“Turai 27–Aokati 2. Aramwa 39–42: ‘Te Babaire ni Kamaiu Are e Korakora,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Turai 27–Aokati 2. Aramwa 39–42,” Nakomai, Iriirai - Ibukiia Aomata n Tatabemaniia ao Utu: 2020
Te Aine, E Aera Ko Tang? iroun Mark R. Pugh
Turai 27–Aokati 2
Aramwa 39–42
“Te Babaire ni Kamaiu Are e Korakora”
Ngkana ko kamatebwaia Aramwa 39–42, te Tamnei ae Raoiroi e kona n anganiko atatai aika a nano iaon bwaai aika riki inanon maium.
Korei Am Namakin
Ngke iai ae ti tangiria ae e a tia ni karaoa te bure ae kakaiaki, e kona ni matoatoa aron te bwai ae ti na buokia iai. Mwakoron te bwai ae karika Aramwa 39–42 bwa e na rangi ni kakawaki bwa e kaotia bwa e kanga Aramwa—ana reirrei Kristo are n te taina e reke ana bure ae moan te kaangaanga rairan nanona mai iai—e tabeakina te kaangaanga anne. Natin Aramwa te mwaane Korianton e a tia ni wenenibure, ao Aramwa, are e bon kakaraoia naba, e onimakina mwaakan te reirei ni koaua ni kaungaa te rairannano (taraa Aramwa 4:19; 31:5). Inanon mwakoro aikai, ti noora aron ninikorian Aramwa ni karaoan te bure ao ana akoi ao ana tangira ibukin Korianton. Ao n tokina, ti namakina ana koaua Aramwa bwa te Tia Kamaiu “e na bon roko ni uotinako [buure ao] ni katanoataa te rongorongo ni kamaiu ae kakukurei” nakoia naake a rairi nanoia (Aramwa 39:15). Te koaua are n tokina Korianton e oki nakon te mwakuri n ibuobuoki (taraa Aramwa 49:30) e kona n anganiira te kaantaninga ibukin te kabwarabure ao te kamaiuaki ngkana ti reke n te “kaangaang[a]” (Aramwa 42:29) ibukin ara bure ke ana bure temanna ae ti tangiria.
Iango ibukin Am Kamatebwai I Bon Iroum ni Koroboki Aika Tabu
Te wenenibure bon te mwakuri ae ribaaki i matan te Uea.
Ni buoka natina te mwaane bwa e na ota n aron te kaangaanga ae e na reke man te wenenibure, Aramwa e reirei “bwaai aikai bon mwakuri aika bati n ribaaki i matan te Uea” (Aramwa 39:5). Bukin tera te itiaki e kakawaki nakoim? Bukin tera e kakawaki nakon te Uea? Kamataata mairoun Unimwaane Jeffrey R. Holland aikai a kona n ibuobuoki:
“E mataata mai ibuakon Tabeaiangana ae korakora ni kaineti ma te maiu ae mamate bwa e kanga temanna n rin inanon te aonaaba ao e kanga are temanna ni mena itinanikuna. E a tia ni katea te tia ae matoatoa ni bwaai aikai.
“… Te reitaki ae tamaroa irouia aomata e kawakinaki ibukiia taanga aika a tia ni mareaki ibukina ngkai te kanikinaa n te katiteuanaaki ni koaua, te reitaki ao te katiteuanaaki ae katabuaki ao ni kaitiakaki iroun te Atua. … Te mare e baireaki bwa te katiteuanaaki imarenan te mwaane ao te aine. … Aio te reitaki ae bwanin are ti kabongana iai te taeka ae kabaeaki bwa e na anga ana berita ae akea tokina” (“Personal Purity,” Ensign, Nob. 1998, 76).
Iangoa te reirei ae anga Aramwa nakon Korianton inanon Aramwa 39:8–15. E kanga ni buokiko riki n ataa kakawakin tuan te itiaki ao ko na kanga n tokanikai iaon te kataaki? E kamatataa naba n ana reirei Aramwa aron kukurein te Uea ni kabwarai ara bure ngkana ti rairi nanora ao iai te kaantaninga ibukira ni kabane. Ngkana ko wareka Aramwa 39–42 n te wiiki aei, kakaei kakoauaan ana nanoanga te Atua. E kanga ana nanoanga te Atua ni kakabwaiako?
Taraa naba “Sexual Purity,” Ibukin Kakorakoraia Kairake, 35–37.
N na mangauti ao n tei imatan te Atua bwa e na baireaki taekau.
Ngke e ataia Aramwa bwa iai ana titiraki Korianton ibukin te Mangauti, e reireinna te bwai ae e na riki imwiin ae ti mate. Tera taian koaua ae reirei iai Aramwa inanon mwakoro 40–41 are e na ibuobuoki ibukin Korianton—ao ane iai ana bure—bwa a na ota iai? Ko kona ni bairea te bwai ae ko reiakinna man rinean atuun te reirei are e anga Aramwa (n aron te aonaaba n tamnei, te mangauti, ao kaokan bwaai) ao korean bwaai aika e anga reirei iaona Aramwa ibukiia n tatabeua. E kanga uringakin koaua aikai ni buokiko ngkana ko namakinna ae ko kaririaki ke n ukoukora te rairannano?
