Aentaai-Nibwaai-Riaai a Tauni aia Bwai ni Buaka, iroun Jody Livingston

Tuun 29–Turai 5

Aramwa 23–29

A “Bon Aki Manga Tannako”

Kamatebwaia Aramwa 23–29, ma te tataro, n ukora te kairiri bwa tera ae a kainnanoia ataei ao tera ae a na buokaki iai.

Korei Am Namakin

Kaoa te Tibwatibwa

Korea te ubu ae kukurei iaon te mwakoro ni beeba, ao angan temanna ma temanna bwa e na taua. N te tai are a taua iai te beeba, kaoiia bwa a na atonga te bwai ae a reiakinna man ana Boki Moomon are e anganiia te kimwareirei.

Reirei te Reirei: Ataei aika a Uarereke

Aramwa 24:6–24

I kakabwaiaki ngkana I kawakin au berita nako.

Tera ae ko reiakinna man am kamatebwai n Aramwa 24:6–24 ae kona ni buokiia ataei bwa a na oota ni kakawakin kawakinan te berita ae raoiroi?

Waaki ni Kakukurei aika a Kona ni Karaoaki

• Wareki tabeua kiibu ke mwakoro n taeka man Aramwa 24:6–24 n reireiniia ataei rongorongoia tenaan Aentaai-Nibwaai-Riaai, te berita are a karaoia, ao aroia ni kawakina aia berita. Ko kona naba ni kabongana te tamnei are inanon kairan te reirei n te wiiki aei i nanon Nakomai, Iriirai—Ibukiia Aomata n Tatabemaniia ao Utu ke “Mwakoro 26: Ana Botannaomata Amon” (Karaki man Ana Boki Moomon, 73–74, ke te witeo ibukin te reirei aei iaon ChurchofJesusChrist.org).

• Kabwarabwara bwa a kanga tenaan Aentaai-Nibwaai-Riaai ni kawakina aia berita man taunan aia bwai ni buaka. Kaoiia ataei bwa a na korea tamnein te kabaang ao tuangiia bwa aongkoa a kena te mwanono ao a tauna aia kabaang. Buokiia ataei bwa a na iangoi berita ake a karaoi. Bukin tera e kakawaki kawakina taian berita? Kabwarabwara bwa ngke ti bwabetitoaki, ti karaoi berita ma te Atua ao E karaoi berita ma ngaira. A aranaki aikai bwa berita aika a tabu. Kaota koauan ae ti kakabwaiaki ngkana ti kawakin ara berita ma te Atua.

Aramwa 26; 29

Te euangkerio e uota nakoiu te kimwareirei, ao I kona ni tibwaua te kimwareirei aei ma tabeman.

Amon, are e buoka reireian te euangkerio nakoia tenaan Aentaai-Nibwaai-Riaai, e karekea te kimwareirei ae bati man tataekinan te euangkerio. Aramwa, are e reirei te euangkerio nakoia aomata aika a mwaiti, e karekea naba te kukurei aei. Ti kona n namakina te kukurei aei ngkana ti tibwaua ara koaua ma tabeman.

Waaki ni Kakukurei aika a Kona ni Karaoaki

• Rinei tabeua mwakoro n taeka man Aramwa 26 ke 29 ae a taekina te kimwareirei, ao wareki nakoia ataei (tarai kibu, n aron, Aramwa 26:11, 13 ke Aramwa 29:13–14). Kaoiia ataei bwa a na teirake ni katoaa te tai are a ongo iai te taeka ae “kimwareirei.” Buokiia ataei bwa a na oota bwa tibwauan te euangkerio ae e kakukureia Aramwa ma Amon. Tibwaua ae ko a tia n rinanona ike tibwauan te euangkerio e uota nakoim te kimwareirei.

• Kaoiia ataei bwa a na korea tamnein baika a uota nakoia te kimwareirei. Kaoiia ataei temanna imwin temanna bwa e na kaota ana tamnei nakon kaain rarikina ao ni kabwarabwara. Katerea bwa ngkana iai te bwai ae e anganira te kimwareirei—n aron te euangkerio—ao kimwareireira e rikirarake ngkana ti tibwauaia.

