“ວັນທີ 9–15 ເດືອນມີນາ. ຢາໂຄບ 1–4: ‘ຈົ່ງຄືນດີກັບພຣະເຈົ້າທາງການຊົດໃຊ້ຂອງພຣະຄຣິດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 9–15 ເດືອນມີນາ. ຢາໂຄບ 1–4,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ຜູ້ຍິງຄຸເຂົ່າຢູ່ທີ່ພຣະບາດຂອງພຣະເຢຊູ

Forgiven [ຖືກໃຫ້ອະໄພ], ໂດຍ ກະເຣກ ເຄ ອໍສັນ

ວັນທີ 9–15 ເດືອນມີນາ

ຢາໂຄບ 1–4

ຈົ່ງຄືນດີກັບພຣະເຈົ້າທາງການຊົດໃຊ້ຂອງພຣະຄຣິດ

ເມື່ອທ່ານບັນທຶກຄວາມປະທັບໃຈທາງວິນຍານ, ທ່ານກໍສະແດງວ່າ ທ່ານຢາກໃຫ້ພຣະວິນຍານບໍລິສຸດສິດສອນທ່ານ. ຂະນະທີ່ທ່ານອ່ານ ຢາໂຄບ 1–4, ໃຫ້ຄິດທີ່ຈະຂຽນສິ່ງທີ່ທ່ານໄດ້ຮຽນຮູ້ໄວ້.

ບັນທຶກຄວາມປະທັບໃຈຂອງທ່ານ

ຊາວນີໄຟນັບຖືວ່າ ນີໄຟເປັນ “ຜູ້ປົກປັກຮັກສາທີ່ຍິ່ງໃຫຍ່” ຂອງພວກເຂົາ (ຢາໂຄບ 1:10). ເພິ່ນໄດ້ປົກປ້ອງພວກເຂົາຈາກການໂຈມຕີຂອງສັດຕູ, ແລະ ເພິ່ນໄດ້ເຕືອນພວກເຂົາກ່ຽວກັບໄພອັນຕະລາຍທາງວິນຍານ. ບັດນີ້ເພິ່ນໄດ້ຈາກໄປແລ້ວ, ແລະ ໜ້າທີ່ຂອງການເປັນຜູ້ນຳຊາວນີໄຟ ກໍຕົກຢູ່ທີ່ຢາໂຄບ, ຜູ້ທີ່ນີໄຟໄດ້ອຸທິດຖວາຍໃຫ້ເປັນປະໂລຫິດ ແລະ ສິດສອນຜູ້ຄົນ (ເບິ່ງ ຢາໂຄບ 1:18). ໂດຍໄດ້ຮັບການດົນໃຈ, ຢາໂຄບຮູ້ຈັກວ່າ ຜູ້ຄົນຂອງເພິ່ນຕ້ອງໄດ້ຮັບການສິດສອນຢ່າງ “ຮຸນແຮງ,” ເພາະພວກເຂົາ “ເລີ່ມຕົ້ນອອກແຮງງານໃນບາບ” (ຢາໂຄບ 2:7, 5). ບາບເຫລົ່ານີ້ ຄືກັນກັບສິ່ງທີ່ຜູ້ຄົນດີ້ນລົນຢູ່ທຸກວັນນີ້: ການໄຝ່ຝັນຫາຄວາມຮັ່ງມີ ແລະ ການຂາດສິນທຳທາງເພດ. ແລະ ເຖິງແມ່ນຢາໂຄບຮູ້ສຶກວ່າ ເພິ່ນຕ້ອງໄດ້ກ່າວໂທດຄົນຊົ່ວຮ້າຍເຫລົ່ານີ້, ແຕ່ຫົວໃຈຂອງເພິ່ນເຈັບປວດສຳລັບຜູ້ຮັບເຄາະ, ຜູ້ຫົວໃຈ “ຖືກສຽບແທງເປັນແຜເລິກ” (ຢາໂຄບ 2:35). ຢາໂຄບໄດ້ເປັນພະຍານວ່າ ການປິ່ນປົວທັງສອງກຸ່ມ—ຄົນບາບ ແລະ ຜູ້ເປັນແຜທາງວິນຍານ—ມາຈາກພຣະຜູ້ຊ່ວຍໃຫ້ລອດ ພຣະເຢຊູຄຣິດ. ຂ່າວສານຂອງຢາໂຄບ, ເຊັ່ນດຽວກັບຂ່າວສານຂອງນີໄຟກ່ອນເພິ່ນ, ເປັນການເອີ້ນໃຫ້ “ຄືນດີກັບ [ພຣະເຈົ້າ] ທາງການຊົດໃຊ້ຂອງພຣະຄຣິດ” (ຢາໂຄບ 4:11).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຢາໂຄບ 1:6–8, 15–19; 2:1–11

