“Aokati 24–30. Ereman 7–12: ‘Uringa te Uea,’” Nakomai, Iriirai—Ibukin te Moanrinan: Ana Boki Moomon 2020 (2020)
“Aokati 24–30. Ereman 7–12,” Nakomai, Iriirai—Ibukin te Moanrinan 2020
Kamatataan tamnein Nibwaai inanon ana onaroka ae te taua iroun Jerry Thompson
Aokati 24–30
Ereman 7–12
“Uringa te Uea”
Ngkai ko wareka Ereman 7–12, iangoia bwa a kanga karaki ao reirei n te mwakoro aei ni kona ni kakabwaiaia ataei ake ko reireiniia. Te iango iaon te kabwarabwara aei e kona n riki bwa te bwai n ibuobuoki ni kaunganano are ko karekei.
Korei Am Namakin
Kaoa te Tibwatibwa
Titirakiniia ataei te bwai ae a ataia iroun te burabeti are Nibwaai, natin Ereman (taraa Ereman 7–12). Ngkana e riai, kabwarabwara te kaokoro imarenan te burabeti ae arana Nibwaai ao te burabeti ae arana Nibwaai ni moan ana Boki Moomon.
Reirei te Reirei: Ataei aika a Uarereke
Te Uea e tangirai bwa N na uringnga.
Nibwaai e mimi bwa a kanga ana aomata n rairakinako mairoun te Atua ao ni mwaninga taekana. Ko na kanga ni buokiia ataei n reiakin kawai ake a kona iai n uringa Tamara are i Karawa ao Iesu?
Waaki ni Kakukurei aika a Kona ni Karaoaki
-
Tibwaia ma ataei bwaai are ko rinanona ngkai ko mwaninga te bwai ae kakaawaki. Titirakiniia ngkana a tia ni mwaninga te bwai teuana. Wareka nakoia Ereman 7:20, ao kabwarabwara bwa Nibwaite a tia n rineia bwa a na mwaninga taekan te Atua. Te burabeti Nibwaai e tangiriia bwa a na uringa te Atua. Uoti tamnei inanon te baeki are e tei ibukin te kawai are a na kona iai ataei n uringa Tamara arei Karawa ao Iesu. Anganiia ataei bwa a na kakaibibiti n rinea te tamnei ao n tibwaia bwa ti kanga n uringa te Atua ni katoa bong.
-
Buokiia ataei bwa a na katiai iteranibaan te waaki n te wiiki aei.
Burabeti a kakoaua ibukin Iesu Kristo.
Nibwaai e kakoaua bwa Iesu Kristo e na roko, ao kaoiia ana aomata bwa a na rairinanoia ao n Iriiria. Kabonganai mwakoro aikai n reireiniia ataei bwa burabeti a kakoaua Iesu Kristo.
Waaki ni Kakukurei aika a Kona ni Karaoaki
-
Kaota tamnein Iesu Kristo, ao tuangiia ataei bwa burabeti n aron Nibwaai e kaoiia bwa a na iriira Iesu. Wareki taeka aikai n taekaia burabeti man Ereman 8:22: “a tia ni kakoaua n rokon Kristo, ao a tia n ingainga, ao ni kimwareirei n ana bong.” Tibwaia ma ataei te bwai are e a tia n taekinna te burabeti ae maiu ibukin te Tia Kamaiu.
-
Ikotaki anenea te anene ibukin te burabeti, n aron “Follow the Prophet” (Aia Boki n Anene Ataei, 110). Anai kibuntaeka aika kakaawaki man te anene, ao korea te taeka teuana man te kibuntaeka ni katoai beeba ake iai mwaneka iai. Kawenei mwaneka iaon te timanti are e kaineti nakon tamnein te Tia Kamaiu. Kaoiia ataei bwa a na iriira te mwaneka, ao buokiia ni wareki taeka.
N na ongotaeka iroun Tamara are i Karawa.
Ana banna ni katoto Nibwaai e kona ni kaungaia ataei ngkai ko reireiniia bwa a na ongotaeka iroun te Uea.
Waaki ni Kakukurei aika a Kona ni Karaoaki
-
Wareka Ereman 10:2, 11–12, ao buokiia ataei bwa a na ataia bwa Nibwaai e ongotaeka nakon te Atua. Kaoiia ataei bwa a na karaoa are e karaoia Nibwaai. Te katoto, tuangiia bwa a na nakonako ni kaineta iteran te ruu (n aron are a okira mweengagia), tei, rairaki, ao nakonako ni kaineta iteran te ruu (kaanga angkoa a oki n reireiniia aomata). Buokiia n noora te bwai are e tangiria Nibwaai bwa a na ongotaeka iroun te Uea riki e ngae ngke iai te bwai ae a na karaoia ae kaangaanga.
-
Buokiia ataei bwa a na ota bwa n tabetai Tamara arei Karawa e tangiriira bwa tina karaoa te bwai teuana ae kaokoro man te bwai are ti tangiria ni karaoia, ma ti kona n ongotaeka irouna n aron are e karaoia Nibwaai. Tibwai taeka n aron “N tabetai I tangiria n un, ma Tamau are i Karawa e tangirai bwa N na … ,” ao anganiia ataei bwa a na kabanea taekana n taekinna. Kaungaia ataei bwa a na uringnga n tei ao n iangoa te bwai are e tangiria Tamara arei Karawa bwa a na karaoi ao ngkanne a karaoia.
Reirei te Reirei: Ataei aika a Ikawai
N na bon mano n te maiu n tamnei ngkai I iriira te burabeti.
Beretitenti James E. Faust e reirei: “Kamanoara e mena inanon iriirakin te bwai are e taekinna [te Beretitenti n te Ekaretia] ao n iriiri ana reirei.” (“Continuous Revelation,” Ensign, Nobembwa. 1989, 10).