I kona n noori kaekaan au titiraki n te euangkerio n te onimaki.
N tabetai ti taku bwa Burabeti ataa te kaeka nakon titiraki ni kabane iaon te euangkerio. Ma ko na nooria bwa ni kabutaa te mwakoro 40, iai tabeua ana titiraki ae aki kaekaaki ibukin te maiu imwiin te mate. Tera ae e karaoia ni kakaai kaekaaia? Tera ae karaoia ngke e aki kaekai titiraki? Iangoia bwa e kanga ana banna ni katooto Aramwa ni buokiko ma titiraki n te euangkerio aika iai iroum.
Te tataro bon teuana te kawai ae ti kona iai ni kunei kaekaan titiraki n te euangkerio.
Ana Mwakuri ni Kamaiu Iesu Kristo e karaoa te baire ibukin kaboan maiura bwa e na kona ni karaoaki.
E kakoaua Korianton bwa rekenikai ibukin buure aki raoiroi (taraa Aramwa 42:1). Ma e reirei Aramwa bwa iai te kawai ae ko na kamaiuko iai man “te aro ae kananokawaki” are e reke man te bure: te rairannano ao te onimaki n ana Mwakuri ni Kamaiu Iesu Kristo, ake a uaia n nanoanga ao ni momotiraoi (taraa Aramwa 42:15). Ngkana ko wareka Aramwa 42, kakaea bwa e kanga Ana Mwakuri ni Kamaiu te Tia Kamaiu ni kariaiko bwa ko na karekea te nanoanga n akean te “i[raa] man te momotiraoi ” (kibu 25). Tera koaua aika ko kunei n te mwakoro aei are ko namakina iai Ana nanoanga?
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Aramwa 39:1–9
Iai te bwai ae tamaroa ae e karekea am utu man te marooro iaon tuan te itiaki? Ngkana ngaia anne, iangoia ni kabonganai bwaai n reirei aikai ni kaineti ma kainnanon am utu: Aramwa 39:1–9; “Itiaki man te Wenenibure,” Ibukin Kakorakoraia Kairake, 35–37; “Te Itiaki,” Atuun rongorongo n te Euangkerio, topics.ChurchofJesusChrist.org; overcomingpornography.org; ao witeo “Tera ae I Riai ni Karaoia Ngkana I Noora te Tamnei ae Buakaka?” ao “I Rineia bwa N na Itiaki” (ChurchofJesusChrist.org). Iangoia bwa ko na kanga ni buoka am utu bwa a na atai kakabwaia n te itiaki ao n te reitaki ae nakoraoi n te mare (te katooto, taraa te witeo “Ko na Kanga n Taetae Nakoia Am Ataei iaon te reitaki ae nakoraoi” iaon ChurchofJesusChrist.org).
Aramwa 39:9–15
Tera ae ti reiakinna man kiibu aikai bwa ti na kanga n totokoa te bure?
Aramwa 42:4
Ko kona ni karaoa te takakaro ma mwakorokoron beeba aika a koreaki iaoia katei aika a irekereke ma maiun Kristo ke reirei n te euangkerio a kamaenakoaki inanon te ru. Ko kona n nooria bwa iraua mwakorokoron beeba aika mwaiti ae a kona kaain te utu ni bobotii n te tau ae kakaokoro, ao ni maroroakinna bwa a kanga bwaai aika a koreaki iaon beeba ni kona ni buokiko n riki n aron te Atua. E kanga te “tai ae ti anganaki” iaon te aba n titebo ma te tai ae ti anganaki n te takakaro aei? Ti na kanga ni kabongana ara “tai ni kataaki” iaon te aba n riki n aron te Tia Kamaiu?
Aramwa 42:12–15, 22–24
Ko kona ni kamataata te irekereke imarenan te motiraoi ao te nanoanga man kabonganakin tamnein te kainikatine ae bebete ni maroroakin titiraki n aron aikai: Tera ae na riki nakon te kainikatine ngkana ti bure? Tera ae kainnanoia te motiraoi bwa e na baeranti te kainikatine? E kanga te Tia Kamaiu ni kaitarai bwaai aika kainnanoaki n te motiraoi ao ni kona ni karaoa te nanoanga?
Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Kanakoraoan Ara Anga reirei
Iangoi reirei aika a na kakabwaiaia am utu. Ngkana kam tataro mwaaka ni kamatebwaia ana taeka te Atua, titirakiniko i bon iroum, “Tera ae I kunea ikai ae e na bongana nakon au utu?” Ukoukora ana babaire te Tamnei ngkana ko iangoia bwa ko na kangaa ni buokiia am utu ni maroroakin koaua aikai.
Aio Natiu te Mwaane, iroun Elspeth Caitlin Young