ພຣະຜູ້ເປັນເຈົ້າປະສົງໃຫ້ເຮົາຂະຫຍາຍການເອີ້ນຂອງເຮົາ.

ສຳລັບຢາໂຄບແລ້ວ, ການສິດສອນພຣະຄຳຂອງພຣະເຈົ້າ ແມ່ນຫລາຍກວ່າ ການມອບໝາຍຈາກອ້າຍຂອງເພິ່ນເທົ່ານັ້ນ—ມັນແມ່ນ “ວຽກງານຈາກພຣະຜູ້ເປັນເຈົ້າ,” ສະນັ້ນ ເພິ່ນຈຶ່ງໄດ້ທຳງານຢ່າງພາກພຽນ ເພື່ອ “ຂະຫຍາຍໜ້າທີ່ [ຂອງເພິ່ນ]” (ຢາໂຄບ 1:17, 19). ປະທານກໍດອນ ບີ ຮິງລີ ໄດ້ສິດສອນວ່າ ເຮົາຂະຫຍາຍການເອີ້ນຂອງເຮົາ “ເມື່ອເຮົາຮັບໃຊ້ດ້ວຍຄວາມພາກພຽນ, ເມື່ອເຮົາສິດສອນດ້ວຍສັດທາ ແລະ ປະຈັກພະຍານ, ເມື່ອເຮົາເຊີດຊູ ແລະ ເພີ່ມຄວາມເຂັ້ມແຂງ ແລະ ເສີມສ້າງຄວາມເຊື່ອໝັ້ນຂອງຄວາມຊອບທຳ ໃນຊີວິດຂອງຜູ້ຄົນທີ່ເຮົາສຳພັດ” (“Magnify Your Calling,” Ensign, May 1989, 47). ໃຫ້ຄິດກ່ຽວກັບ “[ວຽກງານ ຂອງທ່ານເອງ] ຈາກພຣະຜູ້ເປັນເຈົ້າ” ຂະນະທີ່ທ່ານອ່ານ ຢາໂຄບ 1:6–8, 15–19 ແລະ 2:1–11. ເປັນຫຍັງຢາໂຄບຈຶ່ງຮັບໃຊ້ຢ່າງຊື່ສັດ? ຕົວຢ່າງຂອງເພິ່ນດົນໃຈໃຫ້ທ່ານເຮັດຫຍັງແດ່ ເພື່ອຈະໄດ້ຂະຫຍາຍການເອີ້ນຂອງທ່ານຢູ່ໃນສາດສະໜາຈັກ ແລະ ໜ້າທີ່ຮັບຜິດຊອບຂອງທ່ານຢູ່ທີ່ບ້ານ?

ຢາໂຄບ 2:23–3:12

ພຣະຜູ້ເປັນເຈົ້າເບີກບານໃນພົມມະຈັນ.

