Mwakoro 15
Aramwa e Reireiia te Bwabetito
Aramwa e rabanako mairoun ana toro te Uea ae Nooa ao e karaba inanon boong aika mwaiti. Ao inanon boong ake e karaba iai, e korei ana taeka ni burabeti Abinataai ni kabane.
Aramwa e raira nanona ao e kawariia Nibwaite ni karaba, n reireiniia ana rongorongo Abinataai. Aramwa e tuangiia aomata bwa a na karekea te onimaki iroun Iesu Kristo ao n rairinanoia.
N tain te ngaia Aramwa e karaba ibuakon taian aroka irarikin te ran ae aranaki bwa ranin Momoon.
Koraki ake a kakoaua ana reirei Aramwa a nako Nnein Moomon ao a bwabetitoaki. Aramwa e bwabetitoiia 204 aomata nakon ana Ekaretia Kristo.
Aramwa e katabuiia ibonga bwa a na reireiniia aomata. E tuangiia ibonga bwa a na reirei te rairannano ao te onimaki iroun Iesu Kristo. E taku naba bwa riai n aki kauntaeka ma ana katiteuanaaki.
Ana aomata Aramwa a tangiriia ao a ibuobuoki ibon imarenaia. A tibwai bwaai ni kabane ake iai irouiia ao a kukurei ngkai a tia n reiakina taekan Iesu Kristo, aia tia Kabooiia.
Ana toro te uea ae Nooa a noora Aramwa n reireiniia aomata. Te uea e taku bwa Aramwa e rairiia tenaan Nibwaite ni kaaitara, ngaia are e a kanakoa te taanga ni buaka bwa a na tiringiia.
Te Atua e kauringa Aramwa bwa ana taanga ni buaka te Uea ae Nooa a roko. Aomata a ikotiia aia utu, man, ao tabeua aia bwai ao a birinako nako nanon te rereua.
Te Atua e kakorakora ana aomata Aramwa n te aro are a rabanako man ana taanga te uea ae Nooa. Te taanga ni buaka a ukoukoriia ma aki kuneiia.
Imwin mwanangaia inanon te rereua inanon waniua te bong, ana aomata Aramwa a roko n te aono ae tamaroa are raanga rinanona te ran ae e itiaki. Ikai are a uniki kain amwarake ao katei taian kateitei.
Aomata a tangira Aramwa n riki bwa aia uea, ma Aramwa e taku bwa te Atua e aki tangiriia bwa a na iai aia uea. Te Atua e tangiriia bwa a na inaomata.