Aramwa ao Amureka a rianna n otinako man te karabuuti

Kabwarabwaraan tamnein Aramwa ao Amureka ngke a otinako man te karabuuti, iroun Andrew Bosley

Tuun 15–21

Aramwa 13–16

“Rin inanon ana rau te Uea”

Te namakin are ko karekea ngkai ko iangoi koroboki aika a tabu e rang kakaawaki. Ko kona ni kaotia bwa ko kabonganai raoi man raweana ao karaoan nanona.

Korea Am Namakin

N aro aika a bati, e rang tamaroa maiuia Amureka ao Teeterom i Amonia. Amureki bon “te aomata ae akea ae aki kina,” ao “a mwaiti ana koraki ao raraona” ao “e kaubwai” (Aramwa 10:4). Teeterom bon “temanna are e rang bane arona” ibuakoia rooia ao e rang “mwaiti ana mwakuri” (Aramwa 10:31). Ngkanne e roko Aramwa i Amonia n te kakao mai karawa bwa e na raira nanona ao “n rin n ana rau te Uea” (Aramwa 13:16). Iroun Amureki, Teeterom, ao tabeman riki, butimwaean te kakao aei e kainnanoa te anganano ao riki te kaitara ae a kuri n aki kona.

Ma eang e aki moti ikanne te karaki. N Aramwa 13–16, ti reiakin bwaai ake a riki n tokin te tai nakoia ake a kakoaua “mwaakan Kristo nakon te kamaiuaki” (Aramwa 15:6). N tabetai iai te kamaiuaki, n tabetai te kamarurungaki—ao n tabetai e aki rikirake ni bebete bwaai n te maiu aei. Ma n tainako, “te Uea e butimwaia [Ana botanaomata] nakoina, ma te mimitong” (Aramwa 14:11). N tainako, te Uea e anga “te mwaaka, n aron [ara] onimaki are [iroun] Kristo” (Aramwa 14:28). Ao n taainako, n “reken onimakinan te Uea ”e anganiira “te kantaninga bwa [ti] na karekea te maiu ae akea tokina” (Aramwa 13:29). Ngkai ko wareki mwakoro aikai, ko kona n nanoraoi ni berita aikai, ao ko kona ni matata riki n te bwai are e kananona ngke e taekina “ana rau te Uea.”

te aikaon ibukin te kamatebwai i bon iroum

Iango ibukin te Kamatebwai ni koroboki aika tabu i bon iroum

Aramwa 13:1–19

Otenanti n te nakoanibonga a buokai ni karekea te kamaiuaki rinanon Iesu Kristo.

Ko kona n uringnga n Aramwa 12, Aramwa e reirei taekan ana baire te Atua ibukin te kaboaki (taraa Aramwa 12:24–27). Ni mwakoro 13, e taekina taekan te ibonga are e kamatoa te Atua “n reirei baikai nakoia aomata” (Aramwa 13:1). Ana taeka Aramwa e kaoti koaua aika mwaaka aika a bati iaon koauan te nakoanibonga. Tao ko kona ni kataia n taekina teuana te koaua ni katoai kibu n Aramwa 13:1–9. Aikai tabeua iango bwa ko aonga ni waaki:

Kibu 1:Te nakoanibonga e aranaki naba “n aron ana karinan natin [te Atua]” (taraa naba RB 107:1–4).

Kibu 2:Te Atua e katabuia ibonga bwa a na buokiia aomata n taraa Natina ibukin kamaiuakia.

Kibu 3:Naake iai irouia te nakoanibonga a katauraoaki ibukin tibwangaia “man imwain katean te aonaaba.”

Tera riki ae ko kunea? Tera ae ko namakinna ibukin te nakoanibonga ngkai ko iangoi koaua aikai? A kanga otenanti n te nakonibonga ni buokiko n taraa Kristo ibukin te kabooaki?

E kakaongora ataakina bwa a mwaiti aomata i Amonia ake a ira Neooa (taraa Aramwa 14:18; 15:15). E kanga aron teia ibonga n ana baire Neooa (taraa Aramwa 1:3–6) ni kaokoro man ibonga ake a katabuaki “aron ana Karinan Natin te Atua.” (RB 107:3), are e kabwarabwara Aramwa? (taraa Aramwa 13:1–19).

Taraa naba Dale G. Renlund, “The Priesthood and the Savior’s Atoning Power,” Ensign ke Riaona, Nob. 2017, 64–67.

ataeinimwaane n taiboran te toa

Otenanti n te nakoanibonga e buokiira n tararake nakon Iesu Kristo ibukin te kamaiuaki.

Aramwa 13:3

Ti naake a taua te nakoanibonga aomata ake “a weteaki ao ni katauraoaki man moan katean te aonaaba”?

