Bwaai ni Kabane a Kaotia Bwa Iai te Atua (Aramwa ao Korioa), iroun Walter Rane

Turai 6–12

Aramwa 30–31

“Tamaroan Ana Taeka te Atua”

Aramwa e kaota koauan “mwiin mwaakan” ana taeka te Atua (Aramwa 31:5). Ngkana ko wareka Aramwa 30–31, korei am namakin ngkana ko namakina mwiin mwaakan ana taeka te Atua ae korakora iaom.

Korei Am Namakin

Te rongorongo n Aramwa 30–31 e kamatataa raoi mwaakan taian taeka—ibukin te buakaka ao ibukin te raoiroi. Te “taeka ni kababa” ao “korakoran ana kauntaeka” iaon te tia reirei ae te tia kewe ae arana Korioa e kakamaaku bwa e na uoti “tamnei aika mwaiti nakon te kamateaki” (Aramwa 30:31, 47). N aron naba aei, te tia kaitaraa aia reirei Nibwaite arana Tioram e kairiia aomata ni kabane bwa a na bwaka “nakon bure aika korakora” ao ni “kabwaouai kawain te Uea” (Aramwa 31:9, 11).

Ni kabotauana, iai ana onimaki Aramwa ae matoatoa are ana taeka te Atua “bon iai korakoran riki korakorana iaon aia iango aomata nakon te kabaang, ke te bwai riki teuana” (Aramwa 31:5)—n raonaki ma aia taeka Korioa ao Tioram. Ana taeka Aramwa e kamatataa te koaua ae akea tokina ao ni wetea mwaakan karawa bwa e na kaina wiin Korioa (taraa Aramwa 30:39–50), a kaoa ana kakabwaia karawa iaoia naake a nako ma ngaia ni uotiia rikaaki Tioramwaite nakon te koaua (taraa Aramwa 31:31–38). Aikai banna ni katooto aika kakawaki ibukiia taan iriira Kristo n te bong aei, ngkana “korakoran kauntaeka” ao “buure aika korakora” a manga riki mwiia aika korakora iaon aia iango aomata (Aramwa 30:31; 31:9). Ma ti kona ni kakaea te koaua man te onimaki, n aron ae karaoia Aramwa, “tamaroan ana taeka te Atua” (Aramwa 31:5).

Iango ibukin Am Kamatebwai I Bon Iroum ni Koroboki Aika Tabu

Aramwa 30:6, 12

Tera ae nanonaki n te tia kakewea-Kristo?

N Aramwa 30:6, Korioa e aranaki bwa te “Tia Kakewea-Kristo.” Te tia kakewea-Kristo bon “te aomata ae aongkoa e kakoaua Kristo ma ni koauana e boni kaitaraa Kristo (1 Ioane 2:18–22; 4:3–6; 2 Ioane 1:7). Ni kabonganakina ae mataata riki bon te aomata ke te bwai teuana ae e kewe ni kakoaua te euangkerio ke te babaire ni kamaiu ao anne are e bon kateaki bwa kaitaraan Kristo” (Bible Dictionary, “Antichrist”).

Tera “keewe [n] te euangkerio ae koaua” aika ko noori n te aonaaba n te bong aei? Te katooto, Titita Julie B. Beck, te Beretitenti ni Kabuta n te Bootaki n Aine are mai imwaina, e reirei, “Ngkana iai te reirei ao berita aika [ti] ongo man te aonaaba ae kakewea te utu e bon kakewea naba Kristo” (“Teaching the Doctrine of the Family,” Ensign, Maati. 2011, 15).

Korioa e Kaewenakoa Aramwa, iroun Robert T. Barrett

Aramwa 30:6–60

E kona Ana Boki Moomon ni buokai ni buakana aia kairoro naake a kataia ni kamwaneai.

Ngkana ko wareka Aramwa 30:6–31, ana reirei Korioa a taraa n ae ti a tia n ongongo mai imwaina. Anne bukina, ngkai e reirei Beretitenti Ezra Taft Benson, bwa Ana Boki Moomon e kaoki ao e kona ni kakorakoraira ni kaitarai “babaire aika buakaka, kainibaire, ao reirein te buakaka n ara bong. Te tia kitana te koaua n Ana Boki Moomon titebo ma ae iroura n te bong aei. Te Atua, n ana atatai mai imwaina ae akea tokina, e karaoa raoi ana Boki Moomon n te aro are e na kona n noora te kairua ao n ata aron kaitaraan reirei ni kewe, n tautaeka, aro, iango ni wanawana n ara tai.” (Teachings of Presidents of the Church: Ezra Taft Benson, [2014], 132).