• Angan te ataei ana boki Moomon, ao kariaia bwa e na kataneiai n tibwauaia man temanna kaain te kiraati. Kaungaia ataei bwa a na kaota aia namakin ibukin ana Boki Moomon. Bukin tera ti tibwaua ana Boki Moomon ma tabeman?

Aramwa 27:20–30

I kona ni buokiia raoraou ni maiuakina te euangkerio.

Nibwaite a kamanoia tenaan Aentaai-Nibwaai-Riaai mairouia aia kairiribai ao a buokiia ni kawakin aia berita aika a tabu ake a tia ni karaoi ma te Uea.

Waaki ni Kakukurei aika a Kona ni Karaoaki

• Karakina karakinaia tenaan Aentaai-Nibwaai-Riaai nakoia ataei ngke a karaoa te berita bwa a na manga aki buaka (taraa Aramwa 27:20–30). Kabwarabwara bwa ibukin aia berita tenaan Aentaai-Nibwaai-Riaai, ao a aki kona ni kamanoia mairouia aia kairiribai. Wareka Aramwa 27:23, ao kabwarabwara bwa raoraoia ake ibuakoia Nibwaite a rineia bwa a na kamanoia tenaan Aentaai-Nibwaai-Riaai bwa a aonga ni kona ni kawakin aia berita. Tera arora ni buokiia raoraora bwa a kawakina aia berita? Taekina rongorongon te tai teuana ike raoraom e buokiko iai ni kawakina am berita ma te Atua.

• Kataneiai ma ataei taai ike a kona iai, n te aro ae akoi, ni buokiia tabeman n rinea te eti. Te katoto, tera ae ti kona n taekinna nakon raoraora ae tangiria ni kewe ke ni moakakung?

Reirei te Reirei: Ataei aika a Ikawai

Aramwa 24

Berita aika a tabu bon berita aika I karaoi ma te Atua ao aika E karaoi ma ngai.

Tenaan Aentaai-Nibwaai-Riaai a tauni aia bwai ni buaka ao a berita bwa a na aki manga tiriaomata. N aron aei, ataei ake ko reireiniia a kona ni kawakin aia berita aika a tabu.

Waaki ni Kakukurei aika a Kona ni Karaoaki

• Anganiia ataei atibu aika a uarereke, ao kaoiia bwa a na korea te taeka ae berita ae tabu iaon aia atibu. Kabwarabwara bwa te berita ae tabu bon te berita are imarenan Tamara are i Karawa ma Natina. A kanga ara berita aika a tabu ni kakorakoraira ke ni “kamatoatoaira” n aron te atibu? (Aramwa 24:19). Bootaki ni wareka Aramwa 24:16–25 ni kakaea bwa tera te berita ae a karaoia ana botanaomata Amon ao tera aroia ni karinea aia berita. Kaoiia ataei bwa a na uoti atibu nakon mwengaia bwa te kauring nakoia bwa a na kawakin aia berita aika tabu.

• Bootaki wareka Aramwa 24:16–19, ma ataei, ao marorokinna bwa tera ae a karaoia tenaan Aentaai-Nibwaai-Riaai ni kaotia nakon te Atua bwa a tia n rairannano. Tera ae a berita bwa a na aki karaoia? Kabwarabwara bwa berita aika tabu ake ti karaoi bon “te kakoaua nakon te Atua” bwa ti tangiria n ira ana tua nako te Atua. (kiibu 18). Tera berita aika tabu aika a tia ni karaoi ataei?

• Kaoiia ataei bwa a na korea tamnein aia bwai ni buaka tenaan Aentaai-Nibwaai-Riaai. Imwina ao kaoiia bwa a na korea, iaon bukin bwai ni buaka, te bwai ae a namakinna bwa a riai ni bitia bwa a aonga n ira Iesu Kristo n ae bwanin riki. Kariaia bwa a aongkoa a tauni aia bwai ni buaka ao a karaoa te babaire bwa a na mwakuria te bwai are a koreia.

