“ວັນທີ 24 ເດືອນກຸມພາ–ວັນທີ 1 ເດືອນມີນາ. 2 ນີໄຟ 26–30: ‘ງານແປກປະຫລາດ ແລະ ອັດສະຈັນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 24 ເດືອນກຸມພາ–ວັນທີ 1 ເດືອນມີນາ. 2 ນີໄຟ 26–30,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
He Will Lead Thee by the Hand [ພຣະອົງຈະຈູງມືທ່ານໄປ], ໂດຍ ແຊນດຣາ ແຣສຕ໌
ວັນທີ 24 ເດືອນກຸມພາ–ວັນທີ 1 ເດືອນມີນາ
2 ນີໄຟ 26–30
“ງານແປກປະຫລາດ ແລະ ອັດສະຈັນ”
ພຣະຜູ້ເປັນເຈົ້າໄດ້ກ່າວວ່າ, “ເຮົາສັ່ງມະນຸດທັງປວງ … ວ່າພວກເຂົາຈະບັນທຶກຄຳເວົ້າ ຊຶ່ງເຮົາເວົ້າກັບພວກເຂົາ” (2 ນີໄຟ 29:11). ຜ່ານທາງພຣະວິນຍານ, ພຣະຜູ້ເປັນເຈົ້າຈະກ່າວກັບທ່ານ ຂະນະທີ່ທ່ານສຶກສາພຣະຄຳຂອງພຣະອົງ. ບັນທຶກສິ່ງທີ່ທ່ານໄດ້ຮັບ.
ບັນທຶກຄວາມປະທັບໃຈຂອງທ່ານ
“ຂ້າພະເຈົ້າທຳນາຍຕໍ່ພວກທ່ານກ່ຽວກັບຍຸກສຸດທ້າຍ,” ນີໄຟໄດ້ຂຽນ (2 ນີໄຟ 26:14). ໃນອີກຄຳໜຶ່ງ, ເພິ່ນໄດ້ຂຽນກ່ຽວກັບວັນເວລາຂອງເຮົາ. ແລະ ມັນມີເຫດຜົນທີ່ຕ້ອງເປັນຫ່ວງກ່ຽວກັບສິ່ງທີ່ເພິ່ນໄດ້ເຫັນ: ຜູ້ຄົນປະຕິເສດອຳນາດ ແລະ ການມະຫັດສະຈັນຂອງພຣະເຈົ້າ, ມີພຶດຕິກຳທີ່ອິດສາບັງບຽດ ແລະ ການຜິດຖຽງກັນ, ມານຜູກມັດຜູ້ຄົນດ້ວຍເຊືອກອັນໝັ້ນ. ແຕ່ນອກເໜືອໄປຈາກ “ວຽກງານແຫ່ງຄວາມມືດ” ໃນຍຸກສຸດທ້າຍ (2 ນີໄຟ 26:10, 22) ທີ່ນຳພາໂດຍຜູ້ປໍລະປັກແລ້ວ, ນີໄຟຍັງໄດ້ກ່າວເຖິງ “ງານແປກປະຫລາດ ແລະ ອັດສະຈັນ” ທີ່ນຳພາໂດຍພຣະຜູ້ເປັນເຈົ້າເອງ (2 ນີໄຟ 27:26). ແລະ ຢູ່ທີ່ໃຈກາງຂອງວຽກງານນັ້ນ ຈະມີໜັງສືເຫລັ້ມໜຶ່ງ—ໜັງສືທີ່ກ່າວຈາກພື້ນດິນ, ທີ່ເປີດເຜີຍຄວາມຕົວະຂອງຊາຕານ, ແລະ ເຕົ້າໂຮມຄົນຊອບທຳເໝືອນຫລັກສັນຍານ. ໜັງສືເຫລັ້ມນັ້ນຄື ພຣະຄຳພີມໍມອນ, ງານອັດສະຈັນ ຄືວຽກງານຂອງສາດສະໜາຈັກຂອງພຣະຜູ້ເປັນເຈົ້າ ໃນຍຸກສຸດທ້າຍ, ແລະ ງານແປກປະຫລາດຄື ພຣະອົງເຊື້ອເຊີນເຮົາທຸກຄົນ, ເຖິງແມ່ນໃນຄວາມອ່ອນແອຂອງເຮົາ, ໃຫ້ເຂົ້າຮ່ວມ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະເຢຊູຄຣິດເຊື້ອເຊີນເຮົາທຸກຄົນໃຫ້ມາຫາພຣະອົງ.
