“Tebetembwa 7–13. 3 Nibwaai 1–7: ‘Tabekarake Atuum ao Kukurei,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Tebetembwa 7–13. 3 Nibwaai 1–7,” Nakomai, Iriirai—Ibukiia Aomata n Tatabemaniia ao Utu: 2020
Teuana te Ngaina, Teuana te Tairiki, ao Teuana te Ngaina, irou Jorge Cocco
Tebetembwa 7–13
3 Nibwaai 1–7
“Tabekarake Atuum ao Kukurei”
Nibwaite a kakoauai kanikinaa aika kamimi, ma inanon te tai a mwaninga te bwai ae a tia n rinanona (taraa 3 Nibwaai 2:1). Tauan mwiin am namakin e na buokiko n uring am atatai n tamnei ngkana ko kamatebwaia 3 Nibwaai 1–7.
Korei Am Namakin
Ni kawai tabeua, bon te tai ae kamiimi n riki bwa te tia kakoaua iroun Iesu Kristo. A tia ni koro bukin taeka ni burabeti—kanikinaa aika a korakora ao kakai ibuakoia aomata e kaotia bwa e na waekoa ni bungiaki te Tia Kamaiu. N taekana teuana, bon te tai naba ae kararaoma ibukiia taan onimaki ibukina bwa, n aki tabe ma kakai ni kabane, a taekinna taan aki onimaki bwa “e a bwakanako te tai” ibukin te Tia Kamaiu bwa e na bungiaki (3 Nibwaai 1:5). Aomata aikai a karika te “te kiriwe ae korakora ni kabutaa te aba” (3 Nibwaai 1:7) ao a karea te tai are a na tiringiia taan onimaki ni kabane ngkana te kanikinaa are e taetae ni burabetiaki iroun Tamuera, te Reimwanaite—te tairiki n akea te roo—e aki riki.
N tain kaangaanga aika a korakora aikai, te burabeti Nibwaai “takarua n te bwanaa ae korakora nakon te Atua ibukiia ana aomata” (3 Nibwaai 1:11). Ana kaeka te Uea e kaunganano nakoia aomata ae a kaitara ma te bwainikirinaki ke te raraoma ao e riai n ataaki bwa te ota e na tokanikai iaon te roo: “Tabekarake Atuum ao Kukurei; … N na kakoroi bukin bwaai ni kabane ake I a tia n tua bwa a na taekinaki ni wiia au burabeti aika a tabu” (3 Nibwaai 1:13).
Iango ibukin Oin Am Kamatebwai ni Koroboki Aika Tabu
Te Uea e na kakoroi nanon Ana taeka ni kabane.
E na kanga am iango ngkana ko namakinna bwa ko a tia n riki bwa temanna te tia onimaki n te tai are e kabwarabwaraaki n 3 Nibwaai 1–7? E na kanga aron te namakin, te katooto, n tataninga ibukin te tairiki ae akea te roo are e na katanoata bungiakin te Tia Kamaiu, n atakina ae ko na kamateaki ngkana e aki riki? Ngkana ko wareka 3 Nibwaai 1:4–21 ao 5:1–3, kakaai bwaai aika a karaoi Nibwaai ao taan onimaki ake tabeman ni kateimatoa aia onimaki n taai ni kaangaanga aikai. E kanga te Uea ni kakabwaiaia? Tera ae ko reiakinna ae e na kona n ibuobuoki ngkana ko tataningai kakabwaia aika a tia ni beritanaki iroun te Uea?
Mwanuokinan atatai aika tamnei e karikai bwa N na kairaki n ana kariiri Tatan.
Ko kona n iangoia bwa kakouakin te bwai teuana ae kakai kanga te tairiki n akea te roo e na riki bwa te bwai ae ko na ururingnga n te tai ae maan ao n riki bwa boton am koaua. Ma ururingakin kanikinaa ao bwaai aika kamimi aika a kakoauai Nibwaite a taraa ni mwaninga taekaia. Tera ae karikiia bwa a na mwaninga, ao tera mwiin te mwaninga? (taraa 3 Nibwaai 1:22; 2:1–3).
Tera ae ko karaoia bwa ko na uringnga ao ni kaboua am koaua ni koaua n tamnei? Te katooto, iangoia bwa e kanga tauan mwiin am atatai n tamnei ni kona ni buokiko. Ko na kanga n tibwaua am kakoaua ma naake kabanea ni kaan ma ngkoe ni buokiia bwa ana kakoauaa?
Taraa naba Aramwa 5:6; Henry B. Eyring, “O Uringnga, Uringnga,” Ensign ke Riaona, Nob. 2007, 66–69; Neil L. Andersen, “Faith Is Not by Chance, but by Choice,” Ensign ke Riaona, Nob. 2015, 65–68.
