“Aokati 31–Tebetembwa 6. Ereman 13–16: ‘Te Rongorongo ae Raoiroi ae Moan te Kakimwareirei,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Aokati 31–Tebetembwa 6,” Nakomai, Iriirai - Ibukiia Aomata n Tatabemaniia ao Utu: 2020
Tamuera are te i Reimwanaite iaon te Oo, iroun Arnold Friberg
Aokati 31–Tebetembwa 6
Ereman 13–16
“Te Rongorongo ae Raoiroi ae Moan te Kakimwareirei”
Ngkana ko korei mwiin am namakin n te wiiki aei, iangoia bwa a kanga reirei n Ereman 13–16 n reitaki nakon ao ni kakorakorai bwaai ake tabeua aika ko a tia n reiakin inanon koroboki aika tabu.
Korei Am Namakin
Te moan tai are e kataia Tamuera te Reimwanaite n tibwaua “te rongorongo ae raoiroi” i Taraemera (Ereman 13:7), e aki butimwaeaki ao e karenakoaki irouia Nibwaite aika a matoatoa nanoia. Titebo ma a tia ni katea te oo ae matoatoa ni katobibia nanoia are e tukiia man karekean ana rongorongo Tamuera. Tamuera e ataa kakawakin te rongorongo are e na tibwauaia ao ni kaota te onimaki man irakin ana tua te Atua “bwa e na riai ni manga oki, ao n taetae ni burabeti” (Ereman 13:3). N aron are e karaoia Tamuera, ti bane ni kaitara ma te oo ngke ti “katauraoa kawain te Uea” (Ereman 14:9) ao ni kekeiaki n ira Ana burabeti. Ao n aron Tamuera, ti kaota naba ara kakoaua iroun Iesu Kristo, “ae e na bon roko,” ao e kaoiia ni kabane bwa a na “onimakina arana” (Ereman 13:6; 14:13). Ti aki ni kabane aika a na kakauongo, ao n te tai ae waekoa e na bon kaitaraira. Ma naake a kakoaua te rongorongo aei ma te onimaki iroun Kristo a na kunea bwa bon “Te Rongorongo ae Raoiroi ae Moan te Kakimwareirei” (Ereman 16:14).
Iango ibukin Am Kamatebwai I Bon Iroum ni Koroboki Aika Tabu
Te Uea e anga kauring rinanoia Ana burabeti.
Inanon koroboki aika tabu, burabeti n tabetai a kabotauaki ma uaatiman iaon te oo ke taua aika a anga kauring n taian kaangaanga (taraa Itaia 62:6; Etekiera 33:1–7).
E reirei Beretitenti M. Russell Ballard: “Rinanon tienture, a tia burabeti ni kakoroi nanon tabeia ngke a tia ni kauringiia aomata n taian kaangaanga n taai aika imwaaia. A tia ana Abotoro te Uea ni berita bwa ana tararua, kauring, ao ni buokiia naake a ukoukora kaekaan aia titiraki n te maiu” (“God Is at the Helm,” Ensign ke Riaona, Nob. 2015, 25).
Ngkana ko reirei ao n iango Ereman 13, ko kona ni mwaaken kauring aika a mwaiti aika e anga Tamuera. Te katooto, tera ae e reirei ibukin te rairannano? ibukin te nanorinano ao te marurung? A na kanga kauring aikai ni kaineti nakoiu? Tera kauring aika a tibwa tia n anganaki burabeti n taai aikai, ao tera te bwai ae ko namakinna ae ko riai ni karaoia ibukin kauring aikanne?
Te burabeti e kairiira nakon Iesu Kristo.
Te Uea e rangi n akoi nakoia aika a rairi nanoia.
N te moantai, e kanakoa Tamuera nakoia Nibwaite bwa e na tibwaua te rongorongo ae kakimwareirei n taekan okin te Tia Kamaiu (taraa Ereman 13:7). Ibukina bwa a aki butimwaia, e oki ma te kauring ae korakora n ana babaire te Atua. Ma kauring aikanne a teimatoa n irianaki ma te kakao ae nanoanga n te rairannano, ukoukori kakao aikanne ni kabuta Ereman 13–15 (taraa riki Ereman 13:6, 11; 14:15–19; 15:7–8). A kanga kakao aikai ni kaineti nakoim? Tera ae ko reiakinna man kiibu aikai ibukin te rairannano? N ningai ae ko a tia n rinanon ana nanoanga te Atua ae reke man te rairannano?
Kanikina ao kakai a kona ni kakorakora aia onimaki naake aki kamatoa nanoia.
N Ereman 14, e kabwarabwara Tamuera ibukina ngkai te Uea e katauraoi kanikinaean bungiakin ao maten te Tia Kamaiu: “Bwa e aonga ni kakoauaa arana” (Ereman 14:12). Ngkana ko kamatebwaia Ereman 14, mwannanoi kanikinaa ni bungiakin te Tia Kamaiu n kiibu 1–8 ao kanikinaa ni Matena n kiibu 20–28. Bukin tera n am iango kanikinaa aikai a riki bwa kawai aika a nakoraoi ni kakoauaan bungiakin ao maten Iesu Kristo?
