Reireia te Reirei ae Koaua, iroun Michael T. Malm

Tuun 8-14

Aramwa 8–12

E na Roko Iesu Kristo ni Kabooia Ana Aomata

N am tai ni warekia bwa tera ae a reirei iaona Aramwa ao Amureki nakoia aomata i Amonia, tera n am namakin ae e kaineti raoi nakoia ataei ake ko reireiniia?

Korea Am Namakin

Kaungaa te Tibwatibwa

Kaoiia ataei bwa a na kabwarabwaraa bwa tera ae a kakaraoia mitinare ao a na tuangko rongorongon temanna ae a kinaa are e karaoa ana beku n te mition. Tera ae a reireiakinna mitinare nakoia aomata? Buokiia ataei n nooria bwa Aramwa ao Amureki bon mitinare ake a tibwaua te euangkerio ma aomata i Amonia.

Reirei te Reirei: Ataei aika a Uarereke

Aramwa 8

I kona n tibwaua te euangkerio.

E mwamwananga Aramwa ni kabutaa te aba n tataekina te euangkerio, ao Amureki e kabwarabwaraa ibon inanon ana kaawa nakoia raoraona ao kain rarikina. Ko na kanga ni kaunga nanoia ataei bwa a na iriira aia katooto ao n tibwaua te euangkerio ma tabeman?

Waaki ni Kakukurei aika a Kona ni Karaoaki

• Baane wareka iteran te “Mwakoro 22: Ana Mition Aramwa i Amonia” (Karaki man Ana Boki Moomon, 58–63; taraa naba te witeo ae irekereke ma ngaia iaon ChurchofJesusChrist.org). Kaoiia ataei bwa a na taui baia ni kakauoman ao n riki bwa aongkoa Amureki ao Aramwa, are a uaia n reireia te euangkerio, ngkai anenea te anene ibukin te mwakuri ni mitinare, n aron “I Want to Be a Missionary Now” (Aia Boki n Anene Ataei, 168).

• Buokiia ataei bwa a na kaokioka atongan te koaua n te euangkerio, n aron “Ana Boki Moomon e kaota koauan Kristo” ke “I ataia bwa e tangirai Iesu.” Ngkanne kaoiia ataei n tatabemaniia bwa a na kataneiaiia n tibwaua te koaua aei ma temanna kain te kiraati. N riki bwa mwakoron te waaki ni kakukurei, ko na bae ni buokiia ataei bwa a na katiaa kanoan te iteraniba ibukin te waaki ni kakukurei n te wiiki aei.

• Tuangiia ataei bwa a na tuangko ibukin te bwai are a tia ni ibuobuoki iai ma kain aia utu ke raoraoia—n aron te bwai n takakaro ke te kanre. Buokiia bwa a na korei ni karinani bwaai ake a kakawaki are ti kona n tibwauaia ma tabeman ibukin Iesu Kristo. Kabwarabwaraa bwa ibukina bwa e rangi ni kakawaki te euangkerio, e nako Aramwa n tibwauaia ma aomata ni kaawa aika mwaiti bwa aonga n reiakinna bwa a na kanga ni karekea te kukurei.

Aramwa 8:18–22

I kona n riki bwa te rao ae tamaroa.

Ana mwakuri ni ibuobuoki Amureki nakon Aramwa bon te katooto ae e tamaroa nakoia ataei bwa a na kanga n tangiriia ao ni buokiia tabeman.

Waaki ni Kakukurei aika a Kona ni Karaoaki

• Kaoa temanna te ataei bwa e na riki bwa Amureki ao temanna e na riki bwa Aramwa ngkai ko karakina te karaki n Aramwa 8:18–22. Kariaia ataei bwa a na buokia ni karakina te karaki, ao kaoiia ataei ni kakaokoroiia bwa a na riki bwa Aramwa ao Amureki. E kanga n riki Amureki bwa raoraon Aramwa ae e tamaroa? Tuangiia ataei bwa a na taekinna bwa e kangaa aron temanna n tia n riki bwa raoraoia. E kanga aron aia taneiai n te bwai are e a tia n riki nakoia anne? Bukin tera te Atua e tangiriira bwa ti na riki bwa raao aika a tikiraoi nakoia tabeman?

• Kakaea ke korea te tamnei ae e tei ibukin te iraorao (n aron uoman aomata aika a irabwati ke te aati), ao korokorei bwa a na riki bwa tamnei aika a konaa ni katomatomaaki. Ao ni iteran te tamnei are ko korokoreia, korei tabeua bwaai ake a karaoi Aramwa ao Amureki ni karikiia bwa raao aika a tamaroa. Kaoiia ataei bwa a na bane n iai aia tai are a na rinea teuana te moti ni beeba ao ni katoma nakon te tamnei ngkai ko warekia tera are e koreaki mai aana. Buokiia bwa a na iangoia aomata are a kona ni riki bwa raoraoia. Kaota koauana bwa Iesu Kristo bon raoraora ae e tikiraoi are ti kona ni karekea.

Ti kona n riki bwa raao aika a tamaroa nakoia tabeman.

Aramwa 11:43–44

Imwin te mate, N na bon mangauti.

E reirei Amureki nakoia aomata i Amonia iaon te Mangauti. Ko na kanga ni buokiia ataei ake ko reireiniia n ataia bwa tera nanon ae ko na mangauti?