ບາບມີຜົນສະທ້ອນສຳລັບບຸກຄົນ ແລະ ສຳລັບສັງຄົມ. ໃນການກ່າວກ່ຽວກັບບາບທາງເພດ, ຢາໂຄບໄດ້ເຕືອນເຖິງຜົນສະທ້ອນທັງສອງແບບ. ເມື່ອທ່ານອ່ານ ຢາໂຄບ 2:31–35 ແລະ 3:10, ໃຫ້ຊອກຫາວິທີທີ່ການຂາດສິນທຳມີຜົນກະທົບຕໍ່ຊາວນີໄຟເປັນກຸ່ມໃຫຍ່ ແລະ ເປັນສ່ວນບຸກຄົນແນວໃດ. ວິທີເຫລົ່ານີ້ຄ້າຍຄືກັນແນວໃດ ກັບຜົນສະທ້ອນຂອງການຂາດສິນທຳ ທີ່ທ່ານເຫັນໃນໂລກທຸກວັນນີ້? ທ່ານພົບເຫັນຫຍັງແດ່ຢູ່ໃນຖ້ອຍຄຳຂອງຢາໂຄບ ທີ່ສາມາດຊ່ວຍທ່ານໃຫ້ສິດສອນຄົນທີ່ທ່ານຮັກ ເຖິງຄວາມສຳຄັນຂອງພົມມະຈັນ? ທ່ານໄດ້ຮັບພອນແນວໃດ ໂດຍຄວາມພະຍາຍາມຂອງທ່ານ ທີ່ຈະເປັນຄົນບໍລິສຸດ?

ໃຫ້ສັງເກດເຫັນວ່າ ຢາໂຄບກໍໄດ້ກ່າວເຖິງການມີເມຍຫລາຍຄົນ. ທ່ານພົບເຫັນຫຍັງແດ່ ຢູ່ໃນ ຢາໂຄບ 2:23–30 ທີ່ຊ່ວຍທ່ານໃຫ້ເຂົ້າໃຈວ່າ ໃນກໍລະນີຈຳກັດ, ເປັນຫຍັງພຣະຜູ້ເປັນເຈົ້າຈຶ່ງບັນຊາຜູ້ຄົນຂອງພຣະອົງໃຫ້ແຕ່ງເມຍຫລາຍຄົນ? ພຣະອົງຮູ້ສຶກແນວໃດກ່ຽວກັບຜູ້ທີ່ເຮັດແນວນີ້ ປາດສະຈາກການໄດ້ຮັບອະນຸຍາດຈາກພຣະອົງ?

ຢາໂຄບ 4

ເຮົາສາມາດຄືນດີກັບພຣະເຈົ້າ ທາງການຊົດໃຊ້ຂອງພຣະເຢຊູຄຣິດ.

ຢາໂຄບໄດ້ອ້ອນວອນຜູ້ຄົນຂອງເພິ່ນ ໃຫ້ “ຄືນດີກັບ [ພຣະເຈົ້າ] ທາງການຊົດໃຊ້ຂອງພຣະຄຣິດ” (ຢາໂຄບ 4:11). ທ່ານຄິດວ່າ ນັ້ນໝາຍຄວາມວ່າແນວໃດ? ມັນຊິຊ່ວຍໄດ້ຢູ່ບໍ ຖ້າຫາກທ່ານເປີດເບິ່ງຄຳວ່າ ຄືນດີ ຢູ່ໃນ ວັດຈະນະນຸກົມ? ບາງທີທ່ານສາມາດພົບເຫັນຖ້ອຍຄຳ ຫລື ສຳນວນຢູ່ໃນບົດນີ້ ທີ່ໃຫ້ຄຳແນະນຳແກ່ທ່ານ ເຖິງວິທີທີ່ຈະມາຫາພຣະຄຣິດ ເພື່ອວ່າທ່ານຈະສາມາດຄືນດີກັບພຣະເຈົ້າ. ຍົກຕົວຢ່າງ, ຢາໂຄບໄດ້ສິດສອນວ່າ ກົດຂອງໂມເຊໄດ້ຖືກມອບໃຫ້ ເພື່ອຊີ້ບອກຜູ້ຄົນໃຫ້ໄປຫາພຣະເຢຊູຄຣິດ (ເບິ່ງ ຢາໂຄບ 4:5). ພຣະເຈົ້າໄດ້ຈັດຕຽມຫຍັງແດ່ ເພື່ອຊີ້ບອກທ່ານໃຫ້ໄປຫາພຣະຄຣິດ? ທ່ານໃຊ້ສິ່ງເຫລົ່ານີ້ ເພື່ອຈະໄດ້ເຂົ້າໃກ້ພຣະເຈົ້າຫລາຍຂຶ້ນແນວໃດ?

ເບິ່ງ 2 ນີໄຟ 10:24 ນຳອີກ.

