“ວັນທີ 10–16 ເດືອນກຸມພາ. 2 ນີໄຟ 6–10: ‘ໂອ້ ແຜນຂອງພຣະເຈົ້າຂອງພວກເຮົາຍິ່ງໃຫຍ່ພຽງໃດ!’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 10–16 ເດືອນກຸມພາ. 2 ນີໄຟ 6–10,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ພຣະເຢຊູອະທິຖານຢູ່ໃນສວນເຄັດເຊມາເນ

Not My Will, But Thine, Be Done [ຂໍຢ່າໃຫ້ເປັນໄປຕາມຄວາມປາດຖະໜາຂອງລູກ, ແຕ່ຂໍໃຫ້ເປັນໄປຕາມຄວາມປະສົງຂອງພຣະບິດາເທີ້ນ], ໂດຍ ແຮຣີ ແອນເດີສັນ

ວັນທີ 10–16 ເດືອນກຸມພາ

2 ນີໄຟ 6–10

“ໂອ້ ແຜນຂອງພຣະເຈົ້າຂອງພວກເຮົາຍິ່ງໃຫຍ່ພຽງໃດ!”

ຂະນະທີ່ທ່ານອ່ານ 2 ນີໄຟ 6–10, ໃຫ້ໄຕ່ຕອງສິ່ງທີ່ພຣະຜູ້ເປັນເຈົ້າກຳລັງພະຍາຍາມສິດສອນທ່ານ. ເມື່ອທ່ານພົບເຫັນຄວາມຈິງເຫລົ່ານີ້ແລ້ວ, ໃຫ້ບັນທຶກມັນໄວ້ ແລະ ພິຈາລະນາດ້ວຍການອະທິຖານ ເຖິງວິທີທີ່ທ່ານຈະສາມາດເຮັດຕາມສິ່ງທີ່ທ່ານກຳລັງຮຽນຮູ້ໃນເວລານີ້.

ບັນທຶກຄວາມປະທັບໃຈຂອງທ່ານ

ຄົງເປັນຢ່າງໜ້ອຍ 40 ປີ ຜ່ານມາແລ້ວ ນັບຕັ້ງແຕ່ຄອບຄົວຂອງລີໄຮ ໄດ້ໜີຈາກເຢຣູຊາເລັມມາ. ເຂົາເຈົ້າໄດ້ຢູ່ໃນແຜ່ນດິນໃໝ່, ຢູ່ຊີກໂລກອີກເບື້ອງໜຶ່ງ ຈາກເມືອງເຢຣູຊາເລັມ ແລະ ຈາກຜູ້ຄົນແຫ່ງພັນທະສັນຍາຂອງພຣະເຈົ້າ ທີ່ເຫລືອຢູ່. ລີໄຮໄດ້ເສຍຊີວິດໄປ, ແລະ ລູກຫລານຂອງເພິ່ນກໍເລີ່ມຕົ້ນສິ່ງທີ່ກາຍເປັນການຂັດແຍ້ງກັນລະຫວ່າງຊາວນີໄຟ ເປັນເວລາໜຶ່ງສັດຕະວັດ—“ຜູ້ທີ່ເຊື່ອໃນການເຕືອນ ແລະ ການເປີດເຜີຍຂອງພຣະເຈົ້າ”—ກັບຊາວເລມັນ, ຜູ້ທີ່ບໍ່ເຊື່ອ (2 ນີໄຟ 5:6). ໃນສະພາບການເຫລົ່ານີ້, ຢາໂຄບ, ຜູ້ເປັນນ້ອງຊາຍຂອງນີໄຟ ແລະ ບັດນີ້ໄດ້ຖືກແຕ່ງຕັ້ງໃຫ້ເປັນຄູສອນຂອງຊາວນີໄຟ, ຢາກໃຫ້ຜູ້ຄົນແຫ່ງພັນທະສັນຍາຮູ້ວ່າ ພຣະເຈົ້າຈະບໍ່ເຄີຍລືມໄລພວກເຂົາ, ສະນັ້ນພວກເຂົາຈຶ່ງບໍ່ຄວນລືມໄລພຣະອົງ. ນີ້ຄືຂ່າວສານທີ່ເຮົາຕ້ອງການຫລາຍທີ່ສຸດຢູ່ໃນໂລກຂອງເຮົາເອງ, ບ່ອນທີ່ພັນທະສັນຍາຖືກດູຖູກ ແລະ ການເປີດເຜີຍຖືກປະຕິເສດ. “ຂໍໃຫ້ພວກເຮົາລະນຶກເຖິງພຣະອົງ, … ເພາະວ່າພວກເຮົາບໍ່ໄດ້ຖືກປະຖິ້ມ. … ຄຳສັນຍາຂອງພຣະຜູ້ເປັນເຈົ້ານັ້ນຍິ່ງໃຫຍ່,” ເພິ່ນໄດ້ປະກາດ (2 ນີໄຟ 10:20–21). ໃນບັນດາຄຳສັນຍາເຫລົ່ານັ້ນ, ບໍ່ມີຢ່າງໃດທີ່ຍິ່ງໃຫຍ່ໄປກວ່າຄຳສັນຍາທີ່ວ່າ “ການຊົດໃຊ້ອັນບໍ່ມີຂອບເຂດ” ຈະເອົາຊະນະຄວາມຕາຍ ແລະ ນະລົກ (2 ນີໄຟ 9:7). “ສະນັ້ນ,” ຢາໂຄບ ໄດ້ສະຫລຸບ, “ຈົ່ງເຮັດໃຫ້ໃຈຂອງທ່ານຊື່ນບານ”! (2 ນີໄຟ 10:23).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