3 Nibwaai 2:11–12; 3:1–26; 5:24–26
E kakorakoraia Ana aomata Aika Itiaki te Uea ni kaitarai kaangaanga n tamnei.
N ara bong, ti aki toki n tainako ni kaitaraaki ma kurubu n iraa ake a tauira ma tematoa bwa ti na kitan mweengara ao n ikotaki n te tabo ae ti teuana. Ma ti kaitara ma kaangaanga n tamnei, ao aia taneiai Nibwaite a kona n iai inanoia reirei ake a kona ni buokiira. Tarai reirei aikai ngkana ko wareware 3 Nibwaai 2:11–12 ao 3:1–26.
N 3 Nibwaai 5:24–26 ti wareka are ikotakiia ana aomata te Uea ni boong aika kaitira. Tera ae a reiakinna kiibu aikai n reirei aron ikotakiia Ana tibu te Uea n te bong aei?
Taraa naba “Worldwide Devotional for Youth: Messages from President Russell M. Nelson and Sister Wendy W. Nelson,” Tuun 3, 2018, ChurchofJesusChrist.org; “Israel—The gathering of Israel,” Guide to the Scriptures, scriptures.ChurchofJesusChrist.org.
Ngai ana reirei Iesu Kristo.
Tera n am iango nanon ae ko na riki bwa Ana reirei Iesu Kristo? (taraa RB 41:5). N 3 Nibwaai 5:12–26, Moomon e katoka ana kauarereke n ana koroboki Nibwaite ao ni katanoata are ngaia bon ana reirei Iesu Kristo. Ngkanne, n 3 Nibwaai 7:15–26, e kabwarabwara ana mwakuri temanna ana reirei Iesu—te burabeti ae Nibwaai. Tera ae ko kunei inanon kibu n taeka aika uoua aikai aika a buokiko n ataia bwa tera nanon te riki bwa ana reirei Kristo?
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
3 Nibwaai 3:13–14, 25–26
Tera ae a karaoia Nibwaite ni kamanoia mai irouia aia kairiribai aika a kaitara ma ngaai? Tera ae ti karaoia ni karaoa mweengara bwa te tabo ni katantan ao ni kamanomano man bwain te aonaaba?
3 Nibwaai 2:1–3; 6:15–17
Ni buoka am utu n reirei bwa e kanga Tatan ni kona ni mwamwanaira, korea tamnein te rabwata, ao n aia tai kain am utu ni wareka 3 Nibwaai 2:1–3 ao 6:15–17, mwaken mwakoron te rabwata aika a taekinaki. Ni kaineti ma kiibu aikai, tera kawai tabeua aika e anai iai nanora Tatan bwa ti na mwaninga taekan te Atua ao n rairaki nakon te bure?
3 Nibwaai 4:7–12, 30–33
Tera ae a karaoia Nibwaite ngke a nooriia ana taan iraa Kateanton n roko? Tera ae a kona n reiakinna kain ara utu mai irouia Nibwaite ngkana ti rinanon waaki aika a kaangaanga? Tera ae ti kona n reiakinna man aia taeka Nibwaite imwiin ae buokiia te Uea n aia tai ni kaangaanga?
3 Nibwaai 5:13; Reirei ao Berita aika Tabu 41:5
Wareka 3 Nibwaai 5:13 ao Reirei ao Berita aika Tabu 41:5, ao maroroakinna bwa tera ae nanonaki n riki bwa ana reirei Kristo. Tao a kona kaain te utu ni maroroakin taekan taai ngke a noriia n tatabemaniia n riki bwa ana reirei Iesu. Ngkana iai am ataei ae uarereke, ko kona ni karaoa te kanikinaa ae kangai taekana, “Ngai ana reirei Iesu Kristo,” ao kariaia bwa a na bwaina te kanikina n te tabo are ko noriia iai n ira te Tia Kamaiu.
Ibukin iango riki tabeua ibukin reireinaia ataei, taraa te kamataata n te wiiki aei n Nakomai, Iriirai—Ibukin te Moanrinan.
Kanakoraoan Ara Anga reirei
Buokiia am utu bwa a na tangiri koroboki aika tabu. E taku Nibwaai, “I kabootaui kanoan koroboki aika tabu nakon maiura, bwa ti aonga n raka man reireinaki iai” (1 Nibwaai 19:23). Ni buokiia kaain am utu bwa a na tangiri koroboki aika tabu, ko kona ni kaoiia bwa a na iangoa te bwai ae a na kona n tia ni karaoia ibuakoia taan onimaki ae kabwarabwaraaki n 3 Nibwaai 1:4–9. (Taraa Reirei n Ana Kawai te Tia Kamaiu, 21.)
Te Ngaina, te Tairiki, ao te Ngaina, iroun Walter Rane