Amon ao te Uea ae Ramonaai, iroun Scott M. Snow

Tuun 22-28

Aramwa 17–22

“N na Karaoi Ngkami bwa Bwaai ni Mwakuri I Nanon Baiu”

N ai aron Ramonaai ao tabeman n te rongorongo aei iai bitakin-maiun tamneia are a rinanona, ataei ake ko reireiniia a kona ni karekea te namakin n tamnei ma koroboki aika tabu ake a na bitii maiuia ibukin ririki aika a na roko. Iangoa aei ngkai ko iangoa arom n anga reirei nakoia.

Korea Am Namakin

Kaungaa te Tibwatibwa

Kaota te tamnei are e kaota te bwai ae riki n Aramwa 17–22 (taraa te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu). Tuangiia ataei bwa a na karakina te bwai are a nooria n te tamnei.

Reirei te Reirei: Ataei aika a Uarereke

Aramwa 17–19

I kona n tibwaua te euangkerio ma tabeman.

A kanga bannaia ni katooto natin Motiaea mwaane ni kaungaia kain am kiraati n tibwauai aia koaua ma tabeman?

Waaki ni Kakukurei aika a Kona ni Karaoaki

• Buokiia ataei bwa a na karaoa te kaotioti ni karakinan Amon n Aramwa 17–19. Ko kona n okira “Mwakoro 23: Amon: Te Toro ae Korakora” (Karaki man Ana Boki Moomon, 64–68, ke te witeo ae irekereke ma ngaia iaon ChurchofJesusChrist.org). Ngkana ko taku bwa ataei a na kukurei iai, uoti kunnikai ni kaotioti aika beebete ao bwaai ni kaotioti tabeua. Tuangiia ataei te bwai are ko reiakinna man te karaki, ao kaoiia bwa a na karaoa naba anne.

• Kaota te bwai ni mwakuri ke bwaai ni mwakuri, ao marooro nakoia ataei bwa tera ae a kabonganaaki iai. Tera riki bwaai ni mwakuri aika a atai ataei? Kaoiia bwa aongkoa are a kabonganai bwaai ni mwakuri. Kabwarabwaraa bwa ngkai ti kabonganai bwaai ni mwakuri ke bwaai ni katiai iai bwaai, Tamara are i Karawa e kona ni kabonganaira ni karaoan Ana mwakuri. Wareka Aramwa 17:11, ao kabwarabwaraa bwa Amon ao tarina bon bwaai ni mwakuri ni buokaia Reimwanaite n reiakina taekan te euangkerio.

• Kaoiia ataei bwa a na biri n te tabo are a tei iai ao aongkoa a karebwerebwe iaon taian mataroa ngkai ko karakina rongorongon Abiti ni katoai auti n tuangiia aomata taekan mwaakan te Atua (taraa Aramwa 19:16–34). Buokiia ataei n iangoi kawai ake a kona iai n riki n ai aron Abiti ao n tibwaua te euangkerio ma tabeman.

• Kaoiia ataei bwa a na korea tamneia ngke a tibwaua te euangkerio ma temanna. Buokiia n iangoa te bwai are a kona n tibwauaia. Ikotaki anenea te kuna ibukin tibwauan te euangkerio, n aron “I Want to Be a Missionary Now” (Aia Boki n Anene Ataei, 168). Anganiia aia tai n tibwa aia namakin n taekan bwaai ake e reirei iaona Amon.

Aramwa 17:21–25; 20:9–27

I kona ni buokiia tabeman n nakon Kristo man kaotan au tangira nakoia.

Ana tangira Amon ao ana mwakuri n ibuobuoki e kabebetea nanon te Uea ae Ramonaai ma tamana. Tera ae a kona n reiakinna ataei man rongorongo aikai?

Waaki ni Kakukurei aika a Kona ni Karaoaki

• Kakimototoa Aramwa 17:21–25 ibukiia ataei, ni katuruturua bwa Amon e tangiria ni beku ibukin Ramonaai. Kaoia ataei bwa a na tibwa te bwai are a rinanona ngke a buoka temanna. Kauringiia ataei bwa ana ibuobuoki Amon ae korakora e buoka te Uea ae Ramonaai n tangiria n reiakina taekan te euangkerio (taraa Aramwa 18:15–23). Kaoiia ataei bwa a na iangoa temanna ae a kona ni beku ibukina n te bong aei, ao maroroakinna bwa a na kanga ni beku ibukin te aomata anne.

• Tuangiia ataei te karaki n Aramwa 20:8–27. Ko kona ni kabongana “Mwakoro 24: Amon E kaitibo Ma Taman te Uea Ramonaai” (Karaki man Ana Boki Moomon, 69–70, ke witeo ake a irekereke ChurchofJesusChrist.org). Tuangiia ataei bwa a na iangoi mwakuri aika a kaokoro ake a kona ni karaoi ni katoa te tai are ko taekina iai aran Amon, Ramonaai, ke taman Ramonaai. Katerea bwa teuana bukina ngkai nanon taman Ramonaai e bitaki bon ana tangira Amon nakon Ramonaai ae korakora. Kaoiia ataei bwa a na korea tamnein te bwai teuana are a kona ni karaoia bwa a na kaota te tangira nakon temanna.

Reirei te Reirei: Ataei aika a Ikawai

Aramwa 17:1–4

Au koaua e na rikirake ngkai I wareki koroboki aika tabu, tataro, ao I aki mamatam.

Natin Motiaea mwaane a rikirake ni korakora n te euangkerio ao a rikirake bwa mitinare aika korakora ibukina bwa a kamatebwai mwaaka ni koroboki aika tabu, a tataro, ao aki mamatam. Bwaai naba aikai a kona naba ni buokiia ataei ake ko reireiniia.