2 ນີໄຟ 6–8

ພຣະຜູ້ເປັນເຈົ້າມີຄວາມເມດຕາຕໍ່ຜູ້ຄົນຂອງພຣະອົງ ແລະ ຈະເຮັດໃຫ້ຄຳສັນຍາຂອງພຣະອົງສຳເລັດຄົບຖ້ວນ.

ເພື່ອຊ່ວຍຜູ້ຄົນຂອງພຣະອົງໃຫ້ເຂົ້າໃຈວ່າ ພວກເຂົາເປັນພາກສ່ວນໃນເຊື້ອສາຍອິດສະຣາເອນ ແລະ ສາມາດໄວ້ວາງໃຈໃນພຣະເຈົ້າ ແລະ ຄຳສັນຍາຂອງພຣະອົງ, ຢາໂຄບຈຶ່ງໄດ້ອ້າງເຖິງຄຳທຳນາຍຂອງເອຊາຢາ, ຊຶ່ງມີບັນທຶກຢູ່ໃນ 2 ນີໄຟ 6–8. ເອຊາຢາໄດ້ບັນຍາຍເຖິງການກະຈັດກະຈາຍຂອງຊາວອິດສະຣາເອນ ແລະ ເຖິງຄຳສັນຍາຂອງພຣະຜູ້ຊ່ວຍໃຫ້ລອດ ທີ່ຈະເຕົ້າໂຮມ ແລະ ໄຖ່ຜູ້ຄົນຂອງພຣະອົງ. ຂະນະທີ່ທ່ານອ່ານ, ໃຫ້ໄຕ່ຕອງຄຳຖາມເຊັ່ນດັ່ງຕໍ່ໄປນີ້:

ເຮົາຮຽນຮູ້ຫຍັງແດ່ກ່ຽວກັບຄວາມຮັກທີ່ໄຖ່ຂອງພຣະຜູ້ຊ່ວຍໃຫ້ລອດເພື່ອເຮົາ?
ການປອບໂຍນໃດແດ່ທີ່ພຣະຜູ້ຊ່ວຍໃຫ້ລອດໄດ້ສະເໜີມອບໃຫ້ແກ່ຜູ້ທີ່ສະແຫວງຫາພຣະອົງ?
ເຮົາສາມາດເຮັດຫຍັງແດ່ ເພື່ອຈະໄດ້ “ລໍຖ້າ” ພຣະອົງ ແລະ ພອນແຫ່ງຄຳສັນຍາຂອງພຣະອົງ ຢ່າງຊື່ສັດ?

2 ນີໄຟ 9:1–26

ຜ່ານການຊົດໃຊ້ຂອງພຣະອົງ, ພຣະເຢຊູຄຣິດໄດ້ໄຖ່ຖອນທຸກຄົນຈາກຄວາມຕາຍທາງຮ່າງກາຍ ແລະ ທາງວິນຍານ.

