Anti-Nibwaai-Riaai a Tauni Aia Bwai ni Buaka, iroun Jody Livingston

Tuun 29–Turai 5

Aramwa 23–29

A bon “Aki Manga Tannako”

Ngkana ko kamatebwaia Aramwa 23–29, tera rongorongo aika kunei bon ibukim ao am utu? Tera ae ko kona n tibwauaia n ama kiraati n te Ekaretia?

Korei Am Namakin

Iai n taai tabetai ko aki koaua raoi ngkana a kona ni bitaki aomata? Tao ko kona n raraoma bwa ko kona n tokanikai iaon rinerine aika buakaka aika ko a tia ni karaoi ke katei aika a buakaka aika ko a tia ni karikirakei, ke ko kona ni karekea te aeka n raraoma anna ibukiia aika ko tangiriia. Ngkana ngaia anne, karakinaia Aentaai-Nibwaai-Riaai e kona ni buokiko. Aomata aikai bon aia kairiribai Nibwaite. Ngke a iangoia Amon ma tarina bwa a na kabwarabwaraa te euangkerio nakoia, tenaan Nibwaite “a [ngareakiniia] ni bwainingareiia.” Kamateakiia Reimwanaite e taraa n ae katokana ae raoiroi riki nakon rairakiia. (Taraa Aramwa 26:23–25.)

Ma Reimwanaite a bon bitaki—rinanon mwaakan te Uea ni bitiia. Ngke n te taina a kinaaki bwa “aomata aika a moaanti ma ni matoatoa ma n iowawa” (Aramwa 17:14), a riki ni “kinaaki man nanomatoaia nakon te Atua” (Aramwa 27:27). Ni koauana, a bon “aki manga tannako” (Aramwa 23:6).

Tao iai katei aika a bure aika a riai ni katukaki ke “bwaai ni buaka … ake a kakaitara iai” ni kawenei (Aramwa 23:7). Ke tao ko na ti kainnanoia n rangi ni kabanea riki am tai n am koaua ao e na kaangaanga iai tannakom. N aki tabe ma tera bitaki aika ko kainnanoi, Aramwa 23–29 e kona n anganiko te kaantaninga bwa, rinanon mwaakan Iesu Kristo ni kamaiu, ao e kona n riki te bitaki ae teimaan.

Iango ibukin Am Kamatebwai I Bon Iroum ni Koroboki Aika Tabu

Aramwa 23:1–5

Ngkana a butimwaea te euangkerio natin te Atua, ao a na rimwiaki ma kakabwaia aika a mwaiti.

Ngke e katanoata aia uea Reimwanaite “bwa e na aki tukaki” ana taeka te Atua nakoia Ana aomata (taraa Aramwa 23:1–5), e karekea te kawai nakon karekean kakabwaia aika mwaiti ibukiia. Ngkana ko wareka Aramwa 23–29, tarai kakabwaia aikai. Ko na kanga ni kakoaua bwa “akea tukakin” Ana taeka te Atua inanon maium ke n am utu?

Aramwa 23–25; 27

Rairakiu nakon Iesu Kristo ao Ana euangkerio e bita maiu.

Reimwanaite ake a kawaraki iroun Amon ao tarina a taraa n ae a na aki rairaki—a tukaki man kateia aia karo ao ni bon oin buakakaia. E ngae n anne a mwaiti mai ibuakoia aika a butimwaea ana euangkerio Iesu Kristo ao ni karaoi bitaki aika a tamaroa inanon maiuia. N riki bwa te kanikinaa n oin rairakiia, Reimwanaite aikai a araniia bwa Aentaai-Nibwaai-Riaai. (Nanon “aentaai” ni kabonganakin aei tiaki ti tebo ma “anti” n ae “te tia kakewea-Kristo.”)

Iangoan rairakiia Reimwanaite aikai e kona ni kawaekoako n iangoa oin rairakim “nakon te Uea” (Aramwa 23:6). Teuana te kawai ni kamatebwai mwakoro aikai e kona n ae kinakin rairakiia tenaan Aentaai-Nibwaai-Riaai ni bita maiuia. Ko kona ni moanna man kiibu aikai.

Ngkana ko iangoi bitaki inanon Aentaai-Nibwaai-Riaai, iangoia bwa e kanga rairakim nakon Kristo ni bitiko. Tera ae ko namakinna ae ko na kainnanoia riki ni bitia bwa e aonga te euangkerio n iai mwaakana inanon maium?

Aramwa 23:6–7

Aramwa 23:17–18

Aramwa 24:11–19

Aramwa 25:13–16

Aramwa 27:26–30

Aramwa 24:7–19; 26:17–22

E rangi n nanoanga te Atua.

