“Aokati 3–9. Aramwa 43–52: ‘Teimatoa n te Onimaki Iroun Kristo,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Aokati 3–9. Aramwa 43–52,” Nakomai, Iriirai—Ibukiia Aomata n Tatabemaniia ao Utu: 2020
Ibukin Kakabwaia n Te Buraeki Ibukin te Inaomata, iroun Scott M. Snow
Aokati 3–9
Aramwa 43–52
“Teimatoa n te Onimaki Iroun Kristo”
E taraa n ae bwaai aika a riki aika a kabwarabwaraaki inanon Aramwa 43–52 aki kaineti nakoim. Ma inanon ni kabane koroboki aika tabu, iai ana rongorongo te Uea ibukim. Tataromwaaka n ukoukora te rongorongo mairoun te Uea ibukimi.
Korei Am Namakin
Ngke ti wareki taeka aikai ni moan mwakoron Aramwa 43—“Ao ngkai I a okira rongorongon taian buaka imarenaia Nibwaite ao Reimwanaite”—bon te bwai ae bwainaki bwa bukin tera e karin karakinan taian buaka Moomon ngkai e aki tau te tabo ae mwaawa iaon bwaatua (taraa Ana Taeka Moomon 1:5). E koaua bwa a rawata ara buaka ni boong aika kaitira, ma iai te bwai ae kakawaki n ana taeka ae raka riki nakon tii kabwarabwaraan te babaire ao te mate n te buaka. Ana taeka e katauraoira naba ibukin te buaka ae “ti bane n iria” (Anene n Taromauri, nambwa. 250), te buaka ae ti kaitaraa ni katoabong ni kaitara ana kairoro te buakaka. Te buaka aei e bon koaua, ao mwiina e roota maiura ae akea tokina. N aroia Nibwaite, ti “kaungaki man bukina ae tamaroa riki,” are bon “Atuara, ara aro, ma inaomatara, ma ara rau, ma ara [utu].” E arana te bwai aei Moronaai bwa “ibukiia Kiritian,” titebo bukina ma ae ti buakanna n te bong aei (Aramwa 43:45; 46:12, 16).
Iango ibukin Am Kamatebwai I Bon Iroum ni Koroboki Aika Tabu
Te buaka n ana Boki Moomon e reireinai taekan au buaka ni kaitara te riaboro.
Warekan taekan taian buaka imarenaia Nibwaite ao Reimwanaite e na uaana riki nakoim ngkana ko tarai baika ti te arona nakon am buaka n tamnei. Ngkana ko wareka Aramwa 43–52, taraia bwa tera ae a karaoia Nibwaite are a karaoia bwa a na nakoraoi (ke n aki nakoraoi) iai. Ngkanne iangoia bwa ko na kanga ni kabongana te bwai ae ko a tia n reiakinna ae e na buokiko n tokanikai iaon am buaka n tamnei. Ngkana ko kamatebwai kiibu aikai n aron aikai, koroi am iango bwa ko na kanga ni kona n ira aia banna ni katooto Nibwaite:
-
Aramwa 43:19. A tauraoi Nibwaite ma otanga. (I kona ni kekeiaki ni katauraoai ma otanga n tamnei.)
-
Aramwa 43:23–24. A ukoukora ana kairi te burabeti.
Taraia naba bwa a kanga taan kakaitaraia Reimwanaite ao Nibwaite ni kataia ni konaia Nibwaite. A kona ni kauringko bwaai aikai bwa a na kanga taan kakaitara ni buakaniko. N am tai ni kamatebwai, koroia bwa e na kanga Tatan ni buakaniko ni kawai naba aikanne:
-
Aramwa 43:8. Teraemena e kataia ni kauniia ana aomata bwa e aonga n reke te mwaaka iaoia. (Ngkana I a un ma aomata tabeman, I a karekea mwaakan Tatan iaou.)
-
Aramwa 43:29. A tangiria Reimwanaite bwa a na uotiia Nibwaite nakon te tautoronaki.
Kamanoan aia Kaawa Nibwaite, iroun Minerva K. Teichert
Ngkai I kataia ni kakaonimaki n aron Moronaai, ao N na riki n aekakin te Tia Kamaiu.
N am iango ko kona n riki n aron te Tia Kamaiu ao ni kakerikaka mwaakan te tia kakaitara inanon maium? Teuana kawaina ko na ira te kauring inanon Aramwa 48:17 n riki n “aiaron Moronaai.” Iangoa katein ao ana mwakuri Moronaai aika a kabwarabwaraaki ni kabutaa Aramwa 43–52 ma riki inanon 46:11–28 ao 48:7–17. Tera ae anaa nanom iaon te “te mwaane ae korakora”? E na kanga ni kona anuan ao ana mwakuri n aron ae kakerikaka mwaakan te riaboro ni maium? Iangoia bwa tera ae ko namakinna bwa ko na karaoia n ira ana banna ni katooto Moronaai ao n riki n aron te Tia Kamaiu.
