“Tebetembwa 14–20. 3 Nibwaai 8–11: ‘Teirake ao Nakomai Nakoiu,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Tebetembwa 14–20. 3 Nibwaai 8–11,” Nakomai, Iriirai-—Ibukiia Aomata n Tatabemaniia ao Utu: 2020
Otan te Aonaaba Ngai, iroun James Fullmer
Tebetembwa 14–20
3 Nibwaai 8–11
“Teirake ao Nakomai Nakoiu”
N 3 Nibwaai 8–11, aomata a ongo bwanaan te Atua n taetae nakoia. Ngkana ko wareki mwakoro aikai, katurua am iango nakon te bwai ae E taekinna nakoim.
Korei Am Namakin
“Nooria, bon Iesu Kristo ngai, are a kakoaua ibukina burabeti bwa e na roko nakon te aonaaba” (3 Nibwaai 11:10). Ma taeka aikai, te Tia Kamaiu ae e a uti E kabwarabwaraa bon Ngaia, ni kakoroa bukin te taetae ni burabeti ae raka iaon 600 te ririki ibukin Ana Boki Moomon. “Te kaoti anne ao te katanoata anne,” ae e koroia Unimwaane Jeffrey R. Holland, “bon kanoana aika moan te kakawaki, te tai ae moan te tamaroa, ni kabutaa rongorongon Ana Boki Moomon. Bon kakoauaan ao te katanoata ae e a tia ni kaongoia ao ni kaungaia aia burabeti ni kabane Nibwaite. … A bane n tia n taetae ibukina, n aneneia, miia, n tataro ibukin kaotina—ma ikai e bon mena ikai. Te bong are e kaoti iai bon te bong ae moan te kakawaki nakoia! Te Atua are e bitii tairiki ni kabane aika roo nakon rokon otan te moaningabong” (Kristo ao te Berita ae Boou [1997], 250–51).
Iango ibukin Am Kamatebwai I Bon Iroum ni Koroboki Aika Tabu
Iesu Kristo bon Otan te Aonaaba.
Ko na bae ni kinai kanikinaa aika irekereke ma te roo ao te ota—n rabwata ao n tamnei—a kaokiokaki rinanon 3 Nibwaai 8–11. Tera ae ko reiakinna man mwakoro aikai ibukin te roo ao te ota n tamnei? Tera ae uota te roo nakon maium? Tera ae uota te ota? Bukin tera n am iango te Tia Kamaiu e rineia bwa E na kabwarabwaraa ae “te ota ao maiun te aonaaba”? (3 Nibwaai 9:18; 11:11). E kanga n tia n riki Iesu Kristo bwa te ota ni maium?
Ngkana I raira nanou, te Tia Kamaiu e na ikoikotai, kawakinai, ao ni kamaiuai.
Tera am iango n aia namakin aomata imwiin te urubekebeke ao te rootongitong ae kabwarabwaraaki n 3 Nibwaai 8? Tera n am iango n te bwai ae a na tia n namakinna ngke a ongo bwanaan te Tia Kamaiu n taetae iaon te ota, te akoi, ao kaboan maiura n mwakoro 9 ao 10?
E ngae ngke e taekinna te Tia Kamaiu bwa te urubekebeke ae korakora bon mwiin aia bure aomata, E berita bwa e na kamaiuia naake a oki rikaaki Nakoina ao n rairi nanoia (taraa 3 Nibwaai 9:2, 13). E taekinna Unimwaane Neil L. Andersen: “I miimi ni bain te Tia Kamaiu n akoi ae a ramwaneai ao ana tangira ibukin te tia rairannano, n aki tabe bwa babakanikawaira te bure ae kabwaraaki. I kakoaua bwa te Tia Kamaiu e kona ao e tauraoi ni kabwarai ara bure” (“Repent … That I May Heal You,” Ensign ke Riaona, Nob. 2009, 40).
Ukeukera 3 Nibwaai 9–10 ibukin kakoauaan ana akoi Kristo ao Nanona ae tauraoi ni kabwara te bure. Te katooto, tera ae ko kunea n 3 Nibwaai 9:13–22 ao 10:1–6 ae e na buokiko n namakina ana tangira ao ana akoi te Tia Kamaiu? Iangoi taneiai ngke ko a tia n Namakinna n “ikoikotiko” ao “n kakamwarakeko” (taraa 3 Nibwaai 10:4). Iangoia ni korei mwiin taneiai aikai inanon te tieno ke n tibwauai ma am utu aika ko tangiriia.
I kona n reirei n ongo ao n kinaa bwanaan te Atua.
