Mwakoro 41
Taian Kanikina Ni Bungiakin Kristo
Nibwaai, natin Ereman te mwane, e anga rekooti aika tabu ao koroboki aika tabu nakon natina te mwane, Nibwaai.
Taian Nibwaite a noori kanikina ao kamiimi are a taku burabeti bwa a na riki imwain bungiakin Iesu.
Ma tabeman tenaan Nibwaite a taku bwa e a bwakanako te tai ibukin bungiakin Iesu. A kaenaenaia koraki ake a bon tiku ni kakoaua ana taetae ni burabeti Tamuera.
Aomata ake a kakoaua Iesu Kristo ao irouia burabeti a nanokawaki n iangoia bwa tao a na iai te bwai are e na aki kakoroa bukin te taetae ni burabeti.
Aomata a taratara ma te onimaki ibukin te tairiki ae akea te roo iai, bwa bon anne te kanikina ae na bungiaki Iesu Kristo iai.
Te koraki ake a aki kakoaua Iesu Kristo a rinea te bong are a na tiringiia taan kakoaua ngkana e aki riki te kanikina.
Nibwaai e nanokawaki ibukin buakakaia te koraki ake a aki kakoaua iroun te Tia Kamaiu.
Nibwaai e tataro ni kabongnga ibukiia aomata ake a na kamateaki.
Te Uea e karaua nanon Nibwaai ao e tuangnga bwa e na aki roo n te tairiki anne. E na bungiaki Iesu n te bong are imwiina i Betereem.
N te tairiki anne e bung taai, ma e aki roo. Te kanikina ibukin bungiakin Iesu Kristo e a roko. A miimi aomata.
Te koraki ake a tia ni baireia bwa a na tiringiia taan kakoaua a bwaka ao a tara ni mate.
A maaku ibukina bwa a tia ni buakaka. Ngkai a ataia bwa te Tia Kamaiu e na bungiaki ao e koaua are a taku burabeti.
E tiku n oota n te tairiki anne. Ngke e a waerake taai n te bong are imwiina, a ataia aomata bwa Iesu Kristo e bungiaki n te bong anne. E kakoroaki bukin taetae ni burabeti.
Te itoi ae boou e kaoti i karawa, n aron are a taekinna burabeti bwa e na riki.
Tatan e kataia ni karekeia aomata bwa a na aki kakoauai kanikina ake a noori, ma a mwaiti aika kakoaua.
Nibwaai ao taan kairiri tabeman n te Ekaretia a bwabetitoiia ake a kakoauaa ao n rairinanoia.
Iai te kakukurei n te aba ibukin aia taeka burabeti ae kakoroaki bukina. Iesu Kristo e a tia ni bungiaki.