ຢາໂຄບ 4:8–18

ເຮົາສາມາດຫລີກລ້ຽງຈາກຄວາມມືດບອດທາງວິນຍານໄດ້ ໂດຍການເອົາໃຈໃສ່ຕໍ່ພຣະຜູ້ຊ່ວຍໃຫ້ລອດ.

ຂະນະທີ່ຢາໂຄບໄດ້ສະແຫວງຫາທີ່ຈະຫັນຜູ້ຄົນຂອງເພິ່ນ ໄປຫາພຣະຜູ້ເປັນເຈົ້າແທ້ໆຫລາຍກວ່າເກົ່າ, ເພິ່ນຈຶ່ງໄດ້ເຕືອນພວກເຂົາວ່າ ບໍ່ໃຫ້ບອດທາງວິນຍານ ແລະ ບໍ່ໃຫ້ກຽດຊັງ “ຄຳເວົ້າອັນແຈ່ມແຈ້ງ” ຂອງພຣະກິດຕິຄຸນ (ເບິ່ງ ຢາໂຄບ 4:13–14). ແອວເດີ ຄວິນຕິນ ແອວ ຄຸກ ໄດ້ເຕືອນເຖິງບັນຫາທີ່ຄ້າຍຄືກັນໃນສະໄໝຂອງເຮົາວ່າ: “ມີແນວໂນ້ມໃນໝູ່ພວກເຮົາບາງຄົນ ທີ່ຈະ ‘ເບິ່ງກາຍເຄື່ອງໝາຍ’ ແທນທີ່ຈະຮັກສາປະຈັກພະຍານກ່ຽວກັບພື້ນຖານພຣະກິດຕິຄຸນ. ເຮົາເຮັດສິ່ງນີ້ຕອນເຮົາໃຊ້ປັດຊະຍາຂອງມະນຸດແທນຄວາມຈິງຂອງພຣະກິດຕິຄຸນ, ເມື່ອເຮົາມີສ່ວນຮ່ວມໃນຄວາມບ້າຄັ່ງເລື່ອງພຣະກິດຕິຄຸນ, … ຫລື ນັບຖືກົດວ່າສຳຄັນກວ່າຄຳສອນ. ການຫລີກລ້ຽງຈາກການປະພຶດແບບນີ້ ຈະຊ່ວຍເຮົາໃຫ້ຫລີກລ້ຽງຈາກຄວາມມືດບອດທາງສາດສະໜາ ແລະ ຈາກການສະດຸດທີ່ຢາໂຄບໄດ້ບັນຍາຍ” (“Looking beyond the Mark,” Ensign, Mar. 2003, 42).

ອີງຕາມ ຢາໂຄບ 4:8–18, ເຮົາສາມາດເຮັດຫຍັງແດ່ ເພື່ອຈະໄດ້ເອົາໃຈໃສ່ຕໍ່ພຣະຜູ້ຊ່ວຍໃຫ້ລອດ ແລະ ຫລີກລ້ຽງຈາກຄວາມມືດບອດທາງວິນຍານ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

ຢາໂຄບ 1:6–8, 15–19; 2:1–11; 4:18

ຄຳໃດ ແລະ ສຳນວນໃດ ຢູ່ໃນຂໍ້ເຫລົ່ານີ້ ທີ່ບອກເຖິງຄວາມຮັກຂອງຢາໂຄບສຳລັບຜູ້ທີ່ເພິ່ນນຳພາ? ຜູ້ນຳຂອງສາດສະໜາຈັກຂອງເຮົາໄດ້ເຮັດຫຍັງແດ່ ເພື່ອຊ່ວຍເຮົາໃຫ້ຮູ້ສຶກເຖິງ “ຄວາມປາດຖະໜາ ແລະ ຄວາມກະວົນກະວາຍ [ຂອງພວກເພິ່ນ] ເພື່ອຄວາມຜາສຸກຂອງຈິດວິນຍານ [ຂອງເຮົາ]”? (ຢາໂຄບ 2:3). ບາງທີສະມາຊິກໃນຄອບຄົວສາມາດແບ່ງປັນວິທີທີ່ເຮົາສາມາດສະໜັບສະໜູນຜູ້ນຳຂອງສາດສະໜາຈັກຂອງເຮົາ. ພວກທ່ານສາມາດວາງແຜນທີ່ຈະເຮັດບາງຢ່າງເປັນຄອບຄົວເພື່ອຜູ້ນຳຂອງສາດສະໜາຈັກໃນທ້ອງຖິ່ນ, ດັ່ງເຊັ່ນການຂຽນຈົດໝາຍຂອບໃຈພວກເພິ່ນ ສຳລັບການຮັບໃຊ້ ຫລື ຈື່ຈຳພວກເພິ່ນ ແລະ ຄອບຄົວຂອງພວກເພິ່ນ ຢູ່ໃນຄຳອະທິຖານຂອງພວກທ່ານ.

