄຟ 1–5,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ອາດາມ ແລະ ເອວາ ໜີຈາກສວນເອເດນ

Adam and Eve [ອາດາມ ແລະ ເອວາ], ໂດຍ ດັກລັສ ຟຣາຍເອີ

ວັນທີ 3–9 ເດືອນກຸມພາ

2 ນີໄຟ 1–5

“ພວກເຮົາມີຊີວິດຢູ່ຕາມທາງແຫ່ງຄວາມສຸກ”

ພຣະຄຳພີສາມາດເປີດປະຕູໃຫ້ແກ່ການເປີດເຜີຍສ່ວນຕົວ. ຂະນະທີ່ທ່ານອ່ານ 2 ນີໄຟ 1–5, ທ່ານອາດພົບເຫັນວ່າພຣະຜູ້ເປັນເຈົ້າມີສິ່ງໃດໜຶ່ງໂດຍສະເພາະ ທີ່ພຣະອົງປະສົງທີ່ຈະສິດສອນທ່ານ.

ບັນທຶກຄວາມປະທັບໃຈຂອງທ່ານ

ຖ້າຫາກທ່ານຮູ້ວ່າ ທ່ານຈະຕາຍເມື່ອໃດ, ແມ່ນຫຍັງຄືຂ່າວສານອັນສຸດທ້າຍ ທີ່ທ່ານຢາກບອກກ່າວ ແກ່ຄົນທີ່ທ່ານຮັກຫລາຍທີ່ສຸດ? ເມື່ອສາດສະດາລີໄຮຮູ້ສຶກວ່າ ເພິ່ນຈະມີຊີວິດຢູ່ບໍ່ໄດ້ດົນ, ເພິ່ນຈຶ່ງໄດ້ເຕົ້າໂຮມລູກຫລານຂອງເພິ່ນເປັນເທື່ອສຸດທ້າຍ ເພື່ອແບ່ງປັນຄວາມຈິງຂອງພຣະກິດຕິຄຸນ ທີ່ເພິ່ນໄດ້ທະນຸຖະໜອມກັບຜູ້ຄົນທີ່ເພິ່ນທະນຸຖະໜອມ. ເພິ່ນໄດ້ສິດສອນເຖິງເສລີພາບ, ການເຊື່ອຟັງ, ການຕົກຂອງອາດາມ ແລະ ເອວາ, ການໄຖ່ຜ່ານທາງພຣະເຢຊູຄຣິດ, ແລະ ຄວາມຊື່ນຊົມ. ບໍ່ແມ່ນລູກທຸກຄົນຂອງເພິ່ນ ໄດ້ຍອມຮັບປະຈັກພະຍານເທື່ອສຸດທ້າຍຂອງເພິ່ນ, ແຕ່ຜູ້ທີ່ຍອມຮັບ—ຕະຫລອດທັງຫລາຍລ້ານຄົນທີ່ອ່ານມັນໃນທຸກວັນນີ້—ພົບເຫັນວ່າ ຢູ່ໃນ ປະຈັກພະຍານຂອງເພິ່ນມີຫລັກທຳສຳລັບການດຳລົງຊີວິດ “ຕາມທາງແຫ່ງຄວາມສຸກ” (2 ນີໄຟ 5:27).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

2 ນີໄຟ 2

ເຮົາເປັນອິດສະລະທີ່ຈະເລືອກຊີວິດນິລັນດອນ.

ແອວເດີ ດີ ທອດ ຄຣິສໂຕເຟີສັນ ໄດ້ກ່າວວ່າ: “ພຣະເຈົ້າປະສົງວ່າລູກໆຂອງພຣະອົງຄວນປະຕິບັດຕາມອຳເພີໃຈທີ່ຊອບທຳ ທີ່ພຣະອົງໄດ້ປະທານໃຫ້ເຂົາ. … ມັນເປັນແຜນ ແລະ ພຣະປະສົງຂອງພຣະອົງ ທີ່ຈະໃຫ້ເຮົາມີບົດບາດໃນການຕັດສິນໃຈດ້ວຍຕົວເອງ” (“Free Forever, to Act for Themselves,” Ensign ຫລື Liahona, Nov. 2014, 16). ໃນຄຳສອນຂອງເພິ່ນກ່ຽວກັບອຳເພີໃຈ, ລີໄຮໄດ້ບອກເຖິງເງື່ອນໄຂທີ່ຈຳເປັນ ທີ່ເຮັດໃຫ້ອຳເພີໃຈເປັນໄປໄດ້ ແລະ ເຮັດໃຫ້ເຮົາສາມາດເອື້ອມເຖິງສັກກະຍະພາບທີ່ສູງສົ່ງຂອງເຮົາ, ລວມທັງດັ່ງຕໍ່ໄປນີ້:

