“ວັນທີ 17–23 ເດືອນກຸມພາ. 2 ນີໄຟ 11–25: ‘ພວກເຮົາປິຕິຍິນດີໃນພຣະຄຣິດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 17–23 ເດືອນກຸມພາ. 2 ນີໄຟ 11–25,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ເອຊາຢາກຳລັງຂຽນໃສ່ໜັງສືມ້ວນ

ວັນທີ 17–23 ເດືອນກຸມພາ

2 ນີໄຟ 11–25

“ພວກເຮົາປິຕິຍິນດີໃນພຣະຄຣິດ”

ນີໄຟໄດ້ສອນວ່າ ຖ້ອຍຄຳຂອງເອຊາຢາແມ່ນ “ແຈ່ມແຈ້ງແກ່ຄົນທັງປວງທີ່ເຕັມໄປດ້ວຍວິນຍານແຫ່ງການທຳນາຍ” (2 ນີໄຟ 25:4). ຂະນະທີ່ທ່ານອ່ານ, ໃຫ້ສະແຫວງຫາວິນຍານແຫ່ງການທຳນາຍ ໂດຍການກະກຽມຕົວທ່ານເອງທາງວິນຍານ, ຮັບຟັງພຣະວິນຍານ, ແລະ ບັນທຶກຄວາມປະທັບໃຈຂອງທ່ານ.

ບັນທຶກຄວາມປະທັບໃຈຂອງທ່ານ

ການສະຫລັກອັກຂະລະໃສ່ແຜ່ນໂລຫະບໍ່ໄດ້ເປັນເລື່ອງງ່າຍ, ແລະ ຊ່ອງວ່າງຢູ່ໃນແຜ່ນຈາລຶກນ້ອຍຂອງນີໄຟກໍມີຈຳກັດ. ດັ່ງນັ້ນ ເປັນຫຍັງນີໄຟຈຶ່ງໃຊ້ຄວາມພະຍາຍາມຫລາຍທີ່ສຸດ ເພື່ອກ່າຍການຂຽນຂອງເອຊາຢາໃສ່ໃນບັນທຶກຂອງເພິ່ນ? ເພິ່ນໄດ້ເຮັດມັນ “ສຳລັບຜູ້ໃດຜູ້ໜຶ່ງ … ຈະເຫັນຄຳເວົ້າເຫລົ່ານີ້ ຈະໄດ້ມີກຳລັງໃຈ ແລະ ປິຕິຍິນດີ” (2 ນີໄຟ 11:8). ໃນວິທີໜຶ່ງ, ຄຳເຊື້ອເຊີນໃຫ້ອ່ານການຂຽນຂອງເອຊາຢາ ເປັນຄຳເຊື້ອເຊີນໃຫ້ປິຕິຍິນດີ. ທ່ານສາມາດເບີກບານ, ດັ່ງທີ່ນີໄຟໄດ້ເບີກບານ, ໃນຄຳທຳນາຍກ່ຽວກັບການເຕົ້າໂຮມຂອງຊາວອິດສະຣາເອນ, ການສະເດັດມາຂອງພຣະເມຊີອາ, ແລະ ຄວາມສະຫງົບໃນຊ່ວງໄລຍະໜຶ່ງພັນປີທີ່ສັນຍາໄວ້ກັບຄົນຊອບທຳ. ທ່ານສາມາດປິຕິຍິນດີ ແມ່ນແຕ່ໃນວັນເວລາແຫ່ງ “ຄວາມຫຍຸ້ງຍາກ, ແລະ ຄວາມມືດ,” ທ່ານກໍຍັງ “ໄດ້ເຫັນແສງສະຫວ່າງຢ່າງໃຫຍ່ຫລວງ” (2 ນີໄຟ 18:22; 19:2). ທ່ານສາມາດປິຕິຍິນດີ ທີ່ທ່ານສາມາດ “ຕັກນ້ຳຈາກບໍ່ແຫ່ງຄວາມລອດ” (2 ນີໄຟ 22:3). ໃນອີກຄຳໜຶ່ງ, ທ່ານສາມາດ “ປິຕິຍິນດີໃນພຣະຄຣິດ” (2 ນີໄຟ 25:26).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

2 ນີໄຟ 11–25

ເຮົາຈະສາມາດເຂົ້າໃຈຄຳສອນຂອງເອຊາຢາ ຫລາຍຂຶ້ນກວ່າເກົ່າໄດ້ແນວໃດ?