ສາດສະດາໂຈເຊັບ ສະມິດ ໄດ້ສິດສອນວ່າ ພຣະບິດາເທິງສະຫວັນ “ບໍ່ມີຂອບເຂດໃນພຣະເມດຕາ ແລະ ພຣະພອນຂອງພຣະອົງ, ຫລາຍກວ່າທີ່ເຮົາພ້ອມແລ້ວທີ່ຈະເຊື່ອ ຫລື ຮັບເອົາ” (The Joseph Smith Papers, “History, 1838–1856, volume D-1,” p. 4 [addenda], josephsmithpapers.org). ໃຫ້ອ່ານສິ່ງທີ່ນີໄຟໄດ້ເຫັນລ່ວງໜ້າ ຢູ່ໃນ 2 ນີໄຟ 26:20–22 ແລະ ສິ່ງທີ່ເພິ່ນໄດ້ສິດສອນກ່ຽວກັບພຣະຜູ້ຊ່ວຍໃຫ້ລອດ ຢູ່ໃນ ຂໍ້ທີ 23–33, ແລະ ປຽບທຽບສິ່ງນີ້ໃສ່ກັບບົດຄວາມຂອງໂຈເຊັບ ສະມິດ. ທ່ານຮຽນຮູ້ຫຍັງແດ່ກ່ຽວກັບພຣະເມດຕາທີ່ບໍ່ມີຂອບເຂດຂອງພຣະຜູ້ເປັນເຈົ້າ? ທ່ານສາມາດເຮັດຫຍັງແດ່ ໃນຖານະສະມາຊິກຂອງສາດສະໜາຈັກຂອງພຣະເຢຊູຄຣິດ ເພື່ອຈະເປັນເໝືອນຢ່າງພຣະຄຣິດຫລາຍຂຶ້ນ ໃນວິທີທາງທີ່ທ່ານປະຕິບັດຕໍ່ລູກໆຂອງພຣະເຈົ້າ?
ເບິ່ງ 3 ນີໄຟ 18:30–32 ນຳອີກ.
ແມ່ນຫຍັງຄືໜັງສືທີ່ຖືກກ່າວເຖິງ ຢູ່ໃນບົດເຫລົ່ານີ້?
ຄຳທຳນາຍຂອງນີໄຟ ຢູ່ໃນ 2 ນີໄຟ 26–27, ຊຶ່ງໄດ້ຮັບການດົນໃຈຢ່າງຫລວງຫລາຍຈາກ ຄຳທຳນາຍຂອງເອຊາຢາ ທີ່ຜ່ານມາ (ເບິ່ງ ເອຊາຢາ 29), ບອກລ່ວງໜ້າເຖິງການອອກມາຂອງພຣະຄຳພີມໍມອນ. ການທຳນາຍນີ້ບັນຍາຍສິ່ງດັ່ງຕໍ່ໄປນີ້:
-
ຖ້ອຍຄຳຂອງລູກຫລານຂອງລີໄຮ (ຜູ້ສືບຕະກຸນຂອງເພິ່ນ) ກ່າວ “ຂຶ້ນມາຈາກຂີ້ຝຸ່ນ” ດ້ວຍ “ວິນຍານອັນຄຸ້ນເຄີຍ” ແລະ ຖືກ “ຜະນຶກໄວ້ໃນໜັງສືເຫລັ້ມໜຶ່ງ” (2 ນີໄຟ 26:14–17; ເບິ່ງ ເອຊາຢາ 29:4 ນຳອີກ).