ຄວາມຮູ້ກ່ຽວກັບຄວາມດີ ແລະ ຄວາມຊົ່ວ (2 ນີໄຟ 2:5)
ກົດທີ່ມອບໃຫ້ມວນມະນຸດ (2 ນີໄຟ 2:5)
ການກົງກັນຂ້າມ, ການເລືອກທີ່ລໍ້ໃຈ (2 ນີໄຟ 2:11)
ອຳນາດທີ່ຈະກະທຳ (2 ນີໄຟ 2:16)

ຂະນະທີ່ທ່ານອ່ານ 2 ນີໄຟ 2, ທ່ານຮຽນຮູ້ຫຍັງແດ່ກ່ຽວກັບເງື່ອນໄຂແຕ່ລະຢ່າງຂອງອຳເພີໃຈ ແລະ ຄວາມສຳພັນຂອງເງື່ອນໄຂທັງໝົດຕໍ່ກັນແລະກັນ? ຈະມີຫຍັງເກີດຂຶ້ນກັບອຳເພີໃຈຂອງເຮົາ ຖ້າຫາກເງື່ອນໄຂຢ່າງໜຶ່ງ ຫລື ຫລາຍກວ່ານັ້ນຂາດໄປ? ທ່ານຮຽນຮູ້ຫຍັງອີກແດ່ຈາກຖ້ອຍຄຳຂອງລີໄຮ?

2 ນີໄຟ 2:22–29

ການຕົກ ແລະ ການຊົດໃຊ້ຂອງພຣະເຢຊູຄຣິດ ເປັນພາກສ່ວນທີ່ຈຳເປັນໃນແຜນຂອງພຣະບິດາເທິງສະຫວັນ.

ຫລາຍຄົນເຫັນການຕົກຂອງອາດາມ ແລະ ເອວາ ວ່າເປັນເຫດການທີ່ໜ້າໂສກເສົ້າ. ເຖິງຢ່າງໃດກໍຕາມ, ຄຳສອນຂອງລີໄຮກ່ຽວກັບການຕົກ ເປີດເຜີຍເຫດຜົນວ່າ ເປັນຫຍັງມັນຈຶ່ງສຳຄັນໃນແຜນຂອງພຣະບິດາ ສຳລັບຄວາມກ້າວໜ້ານິລັນດອນຂອງເຮົາ. ຂະນະທີ່ທ່ານອ່ານຂໍ້ເຫລົ່ານີ້, ໃຫ້ຊອກຫາເຫດຜົນວ່າ ເປັນຫຍັງການຕົກຈຶ່ງຈຳເປັນຕ້ອງໄດ້ເກີດຂຶ້ນ ເພື່ອວ່າເຮົາ—ລູກໆຂອງພຣະບິດາເທິງສະຫວັນ—ຈະກ້າວໜ້າ. ການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດໄຖ່ເຮົາຈາກການຕົກແນວໃດ?

ເບິ່ງ ໂມເຊ 5:9–12; 6:51–62; “ການຕົກຂອງອາດາມ ແລະ ເອວາ,” ຄູ່ມືພຣະຄຳພີ, scriptures.ChurchofJesusChrist.org ນຳອີກ.

2 ນີໄຟ 3:6–24

ໂຈເຊັບ ສະມິດ ໄດ້ຖືກແຕ່ງຕັ້ງລ່ວງໜ້າຕໍ່ການຟື້ນຟູພຣະກິດຕິຄຸນ.

ສ່ວນສຸດທ້າຍຂອງ 2 ນີໄຟ 3 ບັນຈຸການທຳນາຍຂອງໂຢເຊັບແຫ່ງເອຢິບ ກ່ຽວກັບຜູ້ພະຍາກອນໃນອະນາຄົດ ຜູ້ທີ່ຈະມີຊື່ຄືກັນກັບເພິ່ນ (ເບິ່ງ ຂໍ້ທີ 14–15)—ໂຈເຊັບ ສະມິດ. ຄຳທຳນາຍນັ້ນຍັງໄດ້ບອກຫລາຍຢ່າງກ່ຽວກັບພາລະກິດຂອງໂຈເຊັບ ສະມິດ. ຂໍ້ທີ 6–24 ກ່າວຫຍັງແດ່ ວ່າໂຈເຊັບ ສະມິດ, “ຜູ້ພະຍາກອນທີ່ປະເສີດ,” ຈະເຮັດ ເພື່ອເປັນພອນໃຫ້ແກ່ຜູ້ຄົນຂອງພຣະເຈົ້າ? ວຽກງານຂອງໂຈເຊັບ ສະມິດ “ມີຄຸນຄ່າໃຫຍ່ຫລວງ” ຕໍ່ທ່ານແນວໃດ?