Ko kona n iangoi kanikinaa aika e a tia n anga te Uea bwa e na buokiko ni koaua Irouna? Te katooto, a tia burabeti ni kaman taekin kanikinaa aika a na kaoti imwain Kauaokin te Tia Kamaiu (taraa “Kanikinaean Taai,” Kairi nakon Koroboki aika Tabu, scriptures.ChurchofJesusChrist.org). Iai mai ibuakon kanikinaa aikai aika a tia ni korobukiia n ara bong? Kanikinaa riki tabeua aika a kairiri nakon te onimaki iroun Iesu Kristo a na kona n ae bon ibukim ao n aki rangi n anainano. Anaa te tai n iangoi kawai aika ko a tia ni kakoauai Ana kairoro inanon maium.
Tera kauring ae anga ibukin kanikinaa n Ereman 16:13–23? Ko na kanga n totokoi kateia aomata aika a kabwarabwaraaki inanon kiibu aikai?
Taraa naba Aramwa 30:43–52; Ronald A. Rasband, “Iroun Divine Design,” Ensign ke Riaona, Nob. 2017, 55–57.
Imwiin ana reirei te burabeti I a kaaniaki riki nakon te Uea.
E reirei Unimwaane Neil L. Andersen: I a tia ni kunea bwa ngkana I kamatebwaia ma te tataro mwaaka ana taeka ana burabeti te Uea ao ni karaurau ma te taotaonaki n nano, ni kaeta au baire ma ana reirei, au onimaki iroun te Uea Iesu Kristo e na rikirake. Ngkana ti rineia bwa ti na aki tabeakin ana reirei ao n iangoia bwa ko ataibwai riki, ara onimaki a na kerikaki ao ara taratara ae akea tokina a na rootaki n te kaangaanga” (“Ana Burabeti te Atua,” Ensign ke Riaona, Meei 2018, 26–27). A kanga aia taeka ao aia mwakuri Nibwaite n Ereman 16 ni kamatoa te bwai ae anga reirei iaona Unimwaane Andersen? Tera am motinnano ae ko namakinna bwa ko riai ni karaoia ni kaineti ma ana burabeti te Uea ao rongorongo aikai?
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Ereman 13:3–4
Tera ae kaungaia am utu n ana kaeka Tamuera nakon te Uea n Ereman 13:3–4? N ami tai n reirei ma am utu n te wiiki aei, tao ko kona ni kaungaia kaain te utu bwa a na tibwaua aia namakin aika a “roko [mai] nanoia.”
Ereman 13:38
Te iango are e kona ni kuneaki iai te kukurei “ni karaoan te katei ae aki raoiroi” e bwainaki n ara bong. Ni kawai raa ae maiuakinan te euangkerio e uota nakoira te kukurei ni koaua?
Ereman 15:3
E kanga ana kaetieti te Atua ni kaota Ana tangira ibukira? Kaoiia kaain te utu ni bubutiia te Uea ma te nanorinano te bwai ae a kona ni karaoia bwa a aonga n nakoraoi.
Ereman 15:5–8
Tera ae ti reiakinna ibukin te rairaki mai irouia Reimwanaite aika a kabwarabwaraaki ni kiibu aikai? Ti na kanga ni irii aia banna ni katooto?
Ereman 16:1–3
A kukurei am utu ni karaoa kain te karaki ibukin Tamuera te Reimwanaite? Imwiin warekan te rongorongo, tao a kona kaain te utu n ikaruoruo n tei iaon te kaintekateka ao ni wareki tabeua ana taeka ni burabeti Tamuera ngkana kaain te utu ake tabeman a karaoa ae ao ngkoa a katii ni kainikatebe ke ni karenakoi atiibu. Aio e kona ni buokiia am utu n ataia bwa e na kanga aron aia namakin Tamuera ao Nibwaite. A kona naba ni kukurei kairake n ataei ni korea tamnein te karaki. Ti na kanga n riki n aron Tamuera ao n tibwaua te euangkerio ma tabeman n aki tabe ma maakura?
Ibukin iango riki tabeua ibukin reireinaia ataei, taraa te kamataata n te wiiki aei in Nakomai, Iriirai—Ibukin te Moanrinan.
Kanakoraoan am Kamatebwai I bon Iroum
Taratarai banna ni katooto. Te baeten bon te baire ke te bwai ni katooto ae kona ni kabonganaaki bwa te kairi ibukin kakoroan nanon te mwakuri. Inanon koroboki aika tabu, ti karekei baeten ae a kaotia bwa e kanga te Uea ni kakoroi nanon Ana mwakuri, n aron kanakoan Ana toro bwa e na kauringiia ana aomata.
© The Book of Mormon for Young Readers, Tamuera te Reimwanaite iroun Briana Shawcroft