Mwakoro 20

Aramwa ao Neooa

Imwain maten te Uea ae Motiaea, tenaan Nibwaite a rinea te tia moti ae e na kairiia. Aramwa te Ataei e moa n riki bwa te mataniwi n tia moti. Boni ngaia naba te tia kaira te Ekaretia.

Motiaea 29:41–42

Te mwaane ae bubura, ae aintoa ae arana Neooa e a moana reireian taian kewe. E taku bwa aomata ni kabane a na kamaiuaki ngkana tao a raoiroi ke a buakaka. A mwaiti aomata aika kakoaua Neooa.

Aramwa 1:2–5

Neooa e kabwarabwara ni kaaitara ana Ekaretia te Atua, ma te mwaane ae raoiroi ae arana Kiteon e kaitara. Neooa e kauntaeka ma Kiteon, ma Kiteon e taetae ma ana taeka te Atua.

Aramwa 1:7–8

Neooa e rikirake unna ao e a anaa ana kabaang ao e tiringa Kiteon.

Aramwa 1:9

Neooa e kairaki nakon Aramwa bwa e na motikaki taekana. Neooa e kamanoa n akea kubana.

Aramwa 1:10–11

Ma Aramwa e taku bwa Neooa e bon bure ibukina e a tia n reireiniia aomata bwa a riki ni buakaka ao e tiringa Kiteon.

Aramwa 1:12–13

Aramwa e taku bwa Neoo e na katuaeaki ibukin tiringan Kiteon. Ni kaineti nakon te tua, Neooa e riai ni mate.

Aramwa 1:14

Neooa e kairaki nakon te tabuki ae kaan ao e tiringaki. Imwain matena ao e taekinna bwa bwaai ni kabane ake e taekin a bure. Ma a mwaiti aomata aika teimatoa ni kakoaua ana reirei Neooa aika buakaka.

Aramwa 1:15–16

Aomata aika a tangira te kaubwai ao aki ongotaeka n ana tua te Atua. A bainingareiia membwa n te Ekaretia ao a kauntaeka ao a un ma ngaiia.

Aramwa 1:16, 19–20, 22

Aomata aika a raoiroi a reitinako n ongotaeka n te tua ao aki ngurengure e ngae ngke taan ririmwin Neooa a kamarakiia.

Aramwa 1:25

Membwa n te Ekaretia a tibwai bwaai ni kabane ake iai irouia ma naake a kainnano, ao a tabeakiniia aoraki. A ongotaeka n tuua, ao te Atua e kakabwaiaia.

Aramwa 1:27, 31