“Turai 20–26. Aramwa 36–38: ‘Taraa te Atua ma ni Maiu,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Turai 20–26. Aramwa 36–38,” Nakomai, Iriirai—Ibukiia Aomata n Tatabemaniia ao Utu: 2020
Kamataataan te tamnei iroun Joshua Dennis
Turai 20–26
Aramwa 36–38
“Taraa te Atua ma ni Maiu”
“Ngkana ko namakina te kimwareirei ae roko man ataakin te euangkerio, ko na bae n tangiria ni karaoa te bwai ae ko reiakinna” (Tataekina Au Euangkerio [2004], 19). Korei am iango ao am namakin bwa ko na kanga ni kabonganai koaua aika ko reiakin.
Korei Am Namakin
Ngke e noora te buakaka Aramwa are e katobibia iai, e namakina te “nanokawaki,” “te kataaki,” ma “kammarakan tamneina” (Aramwa 8:14). “Te buakaka are i buakoia aomata aikai,” e taetae ibukiia kaain Tioramwaite, “e bon kammaraka tamneiu” (Aramwa 31:30). E namakina te bwai ae titebo imwiin okina man ana mition nako Tioramwaite—e nooria bwa “nanoia aomata a moanna ni matoatoa, ao a moanna n un ibukin matoan te taeka,” ao aio are e karika “korakoran nanokawakin nanona” (Aramwa 35:15). Tera ae karaoia Aramwa n te bwai are e nooria ao n namakinna? E aki tii bwarananona ke n aki onimakina aron te aonaaba. Irarikina, “e tua bwa natina ake mwaane a na ikotaki” ao n reireiniia “bwaai aika a kaineti nakon te raoiroi” (Aramwa 35:16). E reireiniia bwa “akea riki te kawai ke te anga are e kona te aomata ni kamaiuaki iai, ma tii inanon ao rinanon Iesu Kristo … Nooria, ngaia te taeka ao te raoiroi” (Aramwa 38:9).
Iango ibukin Oin Am Kamatebwai ni Koroboki Aika Tabu
I kona ni bungiaki iroun te Atua ngkai I nanorinano ao n raira nanou.
Iai tabeman aika a na iai aia taneiai aika a kakubanako n aron rairakin Aramwa. Ma iai reirei inanon te taneiai aei aika ti bane ni kona n reiakinna mai iai ao ni karaoia, ibukina bwa a riai aomata ni kabane ni “bungiaki inanon te Atua” (Aramwa 36:23). Ngkana ko wareka Aramwa 36, kakaai reirei aika ko kona ni karaoi. Te katooto, e kanga temanna ae e a tia ni bungiaki inanon te Atua n namakina aron te bure? aron Iesu Kristo? Ko kona naba n taratarai bitaki aika ko na kantaningai n nooria n ana onimaki ao ana mwakuri temanna ae bungiaki inanon te Atua.
Taraa naba Motiaea 5:7; 27:25–26; Aramwa 5:14; 22:15; Ereman 3:35; “Rairaki,” Atuun Reirei n te Euangkerio, topics.ChurchofJesusChrist.org.
E karaoa te mwakuri ni kamaiu Iesu Kristo ibukin ana bure te aonaaba.
Kam kona n noori okiokin tabeua ana koroboki Aramwa iaon rairakina n te mwakoro aei. Anne bukina Aramwa 36 bon te banna ni katooto ae tamaroa n aron te karaki n Ebera ae atongaki bwa chiasmus, ike taeka ao iango a uotaki ni baireaia aika a kakaokoro, ni kaineti nakon te boto n iango, ao ni kaokiokaki ni bita aron teia. Inanon Aramwa 36, te iango inanon te kibu 3 e kaokiokaki n te kibu 27, te iango n te kibu 5 e kaokiokaki n te kibu 26, ao a mwaiti riki. Te boto n iango ikai bon te rongorongo ae moan te kakawaki iaon te chiasmus. Taraia ngkana ko kona ni kunea te boto n iango inanon kiibu 17–18. Iangoia bwa e kanga “tauakin te iango aei” n roota ao ni bita maiun Aramwa. E kanga n tia te koaua aei n rootiko? Tera iango riki tabeua aika a okioki aika ko kunei n te kibu n taeka aei?
E na kanga te karaki n rairannano aei ao ni kabwarabure ni kaungako bwa ko na irii ana katooto Aramwa ao n rairaki nakon te Tia Kamaiu?
Ibukin rongorongon riki te chiasmus, taraa Te Boki n Reirei n Ana Boki Moomon Ibukiia Ataein te Reirei (Boki ni Kairi Ibukin Bootaki n Reirein te Aro [2009], 232–33).