Waaki ni kakukurei aika a Kona ni Karaoaki

• Kabongana baim n tei ibukin te tamnei, ao kabongana nangoan te bai bwa e tei ibukin te rabwata. Buta baim mai inanon nangoan te bai ni kaotia nakoia ataei bwa tamneira ao rabwatara a na maenako n tain te mate. Ngkanne manga karina baim inanon nangoan te bai ni kaotia bwa tamneira ao rabwatara a na manga botaki n tain te Mangauti. Kariaia ataei bwa a na reke aia tai temanna imwin temanna ni karina baia inanon nangoan te bai ao ni manga butia ngkai ko wareka Aramwa 11:43 nakoia. Kaota tamnein Maria ao Iesu Kristo are e a Mangauti (Te Boki n Tamnei n te Euangkerio, nambwa. 59), ao taekina koauana bwa Iesu Kristo e karikia bwa a na kona ni manga bane ni mangauti aomata nako.

• Kaoiia ataei bwa a na korei tamneia raoraoia ke kain aia utu, n ikotaki ma aia utu n aia itera nako. N aia tai ni tibwaua aia tamnei, kotei tamneia raoraoia ke kain aia utu ake a korei tamneia ao kabwarabwaraa bwa teuanne ke neienne a na bon manga kautaki. Kaota koauana bwa Iesu e katauraoa aei nakoira bwa ti na manga maeka ma ara utu n aki toki.

Reirei te Reirei: Ataei aika a Ikawai

Aramwa 8–10

I kona n tibwaua te euangkerio.

Aramwa ao Amureki a tibwaua te euangkerio, e ngae ngke e aki bebete. E na kanga ninikoriaia ao aia onimaki ni kaungaa nanoia ataei ake ko reireiniia?

Waaki ni Kakukurei aika a Kona ni Karaoaki

• Ni bon oin am taeka, manga taekina te bwai are e riki n Aramwa 8–10. Rinei taian reirei aika a mwaiti man te bwai ae riki man taian rongorongo aikai are a na kona ni buokiia ataei n tibwaua te euangkerio, n aron te aki bwarannano (taraa Aramwa 8:8–13), tataekina te koaua ibukin Kristo (taraa Aramwa 9:26–27), ao n iai toam ni mwakuri (taraa Aramwa 10:7–11). Kaoiia ataei bwa a na warekii kibu aika a rineaki ao n taekinna bwa tera ae a reiakinna ibukin tibwauan te euangkerio. Bukin tera e kakawaki bwa ti na tuangiia ni kaongoia tabeman rongorongon te euangkerio?

• Kaoiia ataei bwa a na tibwaua te bwai ae e a tia n riki nakoia inanon aia tai n tibwaua te euangkerio ma tabeman, ke bon tibwaua te bwai ae e a tia n riki nakoim. Kaoiia ataei bwa a na ongoraa n aron kawai are a na kona iai n tibwaua te euangkerio inanon aia tai n anenea te anene ibukin te mwakuri ni mitinare, n aron “We’ll Bring the World His Truth” (Aia Boki n Anene Ataei, 172). Bukin tera Tamara are i Karawa e tangiriira bwa ti na tibwaua te euangkerio? Buokiia ataei bwa a na iangoi kawai are a na tibwaua te euangkerio ma raoraoia, n aron ae a na anganiia Ana Boki Moomon ke ni kaoiia nakon ana waaki ni kakukurei te Ekaretia. Anganiia te tai bwa a na kataneiai ni karaoa aron ae tera ae a na taekinna ke ni karaoia ngkana a rinanon ae ai aron aio.

Aramwa 11–12

Ana babaire te Atua bon te babaire ibukin te kaboomwi.

Ko na kanga ni kabongana Aramwa 11–12 ni “[karaoa] ae a na ataia [ana aomata] te babaire ni kabomwi”? (Aramwa 12:30).

Waaki ni kakukurei aika a Kona ni Karaoaki

• Korei iaon te burakibooti tabeua reirei ake a kaineti ma te babaire ni kabomwi ake a kuneaki n Aramwa 11–12, n aron Bwakan Atam ao Ewa, Ana Mwakuri ni Kamaiu Iesu Kristo, te rairannano, te mate, te mangauti, ao te motiki taeka. Wareki tabeua kiibu man Aramwa 11 ke 12 are e reirei ibukin taian reirei akanne, ao anganiia ataei aia tai ni korei tamnein bwaai ake a tei ibukina taian reirei akanne. Tera ana mwakuri te Tia Kamaiu n te babaire aio? Ngkanne kaoiia ataei bwa a na kabongana aia tamnei ni karaoa te kaotioti bwa a na reiakina raoraoia aron ana babaire te Atua.

Aramwa 12:10

Ngkana I aki kamatoa nanou, I kona ni karekei riki ana taeka te Atua.

Ngkana ti nang kamatebwaia te koaua n tamnei, tauraoin nanora e bon rangi ni kakawaki naba n aron konabwain ara iango.

Waaki ni Kakukurei aika a Konaa ni Karaoaki

• Baane wareka Aramwa 12:10, ao marooro bwa tera ae e nanonaki ni “kamatoan” nanora. Bukin tera bwa te nano ae e matoa e na karika te kaangaanga n reirei mai iroun te Atua?

• Ni katea tamnein te reirei aio, kaota nakoia ataei te ongong ao te atibu ao titirakiniia bwa e nga ae e na anaa riki te ran. Ti na kanga ni kaotia nakon te Uea bwa ti tangira nanora bwa e na riki n aron te ongong ae e maraurau?

Kaungaa te Kamatebwai n te Mweenga

Kaoiia ataei bwa a na karekea te tai are e na reke aia tai n tibwaua te euangkerio ke ni buoka temanna te aomata n te wiiki aei.

Kanakoraoan Ara Anga reirei

Kaota te koaua nakoia kain te kirati. Te koaua e kona n rangi ni bebete n ai aron ae “I ataia bwa Tamara are i Karawa e tangiri ngkami” ke “I namakina te kukurei inanou ngkai I reiakina aron Iesu Kristo.” (Taraa naba Reirei n Ana Kawai te Tia Kamaiu, 11.)