ຄຳໃດ ຫລື ຮູບພາບໃດແດ່ ທີ່ທ່ານຈະໃຊ້ເພື່ອສື່ສານກັບບາງຄົນ ເຖິງຄວາມຕ້ອງການຫລາຍທີ່ສຸດຂອງເຮົາ ທີ່ຈະໃຫ້ພຣະຜູ້ໄຖ່ຊ່ວຍກູ້ເຮົາຈາກຄວາມຕາຍ ແລະ ບາບ? ຢາໂຄບໄດ້ໃຊ້ຄຳວ່າ “ເປັນຕາຢ້ານ” ແລະ “ມານຮ້າຍ.” ຢາໂຄບໄດ້ສິດສອນຫຍັງແດ່ກ່ຽວກັບ “ມານຮ້າຍຜູ້ນັ້ນ, ຄວາມຕາຍ ແລະ ນະລົກ” ແລະ “ການໜີ” ທີ່ພຣະເຈົ້າໄດ້ຕຽມໄວ້ສຳລັບເຮົາ? (2 ນີໄຟ 9:10). ຂະນະທີ່ທ່ານອ່ານ 2 ນີໄຟ 9:1–26, ໃຫ້ຄິດທີ່ຈະໝາຍດ້ວຍສີດຽວ ກ່ຽວກັບສິ່ງທີ່ຈະເກີດກັບເຮົາ ປາດສະຈາກການຊົດໃຊ້ຂອງພຣະເຢຊູຄຣິດ. ແລ້ວ, ອີກສີໜຶ່ງ, ໃຫ້ທ່ານໝາຍສິ່ງທີ່ເຮົາສາມາດໄດ້ຮັບ ຜ່ານທາງການຊົດໃຊ້ຂອງພຣະຜູ້ຊ່ວຍໃຫ້ລອດ. ຄວາມຈິງໃດແດ່ທີ່ທ່ານພົບເຫັນກ່ຽວກັບການຊົດໃຊ້ຂອງພຣະເຢຊູຄຣິດ ທີ່ເຮັດໃຫ້ທ່ານສັນລະເສີນ “ຄວາມສະຫລຽວສະຫລາດຂອງພຣະເຈົ້າ, ພຣະເມດຕາ ແລະ ພຣະຄຸນຂອງພຣະອົງ”? (2 ນີໄຟ 9:8).

ເບິ່ງ “ການຊົດໃຊ້ຂອງພຣະເຢຊູຄຣິດ,” ຄູ່ມືພຣະຄຳພີ, scriptures.ChurchofJesusChrist.org ນຳອີກ.

2 ນີໄຟ 9:27–54

ເຮົາສາມາດມາຫາພຣະຄຣິດ ແລະ ຮັບເອົາພອນທີ່ຮຸ່ງເຫລື້ອມແຫ່ງການຊົດໃຊ້ຂອງພຣະອົງໄດ້.

ພຣະເຢຊູຄຣິດໄດ້ສະເດັດມາ “ຍັງໂລກເພື່ອຈະໄດ້ຊ່ວຍມະນຸດທັງປວງໃຫ້ລອດພົ້ນ ຖ້າຫາກ ເຂົາຈະເຊື່ອຟັງສຸລະສຽງຂອງພຣະອົງ” (2 ນີໄຟ 9:21; ເນັ້ນຄຳເນີ້ງ). ໃນອີກຄຳໜຶ່ງ, ເຮົາຕ້ອງເຕັມໃຈທີ່ຈະຮັບເອົາພອນທີ່ຊ່ວຍໃຫ້ລອດ ທີ່ພຣະອົງສະເໜີມອບໃຫ້. ຫລັງຈາກໄດ້ບັນຍາຍເຖິງແຜນແຫ່ງການໄຖ່ແລ້ວ, ຢາໂຄບໄດ້ໃຫ້ຄຳເຕືອນ ແລະ ຄຳເຊື້ອເຊີນທີ່ສຳຄັນ, ທີ່ມີຢູ່ໃນ 2 ນີໄຟ 9:27–54, ເພື່ອຊ່ວຍເຮົາໃຫ້ໄດ້ຮັບພອນຂອງການຊົດໃຊ້. ໃຫ້ຄິດທີ່ຈະບັນທຶກມັນໄວ້ຢູ່ໃນແຜນຜັງ ທີ່ຄືກັນກັບອັນນີ້:

ຄຳເຕືອນ	ຄຳເຊື້ອເຊີນ
ຄຳເຕືອນ	ຄຳເຊື້ອເຊີນ
ຄຳເຕືອນ	ຄຳເຊື້ອເຊີນ

ທ່ານຮູ້ສຶກໄດ້ຮັບການກະຕຸ້ນຈາກພຣະວິນຍານແນວໃດ ເພື່ອໃຫ້ເຮັດໃນການຕອບຮັບຕໍ່ຄຳເຕືອນ ແລະ ຄຳເຊື້ອເຊີນເຫລົ່ານີ້?