ພາກສ່ວນທີ່ສຳຄັນຢ່າງໜຶ່ງຂອງພາລະກິດຂອງໂຈເຊັບ ສະມິດ ແມ່ນການນຳການຂຽນຂອງລູກຫລານຂອງໂຢເຊັບອອກມາ, ຊຶ່ງບັນຈຸຢູ່ໃນພຣະຄຳພີມໍມອນ. ທ່ານຮຽນຮູ້ຫຍັງແດ່ຈາກບົດນີ້ ກ່ຽວກັບຄວາມສຳຄັນຂອງພຣະຄຳພີມໍມອນ?

ເບິ່ງ ການແປຂອງໂຈເຊັບ ສະມິດ, ປະຖົມມະການ 50:24–38 (ໃນ ຄູ່ມືພຣະຄຳພີ) ນຳອີກ.

Prophet of the Lord [ສາດສະດາຂອງພຣະຜູ້ເປັນເຈົ້າ], ໂດຍ ເດວິດ ລິນຊະລີ

2 ນີໄຟ 4:15–35

ເຮົາສາມາດຫັນມາຫາພຣະເຈົ້າ ໃນຄວາມອ່ອນແອຂອງເຮົາໄດ້.

ນີໄຟຫາກໍໄດ້ສູນເສຍບິດາຂອງເພິ່ນ. ໜ້າທີ່ຮັບຜິດຊອບສຳລັບການນຳພາຄອບຄົວຂອງເພິ່ນ ບັດນີ້ມາຕົກຢູ່ທີ່ເພິ່ນ. ເພິ່ນຮູ້ສຶກວ່າຖືກອ້ອມຮອບໄປດ້ວຍສິ່ງລໍ້ລວງ ແລະ ທໍ້ຖອຍໃຈເພາະບາບຂອງເພິ່ນ. ເຖິງແມ່ນຖ້າຫາກສະຖານະການຂອງທ່ານແຕກຕ່າງຈາກຂອງນີໄຟ, ແຕ່ທ່ານກໍສາມາດເຂົ້າໃຈບາງສິ່ງໃນຄວາມຄິດ ແລະ ຄວາມຮູ້ສຶກຂອງເພິ່ນໄດ້ ທີ່ບັນທຶກຢູ່ໃນ 2 ນີໄຟ 4:15–35. ແມ່ນຫຍັງໄດ້ຊ່ວຍນີໄຟ ໃນຄວາມເປັນທຸກຂອງເພິ່ນ? ການຕອບຮັບຂອງນີໄຟຊ່ວຍທ່ານປະເຊີນກັບບັນຫາຂອງທ່ານແນວໃດ?

2 ນີໄຟ 5

ຄວາມສຸກແມ່ນພົບເຫັນຢູ່ໃນການດຳລົງຊີວິດຕາມພຣະກິດຕິຄຸນ.

ທ່ານຈະບັນຍາຍຄວາມສຸກວ່າແນວໃດ? ນີໄຟໄດ້ຂຽນວ່າ ຜູ້ຄົນຂອງເພິ່ນ ດຳລົງຊີວິດ “ຕາມທາງແຫ່ງຄວາມສຸກ” (2 ນີໄຟ 5:27). ທ່ານສາມາດຊອກຫາສິ່ງທີ່ນີໄຟ ແລະ ຜູ້ຄົນຂອງເພິ່ນເລືອກເຮັດ ທີ່ນຳໄປສູ່ຄວາມສຸກ—ວິທີທີ່ເຂົາເຈົ້າສະໜັບສະໜູນກັນແລະກັນ ແລະ ຄອບຄົວຂອງເຂົາເຈົ້າ, ສິ່ງທີ່ເຂົາເຈົ້າຖືວ່າສຳຄັນຢູ່ໃນຊຸມຊົນຂອງເຂົາເຈົ້າ, ແລະ ອື່ນໆ. ທ່ານຮຽນຮູ້ຫຍັງແດ່ ທີ່ສາມາດຊ່ວຍທ່ານໃຫ້ສ້າງຊີວິດຕາມທາງແຫ່ງຄວາມສຸກ, ຄືກັນກັບຜູ້ຄົນຂອງນີໄຟ?

