“Aokati 31–Tebetembwa 6. Ereman 13–16: ‘Rongorongo aika a raraoi aika uota te kimwareirei ae korakora,’” Nakomai, Iriirai—Ibukin te Moanrinan: Ana Boki Moomon 2020 (2020)
“Aokati 31–Tebetembwa 6,” Nakomai, Iriirai—Ibukin te Moanrinan 2020
Tamuera are te I-Reimwanaite i aon te O, iroun Arnold Friberg
Aokati 31–Tebetembwa 6
Ereman 13–16
“Rongorongo aika a raraoi aika uota te kimwareirei ae korakora.”
Katauraoi n anga reirei man warekan Ereman 13–16 ao iangoia bwa waaki ni kakukurei raa aika a tamaroa aika e na buokiia ataei n reiakina te koaua ni mwakoro aikai.
Korei Am Namakin
Kaoa te Tibwatibwa
Kaota tamnein Tamuera are te Reimwanaite, ao kaoiia ataei bwa a na tibwa te bwai are a ataia n rongorongona. Te katoto, a kona ni maroroakina karakinan Tamuera iaon te o ke te kanikina are e taekinna bwa e na kaoti ngkana e bungiaki Iesu?
Reirei te Reirei: Ataei aika a Uarereke
Te Tamnei e kona n taetae inanora.
Ngke e tuangaki Tamuera bwa e na kabwarabwara nakoia Nibwaite, Tamara are i Karawa e buokia mai inanona n tuangnga bwaai ake e na taekin.
Waaki ni Kakukurei aika a Kona ni Karaoaki
-
Reireiniia ataei bwa ngkai ti taetae imarenara ni kabonganai taeka, te Tamnei ae Raoiroi e kona n reitaki rinanon namakin inanora. Kaoiia bwa a na katokai baia iaon buroia ni katoatai are ko wareka iai “nanou” n Ereman 13:2–5. Buokiia katamaroa mwakoro ni beeba aika aati ake a kangai, “Te Tamnei e taetae inanou.”
-
Tuangiia ataei bwa ngkana a bwabetitoaki ao ni kamatoaki, a na karekea ana bwaintituaraoi te Tamnei ae Raoiroi bwa e na buokiia n ataia bwa Tamara are i Karawa e tangiriia bwa a na karaoi ao n taekinna. Buokiia bwa a na iangoi bwaai ake e na tuangiia te Tamnei ae Raoiroi, ao buokiia bwa a na tibwa te bwai are a kona ni karaoia n iriira Ana wirikiriki.
Burabeti a reirei taekan Iesu Kristo.
Rongorongon Tamuera te Reimwanaite bon te tai ae korakora n reireiniia ataei bwa Burabeti ni kabane a reirei taekan Iesu Kristo.
Waaki ni Kakukurei aika a Kona ni Karaoaki
-
Kaota tamnein Tamuera te Reimwanaite n te kabwarabwara n te wiiki aei inanon Nakomai, Iriirai— Ibukiia Aomata n Tatabemaniia ao Utu, ao tuangiia ataei, n taeka aika a beebete, n te bwai are e rinanona n Ereman 13–16. Ko kona naba ni kabongana “Mwakoro 40: Tamuera te Reimwanaite E Karakina Rongorongon Iesu Kristo” (Karaki man Ana Boki Moomon, 111–13, ke te witeo are a irekereke ma ngaia iaon ChurchofJesusChrist.org). Anganiia ataei bwa a na tibwai aia atatai n rongorongon Tamuera te Reimwanaite.
-
Ikotaki anenea “Samuel Tells of the Baby Jesus” ke te ka-itiua ni kibu n “Book of Mormon Stories” (Aia Boki n Anene Ataei, 36, 118–19). Tibwa te bwai ae ko mataiakinna iroun Tamuera, ao anganiia ataei bwa a na tibwa te bwai are a tatangiria n ana karaki.
-
Karabai tamnei inanona te ruu ake a tei ibukin te kanikina are Tamuera e taetae iai ni burabeti n Ereman 14:2–7 ao 20–25. Wareki kibu ake a kabwarabwa teuana man kanikina, ao tuangiia ataei bwa a na kakaea tamnein te kaninkina anne. Kabwarabwara bwa kanikina aikai a buokiia Nibwaite n ata iai taekan Iesu Kristo. Kaota am koaua, n aron Tamuera, are burabeti ni kabane a kakoaua iroun Iesu Kristo.
Te burabeti e kairiira nakon Iesu Kristo.
I kakabwaiaaki ngkana I iriira te burabeti.
Tamara are i Karawa e a tia n anganiira ara burabeti bwa buokara n ata Ana kantaninga ao n iriira Ana baire. Ti kakabwaiaki ngkai ti ongo n aia taeka burabeti ao ti karaoa nanona.
Waaki ni Kakukurei aika a Kona ni Karaoaki
-
Buokiia ataei ni katea te o ae uarereke ma buraoki ni kai ke ni boki. Ni kabonganaan te bwai n takakaro ae uarereke ke te taore are e tei ibukin Tamuera, anganiia ataei bwa a na ononomwi ni buoka “Tamuera” n tamwarakea te o bwa e na reireiniia aomata taekan Iesu Kristo. (Taraa naba te iteraniba ibukin waaki ni kakukurei n te wiiki aei.) Tibwai kibuntaeka man Ereman 16:1 ao 5 ni kabwarabwara bwa tabeman aomata a kakoaua Tamuera ao a bwabetitoaki. Kabonganai kibuntaeka man Ereman 16:2 ao 6 ni kaotia bwa tabeman aki kakoaua ao a un ma Tamuera. Kaota am koaua bwa aomata ake a iriira te burabeti a kakabwaiaki.