ນີໄຟໄດ້ຍອມຮັບວ່າ “ຄຳເວົ້າຂອງເອຊາຢາ [ບາງຄຳ] ບໍ່ແຈ່ມແຈ້ງ” (2 ນີໄຟ 25:4). ສິ່ງນີ້ສາມາດເປັນຄວາມຈິງສຳລັບຜູ້ທີ່ບໍ່ຮູ້ຈັກຫຍັງຫລາຍກ່ຽວກັບວັດທະນະທຳ ແລະ ພູມີສາດຂອງຊາວຢິວໃນສະໄໝບູຮານ ຄືກັນກັບນີໄຟຮູ້ຈັກ (ເບິ່ງ 2 ນີໄຟ 25:6). ແຕ່ນີໄຟກໍຍັງໄດ້ໃຫ້ຄຳແນະນຳ ເພື່ອຊ່ວຍເຮົາໃຫ້ພົບເຫັນຄວາມໝາຍຢູ່ໃນການຂຽນຂອງເອຊາຢາ ທີ່ວ່າ:

ໃຫ້ “ປຽບທຽບຄຳເວົ້າຂອງເພິ່ນກັບ” ຕົວທ່ານເອງ (2 ນີໄຟ 11:2).ຄຳສອນຂອງເອຊາຢາຫລາຍຢ່າງ ອາດມີຫລາກຫລາຍຄວາມໝາຍ ແລະ ການນຳມາໃຊ້ ໃນຫລາຍຮູບແບບ. ຍົກຕົວຢ່າງ, ການຂຽນຂອງເພິ່ນກ່ຽວກັບການກະຈັດກະຈາຍ ແລະ ການເຕົ້າໂຮມຂອງຊາວອິດສະຣາເອນ ອາດກະຕຸ້ນທ່ານໃຫ້ຄິດກ່ຽວກັບຄວາມຈຳເປັນຂອງຕົວເອງ ທີ່ຈະ “ຖືກເຕົ້າໂຮມ” ຄືນສູ່ພຣະຜູ້ຊ່ວຍໃຫ້ລອດ.

ສະແຫວງຫາທີ່ຈະ “ເຕັມໄປດ້ວຍວິນຍານແຫ່ງການທຳນາຍ” (2 ນີໄຟ 25:4).ວິທີທີ່ດີທີ່ສຸດທີ່ຈະເຂົ້າໃຈການທຳນາຍຂອງເອຊາຢາແມ່ນ ທີ່ຈະສະແຫວງຫາການດົນໃຈຈາກພຣະວິນຍານ. ອະທິຖານເພື່ອການນຳພາທາງວິນຍານ. ທ່ານອາດບໍ່ເຂົ້າໃຈທຸກຢ່າງບາດດຽວ, ແຕ່ພຣະວິນຍານສາມາດຊ່ວຍທ່ານໃຫ້ຮຽນຮູ້ສິ່ງທີ່ທ່ານຕ້ອງຮູ້ສຳລັບຊີວິດຂອງທ່ານໃນທຸກວັນນີ້.

ທ່ານອາດພົບວ່າມັນເປັນປະໂຫຍດທີ່ຈະກວດເບິ່ງສິ່ງຊ່ວຍສຶກສາຢູ່ໃນພຣະຄຳພີ, ລວມທັງໝາຍເຫດຢູ່ທາງລຸ່ມໜ້າປຶ້ມ, ຫົວຂໍ້ບົດ, ຄູ່ມືພຣະຄຳພີ, ແລະ ອື່ນໆ.

2 ນີໄຟ 11:2–8; 25:19–29

“ທາງທີ່ຖືກຕ້ອງຄື ເຊື່ອໃນພຣະຄຣິດ.”

