Ibukin Kakabwaia n Inaomata, iroun Scott M. Snow

Aokati 3–9

Aramwa 43–52

“Teimatoa n te Onimaki iroun Kristo”

Ngkai ko iangoi waaki ni kakukurei, ko kona ni karekei iango ikai n karioiango ibukin te anga reirei irouia ataei ake a uarereke ao ake a ikawai.

Korei Am Namakin

Kaoa te Tibwatibwa

Tuangiia ataei bwa a na tibwai bwaai ake a uringngi iaoia tabeman aomata ao karaki n Aramwa 43–52, n aron Kaaben Moronaai ke te buraeki n inaomata. Ni buokaia bwa a na uringnga, kaoti tamnei man Karaki man Ana Boki Moomon, te Bokin Tamnein te Euangkerio, ke Nakomai, Iriirai—Ibukiia Aomata n Tatabemaniia ao Utu.

Reirei te Reirei: Ataei aika a Uarereke

Aramwa 43:17–21; 48:7–8; 49:1–5; 50:1–6

I kona ni karekei katanan tamnei inanon te euangkerio.

Ni kamanoia Nibwaite mairouia Reimwanaite, Moronaai e katauraoiia ana aomata ma otangaia ao taabo ni katantan. Ana mwakuri e reireiniira arora are ti kona ni karekea iai te kamanoaki n tamnei.

Waaki ni Kakukurei aika a Kona ni Karaoaki

• Karakinna nakoia ataei teutana taekan te buaka imarenaia Nibwaite ao Reimwanaite (taraa Aramwa 43), katuruturua bwa Nibwaite a kabonganai otanga ni kamanoia iai. Kam kona ni kabonganai “Mwakoro 31: Kaaben Moronaai e Tokanikai iaon Tiaraemna” (Karaki man Ana Boki Moomon, 85–88, ke te witeo iaon te bwai are e irekereke ma ngaia ChurchofJesusChrist.org). Wareka Aramwa 43:19, ao kaoiia ataei bwa a na kotei bwain rabwataia ngkai a ongo n koroboki aika a tabu.

• Kabwarabwara bwa n ai aroia Nibwaite n tain te aitara ni buaka n tamnei ni kaitaraa Taatan, are e aki tangiriia bwa tina kawakin ana tua te Atua. Korea tamnein te ataei iaon te burakibooti, ao buokiia ataei n iangoi bwaai ake a na kataniira n te maiu n tamnei bwa otanga ni katanan rabwatara (te katoto, tataro, warekan koroboki aika a tabu, ke kawakinan tuua). Ni katoa tai are e taekinaki iai te bwai teuana, korea tamnein te mwakoro n otanga iaon te ataei iaon te burakibooti.

Katanan aia Kaawa Nibwaite, iroun Minerva K. Teichert

Aramwa 46:11–16; 48:11–13, 16–17

I kona ni kakaonimaki n ai aron Kaaben Moronaai.

Moronaai bon te banna ni katoto n te onimaki, ninikoria, ao te ibuobuoki. Iangoia bwa ko na kanga ni kaungaia ataei n iriira ana banna ni katoto.

Waaki ni Kakukurei aika a Kona ni Karaoaki

• Kaota tamnein Moronaai n bwaai aika a kakawaki n te wiiki aei n Nakomai, Iriirai—Ibukiia Aomata n Tatabemaniia ao Utu. Tuangiia ataei taekan te buraeki n inaomata ao tera are e koreaki iaona, ni kabongana te kibuntaeka man Aramwa 46:11–16. Ko kona n taetae iaon “Mwakoro 32: Kaaben Moronaai ao Buraekin te Inaomata” (Karaki man ana Boki Moomon, 89–90, ke witeo ake a irekereke iaon ChurchofJesusChrist.org). Anganiia ataei bwa a na buoka karakinan te karaki ni mwaitin are a kona. Katereterea bwa Moronaai e kabongana buraekin te inaomata ni buokiia bwa a na uringa te bwai ae kakaawaki ibukiia.

• Buokiia ataei ni karaoa te buraeki n inaomata ibon irouia ke ibukin am kiraati. Waaki ni buokiia n iangoi bwaai ake a kakoauai ke bwaai ake e tangirii Tamaia are i Karawa bwa a na ururingii. Anganiia bwa a korei tamnein bwaai aikai iaon te beeba ae bubura, ke ko kona ni uotii tamnei nakoia bwa a na kanimma ma te beeba.

• Tuangiia ataei bwa a na tuangko taekaia tabeman aomata ake a tangiri ni kan katotongiia ao bukin tera a kan riki n aekakiia. Ngkanne tibwaia ma ngaiia tabeua taeka man Aramwa 48:11–13 are e kabwarabwara Moronaai, ao kaoioa bwa a na keetinna bwa tera ae a kabwarabwarai taeka aikai. Kaota tamnein Moronaai, ao maroroakin kawai ake a kona iai ni katotongnga.

Reirei te Reirei: Ataei aika a Ikawai

Aramwa 43:17–21; 48:7–8; 49:1–5; 50:1–6

I kona ni karekea katanakin te maiu n tamnei inanon te euangkerio.

Te aonnaba iai kaangaanga aika a mwaiti iai n te maiu n tamnei, ma e mwaiti ae a kona n reiakinna ataei mai irouia Nibwaite iaon aroia ni kamanoia.

