Te Aine, E Aera Ko Tang? iroun Mark R. Pugh

Turai 27–Aokati 2

Aramwa 39–42

“Te Babaire ni Kakukuri ae Korakora”

N am tai ni kamatebwaia Aramwa 39–42, ma te tataro, bairei mwakuri ni kauring ni buokia ataei bwa a reiakinaki. Ko kona ni karekei iango ibuakon mwakuri ni kauring aikai ake a kona ni kangaraoaki a aia roro ataei.

Korei Am Namakin

Kaoa te Tibwatibwa

Kaoiia ataei ni kabane bwa a na teirake man tibwaua te bwai teuana iaon taekan te euangkerio ae e a tibwa reiakinna teuanne ke neienne n te mweenga ke n te taromauri.

Reirei te Reirei: Ataei aika a Uarereke

Aramwa 39:1, 10–11

I kona n riki bwa te banna ae raoiroi.

Aramwa e kaungaa Korianton bwa e na reireinna man bannaia tarina aika raoiroi ao e kauringa Korianton bwa e na aki riki bwa te banna ae aki raoiroi ibukiia tabeman.

Waaki ni Kakukurei aika a Kona ni Karaoaki

• Kamatata bwa Tiburon ao Korianton bon taari ao bwa Tiburon bon te banna ae raoiroi ibukin Korianton. Kaoiia ataei bwa a na kaokioka te titiraki aei ma ngkoe: “E a tia ni katea te banna ae raoiroi ibukim?” (Aramwa 39:1). Tuangiia ataei bwa a na maroroakina temanna are e riki bwa te banna ni katoto ibukia.

• Karaoa te takakaro ke anenea te kuna ike ataei a iririko ke ni katotongko, n aron “Do as I’m Doing” (Aia Boki n Anene Ataei, 276). Anganiia ataei bwa a ikaruoruo n riki bwa te tia kairiiri ke te banna ni katoto. Titirakinia ataei bwa a na kanga n riki bwa te banna ae raoiroi nakon temanna.

• Kaoti tamnein Iesu ngke e karaoi bwaai aika a raoiroi, ao kamatata bwa Ngaia bon ara katoto ae kororaoi. Kamatata bwa ti kona n riki bwa banna aika raoiroi, n aron Iesu. Kaoiia ataei bwa a na korei tamneia ngke a riki iai bwa banna aika raoiroi.

Aramwa 39:9, 13

Tamara are i Karawa ao Iesu Kristo a kona ni buokai ni kaeta au kairua.

E ngae ngke ataei aika a uarererek a aki kainnanoa te rairannano, tuangakia taekan Korianton e kona ni buokia ni moantai n matata bwa tera nanon te rairannano.

Waaki ni Kakukurei aika a Kona ni Karaoaki

• N aki kabwarabwara raoi bwa tera ana bure, kamatata bwa Korianton e karaoa te rinerine ae kairua. Tera ae a kona n taekinna ni buokia? Wareka nakoia ataei are e taekinna Aramwa, are taman Korianton, nakoina: “Ko riai n raira nanom man mwanuokin am bure nako” (Aramwa 39:9). Tuangiia bwa “rairannano” nanona bwa ti bubutia Tamara are i Karawa ao Iesu Kristo bwa a na kabwarai ara bure ao ni buokira ni kaeti ara kairua ao bwa ti kataia n riki n ai Aroia.

• Angan te ataei te bwai ae rawawata bwa e na taua inanon am tai ni karakina karakin temanna ae karaoa ae kairua ao n namakina te nanokawaki. Tuangiia ataei bwa te bwai arei titebo ma namakin aika aki raoiroi ake tao iai iroura ngkana ti karaoa te kairua. Anaa te bwai are e rawawata mai iroun te ataei ao kaota am koaua bwa Tamara are i Karawa ao Iesu Kristo a kona ni buokira ni kanakoi namakin aika rawawata, man aki raoiroi ngkana ti rairannano. Bootaki n anenea te kuna ae reirei taekan te rairannano, n aron “Repentance”(Aia Boki n Anene Ataei, 98).

Aramwa 40:23

N na manga uti.

Buokia ataei bwa a na kaingaa te bong are ngaia ma naake a tangiriia a na manga uti.

Waaki ni Kakukurei aika a Kona ni Karaoaki

• N am tai ni kabaibati ni wareka Aramwa 40:23 , anganiia ataei bwa a kabongana te iteraniba ibukin te waaki ni kakukurei n te wiiki aei ni buokia ni katamnei bwa tera ae e reirei te kibu aei. Kaoa temanna te ataei bwa e na kabongana te iteraniba ibukin te waaki ni kakukurei n reireina te ataei naba temanna bwa tera te mangauti.

• Kaota tamnein te Tia Kamaiu ngke e uti, ao reireinia ataei te kuna ae reirei taekan te Mangauti, n aron “Did Jesus Really Live Again?” ke “He Is Risen” (Aia Boki n Anene Ataei, 64; Anene n Taromauri, nambwa. 199). Tei tabeua te tai ni kamatatai nanon ao kakawakin taeka ma mwakoro n taeka.

• Titirakinia ataei ngkana iai ae a kina ae e a tibwa mate. Kaota am koaua bwa n te bong teuana ao te aomata anne ao aomata ni kabane a na bane ni mangauti ibukin are e karaoi Iesu Kristo. Ngkana e kainnanoaki, kabongana te iteraniba ibukin te waaki ni kakukurei ni kamatata bwa tera ae nanonaki n te mangauti.