ນີໄຟທັງແນະນຳ ແລະ ສະຫລຸບຄຳຂອງເອຊາຢາ ທີ່ເພິ່ນຍົກມາອ້າງ ໂດຍການສະແດງປະຈັກພະຍານຂອງເພິ່ນ ເຖິງພຣະເຢຊູຄຣິດ (ເບິ່ງ 2 ນີໄຟ 11:2–8; 25:19–29). ແມ່ນຫຍັງທີ່ປະທັບໃຈທ່ານ ກ່ຽວກັບປະຈັກພະຍານຂອງເພິ່ນ? ຂະນະທີ່ທ່ານສຶກສາໃນອາທິດນີ້, ໃຫ້ຄິດກ່ຽວກັບຄວາມປາດຖະໜາຂອງນີໄຟ ທີ່ຈະ “ຊັກຊວນລູກຫລານ [ຂອງເພິ່ນ] … ໃຫ້ເຊື່ອໃນພຣະຄຣິດ, ແລະ ໃຫ້ທຳຕົນປອງດອງກັບພຣະເຈົ້າ” (2 ນີໄຟ 25:23), ແລະ ໃຫ້ສັງເກດເບິ່ງຂໍ້ຄວາມທີ່ຊັກຊວນ ທ່ານ ໃຫ້ເຊື່ອ ແລະ ຕິດຕາມພຣະເຢຊູຄຣິດ.

ມັນອາດເປັນປະໂຫຍດທີ່ຈະຈື່ຈຳວ່າ ຄຳສອນຫລາຍຢ່າງຂອງເອຊາຢາກ່ຽວກັບພຣະຜູ້ຊ່ວຍໃຫ້ລອດ ເປັນການສື່ສານຜ່ານທາງສັນຍາລັກ. ຍົກຕົວຢ່າງ, ທ່ານອາດເຫັນພຣະຜູ້ຊ່ວຍໃຫ້ລອດໃນສັນຍາລັກດັ່ງເຊັ່ນ ເຈົ້າຂອງສວນອະງຸ່ນ (ເບິ່ງ 2 ນີໄຟ 15:1–7), ກ້ອນຫີນ (ເບິ່ງ 2 ນີໄຟ 18:14), ແລະ ແສງສະຫວ່າງ (ເບິ່ງ 2 ນີໄຟ 19:2). ມີສັນຍາລັກຢ່າງອື່ນໃດແດ່ເຖິງພຣະເຢຊູຄຣິດ ທີ່ທ່ານພົບເຫັນຢູ່ໃນບົດເຫລົ່ານີ້? ສັນຍາລັກເຫລົ່ານີ້ສິດສອນທ່ານຫຍັງແດ່ກ່ຽວກັບພຣະອົງ?

2 ນີໄຟ 12–13

ຄົນອວດດີ ແລະ ຄົນເຫັນແກ່ໂລກ ຈະຖ່ອມຕົວລົງ.

ນີໄຟໄດ້ເຫັນລ່ວງໜ້າວ່າ ຄວາມຈອງຫອງຈະເປັນສາເຫດຂອງຄວາມພິນາດຂອງຜູ້ຄົນຂອງເພິ່ນ (ເບິ່ງ 1 ນີໄຟ 12:19). ດັ່ງນັ້ນ ມັນຈຶ່ງບໍ່ແປກເລີຍທີ່ນີໄຟໄດ້ແບ່ງປັນຄຳເຕືອນຂອງເອຊາຢາຄືນອີກ ກັບຜູ້ຄົນຂອງເພິ່ນ ເພື່ອຕໍ່ຕ້ານກັບຄວາມຈອງຫອງ. ໃນ ບົດທີ 12 ແລະ 13, ໃຫ້ຊອກຫາຄຳທີ່ເອຊາຢາໄດ້ໃຊ້ ເພື່ອບັນຍາຍເຖິງຄວາມຈອງຫອງ, ດັ່ງເຊັ່ນ ຄົນຫຍິ່ງຍະໂສ ແລະ ຄົນຈອງຫອງ. ແລ້ວທ່ານຄວນພະຍາຍາມແປຄວາມໝາຍຂອງຄຳເຕືອນເຫລົ່ານີ້ ດ້ວຍຄຳຂອງທ່ານເອງ, ຄືກັນກັບວ່າທ່ານກຳລັງຂຽນຂ່າວສານເຖິງຕົວທ່ານເອງ ເພື່ອເຕືອນກ່ຽວກັບຄວາມຈອງຫອງ.