-
ພາກສ່ວນໜຶ່ງຂອງໜັງສື ໄດ້ຖືກມອບໃຫ້ຄົນມີການສຶກສາ ຜູ້ກ່າວວ່າ, “ຂ້າພະເຈົ້າອ່ານມັນບໍ່ໄດ້” (2 ນີໄຟ 27:15–20; ໂຈເຊັບ ສະມິດ—ປະຫວັດ 1:64–65; ເບິ່ງ ເອຊາຢາ 29:11 ນຳອີກ).
ນອກເໜືອໄປຈາກເອຊາຢາແລ້ວ, ກໍຍັງມີສາດສະດາຄົນອື່ນໆຂອງພຣະຄຳພີເດີມ ໄດ້ເວົ້າເຖິງພຣະຄຳພີມໍມອນ, ເຖິງແມ່ນວ່າພວກເພິ່ນບໍ່ໄດ້ກ່າວຊື່ຂອງມັນກໍຕາມ. ຍົກຕົວຢ່າງ, ເອເຊກຽນ 37:15–20 ກ່າວເຖິງມັນວ່າເປັນ “ໄມ້ທ່ອນທີ່ແທນໂຢເຊັບ,” ຊຶ່ງອາດໝາຍເຖິງບັນທຶກຂອງຊາວນີໄຟ, ຜູ້ທີ່ເປັນຕະກຸນຂອງໂຢເຊັບ. ບັນທຶກນີ້ຈະກາຍເປັນໄມ້ທ່ອນດຽວ ກັບ “ໄມ້ທ່ອນທີ່ແທນຢູດາຍ,” ໝາຍເຖິງພຣະຄຣິສຕະທຳຄຳພີ.
ຕົວຢ່າງອື່ນອີກ ກໍມີຢູ່ໃນ “ພຣະຄຳພີມໍມອນ” (ຄູ່ມືພຣະຄຳພີ, scriptures.ChurchofJesusChrist.org).
ຊາຕານສະແຫວງຫາທີ່ຈະຫລອກລວງ.
ຄວາມຕົວະ ແລະ ຍຸດທະວິທີຫລາຍຢ່າງຂອງຊາຕານ ໄດ້ຖືກເປີດເຜີຍ ຢູ່ໃນຄຳບັນຍາຍຂອງນີໄຟ ເຖິງຍຸກສຸດທ້າຍ ຢູ່ໃນ 2 ນີໄຟ 28. ເບິ່ງດູວ່າ ທ່ານຈະພົບເຫັນມັນຢູ່ບໍ (ຍົກຕົວຢ່າງ, ເບິ່ງ ຂໍ້ທີ 6, 8, 21–23, 29). ເປັນຫຍັງທ່ານຈຶ່ງຕ້ອງຮູ້ຈັກກ່ຽວກັບຄວາມຕົວະຂອງຊາຕານ? ທ່ານຈະເຮັດສິ່ງໃດ ເມື່ອຜູ້ປໍລະປັກພະຍາຍາມຫລອກລວງທ່ານ?
ພຣະຜູ້ເປັນເຈົ້າສືບຕໍ່ປະທານການເປີດເຜີຍໃຫ້ ເພື່ອນຳພາລູກໆຂອງພຣະອົງ.
ໃນຖານະໄພ່ພົນຍຸກສຸດທ້າຍ ເຮົາໄດ້ຮັບພອນ ທີ່ເປັນພຣະຄຳຂອງພຣະເຈົ້າ ຢ່າງຫລວງຫລາຍ, ສະນັ້ນຄຳເຕືອນຂອງນີໄຟ ຈຶ່ງກ່ຽວພັນກັບເຮົາ: ເຮົາບໍ່ຄວນຮູ້ສຶກວ່າ “ເຮົາມີພໍແລ້ວ!” ຂະນະທີ່ທ່ານອ່ານຄຳເຕືອນ ຢູ່ໃນ 2 ນີໄຟ 28 ແລະ 29, ໃຫ້ໄຕ່ຕອງຄຳຖາມ ດັ່ງເຊັ່ນເຫລົ່ານີ້:
-
ພຣະຜູ້ເປັນເຈົ້າປະສົງໃຫ້ທ່ານຮູ້ສຶກ ແລະ ຕອບຮັບແນວໃດ ຕໍ່ພຣະຄຳຂອງພຣະອົງ?
