Ko Aki Mwanuokinaki, iroun Jon McNaughton

Tuun 1–7

Aramwa 5–7

“Kam a Tia n Rinanon te Bitaki ae Korakora aio Inanomi?”

Aramwa 5–7 e konaa ni buokiko ni kauringko aron teimatoan rairakim nakon Iesu Kristo. N am tai ni wareware, koroi mwin baike e reireiniko iai te Tamnei.

Korea Am Namakin

E aki ataia Aramwa ae iai n taai aikai te korokoro ibukin manga onean te maama ibukin kamaiuan temanna, ni manga onean mwin te maama ae e uruaki ke ae e aooraki nakon ae e marurung. Ma e ataa riki aron te kakai ni “bitakin te nano” (Aramwa 5:26)—te nano are e anganiira te Tia Kamaiu ae te maiu n tamnei ae boou, n aron are a na “manga bungiaki kaua” (taraa Aramwa 5:14 49). E kona n nooria Aramwa bwa bitakin te nano aio bon te bwai raoi are a kainnanoia angiia Nibwaaite. Iai aika a kaubwai ao ake tabeman a kainnano, tabeman a kainikatonga ao ake tabeman a nanorinano, tabeman taan bwainikirina te aba, ao ake tabeman a rootaki imwin bwainikirinaia (taraaa Aramwa 4-15). Ma a bon bane ni kainnanoa te roko nakon Iesu Kristo bwa a na kamaiuaki—ai arora naba ni kabane. Ngkai tao ti ukoukora kanakoan te kainikatonga ke te kona ni kaitaraa te kaangaanga, Ana taeka Aramwa bon ti te arona: “Nakomai ao tai maaku” (Aramwa 7:15). Kariaia te Tia Kamaiu bwa e na bita te nano ae matoatoa, ae bure, ke te nano ae e ikoaki nakon te nano ae nimamannei, ae itiaki, ao ae e boou.

Iango ibukin te Kamatebwai I Bon Iroum ni Koroboki aika Tabu

Aramwa 5:14–32

N na riai n rinanon—ao n reitinako n namakina—te bitaki n nano ae korakora.

Te titiraki are e anga Aramwa ni karika manga taraan aron maiuia i bon irouia aomata i Taraemera, ae e kuneaki n Aramwa 5:14-33e kona ni buokiira n noora oin nanora ao ara atatai bwa tera ae e nanonaki n namakina te “bitak in nano ae korakora” rinanon maium. E kabwarabwaraa Beretitenti M. Russell Ballard manenan taian titiraki aikai: “I kainnanoa ae N na titirakinai ni katoa tai, ‘E uara arou ngkai?’ E na taara n ae titebo ma ko karaoa am intawiu ae e raba i bon iroum. … E riki bwa kanga kairau n tain te intawiu ae e raba aei, I tangiria ni wareka ao ni iangoi taeka ake a kairai bwa N na manga taara aron maiu e bon kuneaki n Aramwa mwakoro nimaua” (“Return and Receive,” Ensign ke Riaona, Mei 2017, 64).

Iangoa warekan ana titiraki Aramwa n aron ae ko bon intawiuniko ao ko tuoa nanom. Ko na bae n tangiria ni koroi am kaeka nakon titiraki. Tera ae ko namakina bwa ko kan karaoia mai mwin te intawiu?

Taraa naba Dale G. Renlund, “Preserving the Heart’s Mighty Change,” Ensign ke Riaona, Nob. 2009, 97–99.

Ana reirei Kristo n tatabemaniia a riai n namakina te “bitaki i nanoia.”

Aramwa 5:33–62

I kona ni karekea oin au kakoaua iroun te Tia Kamaiu ao n Ana euangkerio rinanon te Tamnei ae Raoiroi.

E kaota ana koaua ae e korakora Aramwa iaon te tTa Kamaiu ao Ana euangkerio, ao e kabwarabwaraa naba aron reken te koaua anne. Ni kaotan taekinan ana koaua, e aki kaota arona ngke e noora ao e ongo iroun te anera (taraa Motiaea 27:10–17) ma e ti kabwarabwaraa korakaina n ataakin reken te koaua irouna. Teraa ae ko reiakinna man Aramwa 5:44-51 arona bwa e kanga Aramwa ni karekea te koaua? Ko na kanga n ira ana katooto n am tai ni keiaki ni karekea ke ni kakorakora am koaua? Tera ae ko reiakinna man ana reirei Aramwa ibukin te Ta Kamaiu n Aramwa 5:33-35 48-50, ao 57-60?

Aramwa 7

Te teimatoa n ongotaeka e na buokai n tiku iaon “te kawai are e kaineti nakon uean te Atua.”