ເບິ່ງ “Chapter 18: Beware of Pride” (Teachings of Presidents of the Church: Ezra Taft Benson [2014], 229–40) ນຳອີກ.

2 ນີໄຟ 12:2–5; 21:9–12; 22; 24:1–3

ໃນຊ່ວງໄລຍະໜຶ່ງພັນປີ, ຜູ້ຄົນຂອງພຣະເຈົ້າຈະຊື່ນຊົມກັບຄວາມສະຫງົບ.

ທ່ານອາດພົບເຫັນວ່າມັນຊ່ວຍໄດ້ຫລາຍ ທີ່ຈະວາດພາບເຫັນຕົວເອງ ແທນນີໄຟ ແລະ ຜູ້ຄົນຂອງເພິ່ນ. ວາດພາບວ່າຕົວເອງໄດ້ໜີຈາກເຢຣູຊາເລັມ ກ່ອນມັນໄດ້ຖືກທຳລາຍບໍ່ດົນຈາກນັ້ນ (ເບິ່ງ 2 ນີໄຟ 25:10), ແລະ ບັດນີ້ທ່ານໄດ້ເປັນຜູ້ໜຶ່ງທີ່ກະຈັດກະຈາຍຂອງຊາວອິດສະຣາເອນ. ຈະຮູ້ສຶກແນວໃດ ທີ່ໄດ້ອ່ານຄຳສອນຂອງເອຊາຢາ ກ່ຽວກັບການເຕົ້າໂຮມຊາວອິດສະຣາເອນໃນອະນາຄົດ ແລະ ຄວາມສະຫງົບໃນຊ່ວງໄລຍະໜຶ່ງພັນປີ? ໃນຖານະເປັນໄພ່ພົນຍຸກສຸດທ້າຍ, ເຮົາໄດ້ຖືກເອີ້ນໃຫ້ຊ່ວຍເຕົ້າໂຮມຜູ້ຄົນຂອງພຣະເຈົ້າ ໃນຍຸກສຸດທ້າຍ ໃນການຕຽມສຳລັບການຂຶ້ນຄອງຂອງພຣະຄຣິດໃນຊ່ວງໄລຍະໜຶ່ງພັນປີ. ຂະນະທີ່ທ່ານອ່ານຂໍ້ເຫລົ່ານີ້, ໃຫ້ໄຕ່ຕອງເຖິງວິທີທີ່ທ່ານຈະຊ່ວຍເຮັດໃຫ້ຄຳທຳນາຍທີ່ບັນຍາຍໄວ້ ສຳເລັດຄົບຖ້ວນໄດ້ແນວໃດ. ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງແດ່ ເພື່ອຊ່ວຍເຕົ້າໂຮມຜູ້ຄົນຂອງພຣະເຈົ້າ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

2 ນີໄຟ 12:1–3

ຖ້າຫາກທ່ານເຄີຍໄປພຣະວິຫານ—“ພູທີ່ເປັນບ່ອນຕັ້ງພຣະວິຫານຂອງພຣະຜູ້ເປັນເຈົ້າ”—ທ່ານສາມາດບອກໃຫ້ຄອບຄົວຂອງທ່ານຮູ້ວ່າ ພັນທະສັນຍາຂອງພຣະວິຫານ ຊ່ວຍທ່ານ “ເດີນຕາມທາງ [ຂອງພຣະຜູ້ເປັນເຈົ້າ]” ແນວໃດ. ຖ້າຫາກທ່ານຍັງບໍ່ເຄີຍໄປພຣະວິຫານເທື່ອ, ການອ່ານຂໍ້ເຫລົ່ານີ້ ອາດດົນໃຈໃຫ້ມີການສົນທະນາກ່ຽວກັບວິທີທີ່ພວກທ່ານສາມາດກະກຽມສຳລັບພອນຂອງພຣະວິຫານໄດ້.