Waaki ni Kakukurei aika a Kona ni Karaoaki

• Kaoiia ataei n tatabemaniia bwa a na wareka teuana te kibu ma te karaurau are e kabwarabwara aroia Nibwaite ni katauraoi ibukin te buaka ni kaitaraia Reimwanaite: Aramwa 43:19; 48:8; 49:1–5; ao 50:2–4. Tuangiia ataei bwa a na tibwai bwaai ake a reiakina (anganiia te ibuobuoki ngkana a kainnanoia). Kabwarabwara bwa ti mena inanon te buaka n te maiu n tamnei ni kaitara Tatan, ao ti riai ni katanii maiura n tamnei, n ai aroia Nibwaite ngke a kataniia n te buaka mai irouia Reimwanaite. Aekakira otanga ke taabo ni katantan aika ti kona ni katei bwa otangara n te buaka n te maiu n tamnei?

• Buokiia ataei bwa a na karaoa aia otanga man te beeba ae rababa ke te katibooti, ao tuangiia bwa a na korei iaona bwaai ake ana kataniira n te maiu n tamnei. Katoaia ataei n anganiia te mwakoro ni beeba, ao kaoiia ataei bwa a na korea te bwai ae buakaka are e kona ni kariiriira iai Tatan bwa tina karaoia (n aron te kewe, kimoa, ke te riibuaka). Tuangiia bwa a na kamwanunuua aia beeba bwa e na riki ni booro ao a karea iai te otanga ni kaota aron te euangkerio ni kona ni kamanoia mairoun Tatan (taraa naba Ebeto 6:16).

Aramwa 46:11–16; 48:11–13, 16–17

I kona ni kakaonimaki n ai aron Kaaben Moronaai.

Moronaai bon ana reirei Iesu Kristo ae kakaonimaki ao e korakora, are e kaungaia Nibwaite bwa a na maiuakina te euangkerio (taraa Aramwa 48:17). Tera ae a kona ataein am kiraati n reiakinna man ana banna ni katoto?

Waaki ni Kakukurei aika a Kona ni Karaoaki

• Ikotaki wareka Aramwa 46:11–16. Tera ae e tangiria Moronaai bwa a na uringnga Nibwaite? (taraa kibu 12). E kanga ni buokiia bwa a na uringii bwaai aikai? Tuangiia ataei bwa a na karinaninii tabeua bwaai ake e tangiriira Tamara arei Karawa bwa ti na ururingii. Anganiia ataei bwa a na karaoa oin aia “buraeki n inaomata” ma kibuntaeka ke tamnei ake e na buokiia n uringii bwaai aikai.

• Tuanga te ataei bwa e na wareka Aramwa 48:17. Ni buokiia ataei bwa a na ota bwa bukin tera ti kaoaki bwa ti na riki n ai aron Moronaai, kaoiia bwa ana kamatebwaia Aramwa 48:11–13, 16. Tuangiia bwa a na kakai taeka ao kibu ake e na buokiira n ota bwa bukin tera Moronaai bon ana reirei Iesu Kristo ae korakora. Ngkai a tibwa te bwai are a kunea, kaungaia bwa a na iangoi bwaai aika a onoti ake a kona ni karaoi bwa a na riki n ai aron Moronaai.

Aramwa 47:4–19

Tatan e kaririira ao e keweira teutana imwiin teutana.

Ataei a riai n ataia bwa Taatan e na kataia ni kariiria bwa a na karaoa te bure ae uarereke bwa e aonga ni kona ni kairiia nakon buure aika bubura.

Waaki ni Kakukurei aika a Kona ni Karaoaki

• Ikotaki wareki kibu aika a rineaki man Aramwa 47:4–19, ao kabwarabwara nakoia ataei aroia Amarakai n tautaekana ana taanga ni buaka Reaontaai, e ngae ngke kain te taanga a “tia ni kamatoa n aia iango” bwa a na bon aki kairoroaki bwa a na buakaniia Nibwaite. Tera ae e na kaman riki ngke arona bwa Amarakai e a kaman tuanga Reaontaai ana iango are e na karaoia mai moana? Tera ae e reireiniira iai kiibu aikai n aron Tatan ni kataia ni keweniira?

• Kaota tamnein te auti are e kawakinaki raoi ao te auti are e a tia ni katinanikuaki, ke kaota tamnein te onaroka ae rangi ni maiuraoi ao te onaroka ae onrake n uteute. Anganiia ataei bwa a na maroroakina te bwai are a tia n nooria n te tamnei ao e na kanga n riki bwaai inanon taina. Tera ae e kona ni karaoia te tia bwaibwai n te auti ke n te onaroka n totokoa aei? Kabwarabwara bwa aomata a kona ni karaurau n riki bwa taan bure ngkana aki totokoa ana kariiri Tatan ni karaoi bure aika a uarereke (n aron bwainakin te aki kokoaua ke matakuakinan tamnei aika buakaka) ao imwiina buure aika a bubura riki. Tera tabeua bwaai aika buakaka ake ti riai n totokoi karaoaia inanon maiura?

Kaungaa te Kamatebwai n te Mweenga

Tuangiia ataei n tatabemaniia bwa a na atonga aran te bwai teuana are teuanne ke neienne e ongo ke n namakinna n te bong aei ao n tangiria n tibwaia ma kain ana utu. Kaungaia bwa a na iriira aia baire ake a tia ni katei.

Kanakoraoan Ara Anga reirei

Buokiia ataei bwa a na katea te mweengaraoi. Tabeman ataei a kona n aki namakina te konabwai n reiakina te euangkerio ibon irouia. Teuana te kawai ni katea mweengaraoia bon kamoamoakiia ngkana a iri waaki n te kiraati.