N ana reirei Aramwa n Aramwa 13:3 e kaineti ti nakoia naake iai irouia te nakoanibonga. E ngae n anne, te reirei are e anga—bwa aomata nako a na karekea tibwangaia ao n tauraoi ni kakoroi bukiia “man moan katean te aonaaba”—e kaineti nakoira ni kabane. Beretitenti Spencer W. Kimball e taku: “n te aonaaba imwain are ti roko ikai, aine aika kakaonimaki a anganaki tibwangaia nako ao mwaane aika a kakaonimaki a kaman katabuaki nakon tibwangaia n te nakoanibonga n aekaia nako. Ngkai te bwai ae ti aki uringnga n te tai aei, aio e aki bita koauan te mimitong are ti a tia n ni booraoi iai” (Teachings of Presidents of the Church: Spencer W. Kimball [2006], 215–16; taraa naba RB 138:55–56).

Aramwa 14

N tabetai te Atua e kariaia naake a raoiroi bwa a na korakai.

Aramwa 14 e taekina aroia aomata aika raraoi ake a rootaki ao n tokina a mate ibukin aia koaua. Kona bae ni kan ataia, n aroia aika a mwaiti, bukin tera a riki bwaai aika kakamaku nakoia aomata aika a kataia ni maiuakina te raoiroi. Ko kona n aki kona ni kunei kaeka ni kabane nakon te titiraki ae kanganga aei n Aramwa 14, ma e mwaiti bwaai aika ko reiakinna man aroia Aramwa ao Amureki ni kaitarai bwaai ake kaitarai. Tera ae a reiakiniko aia kaeka ao aia mwakuri iaon tera bukina bwa te Uea n tabetai e kariaia aomata aika a raraoi bwa a na rinanon te korakai? Tera ae ko reiakinna mai irouia ibukin kaitaraan te bwainikiriinaki?

Taraa naba Mataio 5:43–44; Mareko 14:55–65; I-Rom 8:35–39; 1 Betero 4:12–14; Reirei ao Berita aika Tabu 122:5–9.

Aramwa 15:16, 18

N riki bwa ana reirei e kainnanoa te anganano.

E bae ni kakaongora karaoan rinanin bwaai ake e katikui Amureki ibukin kamoamoan te euangkerio (taraa Aramwa 10:4–5; 15:16) ao kabotaua ma rinanin bwaai ake e karekei (taraa Aramwa 15:18; 16:13–15; 34:8). Tera ae ko tauraoi n anganano iai bwa ko aonga n riki bwa ana reirei ae kakaonimaki riki?

aikaon ibukin te kamatebwai n utu

Iango ibukin Kamatebwai n Koroboki aika a tabu ao Bootaki n Utu n te Tairiki

Ngkai kam wareki koroboki aika a tabu ma ami utu, te Tamnei e kona ni buokiko n atai bwa reirei raa aika a na kabwarabwara ao ni maroro bwa e aonga ni karekei kainnanoia ami utu. Aikai iango tabeua.

Aramwa 13

Am utu a na kona ni kanuanganaki man ataakin kaotin te taeka ae “rau” are e kaoti iai n Aramwa 13. Tera taeka tabeua ao iango aika a kaoti ma ngaia? E kanga ni buokiira aio n oota bwa tera “rin n ana rau te Uea” ae e kona n nanonaki? Tera okorora ma te rau n rabwata?

Aramwa 13:10–12

Ni buokaia am utu n nooria bwa tera ae reiakinaki man kiibu aikai, tao kam kona ni kaai ni uatiia te bwai teuana—n aron tabeua kunnikai aika a mainaina. Tera aron ara namakin ngkana ti barekareka? Tera aron ara namakin ngkana ti a manga itiaki? Aekakira aron namakin aikai ni kabotauaki ma are ti namakinna ngkana ti bure ao imwiina ti raririnanora ao ni manga itiaki rinanon Ana Mwakuri ni Kamaiu te Tia Kamaiu?

Aramwa 15:1–12

Tera ae ti reiakinna man are e rinanona Teeterom ni mwaakan te Uea ni kakorakora ao ni kamarurungiira, riki ngkana ti karaoi kairua? Tera ae e kona ni karaoia te nakoanibonga ni karekean te Korakora ao te kamarurungaki mai irouna?

Aramwa 16:1–10

Imwiin warekan kiibu aikai, kona bae ni wareka Aramwa 9:4. Tera ae ti reiakinna man kaokoron are e namakinna Tioram n ana taeka te burabeti ao are a namakinna kain Amonia? Tera ae ti na karaoia bwa ti na kakaonimaki nakon ana taeka ara burabeti ae maiu?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Kanakoraoan Ara Anga reirei

Tatauraoi n tainako. Taai n reireiaki a waekoa ni bua, ngaia are kabonganai raoi ngkana a kaoti. Te kabuanibwai n te aonaaba, n te katoto, e kona iai n reke tain tibwakin te reirei man, Aramwa 14 iaon tera bukina bwa te Uea e kariaia naake akea aia bure bwa a na rootaki n tabetai. (Taraa Reirei n ana Kawai te Tia Kamaiu, 16.)

Aramwa ao Amureki n te Karabuuti

Aramwa ao Amureki n te Karabuuti, iroun Gary L. Kapp