2 ນີໄຟ 10:20, 23–25

ເປັນເພາະການເສຍສະລະຂອງພຣະເຢຊູຄຣິດ, ເຮົາຈຶ່ງສາມາດ “ຊື່ນບານ” ໃນຫົວໃຈ.

ຂ່າວສານຂອງຢາໂຄບເປັນໜ້າປິຕິຍິນດີແທ້ໆ. “ຂ້າພະເຈົ້າເວົ້າເລື່ອງເຫລົ່ານີ້ກັບທ່ານ,” ເພິ່ນໄດ້ກ່າວ, “ເພື່ອທ່ານຈະໄດ້ປິຕິຍິນດີ, ແລະ ເງີຍຫົວຂອງທ່ານຂຶ້ນຕະຫລອດການ” (2 ນີໄຟ 9:3). ຂະນະທີ່ທ່ານອ່ານ 2 ນີໄຟ 10:20, 23–25, ທ່ານພົບເຫັນຫຍັງແດ່ທີ່ໃຫ້ຄວາມຫວັງແກ່ທ່ານ? ທ່ານໄດ້ພົບເຫັນຫຍັງອີກແດ່ ຢູ່ໃນ 2 ນີໄຟ 9–10 ທີ່ໃຫ້ຄວາມຫວັງແກ່ທ່ານ? ທ່ານຈະເຮັດຫຍັງແດ່ເພື່ອຈະໄດ້ຈື່ຈຳສິ່ງເຫລົ່ານີ້ ເວລາທ່ານຮູ້ສຶກທໍ້ຖອຍໃຈ?

ເບິ່ງ ໂຢຮັນ 16:33 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

2 ນີໄຟ 8:3–7

ຂະນະທີ່ທ່ານອ່ານ 2 ນີໄຟ 8:3, ທ່ານສາມາດສະແດງຮູບພາບທີ່ເປັນຖິ່ນແຫ້ງແລ້ງກັນດານ ແລະ ຮູບພາບທີ່ເປັນສວນ. ພຣະຜູ້ເປັນເຈົ້າໄດ້ປ່ຽນຖິ່ນແຫ້ງແລ້ງກັນດານໃຫ້ກາຍເປັນສວນ ໃນຊີວິດຂອງທ່ານແນວໃດ? ໃນ ຂໍ້ທີ 4–7, ພຣະຜູ້ເປັນເຈົ້າໄດ້ແນະນຳເຮົາໃຫ້ເຮັດຫຍັງແດ່ ເພື່ອຈະໄດ້ຮັບຄວາມສຸກດັ່ງທີ່ບັນຍາຍຢູ່ໃນ ຂໍ້ທີ 3?

2 ນີໄຟ 8:24–25

ຖ້ອຍຄຳທີ່ຊຸກຍູ້ຂອງເອຊາຢາ ຕໍ່ຜູ້ຄົນຂອງຊີໂອນ ໃຫ້ຄວາມເຂັ້ມແຂງແກ່ເຮົາແນວໃດແດ່ ໃນຄວາມມຸ່ງໝັ້ນຂອງເຮົາທີ່ຈະກາຍເປັນສານຸສິດທີ່ຊື່ສັດຫລາຍກວ່າເກົ່າ ຂອງພຣະເຢຊູຄຣິດ? ການຕື່ນນອນ ແລະ ການແຕ່ງກາຍ ຄ້າຍຄືກັນກັບສິ່ງທີ່ພຣະເຈົ້າປະສົງໃຫ້ເຮົາເຮັດທາງວິນຍານແນວໃດ?