Aramwa 24:7–10; 26:23–34; 27:27–30

Ibukina bwa e nanoanga Tamara are i Karawa, ti kona n rairannano ao ni bitaki.

Tabeua te tai n nako ao ataei a tia n reirei taekan Aramwa, Amon, ao tenaan Aentaai-Nibwaai-Riaai. Ti na kanga ni kabonganai rongorongo aikai ni kabwarabwara bwa Tamara are i Karawa e nanoanga nakoia naake a rairannano ni koaua?

Waaki ni Kakukurei aika a Kona ni Karaoaki

• Korea Ngkoa ao Imwina iaon te burakibooti. Tuangia tabeman ataei bwa a na wareki kibu aikai ni kakaea bwa tera aroia ngkoa Reimwanaite imwain reiakinaia iroun Amon ma tarina: Aramwa 17:14–15; 26:23–24. Tuangia tabeman ataei bwa a na wareki kibu aikai ni kakaea bwa a kanga ni bitaki Reimwanaite: Aramwa 26:31–34; 27:27–30. Kaoiia ataei bwa a na korei iaan atu baike a kunei. Imwina kaoiia bwa a na kakaea, inanon Aramwa 24:7–10, bwa a kanga Reimwanaite aikai ni bitaki n ae bwanin. Kaota am koaua ni mwaakan te Atua ni kabwarai ara bure ao ni buokira n rairannano ao ni bitaki.

• Kaoiia ataei bwa a na bootaki ni wareka Aramwa 26:21–22, n kakaei kakabwaia aika a roko nakoia naake a rairannano. Kaoiia ataei bwa a na kabwarabwarai tabeua mai buakon kakabwaia aika n oin aia taeka.

Aramwa 26; 29

Te euangkerio e uota nakoiu te kimwareirei, ao I kona ni tibwaua te kimwareirei aei ma tabeman.

Mwakoro aikai e bati inanoia katotoon te kimwareirei ae roko man maiuakinan ao tibwauan te euangkerio. Ko na kanga ni kabongana Aramwa 26 ao 29 ni kaungaia ataei bwa a na ukora te kimwareirei aei?

Waaki ni Kakukurei aika a Kona ni Karaoaki

• Buokiia ataei bwa a kakaea te taeka ae “kimwareirei” inanon Aramwa 26 ao 29. Bootaki ni wareka tabeua kibu ake a kunei, ao maroroakinna bwa tera ae a reirei kibu aikai ibukin te kimwareirei. Tera ae e anganiia Amon ma Aramwa te kimwarieirei? Tibwaua am taneiai ike ko namakina iai te kimwareirei man maiuakinan ao tibwauan te euangkerio, ke kaoiia ataei bwa a na tibwaua oin aia taneiai.

• Kaoiia uoman ataei bwa a na kaitara ao n nooria bwa antai ae e na moan ngare. Tera tabeua kawai aika ti kona iai ni kabutanakoa te kimwareirei nakoia tabeman? E kanga tibwauaan te euangkerio ni kabutanakoa te kimwareirei? Buokiia ataei bwa a na iangoi kawai ake a kona iai n tibwaua te kimwareirei man tibwauan te euangkerio ma raoraoia ke aia utu.

Kaungaa te Kamatebwai n te Mweenga

Kaoiia atae bwa a na kawakin aia berita n aron are a karaoia tenaan Aentaai-NIbwaai-Riaai.

Kanakoraoan Ara Anga reirei

Reiakina te kibu. Rinea te mwakoro n taeka man koroboki aika tabu ke taeka aika kimototo ake ko taku bwa a kona ni buokiia ataei ake n am kiraati, ao buokiia bwa a kamatenanoa. Tamnei ke te taetae n te bai e kona naba n ibuobuoki.