  

  Maria ao Te Uea are E a Uti, iroun Harry Anderson

Reirei te Reirei: Ataei aika a Ikawai

Aramwa 39:1, 10–11

I kona n riki bwa te banna ae raoiroi.

Ana reirei Aramwa nakon Korianton e kona ni buokia ni kamatataia ataei ni kakawakin iriiran ao te riki bwa banna aika raoiroi.

Waaki ni Kakukurei aika a Kona ni Karaoaki

• Kamatata bwa natin Aramwa ae te mwaane e karaoa te bure ae korakora ngke e riai n tataekina te euangkerio. Wareka kabanean mwakoron Aramwa 39:11 ma ataei, ao tuangiia bwa a na kakaungo bwa e kanga ana bure Korianton n rootia Tioromwaite. Buokia ataei ni iangoia aomata ake a rootaki man aia mwakuri. A na kanga n riki bwa banna aika raoiroi ibukia aomata aikai?

• Bootaki wareka Aramwa 39:1. E kanga tarin Korianton are Tiburon n riki bwa te banna ae raoiroi? Tuangiia ataei bwa a na kakaei riki reken te titiraki aei n Aramwa 38:2–4. Tuangiia tabeua katoto aika raoiroi man maium, ao kaoiia ataei bwa a na karaoa naba anne. Kaota te witeo ae “Lessons I Learned as a Boy” (ChurchofJesusChrist.org), ao tuangiia ataei bwa e kanga n riki te mwaane are e ikawai bwa te banna ae raoiroi.

• Uota te tooti ke tamnein taai, ao kabotaua te oota nakon korakoran te banna ae raoiraoi. N aron te oota man te tooti ke taai ae kona ni buokira n nora te kawai are ti kainnanoia bwa ti na iria, te banna ae raoiroi e kona ni kaota nakoia baike ti na karaoi bwa ti aonga n iriira Tamara are i Karawa. Tibwaua te bwai ae ko a tia n rinanona ike ana katoto temanna e buokiko. Tera ae a kona ni karaoia ataei n riki bwa te banna ae raoiroi nakoia tabeman? Kaota am koaua bwa Iesu Kristo bon ara banna ae kororaoi.

Aramwa 39:9–13

I kona n rairannano ngkana I karaoi kairua.

N arora ngaira ni bane, ataei ake ko reireinia a bure man karaoi kairua. Ko na kanga ni kaungaia bwa a na “mwanuokin [aia] bure” man rairannano? (Aramwa 39:9).

Waaki ni Kakukurei aika a Kona ni Karaoaki

• Tuangiia ataei bwa a na tibwaua te bwai ae a tia n rinanona ike a ikoaki iai. Tera ae a karaoia ni buoka kamaoan ikoakia? Kamatata bwa te bure e kaikoaki tamneira, ma te Tia Kamaiu e kona ni kamaoi ngkana ti rairannano.

• Tuangiia ataei bwa a na kaokioka te mwakoro n taeka ae “raira nanom ao mwanuokin am bure” n Aramwa 39:9, ao buokia bwa a na matata bwa tera “raira nanom” ao “mwanuokin”. Kaota am koaua bwa e roko te rairannano rinanon Iesu Kristo ma Ana Mwakuri ni Kamaiu. Bootaki wareka Aramwa 39:10–14 ni kakaei tabeua bwaai aika ti kona ni karaoi aika a na buokira n raira nanora man totokoa te bure.

Aramwa 40:6–7, 11–14, 21–23

Imwin te mate, tamneira e nakon te aba n tamnei ni karokoa te Mangauti ao te Motikitaeka.

E bon ririki ae ti na titiraki bwa tera ae e na riki nakoira imwin te mate. Ana taeka Aramwa e kona ni buokia atae ni karekei kaeka mai ieta.

Waaki ni Kakukurei aika a Kona ni Karaoaki

• Korea te mate, te aba n tamnei, te mangauti, ao te motikitaeka iaon mwakoro ni beeba, ao kamenai iaon te burakibooti n aki karinani. Buokia ataei bwa a na matata n nanon taeka aikai. Wareka Aramwa 40:6–7, 11–14, ao 21–23 ma ataei, ao tuangiia bwa a na korei taeka iaon te burakibooti n te rinan are a riki iai.

• Korei titiraki iaon te burakibooti aika kona ni kaekaaki man Aramwa 40:6–7, 11–14, ao 21–23, ao kaoiia ataei bwa a na katoatoai titiraki ma kiibu ake kaekaia. Te katoto, “Aekakira rabwatau ngkana I a manga uti?” e kona ni kaekaki n Aramwa 40:23. Ngkana e riai, kamatatai taeka aika kaangaanga nakoia ataei n aia tai ni wareware. Kaugaia ataei bwa a na tibwauaia bwa bukin tera a karabwarabwa ibukin ana babaire Tamara are i Karawa.

Kaungaa te Kamatebwai n te Mweenga

Kaungaia ataei bwa a na karabwa kaain aia utu are e ati n riki bwa te banna ae raoiroi nakoia ao n iangoa teuana te kawai are a kona iai n riki bwa te banna ae raoiroi n te wiki aei.

Kanakoraoan Ara Anga reirei

Kairekerekei ara namakin ake ti kabonganai. “Angiia ataei (ao ikawai) e bati ae a reiakinna ngkana a kaairaki taian namakin ake a kabonganaaki. Kakaei kawai ni buokiia ataei ni kabonganai aia namakin n aron aia taratara, kakauongo, ao namakin n aia tai ni reirei” (Anga reirei n ana kawai te Tia Kamaiu, 25).