-
Katea tamnein te Tia Kamaiu, ao tuanga te ataei bwa e na tei ibukin te burabeti ao ni kairiia ataei ake tabeman ni katobibia te ruu ngkai a anenei tabeua kiibu man “Follow the Prophet” (Aia Boki n Anene Ataei, 110–11) ke te kuna teuana ae taekaia burabeti. Ngkanne tuanga te ataei are e tei ibukin te burabeti bwa e na kairiia ataei nakon tamnein te Tia Kamaiu. Kaota am koaua bwa ngkana ko iriira te burabeti, e na kairiira nakon Iesu Kristo. Tibwai bwaai tabeua ake e a tibwa tia n reireiniira ara burabeti n taekan Iesu. Ti na kanga n iriira ana reirei?
Reirei te Reirei: Ataei aika a Ikawai
Te Tamnei e kona n taetae inanora.
N te bong teuana, ataei ake ko reireiniia a na riai n ataia bwa te bwai are e karaoia Tamuera: e tibwa te rongorongo are e katikua inanona te Uea.
Waaki ni Kakukurei aika a Kona ni Karaoaki
-
Kaota tamnein Tamuera te Reimwanaite (n aron are n Nakomai, Iriirai—Ibukiia Aomata n Tatabemaniia ao Utu), ao titirakiniia ataei bwa e kanga Tamuera n ata te bwai ae e na taekinna ngke e kabwarabwara man oon te kaawa. Kaoiia bwa a na kakae n Ereman 13:2–4 ibukin te kaeka. Karakina te tai are e buokiko iai te Tamnei ae Raoiroi n ataia inanom te bwai are e tangiria te Atua bwa ko na karaoi ke n taekinna. Kaoiia ataei bwa a na tibwaua te bwai ae a rinanona ae aekakin are ko a tia n rinanona.
-
Kaota tamnein te burabeti ae maiu n taetae n te maungatabu ni kabuta. Tuangiia ataei bwa te Atua e tuanga te burabeti te bwai ae e na taekinna, n aron are e tuanga Tamuera bwa e na taekinna nakoia Nibwaite. Ikotaki maroroakin bwaai ake e taekin te burabeti ake a tia ni kaungaa nanom ke ni kaungaia ataei.
Burabeti a reirei taekan Iesu Kristo.
Oin te kantaninga n ana rongorongo Tamuera bwa e na kakoaua iroun Iesu ao ni kaopia aomata bwa a na rairi naoia ao n nako Ina. Ara burabeti n te bong aei e karaoa naba anne.
Waaki ni Kakukurei aika a Kona ni Karaoaki
-
Kaoiia iteran mwaitiia ataei bwa a na wareka Ereman 14:2–6 ao ni korei tamnein kanikinaean bungiakin Iesu. Kaoiia iteran mwaitiia ataei bwa a na wareka Ereman 14:20–28 ao ni Korea tamnein maten Iesu. Ngkanne tuangiia kurubu nako bwa a na tibwa te bwai are a koreia. Ikotaki wareka Ereman 14:11–12, ao tuangiia ataei bwa a na kakauongo nakon bwa bukin tera Tamuera e taetae ni burabeti ibukin kanikina aikai. Ti kanga n reiakina taekan Iesu Kristo n te bong aei?
-
Kabwarabwara bwa n aron are e reirei iai Tamuera te Reimwanaite n taekan Iesu Kristo, burabeti aika a maiu a karaoa naba anne ni boong aikai. Tibwa te marooro man te maungatabu are tibwa taekinaki are e taetae iai te burabeti ae maiu ni kakoaua Kristo. Tuangiia ataei bwa a na tibwa te bwai are e a tia n reireiniia te burabeti ibukin Iesu Kristo.
I kakabwaiaaki ngkana I iriira te burabeti.
Tamara are i Karawa e a tia n anganiira te burabeti bwa e na buokiira n ata Ana kantaninga ao n iriira Ana baire. Ti kakabwaiaki ngkai ti kakauongo ao n ongotaeka nakon aia taeka burabeti.
Waaki ni Kakukurei aika a Kona ni Karaoaki
-
Warekia ni kabaibati Ereman 16:1 ao 5, ao tuangiia ataei bwa a na teiraki ngkana a ongo te bwai are a karaoia aomata ngke a kakoaua ana taeka Tamuera. Ngkanne wareki kiibu 2 ao 6, ao tuangiia ataei bwa a na tekateka ngkana a ongo te bwai are a karaoia aomata ngkana aki kakoaua. Ti na kanga ni kaotia bwa ti kakoaua ana taeka te burabeti ae maiu?
-
Kaota tamnein te burabeti ae maiu, ao tuangiia ataei bwa a na taekina rongorongona ae a ataia. Tibwaia bwa ko kanga ni kataia n iriira ana reirei ao e kanga ni kakabwaiako ngke ko karaoia.
Kaungaa te Kamatebwai n te Mweenga
Kaoiia ataei bwa a na reiakina te bwai are e a tia n taekinna te burabeti ao n tibwaia ma te kiraati n te wiiki ae e na roko.
Kanakoraoan Ara Anga reirei
Kaungaia ataei bwa a na titiraki. “Kataia nooria bwa aia titiraki [ataei] bon te tibwanga, tiaki te kakeru ke te kamangaongao nakon am reirei. … Titiraki akanne a na anganiko iango aika kakaawaki n te bwai are a iangoia ataei, tera aia tabeaianga, ao a kanga ni kaeka nakon bwaai ake a reiakinii” (taraa naba Reirei n Ana Kawai te Tia Kamaiu, 25–26).