Mwakoro 34

Ereman ao 2,000 Taan Buaka aika Kairake

Ana aomata Amon a tia ni berita nakon te Atua bwa a na manga aki buaka riki. A maeka irarikiia Nibwaite, ao a kamanoaki irouia Nibwaite.

Aramwa 53:10–12

Ngke aia kaiririba ana aomata Amon a ekinakoiia tenaan Nibwaite, ana aomata Amon a tangiria ni urua aia berita ao ni buokiia Nibwaite ni buaka.

Aramwa 53:13

Ereman ao tabeman aia tia kairii Nibwaite aki tangiriia ana aomata Amon bwa a na urua aia berita nakon te Atua.

Aramwa 53:14–15

Natiia mwaane aika kairake ana aomata Amon a tuai ni karaoa te berita. A tangiria ni buokiia ana taanga ni buaka tenaan Nibwate ni buaka ibukin inaomataia.

Aramwa 53:16–17

Uoua tenga taan buaka aika kairake mwaane a rineia ni kamanoa abaia. A tuanga Ereman bwa e na riki bwa aia tia kairiiri.

Aramwa 53:18–19

Ataenimwaane aikai bon mwaane aika a nanonimwaane, ninikoria, ao a aintoa. A bon kokoaua naba ao a onimakinaki, ao a kawakin ana tua te Atua.

Aramwa 53:20–21

Ereman e kairiia ana 2,000 taan buaka aika kairake inanon te buaka. E araniia bwa natina mwaane, ao ngaiia a aranna bwa tamaia.

Aramwa 53:22; 56:46

E ngae ngke natin Ereman mwaane a tuai man buaka, a bon aki maaku. Tinaia a reireiniia ni karekea te onimaki iroun te Atua ao n ataia bwa e na bon buokiia.

Aramwa 56:47

Ereman ao ana tanga ni buaka a tia n irii bubuaka tabeua ni kaaitaraia Reimwanaite. Kairake n ataeinimwaane aikai a bon rangi n ongotaeka nakon ana oota Ereman.

Aramwa 57:19–21

A ninikoria ni buaka ao a buoka kakionakoaia aia kairiribai. Imwin te buaka Ereman e kunea bwa ni kabane natina mwaane a bane n ikoaki ma akea temanna ae tiringaki.

Aramwa 57:22, 25

Bon te kakai. Ereman e bon rangi ni kukurei. E ataia bwa kairake n ataeinimwaane aikai a tia ni kamanoaki ibukin aia onimaki ae korakora iroun te Atua.

Aramwa 57:26–27