Mwakoro 38
Tiringan te Mataniwi n tia Moti
Mwaane ake a buakaka a riki bwa taani moti iaoia Nibwaite. A katuaeiia aomata aika raoiroi ma aki katuaeiia aomata ake a buakaka.
Nibwaai e rangi n nanokawaki n nooran mwaitin te buakaka ibuakoia aomata.
N tebongina e tataro iaon te taua inanon ana o n aroka. Ana o n aroka e mena irarikin te kawai are abwabwaki are e kaeti nakon te tabo ni mwaakete inanon Taraemera.
Aomata ake a nakonako n te kawai are e abwabwaki a ongo ae e tataro Nibwaai. A ikotaki te kurubu ae bubura, ni warenako aia iango bwa bukin tera e a bon nanokawaki.
Ngke e nooria aomata Nibwaai, e tuangiia bwa e nanokawaki ibukin buakakaia. E tuangiia bwa a na rairinanoia.
E kauringiia bwa ngkana aki rairinanoia, aia kairiribai a na anai mweengaia ao aia kaawa ao te Uea e na aki buokiia ni buakaniia aia kairiribai.
Nibwaai e taku bwa tenaan Nibwaite a riao buakakaia riki nakoia Reimwanaite ibukina bwa Nibwaite a kaman reireiaki te tua ma aki ongotaeka nako iai.
E taku bwa ngkana Nibwaite aki rairinanoia, a na bon kamaunaaki.
Tabeman taan moti aika buakaka a mena ikekei. A tangiria aomata ni katuaea Nibwaai ibukin taetaena ni kaaitaraiia ma aia tua.
Tabeman aomata a boraoi ma taani moti aika buakaka. Tabeman a kakoaua Nibwaai; ataia ae ngaia te burabeti ao e taekina te koaua.
Nibwaai e tuangiia aomata bwa a tia ni kaaitara te Atua ao a na waekoa ni katuaeaki ngkana aki rairinanoia.
Nibwaai e tuangiia aomata bwa a na nako ni kakaea aia mataniwi n tia moti. E na wene iaon oin raraana, bwa e tiringaki iroun tarina are e tangira te nakoa anne.
Niman mwaane mai buakoia te koraki a biri n noora te mataniwi n tia moti. Aki kakoaua bwa Nibwaai bon ana burabeti te Atua.
Ngke a noora Titioram, ae mataniwiia taan moti, bwa e wene iaon raraana, a bwaka nako aontano ni maaku. Ngkai a ataia ae Nibwaai bon te burabeti.
Ana toro Titioram a kaman kunea mataniwiia taan moti ao a biri n tuangiia aomata. A oki ao a kuneiia niman mwaane ni wene ikekei.
Aomata a taku bwa niman mwaane a tia n tiringa Titioram.
A karenakoiia mwaane ake niman inanon te karabuuti ao imwina a kanakoa te taeka rinanon te kaawa bwa mataniwiia taan moti e a tia n tiringaki ao taan tiritiri a karinaki n te karabuuti.
N te bong are imwina aomata a nakon te tabo are e na taunaki iai mataniwiia taan moti. Taan moti ake a mena ngkoa n ana o n aroka Nibwaai a titiraki bwa a mena iaa mwaane ake niman.
Taan moti a bubuti bwa a kan nooriia taan tiritiri ake a bukinaki.
Taan tiritiri ake a bukinaki bon mwaane ake a biri man ana o n aroka Nibwaa nakon mataniwiia taan moti.
Mwaane ake niman a taku bwa a kunea mataniwiia taan moti ni wene inanon raraana, n aron are e a tia n taku Nibwaai. Ngkanne taan moti a bukina Nibwaai bwa e a tia ni kanakoa temanna bwa e na tiringa Titioram.
Ataakina bwa Nibwaai bon te burabeti, mwaane ake niman a kauntaeka ma te tia moti, ma aki kan ongo. A tua bwa e na kabaeaki Nibwaai.
Te tia moti e na angan Nibwaai te mwane ao maiuna ngkana e na taekinna bwa e karaoa te boraraoi ibukin tiringan mataniwiia taan moti.
Nibwaai e tuangiia taan moti bwa a na rairinanoia man aia buakaka. Ngkanne e tuangiia bwa a na nako nakon Tiantam, tarin Titioram.
Nibwaai e tuangiia bwa a na titirakina Tiantam ngkana e bon boraraoi ma Nibwaai bwa e na tiringa Titioram. Nibwaai e taku bwa Tiantam e na kangai “I aki.”
Ngkanne taan moti a na titirakina Tiantam ngkana e bon tiringa tarina. Tiantam e na manga atonga “I aki,” ma taan moti a na kunea te rara iaon rabin ana kunnikai.
Nibwaai e taku bwa e na ruru Tiantam ao e na mairake ao n tokina e na kaotia bwa e bon tiringa tarina.
Taan moti a nakon ana auti Tiantam, ao bwaai ni kabane are e taekinna Nibwaai a riki. Nibwaai ao mwaane ake niman a kainaomataaki.
Ngke a bane n nako aomata mai irarikin Nibwaai, tabeman a taku bwa bon te burabeti; tabeman a taku bwa te atua. Nibwaai e okira mweengana, e teimatoa n nanokawaki ibukin buakakaia.