“ວັນທີ 16–22 ເດືອນມີນາ. ຢາໂຄບ 5–7: ‘ພຣະຜູ້ເປັນເຈົ້າເຮັດວຽກງານຮ່ວມກັບພວກເຮົາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 16–22 ເດືອນມີນາ. ຢາໂຄບ 5–7,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
Allegory of the Olive Tree [ຄຳປຽບທຽບກ່ຽວກັບຕົ້ນໝາກກອກ], ແບຼດ ເທຍ
ວັນທີ 16–22 ເດືອນມີນາ
ຢາໂຄບ 5–7
ພຣະຜູ້ເປັນເຈົ້າເຮັດວຽກງານຮ່ວມກັບພວກເຮົາ
ການອ່ານພຣະຄຳພີເຊື້ອເຊີນການເປີດເຜີຍ. ດັ່ງນັ້ນ ຂະນະທີ່ທ່ານອ່ານ ຢາໂຄບ 5–7, ໃຫ້ສະແຫວງຫາການນຳພາຈາກພຣະວິນຍານ ເພື່ອຊ່ວຍທ່ານ ແລະ ຄອບຄົວຂອງທ່ານ. ຂ່າວສານໃດແດ່ທີ່ພຣະຜູ້ເປັນເຈົ້າມີສຳລັບທ່ານ?
ບັນທຶກຄວາມປະທັບໃຈຂອງທ່ານ
ມີຫລາຍໆຄົນທີ່ຍັງບໍ່ເຄີຍໄດ້ຍິນພຣະກິດຕິຄຸນຂອງພຣະເຢຊູຄຣິດເທື່ອ. ຖ້າຫາກທ່ານຮູ້ສຶກໜັກໜ່ວງກັບພາລະເລື່ອງການເຕົ້າໂຮມເຂົາເຈົ້າເຂົ້າໃນສາດສະໜາຈັກຂອງພຣະຜູ້ເປັນເຈົ້າ, ຄຳປຽບທຽບກ່ຽວກັບຕົ້ນໝາກກອກຢູ່ໃນ ຢາໂຄບ 5 ມີຄຳເຕືອນທີ່ໃຫ້ຄວາມໝັ້ນໃຈ ທີ່ວ່າ: ສວນອະງຸ່ນເປັນຂອງພຣະຜູ້ເປັນເຈົ້າ. ພຣະອົງໄດ້ມອບສວນຕອນນ້ອຍໃຫ້ເຮົາແຕ່ລະຄົນ ເພື່ອຊ່ວຍໃນວຽກງານຂອງພຣະອົງ—ຄອບຄົວຂອງເຮົາ, ໝູ່ເພື່ອນຂອງເຮົາ, ຂອບເຂດອິດທິພົນຂອງເຮົາ. ແລະ ບາງເທື່ອຄົນທຳອິດທີ່ເຮົາຊ່ວຍເຕົ້າໂຮມ ແມ່ນຕົວເຮົາເອງ. ແຕ່ເຮົາບໍ່ເຄີຍຢູ່ຄົນດຽວໃນວຽກງານນີ້, ເພາະພຣະຜູ້ເປັນເຈົ້າຂອງສວນອະງຸ່ນໄດ້ທຳງານຄຽງຂ້າງຄົນໃຊ້ຂອງພຣະອົງ (ເບິ່ງ ຢາໂຄບ 5:72). ພຣະເຈົ້າຮູ້ຈັກ ແລະ ຮັກລູກໆຂອງພຣະອົງ, ແລະ ພຣະອົງຈະຕຽມທາງສຳລັບເຂົາເຈົ້າແຕ່ລະຄົນ ເພື່ອຈະໄດ້ຍິນພຣະກິດຕິຄຸນ, ແມ່ນແຕ່ຜູ້ທີ່ປະຕິເສດພຣະອົງ ໃນອະດີດ (ເບິ່ງ ຢາໂຄບ 4:15–18). ແລະ ແລ້ວ, ເມື່ອວຽກງານສຳເລັດແລ້ວ, ທຸກຄົນທີ່ໄດ້ “ອອກແຮງງານຢ່າງພາກພຽນກັບ [ພຣະອົງ] … ຈະມີຄວາມສຸກກັບ [ພຣະອົງ] ເພາະໝາກໄມ້ໃນສວນອະງຸ່ນ [ຂອງພຣະອົງ]” (ຢາໂຄບ 5:75).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຄຳປຽບທຽບຄືຫຍັງ?
