Aoao Atu Aoaoga Faavae Moni, saunia e Michael T. Malm

8–14 Iuni

Alema 8–12

O Le a Afio Mai Iesu Keriso e Togiola Lona Nuu

O le faitauina o tusitusiga paia e valaaulia ai faaaliga. O le mea lea a o e faitauina le Alema 8–12, tusifaamaumau lagona uunai a le Agaga ao Ia aoao oe mai i savali a Alema ma Amuleka.

Tusifaamaumau Ou Lagona Uunai

O le galuega a le Atua o le a le mafai ona faalavelaveina. Ae o a tatou taumafaiga e fesoasoani i Lana galuega e i ai taimi e foliga ai e le taulau—pe a, atonu e le mafai ona tatou vaai vave i taunuuga tatou te faamoemoe i ai. E i ai taimi tatou te ono maua ai si lagona laitiiti e pei o Alema ina ua ia folafola atu le talalelei i Amonaea—sa teena, tuufeanu i ai, ma tuliesea. Ae ina ua faatonuina o ia e se agelu e toe foi ma toe taumafai, sa “vave ona toe foi” atu Alema ma le lototoa (Alema 8:18), ma sa saunia e le Atua le ala i ona luma. E le gata ina sa Ia saunia meaai mo Alema e ‘ai ai ma se nofoaga e nofo ai, ae sa Ia saunia foi Amuleka, o le na avea ma ona uso a faigaluega, o se puipui lototoa o le talalelei, ma se uo faamaoni. Pe a tatou feagai ma toatuga ma ni le fiafia a o tatou auauna atu i le malo o le Alii, e mafai ona tatou manatua le ala na lagolagoina ai e le Atua ma taitai ia Alema, ma e mafai ona tatou talitonu o le a lagolagoina ma taitai foi i tatou e le Atua, e oo lava i tulaga faigata.

Manatu mo Suesuega Faaletagata Lava Ia o Tusitusiga Paia

Alema 8

O a’u taumafaiga e faasoa atu le talalelei e ono manaomia ai le pulunaunau ma le onosai.

E ui atonu e teena e se tasi lau molimau i le talalelei, e le faapea ua tatau ai ona e le maua le faamoemoe—aua o le mea moni, o le a le fiu lava le Alii i lena tagata, ma o le a Ia taialaina oe i le ala e te faatinoina ai. I le tulaga o Alema, sa poloaiina o ia e se agelu e toe foi i Amonaea e folafola atu le talalelei tusa lava pe ua uma ona teena malosi o ia e le nuu (tagai Alema 8:14–16). O le a se mea ua tatou aoao mai i le faataitaiga a Alema o le faasoa atu o le talalelei e ui i luitau ma tetee? O fea fuaiupu i le Alema 8 e faateleina ai lou manao e faasoa atu le talalelei?

Tagai foi 3 Nifae 18:30–32; Jeffrey R. Holland, “O Le Tau—ma Faamanuiaga—o le Avea ma Soo,” Ensign po o le Liahona, Me 2014, 6-9

Alema 9:18–25; 10:16–23

E faamasinoina e le Atua Ana fanau e tusa ai ma le malamalama ma le poto ua latou maua.

Pe a faitau e uiga i le ala sa taulima ai e sa Nifae i Amonaea auauna a le Alii, e faigofie ona galo faapea sa i ai se taimi na avea ai i latou o ni “tagata sili ona faapitoa o le Alii” (Alema 9:20). O le mea moni, o se vaega o le savali a Alema i tagata i Amonaea e faapea ona sa latou faamaaaina o latou loto e ui ina sa matua faamanuiaina i latou, ae sa sili atu ona leaga lo latou tulaga nai lo sa Lamana, o e sa tele ina agasala ona o le valea. O le a le mea ua aoao mai e lenei eseesega ia i tatou e uiga i le ala e faamasinoina ai e le Atua Ana fanau?

A o e faitau e uiga i faamanuiaga sili na tuu mai e le Atua i le nuu o Nifae (tagai aemaise i le Alema 9:19–23), mafaufau i faamanuiaga sili sa Ia tuuina mai ia te oe. O le a se mea o e faia e tumau faamaoni ai i nei faamanuiaga? O a suiga ua e lagonaina e te manaomia ona fai?

Tagai foi Mataupu Faavae ma Feagaiga 82:3.

Alema 11–12

O le fuafuaga a le Atua o se fuafuaga o le togiola.