ຢາໂຄບ 2:8

ພຣະຄຳຂອງພຣະເຈົ້າ ປິ່ນປົວ “ຈິດວິນຍານທີ່ຖືກບາດເຈັບ” ແນວໃດ?

ຢາໂຄບ 2:12–21

ຂໍ້ເຫລົ່ານີ້ສອນທ່ານຫຍັງແດ່ກ່ຽວກັບວິທີທີ່ເຮົາຄວນເບິ່ງຄວາມຮັ່ງມີທາງສິ່ງຂອງ? ເຮົາຈະເຮັດສິ່ງໃດ ເພື່ອເອື້ອມອອກໄປຫາຄົນອື່ນ ຜູ້ຕ້ອງການຄວາມຊ່ວຍເຫລືອຈາກເຮົາ?

ຢາໂຄບ 3:1–2

ຄຳວ່າມີ “ໃຈບໍລິສຸດ” ແລະ “ຫວັງໃນພຣະເຈົ້າດ້ວຍໃຈໝັ້ນຄົງ” ໝາຍຄວາມວ່າແນວໃດ?

ຢາໂຄບ 4:4–11

ວິທີໜຶ່ງທີ່ຈະຊ່ວຍຄອບຄົວຂອງທ່ານໃຫ້ເຂົ້າໃຈ ຄຳວ່າ “ບໍ່ຫວັ່ນໄຫວ” ໃນສັດທາຂອງເຂົາເຈົ້າ ແມ່ນໃຫ້ຊອກຫາຕົ້ນໄມ້ທີ່ຢູ່ໃກ້ບ້ານ ແລະ ຂໍໃຫ້ສະມາຊິກໃນຄອບຄົວຈັບສັ່ນເບິ່ງຫລາຍໆງ່າ. ແລ້ວໃຫ້ເຂົາເຈົ້າລອງສັ່ນລຳຕົ້ນຂອງມັນ. ເປັນຫຍັງຈຶ່ງຍາກທີ່ຈະສັ່ນລຳຕົ້ນ? ເຮົາຮຽນຮູ້ຫຍັງແດ່ຈາກຄຳສອນຂອງຢາໂຄບ ກ່ຽວກັບການພັດທະນາສັດທາ ທີ່ “ບໍ່ຫວັ່ນໄຫວ”?

ຄືກັນກັບລຳຕົ້ນໄມ້, ສັດທາຂອງເຮົາໃນພຣະຄຣິດ ສາມາດ “ບໍ່ຫວັ່ນໄຫວ.”

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສຶກສາສ່ວນຕົວ

ຮັບຟັງພຣະວິນຍານ. ຂະນະທີ່ທ່ານສຶກສາ, ໃຫ້ເອົາໃຈໃສ່ຕໍ່ຄວາມຄິດ ແລະ ຄວາມຮູ້ສຶກຂອງທ່ານ (ເບິ່ງ ຄ&ພ 8:2–3), ເຖິງແມ່ນເບິ່ງຄືວ່າ ມັນບໍ່ກ່ຽວຂ້ອງກັບສິ່ງທີ່ທ່ານກຳລັງອ່ານກໍຕາມ. ຄວາມປະທັບໃຈເຫລົ່ານັ້ນ ສາມາດເປັນສິ່ງທີ່ພຣະເຈົ້າປະສົງໃຫ້ທ່ານຮູ້ ແລະ ເຮັດ.