Tuun 8–14. Aramwa 8–12: E na roko Iesu Kristo ni Kabooia Ana Aomata,” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Tuun 8–14. Aramwa 8–12,” Nakomai, Irirai—Ibukiia Aomata n Tatabemaniia ao Utu: 2020
Anga reirei iaon Reirei aika Koaua, iroun Michael T. Malm
Tuun 8–14
Aramwa 8–12
“E na Roko Iesu Kristo ni Kabooia Ana Aomata
Kamatebwaian booki aika tabu e kaoa te kaotioti. Ngkana ko wareka Aramwa 8–12, korei namakin mai i roun te Tamnei ngkai E reireiniko man ana rongorongon Aramwa ao Amureki.
Korea Am Namakin
E na aki bwaka ana mwakuri te Atua. Ma ara mwakuri ni buoka Ana mwakuri e tara ni bwaka n tabetai—ma, tao ti aki waekoa n noora mwiina are ti kantaningaia. N tabetai ti kona n namakinna ae kanga ti tebo ngaira ma Aramwa ngke e kabwarabwaraa te euangkerio i Amonia—e aki butimwaeaki, e bawaraeaki, ao e tewenakoaki. Ma ngke te anera e tuangnga bwa e na oki rikaaki ao ni kataia riki, Aramwa e ninikoria n “oki rikaaki n te tai ae waekoa” (Aramwa 8:18), bwa te Atua e a tia ni katauraoa te kawai ibukina. Ti aki ti ngaia anne ma E katauraoa naba te amarake ibuikin Aramwa ao riki ana tabo n tiku, E katauraoa naba Amureki, are e na riki bwa raona ni beku, te tia kamanoa te euangkerio ae ninikoria, ma raoraona ae kakaonimaki. Ngkana ti kaaitarai kaangaanga ao bwarannano n ara beku n abanuean te Uea, ti kona n uringnga bwa e kanga te Atua n boutokaa ao ni kaira Aramwa, ao ti kona n onimaki bwa te Atua e na boutokaira ao ni kairiira naba, riki inanon taai aika kaangaanga.
Iango ibukin Am Kamatebwai ni Koroboki Aika Tabu
Aron au mwakuri korakora n tibwauan te euangkerio e na kainnanoa te tataonaki n nano ao te nanomatoa.
E ngae ngke iai temanna ae e na totokoa am koaua n te euangkerio, tiaki nanona bwa e na kabwara nanom—e ngae n anne, te Uea e aki kona ni bwara nanona iroun te aomata anne ao, E na bon kairiko bwa tera ae ko na karaoia. N aron ana kaangaanga Aramwa, te anera e tuangnga bwa e na oki rikaaki nakon Amonia n reireinia te euangkerio e ngae ngke aomata ikekei a tia n totokoia (taraa Aramwa 8:14–16). Tera ae ko kona n reiakinna man ana katooto Aramwa n aron tibwauaan te euangkerio n aki ongei taian kakawenako ao kakaaitara? N kiibu raa n Aramwa 8 karikirakea ungan nanom n tibwaua te euangkerio?
Taraa naba 3 Nibwaai 18:30–32; Jeffrey R. Holland, “The Cost—and Blessings—of Discipleship,” Ensign ke Riaona, Meei 2014, 6–9.
Te Atua te tia motikitaekaia natina nakon te oota ao nakon te atataibwai are a karekea.
Ngkana ko wareka taekan aroia Nibwaite i Amonia ngke aki butimwaeaki raoi nakoia ana toro te Uea, e bon bebete aki uringakin are bon ngaiia ngkoa aomata ake a maiuakina-te euangkerio, “e korakora tangirakiia iroun te Uea” (Aramwa 9:20). N oina, mwakoron ana rongorongo Aramwa nakoia aomatan Amonia bon ibukina bwa a kamatoai nanoia n rawa ibukin kakabwaia ae a kakabwaiaki iai, aroia a bon riao riki nakoia Remwanaite, ao a karaoa te bure riki man aki kan muuti. Tera kabotauan te reirei aio nakoira bwa e kanga te Atua ni motikitaekaia Natina?
Ngkana ko wareka taekan kakabwaia aika korakora are te Atua e anganiia ana botannaomata Nibwaai (taraa riki Aramwa 9:19–23), iangoa raoi korakoran kakabwaia are E a tia anganiko. Tera ae ko na karaoia bwa kona tiku n eti nakon taian kakabwaia aikai? Tera taian bitaki ae ko namakinna ake ko tangiria ni karaoia?
Taraa naba Reirei ao Berita aika Tabu 82:3.
Ana babaire te Atua bon te babaire ni kaboan maiura.
Ana Boki Moomon taian burabeti a kabongana aara aika mwaiti ni kamataata ana babaire te Atua ibukiia Natina, n aron te babaire ni kamaiu ke te babaire ni kakukurei. N Aramwa 11–12, Aramwa ao Amureki kaota bukina nakon aron te babaire ni kabooa maiura. Ngkana ko wareki mwakoro aikai, iangoia raoi bwa bukin tera te taeka “kabooa maiura” e bon kabonganaki ibukin kamataatan te babaire. Ko kona naba ni korei rongorongo aika a kimototo bwa ibukin tera Aramwa ao Amureki a reirei taekan iango aikai ibukin te babaire.