2 ນີໄຟ 5:20–21

ແມ່ນຫຍັງຄືການສາບແຊ່ງທີ່ມາສູ່ຊາວເລມັນ?

ໃນວັນເວລາຂອງນີໄຟ ການສາບແຊ່ງຂອງຊາວເລມັນແມ່ນວ່າ ພວກເຂົາ “ໄດ້ຖືກຕັດອອກຈາກທີ່ປະທັບ [ຂອງພຣະຜູ້ເປັນເຈົ້າ] … ເພາະຄວາມຊົ່ວຮ້າຍຂອງພວກເຂົາ” (2 ນີໄຟ 5:20–21). ນີ້ໝາຍຄວາມວ່າ ພຣະວິນຍານຂອງພຣະຜູ້ເປັນເຈົ້າໄດ້ຖອນຈາກຊີວິດຂອງພວກເຂົາ. ຕໍ່ມາ ເມື່ອຊາວເລມັນໄດ້ຮັບເອົາພຣະກິດຕິຄຸນຂອງພຣະເຢຊູຄຣິດ, “ການສາບແຊ່ງຂອງພຣະເຈົ້າຈຶ່ງບໍ່ໄດ້ຕິດຕາມພວກເຂົາອີກຕໍ່ໄປ” (ແອວມາ 23:18).

ພຣະຄຳພີມໍມອນກໍຍັງກ່າວອີກວ່າ ເຄື່ອງໝາຍຂອງຜິວຄ້ຳໄດ້ມາສູ່ຊາວເລມັນ ຫລັງຈາກທີ່ຊາວນີໄຟໄດ້ແຍກອອກຈາກພວກເຂົາ. ສະພາບ ແລະ ການປະກົດຂອງເຄື່ອງໝາຍນີ້ ບໍ່ຖືກເຂົ້າໃຈຢ່າງລະອຽດ. ໃນຕອນຕົ້ນ ເຄື່ອງໝາຍໄດ້ເຮັດໃຫ້ຊາວເລມັນແຕກຕ່າງຈາກຊາວນີໄຟ. ຕໍ່ມາ, ເມື່ອທັງຊາວນີໄຟ ແລະ ຊາວເລມັນ ແຕ່ລະຝ່າຍໄດ້ຜ່ານໄລຍະຂອງຄວາມຊົ່ວຮ້າຍ ແລະ ຄວາມຊອບທຳ, ເຄື່ອງໝາຍກໍເລີຍບໍ່ກ່ຽວຂ້ອງກັບສິ່ງທີ່ບົ່ງບອກວ່າຜູ້ໃດເປັນຊາວເລມັນ ເມື່ອຢືນຢູ່ຕໍ່ພຣະພັກຂອງພຣະເຈົ້າ.

ສາດສະດາຢືນຢັນໃນວັນເວລາຂອງເຮົາວ່າ ຜິວຄ້ຳນັ້ນບໍ່ໄດ້ເປັນເຄື່ອງໝາຍຂອງການບໍ່ໄດ້ເປັນຜູ້ໂປດປານຂອງສະຫວັນ ຫລື ເປັນການສາບແຊ່ງ. ສາດສະໜາຈັກໄດ້ຍອມຮັບຄຳສອນຂອງນີໄຟ ທີ່ວ່າພຣະຜູ້ເປັນເຈົ້າ “ບໍ່ປະຕິເສດຜູ້ໃດທີ່ມາຫາພຣະອົງເລີຍ, ບໍ່ວ່າດຳ ແລະ ຂາວ, ຂ້າທາດ ແລະ ຜູ້ເປັນອິດສະລະ, ຊາຍ ແລະ ຍິງ” (2 ນີໄຟ 26:33). ປະທານຣະໂຊ ເອັມ ແນວສັນ ໄດ້ປະກາດວ່າ: “ພຣະຜູ້ເປັນເຈົ້າໄດ້ເນັ້ນຄຳສອນທີ່ສຳຄັນຂອງພຣະອົງເຖິງໂອກາດທີ່ເທົ່າທຽມກັນສຳລັບລູກໆຂອງພຣະອົງ. … ຄວາມແຕກຕ່າງໃນວັດທະນະທຳ, ພາສາ, ເພດ, ເຊື້ອຊາດ, ແລະ ສັນຊາດ ໄດ້ກາຍເປັນເລື່ອງທີ່ບໍ່ສຳຄັນ ເມື່ອຜູ້ທີ່ຊື່ສັດເຂົ້າໄປໃນເສັ້ນທາງແຫ່ງພັນທະສັນຍາ ແລະ ມາຫາພຣະຜູ້ໄຖ່ທີ່ຊົງຮັກຂອງເຮົາ” (“President Nelson Remarks at Worldwide Priesthood Celebration” [June 1, 2018], newsroom.ChurchofJesusChrist.org).