Aomata ake i Kiteon a bon aki korakai n aron te kaagangaanga are a kaitara ma ngaia aomata i Taraemera, ngaia are te Tamnei e buoka Aramwa n namakini kainnanoia ao e reireiniia ni kakaokoroia (taraa Aramwa 7:17, 26). Ko na bae n noori kaokoron ana reirei Aramwa n are e anga i Taraemera (taraa Aramwa 5) ao i Kiteon. Te katooto, E nooria Aramwa bwa aomata ake i Kiteon a bon mena n “te kawai are e kaineti nakon uean te Atua” (Aramwa 7:19). Inanon ana tai ni kabwarabwara nakoia, e reireiniia Aramwa bwaai aika a mwaiti ibukin aroia n teimatoa n tiku iaon te kawai (taraa Aramwa 7). Baikara reirei are e anganiia? Tera ae ko kona ni kabongana nakon maium ngkai?

Aramwa 7:–16

Te tia Kamaiu e katoka iaona au bure, marakiu, ao rawaawatau.

Ko a tia n namakinna n te taina ae kanga akea ae e mataata n aron korakaim ao am kaangaanga? Ngkana ko a tia, te koaua are e reiakinaki n Aramwa 7:7–16 e kona ni buokiko. Unimwaane David A. E kakoaua Bednar: “Natin te Atua e ataia ni koaua ao e mataata, bwa e a tia n namakina ao n rinanon te karawawataaki are ti taonaki iai. Ao ibukin Ana mwakuri ni kamaiu ae akea tiana ao akea tokina (taraa Aramwa 34 14), Iai ana nanoanga ae e kororaoi ao E kona ni kanakoa baina n akoi nakoira” (“Bear Up Their Burdens with Ease,” Ensign ke Riaona, Meei 2014 90).

N am tai ni wareka Aramwa 7:7–16, iangoi nanon taian kibu aikai bwa tera ae a kamataataira are e na ko na ni buokira n ataai bukin ana mwakuri ni kamaiu te Tia Kamaiu. Ti na kanga ni karekea te mwaaka are Irouna inanon maiura? Taraia bwa ko na koroi baike ko iangoi.

Taara naba Itaia 53:3–5.

Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki

Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.

Aramwa 5:6–13

E aera Aramwa e tangiriia ana aomata bwa a na uringa ana nanoanga te Uea nakoia aia bakatibu? Baikara karaki man aia rongorongo am bakatibu ae a reiakiniko ibukin Ana nanoanga? Tao ko konaa n nakon familysearch.org/myfamily ni koroi mwin karaki akanne.

Aramwa 5:14-33

Kain am utu na bae n ataa te namakin are ngkana ko tauraoi—ke ko tuai tauraoi—n te nako ni kaembing te ukeuke n te reirei, ke te intawiu ibukin te mwakuri. Tera te bwai ae a tibwa tia n rinanona are a na kona ni kaotia ni kabwarabwaraa kakawakin te tatauraoi? Ko kona ni kaoiia kain te utu bwa ana manga noora Aramwa 5:14-33 ao ni kakaai titiraki are e kabonganai Aramwa ni katauraoiia ana aomata bwa a aonga ni kaitibo ma te Atua. Tao kain te utu n tatabemaniia a kona n rinea te titiraki ao ni kaotia bwa e na kanga ni katauraoira bwa ti aonga ni kaitibo ma te Atua. Kain am utu a kona ni katekei ana titiraki Aramwa aikai inanon am auti n te aro bwa kain am utu a na iangoi nanoia.

Aramwa 6:4-6

Baikara tabeua bukin ae ti bootaki ngaira kain te Aro? Ti na kangaa ni karika rorokora n te taromauri bwa e na reke buokara ao buokaia tabeman iai?

Alma 7:9–16

Tera ae ti reiakinna mani kiibu aikai ae e na buokiira bwa ti na “aki maaku” (Aramwa 7:15) ngkana ti tangiria n rairi nanora ao ni bitaki? Tera te reirei mani kiibu aikai ibukin okiran te Ta Kamaiu ngkana ti kainnanoa te buoka? Baikara bwaai tabeua ae ti a tia n karaoi ni karekei buokara mai Irouna? E kanga ni buokiira?

Aramwa 7:23

Antai ae ti ataia bwa bon te banna ni katooto ae tamaroa ae iai irouna ae rinanon teuana ke ae e mwaiti n aekan aroaro aika a raraoi ake a karinanaki n te kibu aio? E aera bwa e kakawaki karikirakean taian aroaro aikai?

Ibukin riki iango ibukin reiakinaia ataei, taraa te kabwarabwara n te wiiki aei i nanon Nakomai, Iriirai—Ibukin te Moanrinan.

Kanakoraoan Ara Anga reirei

Anga titiraki ae e na kaoiia kain te utu bwa a na mwakuriia. Tarai titiraki aika a na kairoroia kain am utu n noori anga ake a na koa ni maiuakina te euangkerio ma te nano ae bwanin. “Aikai kanga bon tiaki titiraki aika a na marooroakinaki; ma bon ti ibukin manga tarakin aron maium” (Reirei n ana Kawai te Tia Kamaiu, 31).

Te Tia Tei Ibukira , iroun Jay Bryant Ward