-
ເປັນຫຍັງບາງເທື່ອຜູ້ຄົນ “ໃຈຮ້າຍ” ກ່ຽວກັບການໄດ້ຮັບຄວາມຈິງຈາກພຣະເຈົ້າ ຫລາຍກວ່າເກົ່າ? (2 ນີໄຟ 28:28). ເຮົາເຄີຍຮູ້ສຶກແບບນີ້ບໍ? ຖ້າເຄີຍ, ເຮົາຈະສາມາດຮັບຟັງຄວາມຈິງໄດ້ແນວໃດ?
-
ການຮັບເອົາພຣະຄຳຂອງພຣະເຈົ້າ ໝາຍຄວາມວ່າແນວໃດ? ເຮົາຈະສາມາດສະແດງໃຫ້ພຣະອົງເຫັນວ່າ ເຮົາຢາກຮັບເອົາພຣະຄຳຂອງພຣະອົງຕື່ມອີກແນວໃດ?
ເບິ່ງ ແອວມາ 12:10–11; 3 ນີໄຟ 26:6–10 ນຳອີກ.
ພຣະເຈົ້າໄດ້ຕຽມພຣະຄຳພີມໍມອນໄວ້ສຳລັບວັນເວລາຂອງເຮົາ.
ນີໄຟຮູ້ຈັກໂດຍການເປີດເຜີຍ, ແມ່ນແຕ່ກ່ອນພຣະຄຳພີມໍມອນໄດ້ຖືກຂຽນຢ່າງຮຽບຮ້ອຍ, ວ່າມັນຈະ “ມີຄຸນຄ່າຢ່າງໃຫຍ່ຫລວງຕໍ່ລູກຫລານມະນຸດ” ໃນມື້ໜຶ່ງ (2 ນີໄຟ 28:2). ເປັນຫຍັງພຣະຄຳພີມໍມອນຈຶ່ງມີຄຸນຄ່າຢ່າງໃຫຍ່ຫລວງຕໍ່ທ່ານ? ໃຫ້ຄິດກ່ຽວກັບຄຳຖາມຂໍ້ນີ້ ຂະນະທີ່ທ່ານອ່ານ 2 ນີໄຟ 29–30. ມີງານ “ອັດສະຈັນ” ບາງຢ່າງໃດແດ່ ທີ່ພຣະເຈົ້າໄດ້ສຳເລັດຢູ່ໃນໂລກ ແລະ ໃນຊີວິດຂອງທ່ານ ຜ່ານທາງພຣະຄຳພີມໍມອນ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
2 ນີໄຟ 26:12–13
ນີໄຟໄດ້ສອນວ່າ ພຣະເຢຊູຄຣິດໄດ້ສະແດງພຣະອົງເອງໃຫ້ປະຈັກ ຜ່ານທາງພຣະວິນຍານບໍລິສຸດ. ປະສົບການໃດແດ່ທີ່ສະມາຊິກໃນຄອບຄົວສາມາດບອກເລົ່າໃຫ້ກັນຟັງ ຕອນທີ່ປະຈັກພະຍານຂອງເຂົາເຈົ້າ ເຖິງພຣະຜູ້ຊ່ວຍໃຫ້ລອດໄດ້ຖືກເຮັດໃຫ້ເຂັ້ມແຂງຂຶ້ນ ໂດຍພຣະວິນຍານບໍລິສຸດ?