Waaki ni Kakukurei aika a Kona ni Karaoaki

• Uotii bwaai tabeua nakon te kiraati are a tei ibukin koroboki aika tabu, tataro, ao te aki mamatam, n aron booki ibukin koroboki aika tabu aika bwanin, tamnein temanna ae tataro, ao tamnein amwarake, ao kabwarabwaraa bwa tera ae e tei ibukin bwaai akanne. Wareka Aramwa 17:1–4, ao tuangiia ataei bwa a kanga bwaai aikai ni buokiia natin Motiaea mwaane. E kanga warekan koroboki aika tabu, te tataro, ao te aki mamatam ni buokiira ni kaniira riki nakon Tamara are i Karawa?

• Kabongana te intekiti iaon atuun marooro man Aia Boki n Anene Ataei ni buokiia ataei ni kakaea kunaia iaon koroboki aika tabu ao te tataro. Ikotaki n anenei kuuna tabeua man anene aikai, ao buokiia ataei n ataia bwa tera ae reiakinaki n taekan kuuna bwa e kanga karaoan bwaai aikai ni kakabwaiaira.

Aramwa 17–18; 22:1–3

I kona ni buokiia tabeman n nakon Kristo man kaotan au tangira nakoia.

Nanon Amon ni kan riki bwa ana toro Ramonaai n tokin te tai e reke iai ana tai n reireina Ramonaai ngke e kauka nanona ao e tauraoi ni butimwaea te euangkerio.

Waaki ni Kakukurei aika a Kona ni Karaoaki

• Buokiia ataei ni wareki kiibu man Aramwa 17:21–39 ake a karakina rongorongon ana mwakuri Amon nakon te Uea Ramonaai. Kaoiia bwa a na korea tamneia aomata ke te bwai ae e riki n te karaki ao imwiina a na karakina te karaki n oin aia taeka. Buokiia ataei n noora aron ana mwakuri Amon ni kaira nanon te uea (taraa Aramwa 18:9–23). Tera ae ti kona n reiakinna man te karaki aei iaon aron buokakiia tabeman n tangiria ni kan reiakina taekan te euangkerio?

  

  Minerva K. Teichert (1888–1976), Amon E Kamaiuiia ana Nanai n Tiibu te Uea, 1935–1945, te oera iaon te mitionaite, 35 x 48 te inti. Brigham Young University Museum of Art

• Wareka Aramwa 22:1–3, ao tuangiia ataei bwa a na kakauongo bwa e kanga ana banna ni katooto Amon n roota nanon taman te Uea ae Ramonaai. Kaoiia bwa a na iangoa temanna ae a kinaa ae kan ataa taekan te euangkerio. Kaota am iango nakoia ataei bwa aia tangira ao aia banna ni katooto aika raraoi a na kona ni buoka te aomata aei n noora tamaroan te euangkerio. Buokiia ataei n iangoi kawai ake a kona n riki bwa banna ni katooto aika raraoi ao kaota te tangira nakoia aomata ake a roko n aia iango.

• Kaoiia mitinare aika a bwanin aia tai ke mitinare ake a tibwa oki bwa a na tibwaua karakinan Amon n Aramwa 17–18. Tuangiia bwa a na tibwaua te bwai are a reiakinna n taekan te mwakuri ni mitinare mai iroun Amon ao te mwakuri are a karaoia n aia mwakuri. Maroroakinna ma ataei kawai ake a kona iai n ira ana banna ni katooto Amon.

• Ngkai kain te kiraati, korea rinanin bwaai iaon te burakibooti ake a konaa ni karaoia ni buokiia kain aia utu. E kanga karaoan mwakuri aikai ni kakabwaiaia te utu ni kabane?

Aramwa 18:24–43; 19:16–34

I kona n tibwaua te euangkerio ma tabeman.

Ko na kanga ni kabonganai rongorogo ni kiibu aikai ni kaungai nanoia ataei bwa a na riki bwa mitinare n aroia Amon ao Abiti?

Waaki ni Kakukurei aika a Kona ni Karaoaki

• Kaoti tamnei ake a tei ibukin tabeua koaua mairoun Amon ake e tibwauai ma te Uea ae Ramonaai are e kuneaki n Aramwa 18:24–40 (taraa te iteraniba ni waaki ni kakukurei ibukin te wiiki aei). Kaoiia ataei bwa a na riki bwa aongkoa ngaiia mitinare ao n tibwaua aia atatai ibukin koaua aikai ibon imarenaia.

• Wareka rongorongon Abiti ma ataei (taraa Aramwa 19:16–20, 28–29). Kaoiia ataei bwa a na ikaruoruo n riki bwa aongkoa are ngaiia Abiti ni karebwerebwe iaon mataroan taian kiraati ao ni kaota te bwai are e riki n Aramwa 19:1–17. Ti na kanga n riki n ai aron Abiti ao ni kaoti koaua ake ti atai?

Kaungaa te Kamatebwai n te Mweenga

Kaoiia ataei bwa a na tataro mwaaka ni karaoa te kouru ma aia utu n tibwaua te euangkerio ma temanna.

Kanakoraoan Ara Anga reirei

Ririmwiin nako te kakao n te mwakuri. Ngkana ko kaoiia ataei bwa a na karaoa te bwai are a reiakinna, ririmwiin nako te kakao anne n tain te kiraati are imwiina. Aio are e kaotia nakoia ataei bwa ko mwannanoiia bwa e kanga ni kakabwaiaaki maiuia n te euangkerio. Ngkai a tibwaua te bwai are a rinanona, a na kakorakoraaki ao a na ibuobuoki imarenaia ni maiuakina te euangkerio (taraa Reirei n Ana Kawai te Tia Kamaiu, 35).