Iangoia ni korei ni karinani reirei aika kewe aika e reirei Korioa n Aramwa 30:6–31. Tera tabeua bwaai aika riki man kakoauaan reirei aikai? Te katooto, tera mwiin onimakinan anne “ngkana [e] mate te aomata, anne [bon] te mate”? (Aramwa 30:18). Reirei raa aika a kewe aika a reiakinaki iroun Korioa aika ti tebo ma reirei aika bure aika ko noori n te aonaaba n te bong aei?

Warekan taekan te reitaki imarenan Korioa ao Aramwa a kona ni buokiko ni katauraoi ibukin kaangaanga ngkana a kataia ni mwamwanaiko tabeman. E kona n ibuobuoki ni kamatebwaia Aramwa 30:29–60 n ataia bwa e kanga Korioa ni mwamwanaaki (taraa raoi kiibu 52–53). Tera ae ko kona n reiakinna man ana kaeka Aramwa nakon ana reirei Korioa? (taraa Aramwa 30:31–35).

Aramwa 31

Iai mwaakan ana taeka te Atua ni kairiia aomata nakon te raoiroi.

Aia kaangaanga Tioramwaite ni kaokoroaki mairouia Nibwaite e na taraa ni kainnanoa katokana man te tautaeka ke te taanga ni buaka (taraa Aramwa 31:1–4). Ma e a tia Aramwa n ataia bwa e na onimakina “tamaroan ana taeka te Atua” (Aramwa 31:5). Tera ae ko reiakinna man Aramwa 31:5 ibukin mwaakan ana taeka te Atua? Ko na kanga n tia noora ana taeka te Atua ni kairiia “ana aomata ni karaoa ae [e] bon riai”? (Aramwa 31:5). Iangoia bwa ko na kanga ni “kataia” (ni kabongana ke ni kataa) ana taeka te Atua ni buoka temanna ae ko tangiria.

N ataa riki ana kawai Aramwa ni kamaiuia tabeman, ko kona ni kabotaui kateina, ana namakin, ao ana mwakuri ma aia mwakuri Tioramwaite, n aron are kabwarabwaraaki n Aramwa 31. Te tiaata n aron aikai a na kona n ibuobuoki. Tera kaokoro aika ko noori? E kanga am namakin ni kona n riki n aron Aramwa?

Tioramwaite	Aramwa
Tioramwaite Kakoauaia ake tiaki kaain aia kurubu a motikaki taekaia bwa a na nako moone (Aramwa 31:17).	Aramwa Kakoauaia Tioramwaite bwa bon “tarina” ao tamneia a “kakawaki” (Aramwa 31:35).
Tioramwaite A katikui aia iango iaon kaubwai (Aramwa 31:24, 28).	Aramwa E kantaningaaki bwa e na uoti naano nakon Iesu Kristo (Aramwa 31:34).
Tioramwaite	Aramwa

Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki

Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.

Aramwa 30:44

Iangoia ni wareka ao ni maroroakina Aramwa 30:44 ni bootaki ngkana ko nako n nakonako itinaniku ke n tarai tamnei n ana karikibwai te Atua. A kona kaain te utu n tibwaua te bwai ae a noria ae kakoaua te Atua. A na kanga bwaai aikai—ke taneiai riki tabeua aika ti a tia ni karekei—ni buokiira bwa e koaua te Atua?

Aramwa 30:56–60

Tera ae ti reiakinna man Aramwa 30:56–60 bwa e kanga aron te riaboro nakoia ana taan iriiria? Tera ae ti kona ni karaoia ni kamanoa mweengara man ana kairoro?

Aramwa 31:20–38

Imwiin warekan Aramwa 31:20–38 ma am utu, kam kona ni maroroakin titiraki aikai: E kanga ana tataro Aramwa ni kaokoro ma aia tataro Tioramwaite? Ti na kanga n ira ana banna ni katooto Aramwa n ara tataro ao n ara tataro ma ara utu?

Ataei aika uarereke riki a kona ni kaaki te atiibu iaan uningaia bwa e na buokiia n ururingnga n tataro ni katoa bong n te moaningabong ao n te tairiki. A na bae ni kukurei ni katamaroa aia atiibu.

Aramwa 31:23

Tera ae ti karaoia ni katoabong inanon mweengara n reirei taekan ao n taekina te Atua?

Ibukin iango riki tabeua ibukin reiakinaia ataei, taraa te kamataata n te wiiki aei n Nakomai, Iriirai—Ibukin te Moanrinan.

Kanakoraoan Am Kamatebwai I Bon Iroum

Katauraoa am otabwanin. “E kona ara otabwanin n roota ara konabwai n ae korakora n reirei ao n namakina te koaua” (Teaching in the Savior’s Way, 15). Kataia ni kakaea te tabo n reiakin koroboki aika tabu ae e na karekea mwaakan te Tamnei ae Raoiroi. Katangitang ao korotamnei aika karikirake a kona naba ni kaoa te Tamnei.

Te Ramantam, iroun Del Parson