“Aokati 10–16. Aramwa 53–63: ‘Kawakinaki ni Mwaakana ae Moan te Kamimi,’” Nakomai, Iriirai—Ibukin te Moanrinan: Ana Boki Moomon 2020 (2020)
“Aokati 10–16. Aramwa 53–63,” Nakomai, Iriirai—Ibukin te Moanrinan 2020
Uangaa Rorobuaka n Ataei aika Taani Buaka, iroun Arnold Friberg
Aokati 10–16
Aramwa 53–63
“Kawakinaki ni Mwaakana ae Moan te Kamimi”
Ngkai ko wareka Aramwa 53–63, iangoia bwa kona kanga ni uoti karaki n te mwakoro aei nakon maiuia ataei ao ni buokiia n reiakin reirein te euangkerio are e taekinaki n te karaki anne.
Korei Am Namakin
Kaoa te Tibwatibwa
Ni katauraoia ataei bwa a na reirei man Aramwa 53–63, kaoiia bwa a na tibwa te bwai are a uringnga n taekan Aentaai-Nibwaai-Riaai (taraa Aramwa 23–24). N ibuobuoki, kaota te tamnei are ko kabongana n reirei iai te karaki, ke kauringiia n te waaki ni kakukurei are a karaoia n te kiraati.
Reirei te Reirei: Ataei aika a Uarereke
I kona ni kakaonimaki nakon te Atua n aroia taan buaka aika rorobuaka.
Ana rorobuaka Ereman (nanona “kairake”) aika taan buaka e kona n riki bwa te banna ni katoto ibukiia ataein am kiraati. Kaungaia ataei bwa a na kataia n riki n aekakiia.
Waaki ni Kakukurei aika a Kona ni Karaoaki
-
Kaoa te ataei bwa e na taua i eta tamnein te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu ngkai ko kakimototo ni karakina rongorongoia ana taanga ni buaka Ereman aika rorobuaka. Ko kona naba ni kabongana “Mwakoro 34: Ereman ao Uanga Rorobuaka n Ataei aika Taan Buaka(Karaki man Ana Boki Moomon, 93–94, ke te tamnei ae e irekereke n ChurchofJesusChrist.org). Anganiia ataei bwa a na tibwa te bwai ae a ataia n aron rongorongoia uanga taan buaka aika rorobuaka.
-
Kaoa te aine ao te mwaane bwa a na tei ibukiia tinaia ao tamaia taan buaka aika rorobuaka. Ngkai ko wareka Aramwa 56:27 ao 47–48, anganiia ataei aikai bwaai ake a tei ibukin aroia tinaia ao tamaia taan buaka ni buokiia, n aron te baeki n amwarake n tei ibukin te “bwai ake a kainnanoi” are a kanakoi kaaro ao koroboki aika tabu bwa e na tei ibukin aia reirei tinaia. Tuangiia ataei bwa a na tibwai bwaai ake a karekei aia karo ibukiia ke ake a reireiniia.
-
Wareka Aramwa 53:20–21, ao buokiia ataei bwa a na ota n taeka n aron aki mamaku, ninikoria, korakora, ao koaua ae nanonna. Kabwarabwara bwa a kanga rorobuaka aika taan buaka aikai ni kaoti anua aikai. Karaoi nnen aara aika beebete are e kangai, “Ngkana , I riki n aroia rorobuaka aika taan buaka!” Buokiia ataei ni karin taeka iaon rain ake akea kanoaia ma anua ake a rinei man Aramwa 53:20–21.
-
Kaoiia ataei bwa a na katiai iteraniba ni waaki ni kakukurei ibukin te wiiki aei. Buokiia bwa a na iangoi kawai ake a kona iai n riki kaanga ai aron ana taanga ni buaka Ereman. Ikotaki anene “We’ll Bring the World His Truth” (Aia Boki n Anene Ataei, 172–73).
Ngkana I raraoma, I kona n onimakina te Atua.