ຄຳປຽບທຽບຄືເລື່ອງເລົ່າທີ່ສິດສອນຄວາມຈິງທາງວິນຍານ ຜ່ານທາງສັນຍາລັກ. ຢູ່ໃນຄຳປຽບທຽບເລື່ອງຕົ້ນໝາກກອກ, ຍົກຕົວຢ່າງ, ສວນອະງຸ່ນເປັນຕົວແທນໃຫ້ແກ່ແຜ່ນດິນໂລກ, ຕົ້ນໝາກກອກເທດເປັນຕົວແທນໃຫ້ແກ່ອິດສະຣາເອນ (ຜູ້ທີ່ໄດ້ເຮັດພັນທະສັນຍານຳພຣະເຈົ້າ), ແລະ ຕົ້ນໝາກກອກປ່າ ເປັນຕົວແທນໃຫ້ແກ່ປະຊາຊາດຂອງຄົນຕ່າງຊາດ (ຜູ້ທີ່ຍັງບໍ່ໄດ້ເຮັດພັນທະສັນຍານຳພຣະເຈົ້າເທື່ອ).
ຂະນະທີ່ທ່ານຮຽນຮູ້ກ່ຽວກັບຄຳປຽບທຽບ ຢູ່ໃນ ຢາໂຄບ 5, ໃຫ້ຊອກຫາສັນຍາລັກເພີ່ມເຕີມ ແລະ ໃຫ້ໄຕ່ຕອງຄວາມໝາຍຂອງມັນ. ຍົກຕົວຢ່າງ, ທ່ານຄິດວ່າໝາກດີເປັນຕົວແທນໃຫ້ສິ່ງໃດ? ໝາກບໍ່ດີສາມາດເປັນເຄື່ອງໝາຍໃຫ້ສິ່ງໃດ?
ພຣະເຢຊູຄຣິດຄືພຣະຜູ້ເປັນເຈົ້າຂອງສວນອະງຸ່ນ.
ກ່ອນທ່ານເລີ່ມຕົ້ນສຶກສາຄຳປຽບທຽບຂອງຕົ້ນໝາກກອກ ຢູ່ໃນ ຢາໂຄບ 5, ມັນອາດເປັນປະໂຫຍດທີ່ຈະທົບທວນ ຢາໂຄບ 4:10–18 ເພື່ອຮຽນຮູ້ເຖິງເຫດຜົນທີ່ຢາໂຄບຮູ້ສຶກດົນໃຈ ໃຫ້ແບ່ງປັນຄຳປຽບທຽບນີ້ກັບຜູ້ຄົນຂອງເພິ່ນ. ໃນ ຢາໂຄບ 6:3–5, ທ່ານສາມາດພົບເຫັນຂ່າວສານເພີ່ມເຕີມບາງຢ່າງ ທີ່ຢາໂຄບຢາກເນັ້ນ; ໃຫ້ຊອກຫາຂ່າວສານເຫລົ່ານີ້ຢູ່ໃນຄຳປຽບທຽບ. ຂ່າວສານໃດແດ່ທີ່ທ່ານພົບເຫັນສຳລັບຕົວທ່ານເອງ ຢູ່ໃນ ຢາໂຄບ 5?