2 ນີໄຟ 26:22; 28:19–22
ບາງທີຄອບຄົວຂອງທ່ານອາດມັກບົດຮຽນທີ່ໃຊ້ສິ່ງຂອງ ທີ່ສະແດງສິ່ງທີ່ 2 ນີໄຟ 26:22 ສິດສອນກ່ຽວກັບມານ. ຂະນະທີ່ທ່ານອ່ານກ່ຽວກັບຍຸດທະວິທີຂອງຊາຕານ ຢູ່ໃນ 2 ນີໄຟ 28:19–22, ທ່ານສາມາດເອົາຝ້າຍຜູກໃສ່ແຂນຂອງຄົນໃດຄົນໜຶ່ງ ເພື່ອເປັນຕົວແທນໃຫ້ແກ່ “ເຊືອກອັນໝັ້ນ.” ເຊືອກອັນໝັ້ນ ເປັນເໝືອນການລໍ້ລວງຂອງຊາຕານແນວໃດ? ມັນອາດກາຍເປັນເຊືອກອັນໝັ້ນຫລາຍຂຶ້ນໄດ້ແນວໃດ? ເຮົາຈະຮູ້ຈັກເຖິງຄວາມຕົວະຂອງຊາຕານໄດ້ແນວໃດ?
ນີໄຟໄດ້ປຽບທຽບການລໍ້ລວງຂອງມານໃສ່ກັບ “ເຊືອກອັນໝັ້ນ.”
2 ນີໄຟ 27:20–21
ພຣະຜູ້ເປັນເຈົ້າໝາຍຄວາມວ່າແນວໃດ ເມື່ອພຣະອົງໄດ້ກ່າວວ່າ, “ເຮົາສາມາດທຳງານຂອງເຮົາໄດ້”? ຄວາມຈິງນີ້ມີອິດທິພົນຕໍ່ວິທີທີ່ເຮົາຮັບໃຊ້ຢູ່ໃນສາດສະໜາຈັກຂອງພຣະອົງແນວໃດ?
2 ນີໄຟ 28:30–31
ຄອບຄົວຂອງທ່ານສາມາດຄິດກ່ຽວກັບບາງຢ່າງວ່າ, ເຊັ່ນດຽວກັບການເປີດເຜີຍຈາກພຣະເຈົ້າ, ເປັນສິ່ງທີ່ດີທີ່ສຸດ ຖ້າໄດ້ຮັບເທື່ອລະເລັກເທື່ອລະໜ້ອຍ? ເປັນຫຍັງພຣະເຈົ້າຈຶ່ງເປີດເຜີຍຄວາມຈິງຕໍ່ເຮົາ “ເປັນບັນທັດ, ເປັນຂໍ້ເລັກໆໜ້ອຍໆ, ນີ້ໜ້ອຍໜຶ່ງ ແລະ ນັ້ນໜ້ອຍໜຶ່ງ” ແທນທີ່ຈະມອບໃຫ້ໝົດບາດດຽວ?
2 ນີໄຟ 29:7–9
ພຣະຜູ້ເປັນເຈົ້າມີພຣະປະສົງແນວໃດ ທີ່ຈະພິສູດ ຫລື ສະແດງກັບ ພຣະຄຳພີມໍມອນ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສຶກສາສ່ວນຕົວ
ແບ່ງປັນຄວາມຮູ້. ການສົນທະນາກັບຄົນອື່ນ ກ່ຽວກັບສິ່ງທີ່ທ່ານໄດ້ຮຽນຮູ້ ສາມາດເພີ່ມຄວາມເຂັ້ມແຂງໃຫ້ແກ່ຄວາມເຂົ້າໃຈຂອງທ່ານ. ຫລັງຈາກໄດ້ອ່ານ 2 ນີໄຟ 29:6–14 ແລ້ວ, ທ່ານອາດໄດ້ຮັບການດົນໃຈ ໃຫ້ອະທິບາຍຕໍ່ໝູ່ເພື່ອນຄົນໜຶ່ງວ່າເປັນຫຍັງເຮົາຈຶ່ງຕ້ອງການພຣະຄຳພີມໍມອນ.
ການຂຽນຂອງນີໄຟ ໄດ້ບອກລ່ວງໜ້າເຖິງ “ງານແປກປະຫລາດ ແລະ ອັດສະຈັນ” ທີ່ຈະເກີດຂຶ້ນ ໃນຍຸກສຸດທ້າຍ (2 ນີໄຟ 27:26).