Waaki ni Kakukurei aika a Kona ni Karaoaki
-
Kaoiia ataei bwa a na karaoi te rinan iaon te burakibooti iaon bwaai ake e karaoi te burabeti (taraa“Prophet,” Guide to the Scriptures, scriptures.ChurchofJesusChrist.org). Buokiia ni kakaea Ereman 7:1–2, 27–29; 8:22–23; ao 10:3–4, 6–7 n nooria bwa e kanga Nibwaai ni karaoi tabeua bwaai man aia rinan. Nningai ae ti a tia iai n noora ara burabeti n te bong aei ni karaoi bwaai aikai? Kaota am kakoaua ibukin te burabeti ae maiu. Ni kabwarabwara aron kakaawakiia burabeti, kaota te moan miniti n te witeo “Watchman on the Tower” (ChurchofJesusChrist.org).
-
Ikotaki wareka Ereman 11:3–7 (ke rinanon “Mwakoro 39: Nibwaai E Karekea te Mwaaka ae Korakora,” Karaki man Ana Boki Moomon, 108–10, ke te witeo are e irekereke ma ngaia iaon ChurchofJesusChrist.org). Tuangiia ataei bwa a na kakauongo nakon te bwai are riki nakoia aomata ake aki kakauongo nakon te burabeti. Tera ae e kona n riki ngkana ti aki kakauongo nakon te burabeti? Ti kanga ni kakabwaiaaki ngkana ti iriiria? Tibwa te bwai are e a tia n reirei iai ara burabeti, ao kaungaia ataei bwa a na iriira ana reirei.
E tangirai te Uea bwa N na uringnga.
Ataei ake ko reireiniia a na kaitarai kariiri ake a kona ni mwaninga iai taekan Tamara are i Karawa ao Iesu Kristo. Ko na kanga ni kaungaia ataei bwa a na kabanea aia tai ni bwain te maiu n tamnei?
Waaki ni Kakukurei aika a Kona ni Karaoaki
-
Ikotaki wareka Ereman 7:20–21, ao titirakiniia ataei bwa tera n aia iango ae nanonaki ni mwaninga te Atua. Kabwarabwara bwa te taeka mwaninga e kona naba n nanonaki “ni bakaineia” ke “katinanikua.” Katoka tamnein te Tia Kamaiu, ao kaoiia ataei bwa a na korea te bwai are a kona ni kabanea aia tai iaona are a kona ni mwaninga iai taekan te Uea. Katuka aia tamnei i matan tamnein Iesu. Tuangiia ataei bwa a na iangoi bwaai ake a kona ni karaoi ni katoabong bwa a na uringa iai Tamara arei Karawa ao Iesu. Ngkai a tibwai aia iango, anai tamnei teuana imwiin teuana ni karokoa e kaoti tamnein te Tia Kamaiu.
-
Buokiia ataei bwa a na katiaa te iteraniba ibukin te waaki ni kakukurei ibukn te wiiki aei.
Ngkana I iangoa ana taeka te Atua, I kona ni karekei kaotioti.
A ataia ataei ake ko reireiniia te bwai ae nanonaki n ingoia? Buokiia bwa a na ota bwa Nibwaai e kakabwaiaki man kaotioti ngkana e iangoi bwaai ake e a tia ni kaotia nakoina te Uea.
Waaki ni Kakukurei aika a Kona ni Karaoaki
-
Buokiia ataei n ota n te bwai ae nanonaki n iangoia raoi (taraa “Iangoia Raoi,” Bwai ni Kairi nakon Koroboki aika a tabu, scriptures.ChurchofJesusChrist.org). Kaoiia bwa a na iangoi taeka tabeua ake e kabwarabwara te bwai ae iangoia raoi ae nanonaki iai. Ngkanne tuangiia bwa a na wareka Ereman 10:1–3 ao onea mwiin te taeka iangoia raoi ma te taeka ae a iangoia. Tera ae riki ngke Nibwaai e iangoa koroboki aika a tabu? (taraa Ereman 10:3–7). Tibwa te tai are ko karekea iai te kaotioti imwiin iangoan raoi te boki ae tabu ke kaotioti ni boong aikai ke te bwai ae ko rinanona n te maiu n tamnei.
-
Anganiia ataei aia tai ni wareka Ereman 10, ke ikotaki warekia, ao kaungaia bwa a na kakaea te kibu are a na kona iai n iangoia inanon te wiiki ae e na roko. Kaoiia bwa a na korei kibu ake a rinei iaon te beeba ke kaati ao a katoka n te tabo are e na kauringiia iai bwa a na iangoa te kibu anne inanon wiikirake. N te kiraati n tai aika a na roko, anganiia te tai bwa a na tibwa te bwai ae a reiakinna ngkai a iangoa te kibu.
Kaungaa te Kamatebwai n te Mweenga
Kaungaia ataei bwa a na tibwaia ma aia utu te bwai are a baireia bwa a na karaoia n uringa Tamara arei Karawa ao Iesu ni katoabong. A kona naba ni kaoiia aia utu bwa a na raoniia n aia kouru.
Kanakoraoan Ara Anga reirei
Karababai kakao ake a karinei inaomata n rinerine. Ngkana ko kaoiia ataei bwa a na karaoa te bwai are koa tia n reireiniia, iangoi kawai ni karinea aia rinerine ngkana a karaoa nanon are a tia n reiakinna. Te katoto, imwiin te reirei iaon te Tia Kamaiu, ko kona n titiraki, “Tera ae kona karaoia bwa ko aonga n uringa te Tia Kamaiu n te wiki aei?”