ຢາໂຄບ 5 ເປັນບົດທີ່ຍາວ—ຍາວກວ່າບົດອື່ນໆຢູ່ໃນພຣະຄຳພີມໍມອນ. ບາງທີມັນອາດເປັນປະໂຫຍດທີ່ຈະແຍກມັນເປັນພາກຕ່າງໆດັ່ງຕໍ່ໄປນີ້, ຊຶ່ງບັນຍາຍເຖິງໄລຍະປະຫວັດສາດຂອງໂລກ ດັ່ງນີ້:
-
ຂໍ້ທີ 3–14.ຊາວອິດສະຣາເອນທີ່ກະຈັດກະຈາຍໄປກ່ອນວັນເວລາຂອງພຣະຄຣິດ
-
ຂໍ້ທີ 15–28.ການປະຕິບັດສາດສະໜາກິດຂອງພຣະຄຣິດ ແລະ ອັກຄະສາວົກ
-
ຂໍ້ທີ 29–49.ການປະຖິ້ມຄວາມເຊື່ອຄັ້ງຍິ່ງໃຫຍ່
-
ຂໍ້ທີ 50–76.ການເຕົ້າໂຮມຊາວອິດສະຣາເອນຢູ່ໃນຍຸກສຸດທ້າຍ
-
ຂໍ້ທີ 76–77.ຊ່ວງໄລຍະໜຶ່ງພັນປີ ແລະ ທີ່ສຸດຂອງໂລກ
ສຳລັບຄວາມຮູ້ເພີ່ມເຕີມກ່ຽວກັບຄຳປຽບທຽບ, ໃຫ້ເບິ່ງແຜນພາບທີ່ຢູ່ໃນໂຄງຮ່າງນີ້.
ເຮົາທຸກຄົນສາມາດຮັບໃຊ້ພຣະເຈົ້າ ໂດຍການຊ່ວຍພຣະອົງເຕົ້າໂຮມລູກໆຂອງພຣະອົງ.
ພຣະເຈົ້າເຊື້ອເຊີນເຮົາໃຫ້ຊ່ວຍພຣະອົງເຕົ້າໂຮມລູກໆຂອງພຣະອົງ.
“ຄົນໃຊ້ຜູ້ອື່ນ” (ຢາໂຄບ 5:70) ທີ່ຖືກເອີ້ນໃຫ້ທຳງານຢູ່ໃນສວນອະງຸ່ນຂອງພຣະຜູ້ເປັນເຈົ້າ ຮ່ວມດ້ວຍຜູ້ຄົນທີ່ຄືທ່ານ—ໃນຖານະສະມາຊິກຂອງສາດສະໜາຈັກ, ເຮົາມີໜ້າທີ່ຮັບຜິດຊອບ ທີ່ຈະຊ່ວຍພຣະເຈົ້າເຕົ້າໂຮມລູກໆຂອງພຣະອົງ. ຫລັກທຳຢ່າງໃດແດ່ທີ່ທ່ານພົບເຫັນ ຢູ່ໃນ ຢາໂຄບ 5, ໂດຍສະເພາະ ຂໍ້ທີ 61–62 ແລະ 70–75, ກ່ຽວກັບການທຳງານຢູ່ໃນສວນອະງຸ່ນຂອງພຣະຜູ້ເປັນເຈົ້າ? ທ່ານຮູ້ສຶກແນວໃດວ່າ ພຣະອົງໄດ້ເອີ້ນທ່ານໃຫ້ຮັບໃຊ້ ຢູ່ໃນສວນອະງຸ່ນຂອງພຣະອົງ? ທ່ານມີປະສົບການໃດແດ່ ຂະນະທີ່ມີສ່ວນຮ່ວມຢູ່ໃນວຽກງານຂອງພຣະອົງ?
ເບິ່ງ ວິດີໂອ “Old Testament Olive Vineyard,” “Help the Church Grow” (ChurchofJesusChrist.org) ນຳອີກ.
ເຮົາສາມາດຢືນຢູ່ຢ່າງເຂັ້ມແຂງ ເມື່ອຄົນອື່ນທ້າທາຍສັດທາຂອງເຮົາ.