Ngke ngaia ma ana taanga ni buaka a kaitarai taai ni kaangaanga, Ereman e onimakina te Uea. Tera ae a kona n reiakinaki ataei ake ko reireiniia man ana banna ni katoto?
Waaki ni Kakukurei aika a Kona ni Karaoaki
-
Korea tamnein te ubu ae un iaon te burakibooti, ao taekina aron Ereman ngke e raraoma ibukina bwa ana taanga ni buaka e aki tau kanaia ke e aki tau mwaitiia mwaane n teimatoa ni buaka (taraa Aramwa 58:32–41). Tuangiia ataei bwa a na tibwai taai are a tia n raraoma iai. Wareka Aramwa 58:37 (ke buoka te ataei bwa e na warekia), ao buokiia ataei bwa a na bita te ubu iaon te burakibooti nakon te moangare ni kaota aron ana namakin Ereman are e namakinna ibukina bwa e onimakina te Atua. Tera ae ti kona ni karaoia ngkana ti namakina te raraoma? Ikotaki anene “Smiles” (Aia Boki n Anene Ataei, 267).
-
Koroboki iaon tabeua mwakoro ni beeba tabeua bwaai ake a kona n raraoma iai ataei. Anganiia ataei bwa a na ikaruoruo n rinei beeba nakoim bwa kona wareki, ao kaoiia ataei bwa a na tibwaia bwa e na kanga ni buokiia te Atua ma raraoma aikai n teuana ma teuana. Tibwa te bwai ae koa tia n rinanona are e buokiko iai te Atua ngke koa raraoma.
Reirei te Reirei: Ataei aika a Ikawai
Aramwa 56:45–48; 57:21, 25–27; 58:39–40
I kona ni kakaonimaki nakon te Atua n aroia taan buaka ake rorobuaka.
Tera koaua man karakinaia ana rorobuaka Ereman (nanona “kairake”) ake taan buaka ni kona ni buokiia ataei ma kakaewenako ake a kaitarai?
Waaki ni Kakukurei aika a Kona ni Karaoaki
-
Kaoiia ataei bwa a na tibwa te bwai ae a ataia irouia taan buaka aika rorobuaka. Ko kona naba ni kabongana “Mwakoro 34: Ereman ao Uanga Taan Buaka aika Rorobuaka” (Karaki man Ana Boki Moomon, 93–94, ke witeo ake a irekereke ma ngaia n ChurchofJesusChrist.org). Anganiia ataei bwa a na tibwaia bwa tera ae a mataai iai irouia taan buaka.
-
Ikotaki wareka Aramwa 56:45–48; 57:21, 25–27; ao 58:39–40. Kaoiia ataei bwa a na kakai taeka ke kibuntaeka man kibu aikai ake a kabwarabwaraia taan buaka aika rorobuaka. Tera ae nanonaki n taeka ke kibuntaeka aikai? Ti na kanga n riki n ai aroia rorobuaka ake taan buaka?
-
Wareka Aramwa 56:46–48 nakoia ataei, ao kaoiia bwa a na kakauongo nakon te bwai are e taekinna tinaia taan buaka ake rorobuaka nakoia natiia iaon te onimaki. A kanga kaaro ni boong aikai ni buokiia natiia ni karekea te onimaki? Bukin tera e kakaawaki irouia ataei bwa a na iriiri aia reirei aia karo aika a raraoi ao taan kairiiri n te Ekaretia n “iri raoi”? (Aramwa 57:21).
Atin te Onimaki, iroun Jay Ward
I kona ni kawakina au berita ae tabu.
Taan buaka aika rorobuaka ao aia karo a karaoi berita ake a kakoroi bukiia ma te kakaonimaki. Ko kona ni kabongana te rongorongo aei n reireiniia ataei taekan kakaawakin berita.
