Mwakoro 14
Abinataai ao te Uea ae Noa
Tinebi bon te uea ae raoiroi man te kurubu n Nibwaite. Ngke e a kara, natina te mwaane ae Noa e a manga uea.
Noa bon tiaki te uea ae raoiroi n aron tamana. E bon buakaka ao e aki ongotaeka nakon ana tua te Atua.
E kairoroia ana aomata n anganna mwakoron aia kurein, maan, koora, ao tirewa.
Te Uea ae Nooa e karaoa aio ibukina ae bon taningaroti. E karaoiia tenaan Nibwaite n anganna bwaai ni kabane are e kainnanoi ibukin maiuna.
E onoi mwiia ibonga aika a raraoi are e weteiia tamana ao e weteiia ibonga aika buakaka. Ibonga aika buakaka a reireiniia aomata ni bure.
Te uea ae Noa iai ana kateitei aika tamaroa aika karaoaki, n ikotaki ma te bareti ae bubura ma te kaintokanuea. Kateitei a katamaroaaki man te koora, tirewa, ao kaai aika bobuaka.
Te uea ae Noa e tangiri kaubwai are e anai mairouiia ana aomata. Ngaia ma ana ibonga a kabanei aia tai ni mooi wain ao ni karaoa te buakaka.
Te Atua e kanakoa te burabeti ae arana Abinataai nakoia ana aomata Nooa. Abinataai e kauringiia bwa ngkana aki rairinanoia, a na riki bwa aia toro Remwainaite.
Ngke te Uea are Noa e ongo bwa tera ae taekinna Abinataai, e rangi n un. E kanakoia mwaane bwa a na kaira Abinataai nakon te bareti ike ena kona n tiringnga iai.
Abinataai e kairaki nakon te uea. Te uea ae Nooa ao ana ibonga a titirakinna titiraki aika a mwaiti. A kataia ni kamanea bwa e na taekinii bwaai tabeua aika bure.
Abinataai e aki maaku ni kaekai aia titiraki. E ataia bwa te Atua e na buokiia. Ibonga a rangi ni miimi n ana kaeka Abinataai.
Te Uea ae Nooa e rangi n un ao e anga ana oota nakoia ana iboonga bwa a na tiringa Abinataai. Abinataai e taku bwa ngkana a riingnga, te Atua e na tiringiia.
Te Tamnei ae Raoiroi e kamanoa Abinataai n te aro are e na kona ni kabanea taekinan te bwai ae tangira te Uea. Moamoan Abinataai e otanako. Ibonga a maaku n riingnga.
N taetae ma te mwaaka mairoun te Atua, Abinataai e tuangiia aomata aia buakaka. E wareki ana tua te Atua nakoia.
E tuangiia bwa Iesu Kristo e na bungiaki nako aon te aba. Iesu e anganiia aomata te konaa n rairinanoia, ni maungauti, ao ni maiu ma te Atua.
Abinataai e tuangiia aomata bwa a na rairinanoia ao ni kakoaua iroun Iesu Kristo ke a na aki kamaiuaki.
Te uea ae Nooa ao ni kabane ana ibong e rawa ni kakoaua Abinataai ma tii temana ae kakoauaa. Nooa e tuangiia ibonga bwa a na tiringa Abinataai. A kabaea ao a karenakoa inanon te umanikaikain.
Temanna te ibonga are e kakoaua Abinataai bon arana Aramwa. E bubutia te Uea ae Nooa bwa e na kainaomata Abinataai.
Te uea e rangi n un iroun Aramwa ao e tua bwa e na tewenakoaki. Ngkanne e a kanakoia ana toro bwa a na tiringnga. Aramwa e biri ao e karabaa, ao taian toro aki kunea.
Imwin kabanean teniua te bong inanon te karabuuti, Abinataai e a manga uotaki nako matan te Uea ae Nooa. Te uea e tuanga Abinataai n kaoki ana taeka ake e a tia n taekinna ni kaaitara ma ana aomata.
Te Uea ae Nooa e tuanga Abinataai bwa ngkana e aki kakewei bwaai ake e a tia n taekinna, e na bon tiringaki.
Abinataai e ataia bwa e a tia n taekin koaua. E bon kukurei ni mate nakon are e na kaoki taeka ake e a tia te Atua ni kanakoa bwa e na taekin.
Te Uea ae Nooa e anga ana oota nakoia ana ibonga bwa a na tiringa Abinataai. A kabaea, kataerea, ao a kabuekia ni karokoa matena. Imwain matena, Abinataai e taku bwa te Uea ae Nooa e na mate naba n te ai.
Tabeman tenaan Nibwaite a kaitaraa te Uea ae Nooa ao a kataia n tiringnga. Aia tanga Remwanaite naba a roko ni buakana te uea ao ake a ririmwina.
Te uea ao taan ririmwina a birinako mairouia tenaan Remwanaite, ma a reke irouiia tenaan Remwanaite ao a tiringiia. Te uea e tuangiia ana mwaane bwa a riai ni kitaniia aia utu ao reitinako ni birinako.
Mwaitiia mwaane a rawa ni kan nako. Mwaitiia mwaane a tauaki irouia tenaan Remwanaite.
Angiia mwaane ake a birinako ma te Uea ae Nooa a rangi n nanokawaki. A tangiria n okirikaaki ni buokiia buiia ma natiia ao aia botannaomata.
Te Uea ae Nooa e aki tangiriia mwaane bwa a na okiriia aia utu. E anga ana oota bwa a na tiku irarikina.
Tenaan mwaane a un iroun te Uea ae Nooa. A kabuekia ni karokoa matena, n aron ana taeka ni burabeti Abinataai. Ngkane a oki nakoia aia utu.