ປະສົບການຂອງຊາວນີໄຟນຳເຊເຣັມ ມັກຈະລຶ້ມຄືນໃນທຸກວັນນີ້: ມັນຈະມີຜູ້ຄົນທີ່ມີຄວາມຮູ້, ເວົ້າຈາດີ ທີ່ພະຍາຍາມທຳລາຍສັດທາຂອງທ່ານ. ແຕ່ຢາໂຄບ “ຈະຫວັ່ນໄຫວບໍ່ໄດ້” (ຢາໂຄບ 7:5). ຢາໂຄບຕອບຮັບແນວໃດ ເມື່ອສັດທາຂອງເພິ່ນຖືກໂຈມຕີ? ທ່ານຮຽນຮູ້ຫຍັງແດ່ຈາກການຕອບຮັບຂອງເພິ່ນ? ທ່ານສາມາດເຮັດຫຍັງແດ່ໃນເວລານີ້ ເພື່ອກະກຽມສຳລັບເວລາທີ່ສັດທາຂອງທ່ານຈະຖືກທ້າທາຍ?
ເບິ່ງ Jeffrey R. Holland, “The Cost—and Blessings—of Discipleship,” Ensign ຫລື Liahona, May 2014, 6–9 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
ຢາໂຄບ 5
ບາງຄອບຄົວພົບເຫັນວ່າ ມັນເປັນປະໂຫຍດທີ່ຈະແຕ້ມຮູບຈາກຄຳປຽບທຽບກ່ຽວກັບຕົ້ນໝາກກອກ ຂະນະທີ່ເຂົາເຈົ້າອ່ານມັນ. ຄອບຄົວຂອງທ່ານອາດມັກເຮັດແນວນັ້ນ, ຫລື ອາດມີວິທີອື່ນອີກ ທີ່ທ່ານສາມາດຊ່ວຍສະມາຊິກໃນຄອບຄົວຂອງທ່ານ ໃຫ້ເຫັນພາບສັນຍາລັກຢູ່ໃນຄຳປຽບທຽບນັ້ນ. ບາງທີທ່ານສາມາດໝາຍບາງສ່ວນຢູ່ໜ້າໂຕະ ຫລື ຢູ່ພື້ນ ເພື່ອເປັນຕົວແທນໃຫ້ແກ່ສວນອະງຸ່ນ (ຫລື ແຜ່ນດິນໂລກ) ແລະ ອະທິບາຍກ່ຽວກັບຕົ້ນໝາກກອກເທດ (ຫລື ເຊື້ອສາຍອິດສະຣາເອນ) ດ້ວຍສິ່ງຂອງ, ດັ່ງເຊັ່ນ ຮູບປິດສະໜາ, ທີ່ສາມາດແຍກອອກເປັນຕ່ອນໆ (ເພື່ອເປັນຕົວແທນໃຫ້ແກ່ຊາວອິດສະຣາເອນທີ່ກະຈັດກະຈາຍ) ແລະ ແລ້ວໃຫ້ຮວບຮວມທຸກຕ່ອນເຂົ້າກັນ (ເພື່ອເປັນຕົວແທນໃຫ້ແກ່ການເຕົ້າໂຮມຊາວອິດສະຣາເອນ). ຄຳປຽບທຽບນີ້ສິດສອນເຮົາຫຍັງແດ່ກ່ຽວກັບພຣະຜູ້ເປັນເຈົ້າ? ກ່ຽວກັບຄົນໃຊ້ຂອງພຣະອົງ?