2 ນີໄຟ 15:18–23

ຄອບຄົວຂອງທ່ານສາມາດຄິດຫາຕົວຢ່າງໃນສະໄໝປະຈຸບັນ ເຖິງແນວຄິດທີ່ບໍ່ຊອບທຳ ທີ່ຂໍ້ເຫລົ່ານີ້ບັນຍາຍ ໄດ້ບໍ? ເຮົາຈະສາມາດຫລີກເວັ້ນຈາກການຖືກຫລອກໂດຍແນວຄິດຜິດກ່ຽວກັບຄວາມດີ ແລະ ຄວາມຊົ່ວ ໄດ້ແນວໃດ?

2 ນີໄຟ 21

ຖ້າຫາກຄອບຄົວຂອງທ່ານຕ້ອງການຄວາມຊ່ວຍເຫລືອ ເພື່ອຈະເຂົ້າໃຈບົດນີ້ (ຊຶ່ງຄືກັນກັບ ເອຊາຢາ 11), ທ່ານສາມາດໄດ້ຮັບຄວາມຮູ້ ທີ່ຢູ່ໃນ ຄຳສອນ ແລະ ພັນທະສັນຍາ 113:1–6, ຊຶ່ງໃນນັ້ນ ສາດສະດາໂຈເຊັບ ສະມິດ ໄດ້ຕອບຄຳຖາມບາງຢ່າງກ່ຽວກັບ ເອຊາຢາ 11. ເຮົາຮຽນຮູ້ຫຍັງແດ່ກ່ຽວກັບພຣະເຢຊູຄຣິດ ຈາກຂໍ້ເຫລົ່ານີ້?

2 ນີໄຟ 21:9

ມີສິ່ງບາງຢ່າງໃດແດ່ໂດຍສະເພາະ ທີ່ເຮົາສາມາດເຮັດ ເພື່ອຊ່ວຍຕື່ມເຕັມໃສ່ໂລກ ດ້ວຍ “ຄວາມຮູ້ກ່ຽວກັບພຣະຜູ້ເປັນເຈົ້າ”?

2 ນີໄຟ 25:23–26

ທ່ານຈະສາມາດຊ່ວຍສະມາຊິກໃນຄອບຄົວຂອງທ່ານ ໃຫ້ “ປິຕິຍິນດີໃນພຣະຄຣິດ” ໄດ້ແນວໃດ? ບາງທີທ່ານຄວນເຊື້ອເຊີນເຂົາເຈົ້າໃຫ້ຂຽນບາງສິ່ງໃສ່ເຈ້ຍນ້ອຍ ກ່ຽວກັບພຣະຜູ້ຊ່ວຍໃຫ້ລອດ ທີ່ນຳຄວາມສຸກມາໃຫ້ເຂົາເຈົ້າ. ແລ້ວ, ໃນການສັງສັນໃນຄອບຄົວ ຫລື ໃນການສຶກສາພຣະຄຳພີເປັນຄອບຄົວ ໃນອະນາຄົດ, ຄົນໜຶ່ງສາມາດອ່ານເຈ້ຍນ້ອຍ. ສະມາຊິກໃນຄອບຄົວສາມາດຕື່ມເຈ້ຍນ້ອຍໃສ່ ຕະຫລອດປີ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສຶກສາສ່ວນຕົວ

ຊອກຫາແບບແຜນ. ຢູ່ໃນພຣະຄຳພີ ເຮົາສາມາດພົບເຫັນແບບແຜນ ທີ່ສະແດງແກ່ເຮົາເຖິງວິທີທີ່ພຣະຜູ້ເປັນເຈົ້າທຳງານ. ຍົກຕົວຢ່າງ, ຢູ່ໃນ 2 ນີໄຟ 11–25, ທ່ານອາດພົບເຫັນແບບແຜນທີ່ສະແດງເຖິງວິທີທີ່ພຣະຜູ້ເປັນເຈົ້າເຕືອນ ແລະ ໃຫ້ອະໄພ.