ເບິ່ງ “Till We All Come in the Unity of the Faith” (video, ChurchofJesusChrist.org ນຳອີກ).

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

2 ນີໄຟ 1:13–25

ຂໍ້ເຫລົ່ານີ້ສິດສອນເຮົາຫຍັງແດ່ ກ່ຽວກັບຄວາມປາດຖະໜາສູງສຸດຂອງພໍ່ ຫລື ແມ່ທີ່ຊອບທຳ ສຳລັບລູກໆຂອງເຂົາເຈົ້າ?

2 ນີໄຟ 3:6

ໃຫ້ອ່ານ “ຜູ້ພະຍາກອນ” ໃນຄູ່ມືພຣະຄຳພີ ນຳກັນ. ໂຈເຊັບ ສະມິດ ໄດ້ເປັນຜູ້ພະຍາກອນແນວໃດ? ເປັນຫຍັງເຮົາຈຶ່ງມີຄວາມກະຕັນຍູສຳລັບວຽກງານທີ່ໂຈເຊັບ ສະມິດ ໄດ້ເຮັດສຳເລັດ? (ເບິ່ງ 2 ນີໄຟ 3:6–24).

2 ນີໄຟ 4:20–25

ຂະນະທີ່ພວກທ່ານອ່ານ 2 ນີໄຟ 4:20–25 ນຳກັນ, ໃຫ້ຢຸດອ່ານຫລັງຈາກແຕ່ລະຂໍ້, ແລະ ໃຫ້ເຊື້ອເຊີນສະມາຊິກໃນຄອບຄົວ ໃຫ້ແບ່ງປັນປະສົບການທີ່ເຂົາເຈົ້າມີ ຫລື ຮູ້ສຶກເຖິງສິ່ງທີ່ນີໄຟໄດ້ບັນຍາຍ. ພຣະເຈົ້າໄດ້ເຮັດຫຍັງແດ່ສຳລັບຄອບຄົວຂອງເຮົາ?

2 ນີໄຟ 5

ໃນວິທີທາງໃດແດ່ທີ່ຄອບຄົວຂອງທ່ານດຳລົງຊີວິດ “ຕາມທາງແຫ່ງຄວາມສຸກ”? ໃນຂະນະທີ່ຄອບຄົວຂອງທ່ານອ່ານ 2 ນີໄຟ 5, ພວກທ່ານສາມາດສົນທະນາກ່ຽວກັບສິ່ງທີ່ນີໄຟເອົາໃຈໃສ່ຕໍ່: ຄອບຄົວ (ຂໍ້ທີ 6), ພຣະບັນຍັດ (ຂໍ້ທີ 10), ພຣະຄຳພີ (ຂໍ້ທີ 12), ການສຶກສາ (ຂໍ້ທີ 15), ພຣະວິຫານ (ຂໍ້ທີ 16), ວຽກງານ (ຂໍ້ທີ 17), ແລະ ການເອີ້ນໃນສາດສະໜາຈັກ (ຂໍ້ທີ 26). ວິທີໜຶ່ງທີ່ຈະເຮັດສິ່ງນີ້ ແມ່ນໃຫ້ຊອກຫາສິ່ງຂອງທີ່ເປັນຕົວແທນໃຫ້ແກ່ບາງຢ່າງ ແລະ ເວົ້າລົມກັນເຖິງວິທີທີ່ເຮົາສະແດງວ່າ ເຮົາ, ຄືກັນກັບນີໄຟ, ນັບຖືວ່າສິ່ງເຫລົ່ານີ້ມີຄຸນຄ່າຄືກັນ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສິດສອນຂອງເຮົາ

ຊ່າງສັງເກດ. ຖ້າຫາກທ່ານເອົາໃຈໃສ່ຕໍ່ສິ່ງທີ່ເກີດຂຶ້ນຢູ່ໃນຊີວິດຂອງລູກໆຂອງທ່ານ, ແລ້ວທ່ານຈະພົບເຫັນໂອກາດທີ່ດີເລີດ ທີ່ຈະສິດສອນ. ຄວາມຄິດຄວາມເຫັນຂອງລູກໆຂອງທ່ານ ຫລື ຄຳຖາມທີ່ພວກເຂົາຖາມ ກໍສາມາດເປັນໂອກາດສຳລັບສ້ຽວເວລາຂອງການສິດສອນໄດ້. (ເບິ່ງ Teaching in the Savior’s Way, 16.)