ຢາໂຄບ 5:70–77
ຂະນະທີ່ທ່ານອ່ານກ່ຽວກັບວ່າ ພຣະຜູ້ເປັນເຈົ້າຈະທຳງານຢູ່ໃນສວນອະງຸ່ນຂອງພຣະອົງເປັນ “ເທື່ອສຸດທ້າຍ,” ແມ່ນຫຍັງທີ່ດົນໃຈທ່ານ ແລະ ຄອບຄົວຂອງທ່ານໃຫ້ຮັບໃຊ້ພຣະຜູ້ເປັນເຈົ້າ “ດ້ວຍກຳລັງຂອງພວກເຈົ້າ”? (ຢາໂຄບ 5:71). ທ່ານສາມາດເຊື້ອເຊີນສະມາຊິກໃນຄອບຄົວ ໃຫ້ດັດແປງ ຂໍ້ທີ 75 ໃສ່ກັບຕົວເອງ ໂດຍການຕື່ມຊື່ຂອງເຂົາເຈົ້າໃສ່ໃນຂໍ້ນີ້—ຍົກຕົວຢ່າງ, “[ຊື່] ຈະມີຄວາມສຸກກັບເຮົາ.” ບາງທີເຂົາເຈົ້າສາມາດແບ່ງປັນປະສົບການ ຊຶ່ງໃນນັ້ນເຂົາເຈົ້າຮູ້ສຶກມີຄວາມສຸກ ຂະນະທີ່ຮັບໃຊ້ພຣະຜູ້ເປັນເຈົ້າຂອງສວນອະງຸ່ນ, ຍົກຕົວຢ່າງ ຜ່ານທາງການແບ່ງປັນພຣະກິດຕິຄຸນ, ການຮັບໃຊ້ຢູ່ໃນພຣະວິຫານ, ຫລື ເພີ່ມຄວາມເຂັ້ມແຂງໃຫ້ແກ່ສະມາຊິກຂອງສາດສະໜາຈັກ. (ເບິ່ງ M. Russell Ballard, “Put Your Trust in the Lord,” Ensign ຫລື Liahona, Nov. 2013, 43–45.)
ຢາໂຄບ 6:4–7
ພຣະຜູ້ເປັນເຈົ້າໄດ້ເດ່ພຣະຫັດທີ່ເມດຕາຂອງພຣະອົງມາຫາເຮົາໃນວິທີໃດ? ຄຳວ່າ “ໃກ້ຊິດຕິດແທດ” ຢູ່ໃນຂໍ້ເຫລົ່ານີ້ ໝາຍຄວາມວ່າແນວໃດ? ພຣະຜູ້ເປັນເຈົ້າໃກ້ຊິດຕິດແທດກັບເຮົາແນວໃດ? ເຮົາຈະສາມາດໃກ້ຊິດຕິດແທດກັບພຣະອົງໄດ້ແນວໃດ?
ຢາໂຄບ 7:1–12
ເຮົາຮຽນຮູ້ຫຍັງແດ່ຈາກຂໍ້ເຫລົ່ານີ້ ກ່ຽວກັບວິທີທີ່ຜູ້ຄົນພະຍາຍາມທີ່ຈະນຳພາຄົນອື່ນໃຫ້ຫລົງທາງ? ເຮົາຈະສາມາດເຮັດຕາມຕົວຢ່າງຂອງຢາໂຄບ ແລະ ໝັ້ນຄົງໃນສັດທາຂອງເຮົາ ໃນພຣະຄຣິດໄດ້ແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສິດສອນຂອງເຮົາ
ທ່ອງຈຳຂໍ້ພຣະຄຳພີ. ໃຫ້ເລືອກເອົາຂໍ້ພຣະຄຳພີທີ່ມີຄວາມໝາຍຕໍ່ຄອບຄົວຂອງທ່ານໂດຍສະເພາະ, ແລະ ໃຫ້ທ່ອງຈຳມັນນຳກັນ. ແອວເດີ ຣິເຈີດ ຈີ ສະກາດ ໄດ້ສິດສອນວ່າ, “ຂໍ້ພຣະຄຳພີໃດທີ່ເຮົາທ່ອງຈຳ ຈະກາຍເປັນເພື່ອນທີ່ຍືນຍົງ ຊຶ່ງບໍ່ອ່ອນແອເມື່ອເວລາຜ່ານໄປ” (“The Power of Scripture,” Ensign ຫລື Liahona, Nov. 2011, 6).