Waaki ni Kakukurei aika a Kona ni Karaoaki
-
Bwenauaia ataei inanon teniua te kurubu: teuana a tei ibukin Ereman, teuana a tei ibukiia ana aomata Ammon, ao te kateniua a tei ibukiia natiia ana aomata Ammon. Wareka Aramwa 53:10–17 n ikotaki, ao anganiia kurubu bwa a na tibwaia bwa a kanga aroia aomata ake a tei ibukiia ni karaoi ao ni kawakin berita. Tibwa am koaua bwa Tamara are i Karawa e kakabwaiaira ngkana ti kawakin ara berita.
-
Koreia iaon te burakibooti kibuntaeka man Motiaea 18:8–10 ke Reirei ao Berita aika Tabu 20:37 ake e kabwarabwarai bwaai ake ti berita bwa tina karaoi ngke ti bwabetitoaki. Korei naba tabeua kibuntaeka aika aki irekereke ma te berita ae tabu. Tuangiia ataei bwa a na kamronroni bwaai ake ti berita bwa tina karaoi (anganiia bwa a na kabonganai koroboki aika a tabu ngkana a kainnaoia). Ti kanga ni kakabwaiaaki ngkana ti kawakin ara berita? Kaungaia ataei bwa a na Korei te bwai are a tia ni berita iai ma te Atua bwa a na karaoi ao ni katekei aia rinan n te tabo are a kona n nonori iai.
-
Kaoa te ataei bwa e na wareka Aramwa 56:27. A kanga kaaro ni buokiia natiia mwaane n aki urui aia berita are a na aki buaka? Antai ae e boutokaia ni kawakinan ara berita?
I kona n rineia bwa N na aki un.
Moronaai e kabuakaka Bwaoraan, ma n oneanmwiin are e na un, e taku Bwaoraan, “I … bon kimwareirei n aron korakoran nanom.” (Aramwa 61:9).
Waaki ni Kakukurei aika a Kona ni Karaoaki
-
Kaoiia atae bwa a na iangoia te tai are a kabuakakaaki iai ibukin karaoan te bwai ae aki karaoia. Karakinna nakoia bwa e kanga n riki aei nakon Bwaoraan (taraa Aramwa 60–61). Ko na bae ni kabonganaa “Mwakoro 35: Kaaben Moronaai ao Bwaoraan” (Karaki man Ana Boki Moomon, 95–97, ke te witeo are e irekereke ma ngaia iaon ChurchofJesusChrist.org). N ataia bwa tera aron Bwaoraan nako iai, ikaruoruo ni wareki kiibu man Aramwa 61:3–14. Tera ae e karaoia Bwaoraan ngke e kabuakaka Moronaai? Tera ae ti kona ni reiakinna n te kabwarabure man ana banna ni katoto Bwaoraan? Ti na kanga n riki n ai arona?
-
Koreia iaon te burakibooti Tera ae I riai ni karaoia ngkana iai ae un irou? Kaoiia ataei bwa a na ikaruoruo ni korei tabeua kaeka iaon te burakibooti. E na kanga ni kona Bwaoraan ni kaman kaeka te titiraki aei? Tuangiia ataei bwa a na korei kaeka aikai ni korean te reta ni bon nakoia bwa a na kona ni wareki ngkana iai ae e un irouia.
Kaungaa te Kamatebwai n te Mweenga
Kaungaia ataei bwa a na tibwaia ma aia utu teuana te kawai are a tangiria n riki iai bwa taan buaka aika kairake. A kona naba ni karabwaia aia karo ibukin reireinakiia n ai aroia taan buaka aika kairake are a karaoia tinaia.
Kanakoraoan Ara Anga Reirei
Kabaeia ataei ni maroroakinan te euangkerio. Bibitakin tein te umwanreirei e kona n tabetai ni buokiia ataei bwa a na tamaroa riki kabaeakiia ni maroroakina te euangkerio. Te katoto, ko kona n tabetai ni kaoiia ataei bwa a na tekateka ni kamronron iaon te timanti nakon are a toka n te kaintekateka.