Sa faaaoga e perofeta o le Tusi a Mamona ni igoa eseese e faamatala ai le fuafuaga a le Atua mo Ana fanau, e pei o le ata o le faaolataga po o le fuafuaga o le fiafia. I le Alema 11–12, sa faasino i ai e Alema ma Amoleka o le fuafuaga o le togiola. A o e faitauina nei mataupu, mafaufau pe aisea ua faaaogaina ai le upu “togiola” e faamatala ai le fuafuaga. E mafai foi ona e tusia se aotelega puupuu o mea na aoao atu e Alema ma Amoleka e uiga i vaega nai o le fuafuaga.

O Le Pau:

O Le Togiola:

Salamo:

Maliu:

Toetu:

Faamasinoga:

Matau le aafiaga o tagata ona o upu a Amoleka (tagai Alema 11:46). Aisea e te manatu ai e mamana tele le tosinaga a nei mataupu faavae? O faapefea ona tosinaina lou olaga?.

Tagai foi D. Todd Christofferson, “O Le Toetu o Iesu Keriso,”,” Ensign po o le Liahona, Me 2014, 111–14.

Alema 12:8–18

Afai o le a ou le faamaaaina lo’u loto, e mafai ona tele atu afioga a le Atua ou te maua.

Atonu e taumanatunatu nisi tagata pe aisea e le faia ai e le Tama Faalelagi ia tatou iloa mea uma. I le Alema 12:9–14, sa faamalamalama mai ai e Alema se mafuaaga e tasi e taofia ai e le Atua i nisi taimi Ana mealilo mai ia i tatou. O fesili nei e mafai ona fesoasoani e te mafaufau ai i mea na ia aoao mai:

• O le a le uiga o le faamaaaina o o tatou loto? Pe o e matauina ni uiga faapena ia te oe lava?

• Aisea e ono taofia ai e le Alii Lana afioga mai ia i latou o e faamaaaina o latou loto?

• Ua faapefea ona e iloa le folafolaga o le mauaina o se “vaega tele o le upu”? (Alema 12:10). Na faape’i lena aafiaga?

• O le a se mea e mafai ona e faia ia mautinoa ai “ua maua i totonu ia te [oe]” le upu a le Atua? (Alema 12:13). Afai na ia te oe le upu a le Atua, o le a le aafiaga o le a i ai i au “upu,” “galuega”, ma “mafaufauga”? (Alema 12:14).

Mo se faataitaiga o nei mataupu faavae, faatusatusa Amoleka i isi tagata o Amonaea. O faapefea e le aafiaga o Amoleka (tagai aemaise o le Alema 10:1–11) ona faapupula mai mea o loo aoao atu e Alema i nei fuaiupu?

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Alema 8:10–18

O le a se mea e mafai ona tatou aoao mai ia Alema e uiga i le usitai “vave” i le Alii (fuaiupu 18) tusa lava pe faigata? Ina ia lagolagoina lenei mataupu faavae i tamaiti laiti, e mafai ona e faia se taaloga e te tuu atu ai faatonuga mo se galuega ma vaai po o le a le vave e faataunuu ai e tagata o le aiga. Mo se faataitaiga e mafai ona e vaai po o ai e vave ona gaugauina se fasiie.

Alema 10:1–12

O le a se mea e mafai ona tatou aoao mai le aafiaga o Amoleka i nei fuaiupu? O le a se mea na tupu i e faalogologo ona o lana molimau? Valaaulia tagata o le aiga e fai se fuafuaga e fai se mea se tasi i lenei vaiaso e faavae i luga o mea sa latou aoaoina mai le faataitaiga a Amoleka.

Alema 10:22–23

O a ni mea ua tatou aoao mai i nei fuaiupu e uiga i le tosinaga a se vaega o tagata amiotonu e mafai ona i ai i se aai amioleaga?

Alema 11:34–37

O le a le eseesega i le va o le laveaiina o i tatou e Iesu Keriso i a tatou agasala ma mai i a tatou agasala? (tagai i le Helamana 5:10; tagai foi i le 1 Ioane 1:9–10). Ina ia faaalia mea na aoao atu e Amuleka, atonu e te faasoaina atu le tala i le amataga o le savali a Elder Allen D. Haynie, “Manatua Le Ua Tatou Faalagolago I Ai” (Ensign po o le Liahona, Nov. 2015, 121–23). E faapefea ona laveaiina e Iesu Keriso i tatou mai a tatou agasala?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Suesuega Faaletagata Lava ia

Saili i upu a perofeta ma aposetolo o aso e gata ai. Faitau ma po o a mea na aoao mai e perofeta ma aposetolo o aso e gata ai e uiga i upumoni e te maua i mau. Mo se faataitaiga, e mafai ona e faailoa mai se autu i le Alema 8–12 ma vaavaai mo lena autu i le konafesi aoao aupito lata mai (tagai Aoao Atu i le Ala a le Faaola, 21).

Ata o Alema o loo talisua ma Amoleka saunia e Dan Burr