Ngkai buure ake a na tokanikai iaoia Amon ao tenaan Aentaai-Nibwaai-Riaai a taraa ni kaokoro man bwaai nako inanon maium, ti bane n onimakina ana nanoanga te Atua. Tera ae ko kunea n Aramwa 24:7–19 ao 26:17–22 are e buokiko n ataa Ana nanoanga? Ngkai ko wareware, iangoi bwaai aikai, kawai aika ko a tia ni kaoaki bwa ko na raira nanom, am taneiai ma te rairannano, ko kanga n tia ni kataia ni manga totokoa te bure, ao kakabwaia aika a tia n roko nakoim rinanon te rairannano. Ngkana ko wareki kiibu ngkai ko iangoa taekan te bwai aei, tera ae ko reiakinna n ana nanoanga te Atua inanon maium?

Aramwa 26; 29

Te mwakuri ibukin te Uea e uota te kimwareirei.

N aki tabe ma aia taneiai aika a kakaokoro, Amon and Aramwa a kaota te aeka n namakin ae ti tebo ma anne ibukin aia mwakuri ni mitinare. Iangoia ni wareka Aramwa 26 ao 29 ao kabotaui. Tera bwaai aika ti tebo aika ko noori? Tera taeka ao kibun n taeka aika okioki? Tera ae ko kona n reiakinna mairoun Amon ao Aramwa bwa ko na kanga ni kunea te kimwareirei ni koaua n aki tabe ma am kakaewenako? (N rinanoi kakaewenako aika e a tia n rinanoi Aramwa, tarai atuun reirei ni mwakoron Aramwa 5–16. N rinanoi aia kakaewenako Amon ao tarina, tarai atuun reirei n te mwakoro ibukin Aramwa 17–28.)

Aramwa 26:5–7

Tera bwabwati ni wiita ao te auti ni wiita?

N tain te tai, n tainako a ikotaki nakon bwabwati ae aranaki bwa bwabwati ni wiita ao ni katukaki n te auti ni kaikobwai, n tabetai a aranaki bwa auti ni wiita. Unimwaane David A. Bednar e tibwaua te rairairi n te kanikinaa n Aramwa 26:5: “Te bwabwati ni wiita n te kabotau aei e tei ibukiia kaain te Ekaretia aika a tibwa bwabetitoaki. Auti ni wiita bon tembora aika tabu” (“Honorably Hold a Name and Standing,” Ensign ke Riaona, Meei 2009, 97). Iangoia bwa tera ae reireiniko te kabotau n Aramwa 26:5–7 ibukin kakawakin otenanti te tembora.

Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki

Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.

Aramwa 24:6–19

Bukin tera Aentaai-Nibwaai-Riaai a tauni aia bwainibuaka “ni kananoi iaan te aba“? (Aramwa 24:16). Tao a na kukurei kaain te utu ni koroi iaon mwakorokoron beeba bwaai aika a tangiria n tokanikai iaoia ke ni katikui. A kona imwiina ni kena te nibwa ao n taunii beeba.

Aramwa 24:7–12

A kona kiibu aikai ni buokiia am utu n ataa te bwaintituaraoi ae kamimi ibukin te rairannano. Tera ae a karaoia Aentaai-Nibwaai-Riaai n rairi nanoia man aia bure? E kanga te Uea ni buokiia n rairi nanoia? Tera ae ti kona n reiakinna man te banna ni katooto aei?

Aramwa 24:20–27

Tera ae ti a tia n noria ae kakoaua ana taeka Mormon: “Ngaia are ti nooria bwa te Uea e mwakuri n aanga aika a mwaiti ibukin kamaiuaia ana aomata”? (Aramwa 24:27).

Aramwa 26:2

A na kanga am utu ni kaekai ana titiraki Amon n Aramwa 26:2? Tao ko kona ni koroi aia reke iaon te beeba ae bubura ao kateia n te tabo are a kona aomata ni kabane n noria. Kaungaia kaain te utu bwa a na karinna inanona ngkana a iangoi kakabwaia riki tabeua ae e a tia te Atua ni “katoka i aora.”

Aramwa 29:9

E kanga Amon ao Aramwa n riki bwa bwaai ni mwakuri ni bain te Atua? Iangoia n tarai bwaai ni mwakuri ke baai ni mwakuri inanon mweengam ao maroroakinna bwa a kanga n ibuobuoki nakon mweengam. E kanga aei ni buokiira n ataia bwa ti na kanga n riki bwa “ana bwai ni mwakuri te Atua”?

Ibukin iango riki tabeua ibukin reireinaia ataei, taraa te kamataata n te wiiki aei n Nakomai, Iriirai—Ibukin te Moanrinan.

Kanakoraoan Ara Anga Reirei

Kabonganai aanga n aekaia nako. Kakaokoroan aron am anga reirei nakon kamatebwai ni koroboki aika tabu e kona ni buokiia kaain te utu n teimatoa n iai nanoia ao n irekereke iai. Te katooto, imwiin warekan te kibu iroun temanna kaain te utu, teuanne ke neienne e kona n titirakiniia kaain te utu ake tabeman ni manga taekinna n oin aia taeka te bwai ae e a tibwa warekaki.

Kamataataan tamneia Aentaai-Nibwaai-Riaai a tauni aia bwai ni buaka iroun Dan Burr