E a tia koroboki aika tabu ni kawakinaki “ma bukina ae wanawana.”
Ko a tia n iangoia bwa tera te kakai ao te kakabwaia ae e na reke man karekean koroboki aika tabu n te bong aei? E a tia te Atua n “ni [mwiokoira] ma bwaai aikai, aika a tabu” (Aramwa 37:14). Ngkai ko wareka Aramwa 37, tarai kakabwaia aika a roko man karekean koroboki aika tabu. Ko kanga n tia n rinanoi kakabwaia aikanne? Ti na kanga ni kabonganai koroboki aika tabu ni buokia ni “kaotaa mwaakan te [Atua] nakoia te roro are imwiina”? (Aramwa 37:18).
N Aramwa 37:38–47, Aramwa e kabotaua “ana taeka Kristo” nakon te Riaona. Ngkana ko iangoi kabotau aikai, iangoia ni kawai aika ko a tia n rinanon te kakai ao mwaakan ana reirei Kristo “ni katoa bong” (Aramwa 37:40).
Taraa naba D. Todd Christofferson, “The Blessing of Scripture,” Ensign ke Riaona, Meei 2010, 32–35.
A reireiniira koroboki aika tabu bwa ti na kanga n ira te Atua.
“Bwa a riki bwaai aika a korakora man bwaai aika a uarereke man aki kaangaanga.”
N tabetai ti kona n namakinna ae a rangi ni bubura ao ni korakora ara kaangaanga are e na bubura ao e na bon kaangaanga naba aron katokaia. E taraa n ae n tainako ao te Uea e rineia ni kabonganai “bwaai aika a uarereke ao ni bebete” (Aramwa 37:6) ni kakoroa nanon Ana mwakuri ao ni kakabwaiai maiuia Ana ataei. Ngkana ko wareka Aramwa 37:6–7, iangoi ao koroi kawai aika ko a tia n noora iai te reirei aei n riki inanon maium. Tera tabeua bwaai aika a uarereke ao man aki kaangaanga ae kabonganai te Uea ni kakabwaiako ao ni kakoroa nanon Ana mwakuri?
Taraa naba Aramwa 37:41–46; Dallin H. Oaks, “Small and Simple Things,” Ensign ke Riaona, Meei 2018, 89–92.
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Aramwa 36:5–26
E ngae ngke e rangi ni kamimi ana atatai Aramwa, rairakina e kabwarabwarai reirei tabeua ake a kaineti nakoira ni kabane. Kaoiia kaain te tutu ni kabane bwa a na rinei kiibu man Aramwa 36:5–26 are e reirei taekan te “bungiaki mai iroun te Atua.” Tera ae ti reiakinna man kiibu aikai? Tao a kona kaain te utu n tibwauaia bwa a kanga n tia ni kabongana te reirei are e kabwarabwara Aramwa.
Aramwa 36:18–21, 24
Ti na kanga ni kabonganai kiibu aikai ni buoka temanna n nooria bwa te rairannano bon te taneiai ae kakukurei, e aki kakamaku? E na kanga te rairannano ni kaungaira bwa ti na tibwaua te euangkerio ma tabeman?
Aramwa 37:6–7, 38–46
Tera tabeua “bwaai aika a korakora man ni uarereke” (Aramwa 37:6) are e na uoti bwaai aika a tamaroa nako nanora? Ni kawai raa ae ana taeka Kristo titebo ma te Riaona? Ti na kanga ni buokiira i bon iroura bwa ti na botumwaaka riki iaon kamatebwaiakan koroboki aika tabu?
Aramwa 37:35
Bukin tera bwa e kawanawana kawakinan tuua “n [ara tai] n ataei”?
Aramwa 38:12
A ataia am koraki bwa tera te bwai ae kairiira te aoti? Tao ko kona ni kaota tamnein teuana ao taekinna bwa e kanga ni kabonganaaki ni kairiira te man. Tera ae nanonaki n “kairii [ara] namakin”? E kanga kairiiran angiin ara namakin ni buokiira ni “kaoniira ma te tangira”?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Kanakoraoan Am Kamatebwai
Korei am namakin. Ngkana ko koroi am namakin n tamnei, ko kaotia nakon te Uea bwa ko moanibwaia Ana kawai, ao E na kakabwaiako ma kaotioti aika a teimatoa n riki. Ngkana ko kamatebwai, korei am iango. (Taraa Reirei n Ana Kawai te Tia Kamaiu 12, 30.)
E Kaoti te Anera nakon Aramwa ao Natin Motiaea Mwaane, iroun Clark Kelley Price