Tatan e kataira ao e mwamwanaira teutana te tai imwiin teutana.
E ataia Tatan bwa angiira mai ibuakora ae aki tangiria ni karaoi buure aika a bubura ke ni kakoauai keewe aika a bubura. Ngaia ae, e kabonganai keewe ao kakatai aika a uarereke ni kairiira nakon buure aika a taraa ni uarereke—n aron mwaitina ae taku bwa tina kariaia. E reitinako ni karaoa aei ni karokoa ae ti a raroa nako man te maiu ae raoiroi.
Ko kona ni kunea te baeten n ana rongorongo Amarakaai ni mwamwanaa Reaontaai, e kuneaki inanon Aramwa 47. N am tai ni kamatebwai, iangoia bwa e na kanga Tatan ni mwamwanaiko, n aron ae kabwarabwaraaki iroun Unimwaane Robert D. Hales:
“Te tia kamwane ae Amarakaai e kawaekoa Reaontaai bwa e na ‘ruo rikaaki’ ao ni kaitibo ma ngaia inanon te mwarua. Ma ngke e kitana te tano ae rietaata riki Reaontaai, e kaboitinaki ‘teutana imwiin teutana’ ni karokoa e mate, ao ana taanga ni buaka a mena inanon bain Amarakaai (taraa Aramwa 47). Man taian kakauntaeka ao taian bukibuki, tabeman aomata a anai nanora bwa ti na kitana aontano ae rietaata. Aontano aika a rietaata bon te tabo are e mena te ota iai. … Bon te tano ae mano” (“Christian Courage: The Price of Discipleship,” Ensign ke Riaona, Nob. 2008, 74).
Taraa naba 2 Nibwaai 26:22; 28:21–22.
Te katiteuanaaki e uota te kamanoaki.
Ni bwaai aika a riki ake a koreaki mwiia ni moan Aramwa 50, e taraa n ae a na konaki Reimwanaite n te buaka irouia Nibwaite. Te otanga, te tabo ni kamanomano, ao aia mwakuri n nano teuana Nibwaite a karaoia bwa a na aki kona ni konaaki (taraa Aramwa 49:28–30 ao 50:17–20). Ma a waekoa Reimwanaite n tautaekan aia kaawa aika a mwaiti—n raonaki ma ake e a tia Moronaai ni kakorakoraia (taraa Aramwa 51:26–27). E kanga n riki anne? Taratarai kaeka n am tai ni wareki mwakoro aikai (taraa riki Aramwa 51:1–12). Iangoia bwa tera kauring aika a na reke man te rongorongo aei ibukim ao am utu.
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Aramwa 45:2–8
Warekan kiibu aikai ni bootaki e na kona ni kaunga am utu bwa a na karaoa te marooro iaon temanna ma temanna n itaramata ma kaain te utu, n aron are e karaoia Aramwa ma Ereman.
Aramwa 46:12–22
Te buraeki ibukin te inaomata e kaungaia Nibwaite bwa a na kawakin ana tua te Atua ao ni kamanoi aia onimaki. Tera ae kaungaira bwa ti na karaoa naba anne? Tao a kona am utu ni karaoa oin aia buraeki n inaomata—te buraeki ke te baena ma taeka ke tamnei are e na kauringko ibukin kawakinan ana tua te Atua ni katoa bong.
Aramwa 48:7–9; 49:1–9; 50:1–6
Ngkana a wareware am utu iaon taekan aia tabo ni katantan Nibwaite, ko kona ni maroroakinna bwa ko na kanga ni katana mweengam mairouia taan iowaawa. A kona ataei ni katea te tabo ni kamanomano man bwaai n aron kaintekateka ao burangketi, ke a kona ni korea te bwai ae a iangoia n aron tarakin aia tabo ni kamanoia Nibwaite.
Aramwa 51:1–12
Tera ae a reirei kiibu aikai iaon te bwai ae e na riki ma ara utu ngkana iai te kauntaeka? Ti na kanga ni karikirakea te katiteuanaaki iroura?
Ibukin iango riki tabeua ibukin reiakinaia ataei, taraa te kamataata n te wiiki aei n Nakomai, Iriirai—Ibukin te Moanrinan.
Kanakoraoan Am Kamatebwai
Titiraki titiraki ngkana ko kamatebwai. N am kamatebwai iaon koroboki aika tabu, titirakiniko titiraki aika a na buokiko n iangoia bwa aekakira aron maium man te bwai ae ko warekia.
Te Buraeki Ibukin te Inaomata, iroun Larry Conrad Winborg