2 ນີໄຟ 9:1–26

ຄອບຄົວຂອງທ່ານຈະເຮັດສິ່ງໃດ ເພື່ອຈະເຂົ້າໃຈເຖິງຄວາມສຳຄັນຂອງ “ການຊົດໃຊ້ອັນບໍ່ມີຂອບເຂດ” ຂອງພຣະເຢຊູຄຣິດ? (ຂໍ້ທີ 7). ບາງທີເຂົາເຈົ້າສາມາດເບິ່ງ ຫລື ຄິດກ່ຽວກັບສິ່ງທີ່ເບິ່ງຄືວ່າ ບໍ່ມີຂອບເຂດ ໃນຈຳນວນເລກ—ໃບຫຍ້າຢູ່ໃນທົ່ງ, ເມັດດິນຊາຍຢູ່ໃນຫາດ, ຫລື ດວງດາວຢູ່ໃນທ້ອງຟ້າ. ການຊົດໃຊ້ຂອງພຣະຜູ້ຊ່ວຍໃຫ້ລອດບໍ່ມີຂອບເຂດແນວໃດ? ສຳນວນໃດແດ່ຢູ່ໃນ 2 ນີໄຟ 9 ເຮັດໃຫ້ຄວາມກະຕັນຍູຂອງເຮົາເລິກຊຶ້ງຫລາຍຂຶ້ນ ກ່ຽວກັບສິ່ງທີ່ພຣະຜູ້ຊ່ວຍໃຫ້ລອດໄດ້ກະທຳເພື່ອເຮົາ?

2 ນີໄຟ 9:27–44

ບາງທີມື້ໜຶ່ງໃນອາທິດນີ້ ຄອບຄົວຂອງທ່ານສາມາດຄົ້ນຄວ້າ 2 ນີໄຟ 9:27–38, ຊອກຫາຄຳເຕືອນ (ທີ່ເລີ່ມຕົ້ນດ້ວຍຄຳວ່າ “ວິບັດ”). ອັນໃດທີ່ເບິ່ງຄືວ່າສຳຄັນໂດຍສະເພາະສຳລັບຄອບຄົວຂອງທ່ານ ທີ່ຈະເອົາມາສົນທະນາ? ໃນອີກມື້ໜຶ່ງ, ພວກທ່ານສາມາດຄົ້ນຄວ້າ 2 ນີໄຟ 9:39–44, ຊອກຫາສິ່ງທີ່ຢາໂຄບເຊື້ອເຊີນຜູ້ຄົນຂອງເພິ່ນໃຫ້ຈື່ຈຳ.

2 ນີໄຟ 9:28–29, 50–51

ມີຕົວຢ່າງໃດແດ່ເຖິງ “ຄວາມຖືຕົວ, ແລະ ຄວາມອ່ອນແອ, ແລະ ຄວາມໂງ່ຂອງມະນຸດ”? (ຂໍ້ທີ 28). ເຮົາສາມາດເຮັດຫຍັງໄດ້ແດ່ ເພື່ອໃຫ້ຄວາມສຳຄັນຫລາຍຂຶ້ນແກ່ສິ່ງທີ່ເປັນຂອງພຣະເຈົ້າ ແລະ ໃຫ້ຄວາມສຳຄັນໜ້ອຍລົງແກ່ສິ່ງທີ່ເປັນຂອງໂລກ?

2 ນີໄຟ 9:45

ຄອບຄົວຂອງທ່ານອາດມັກເຮັດໂສ້ເຈ້ຍ ແລະ ແລ້ວໃຫ້ປ່ຽນຜຽນກັນຕໍ່ບ້ວງ ແລະ ສັ່ນໃຫ້ບ້ວງຂາດອອກຈາກກັນ. ບາບຄືກັນກັບບ້ວງເຫລົ່ານີ້ແນວໃດ? ພຣະຜູ້ຊ່ວຍໃຫ້ລອດຊ່ວຍເຮົາສັ່ນມັນໃຫ້ຕົກອອກໄປແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສິດສອນຂອງເຮົາ

ມີເວລາ ແລະ ສາມາດເຂົ້າຫາໄດ້. “ບາງເທື່ອເວລາສິດສອນທີ່ດີທີ່ສຸດແມ່ນ ເລີ່ມຕົ້ນດ້ວຍຄຳຖາມ ຫລື ຄວາມເປັນຫ່ວງເປັນໃຍໃນໃຈຂອງສະມາຊິກໃນ [ຄອບຄົວ]. … ຈົ່ງບອກໃຫ້ເຂົາເຈົ້າຮູ້ຜ່ານທາງຖ້ອຍຄຳ ແລະ ການກະທຳຂອງທ່ານວ່າ ທ່ານພ້ອມທີ່ຈະຮັບຟັງເຂົາເຈົ້າ” (Teaching in the Savior’s Way, 16).