Te Bwaka:
Te Tia Kabooa Maiura:
Rairannano:
Te mate:
Te Mangauti:
Motikitaeka:
Tarai bwaai aika riki n ana taeka Amureki iaoia aomata (taraa Aramwa 11:46). Bukin tera ko iangoia bwa reirei aikai iai te mwaaka n aron aei ae e na roota iai te aomata? E kanga ni iai rekereken maium iai?
Taraa naba D. Todd Christofferson, “Maungautin Iesu Kristo,” Ensign ke Riaona, Meei 2014, 111–14.
Ngkana I aki kamatoa nanou, I kona ni karekea riki ana taeka te Atua.
Tabeman aomata a na miimi bwa bukin tera Tamara are i Karawa e aki karaoi bwaai ni kabane nakoira bwa ti na ataia. N Aramwa 12:9–14, Aramwa e kabwarabwara teuana riain nanon kamiimin ana mwakuri te Atua n tabetai a tauaki mairoura. Titiraki aikai a kona ni buokiko n iangoia raoi bwa tera ae e reireia:
-
Tera ae nanonaki ni kamatoai nanora? Ko a tia n ataa bibitakin te nano aei iroum?
-
Bukin tera te Uea e taua Ana taeka mairouiia koraki ake a kamatoai nanoia?
-
Ko na kanga ni karekea te taneiai ni butimwaea te berita “korakoran mwakoron te taeka”? (Aramwa 12:10). Tera aekan te taneiai anne?
-
Tera ko kona ni karaoia n ataia raoi bwa ana taeka te Atua e bon “kuneaki i[roum]”? (Aramwa 12:13). Ngkana iai ana taeka te Atua iroum, tera te bwai ae e na riki n am “taeka,” “mwakuri,” ao “iango”? (Aramwa 12:14).
Ibukin te katooto n reirei aikai, kabotaua Amureki nakoia tabeman aomatan Amonia. E kanga ana taneiai Amureki (taraa riki Aramwa 10:1–11) kamataata te tamnei bwa tera e reireia Aramwa ni kiibu aikai?
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Aramwa 8:10–18
Tera ae ti kona n reiakinna mairoun Aramwa n taekan te ongotaeka nakon te Uea “ni waekoa” (kibu 18) riki ngkana e taraa ni kaangaanga? Ni kakorakora te reirei aei ma ataei aika uarereke, ko kona ni karaoa te takakaro are ko kona n anga te kaetieti ibukin te mwakuri ao taraia bwa a na kanga membwa n te utu ni waekoa ni katiaa. Ibukin bwaai ni kakairi, ko kona n taraia bwa antai ae kona ni waekoa n rukuma te mwakoro ni kunikai.
Aramwa 10:1–12
Tera ae ti kona n reiakinna man ana taneiai Amureki inanon kiibu aikai? Tera bwaai aika a na riki n ana koaua iaoia koraki ake a kakauongo? Kaoiia membwa n am utu ni karaoa te babaire ni karaoa te bwai teuana inanon te wiiki aei ni boboto iaon bwa tera ae a reiakinna man ana katooto Amureki.
Aramwa 10:22–23
Tera ae ti reiakinna man kiibu aikai n taekan kakairi ae roota te kurubu n aomata aika tamaroa are a kona ni karekea inanon te kaawa ae buakaka?
Aramwa 11:34–37
Tera te kaokoro i marenan Iesu Kristo ngke e kabooira i nanon ara bure ao man ara bure? (taraa Ereman 5:10; taraa naba 1 Ioane 1:9–10). Ni kamatataa te bwai ae anga reirei iaona Amureki, ko kona n tibwaua te karaki are ni moan ana rongorongo Unimwaane Allen D. Haynie “Uringakin te Aomata Are Ti Onimakinna” (Ensign ke Riaona, Nobembwa. 2015, 121–23). E kanga Iesu Kristo ni kamaiura man ara bure?
Ibukin riki iango ibukin reiakinaia ataei, taraa te kabwarabwara n te wiiki aei inanon Nakomai, Iriirai—Ibukin te Moanrinan.
Kanakoraoan te Kamatebwai I bon Iroum
Kamatebwaia aia taeka burabeti ao abotoro ni boong aika kaitira. Warekia bwa tera aia reirei burabeti ao abotoro are a tia n reireia n taekan te koaua are ko a tia ni kunea inanon koroboki aika tabu. N aron te katooto, ko kona ni kinai atuun reirei n Aramwa 8–12 ao kakaea atuuna anne inanon te maungatabu ni kabuta ae ai tibwa ngkai (taraa Reirei n ana Kawai te Tia Kamaiu, 21).
Kamataata n tamnein Aramwa ngke e amwarake ma Amureki iroun Dan Burr