Ko a tia n namakinna ae ko rangi ni kekeiaki ni kan ota n te rongorongo are e anganiko te Atua? Tao aia taneiai aomata n 3 Nibwaai 11:1–8 e kona ni buokiko ni kaotako n tabeua reirei n ongora ao n ataakin bwanaan te Atua. Ko na bae n taua mwiin aron tein bwanaan te Atua ake a ongo aomata ao tera ae a karaoia bwa a aonga n ota iai. E na kanga te rongorongo aei ni kaineti nakon am kekeiaki ni kan ongora ao ni kinaa bwanaan te Atua ni maium rinanon oin am kaotioti?
Iesu Kristo e kaoai bwa N na karekea oin au koaua Ibukina.
E kaniia 2,500 aomata aika a bootaki n te Aba ni Mari ngke e kaoti Iesu Kristo (taraa 3 Nibwaai 17:25). N aki tabe ma te mwaiti ae korakora aei, e kaoiia te Tia Kamaiu n tatabemaniia “temanna imwiin temanna” n namakina mwiin te neera inanon Baina ao waena (3 Nibwaai 11:14–15). Tera ae nanonaki aei iroum ibukin kakawakin karekean oin am atatai ae e na karikirakea te onimaki iroun Iesu Kristo? Ni kawai raa ae e kaoko iai te Tia Kamaiu n “teirake ao nakomai ” Nakoina? (3 Nibwaai 11:14). Tera taneiai aika a tia ni buokiko ni karekea te kakoaua ae Ngaia bon am Tia Kamaiu? Ko kona naba n iangoia bwa e kanga ana banna ni katooto te Tia Kamaiu inanon kiibu aikai ni kaungako n am kekeiaki n ibuobuoki nakoia tabeman.
Temanna imwiin Temanna, iroun Walter Rane
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
3 Nibwaai 8–9
Ni buoka am utu n taekina te taneiai ae kabwarabwaraaki n 3 Nibwaai 8–9, ko kona ni manga karakina ke n ni kakauongo nakon te rawerawe ni mwakoron mwakoro aikai inanon te ruu ae rotongitong. Kabwarabwara bwa e na kanga aron te mena inanon te rotongitong inanon teniua te bong. Ko kona ni maroroakinna bwa e kanga n riki Iesu Kristo bwa “otan … te aonaaba” (3 Nibwaai 9:18).
3 Nibwaai 10:1–6
Te kabootau iroun te moaaine ngke e ikoikotiia natina e kona n riki bwa te bwai n anga reirei ae moan te korakora ni buokiia ataei n ataa katein ao ana mition te Tia Kamaiu. Ko kona ni wareki kiibu aikai ngkai am utu a taraa tamnein te moaaine ma bunna. Bukin tera te moaaine e kainnanoia ni ikoikotiia natina? Bukin tera te Tia Kamaiu e tangiria ni ikoikotiira ni kaniira Nakoina? Tera ae e na riki ngkana e rineia te moa bwa e na aki ikotaki ngkana e weteaki?
3 Nibwaai 11:1–7
Tao ko kona ni wareki tabeua kiibu aikai n te, “bwana ae uarereke” (3 Nibwaai 11:3). Tera ae a na karaoia aomata bwa a na ataa te bwana mai i karawa? Tera ae ti reiakinna man aia taneiai?
3 Nibwaai 11:21–38
Iai temanna man am utu ae katauraoi nakon te bwabetitoaki? Warekan 3 Nibwaai 11:21–38 e kona ni buokiia ni katauraoia. E na kanga iangoan ana reirei te Tia Kamaiu inanon kiibu aikai ni buokiia kaain te utu ake a tia ni bwabetitoaki?
3 Nibwaai 11:29–30
Tera ae reireiniira kiibu aikai iaon taekan te itabararaa? Ti na kanga “[ni] kararoaira” ma te itabararaa inanon mweengara? (3 Nibwaai 11:30).
Ibukin iango riki tabeua ibukin reiakinaia ataei, taraa te kamataata n te wiiki aei n Nakomai, Iriirai—Ibukin te Moanrinan.
Kanakoraoan Am Kamatebwai
Korei am namakin. E taku Unimwaane Richard G. “Atatai aika a koreaki raoi mwiia bon atatai aika a tauraoi n tain kainnanoaia. … [Korean mwiin iango n tamnei] e kanakoraoa aron karekean te ota” (“Karekean Atatai n Tamnei,” Ensign, Nob. 1993, 88).
Temanna te Tia Kawakin Tiibu, iroun Howard Lyon