Mwakoro 51
Tenaan Iaretaite A Mwananga Nakon te Aba ni Berita
Ngke a kaembwa Iaretaite i rarikin taari, tarin Iareta e mwaninga n tataro. E roko te Uea inanon te nang n tuangnga bwa e na raira nanona.
Tarin Iareta e raira nanona ao e tataro. Te Uea e kabwara ana bure tarin Iareta ma e taku bwa e na manga aki bure.
Te Uea e tuanga tarin Iareta ni kabai taian bwaati ni uotiia ana aomata nakon te aba ni berita.
Te Uea e tuanga tarin Iareta aron kabaakin taian bwaati.
A karaoaki taian bwaati bwa e na aki rin te ang n te aro are na aki rin te ran inanona.
Tarin Iareta e miimi bwa a na kangaa aomata ni ikeikena te ea inanon taian bwaati . E butiia te Uea bwa tera ae na karaoia.
Te Uea e tuangnga bwa e na karaoi bwangabwanga i taubukin ao iaan te bwaati n tatabeua. E kona te bwangabwanga ni kaukaki ni karina te ang ao ni kainaki n totokoa taari.
Tarin Iareta e tuanga te Uea bwa taian bwaati e roo nanoia. E tuangnga te Uea bwa e na iangoa te aro are e na reke te oota n taian bwaati.
Te taura ibukin taian bwaati e aki kona ni karekeaki man te ai ke taian kamaama bwa a na uruaki.
Tarin Iareta e nakon te maunga ao e karaoi 16 atibu man te bwaa. Taian atibu a taraa n ai aron te kirati ae itiaki. E karaoi uoua atibu ibukin tatabeua bwaati aika waniua.
Tarin Iareta e uotii atibu nako taubukin te maunga. E tataro ikekei nakon te Uea.
Tarin Iareta e butiia te Uea bwa e na riing atibu bwa aonga n anga te ota inanon taian bwaati.
E riing atibu n tatabeua te Uea n tabonibaina.
Ibukina bwa tarin Iareta e korakora ana onimaki, e noora tabonibain te Uea. Bon aekan taraan tabonibain te aomata.
Ngkanne te Uea e kaotia nakon tarin Iareta.
E taku Iesu nakoia aomata aika a kakoaua a na reke irouiia te maiu are akea tokina.
Iesu e reireina ao ni kaoti nakon tarin Iareta bwaai aika mwaiti. Iesu e tuangnga bwa e na korei bwaai ake e a tia n noori ao n ongo.
Tarin Iareta e uoti rikaki atibu man te maunga. E katukui atiibu n tatabeua i tabon taian bwaati. A kaotai nanon taian bwaati.
A rinnako tenaan Iaretaite inanon taian bwaati ma aia man ao amwarake. Te Uea e karaoa te ang ae korakora ni ukiia nako taian bwaati ni kaineta te aba ni berita.
E kamanoia te Uea i taari inanon te buaka. A kaaitaua te Uea ao n anene ni karaoiroia.
Imwin 344 te bong i aon te ran, taian bwaati a roko i mataniwin biken te aba n te aba ni berita.
Ngke a otinako tenaan Iaretaite man taian bwaati, a katorobubua ao a tang ni kukurei.
Tenaan Iaretaite a katei mweenga ao ni uniki aroka n te aba ni berita. A reireiniia aia ataei ni kakauongo nakon te Uea ao n ongeaba n ana taeka.