Bon Ngai Ootan te Aonaaba iroun James Fullmer

Tebetembwa 14–20

3 Nibwaai 8–11

“Teirake ao Nakomai Nakoiu”

Wareware n 3 Nibwaai 8–11 n iangoia ataei ake ko reireiniia n am iango. Te iango n te kamaatata aei bwa e na kona ni buokiko ni kaira am katauraoi.

Korei Am Namakin

Kaoa te Tibwatibwa

Kaota tamnein Iesu Kristo ngke e kaoti i Amerika, n aron are n te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu. Kaoiia ataei bwa a na katebenakoi kabwarabwara man te tamnei ao n tibwa te bwai ae a ataia man te tamnei are e kaotaki.

Reirei te Reirei: Ataei aika a Uarereke

3 Nibwaai 8–11

E kaoai Iesu Kristo bwa N na nakoIna.

Kona bae n aki kona ni kabwarabwarai raoi ni kabane nakoia ataei aron kaotin te Tia Kamaiu irouia ana aomata Nibwaai, ma ko kona ni buokiia n namakina Ana tangira nakoia aomata n 3 Nibwaai 8–11.

Waaki ni Kakukurei aika a Kona ni Karaoaki

• Tuangiia ataei taekan te buaka ao te rotongitong are e kabwarabwaraaki n 3 Nibwaai 8, ma taratara raoi n aki kakamakuia ke ni kauniia. Ko kona ni kabongana “Mwakoro 42: Kanikina n Taurakin Kristo” (Karaki man Ana Boki Moomon, 117–19, ke witeo ake a irekereke iaon ChurchofJesusChrist.org). Titirakiniia ataei tera aron aia namakin ngkana a tia ni mena inanona te buaka anne ke te rotongitong. Kabwarabwara bwa te buaka ao te rotongitong bon kanikina ake a kaotia bwa e a tia ni mate Iesu, ao kaota tamnein Taurana n te kaibangaki (taraa Bokin Tamnein te Euangkerio, nambwa. 57). Ngkanne wareka 3 Nibwaai 9:13. Tera ae e taekinna Iesu ae E na karaoia ibukiia naake a rairi nanoia? Buokiia ataei n ota bwa te taeka ae “kamarurung” n te kibu aei bwa Iesu e na kabwarai aia bure.

• Kaota te tamnei n te kabwarabwaran te wiiki aei inanon Nakomai, Iriirai— Ibukiia Aomata n Tatabemaniia ao Utu ngkai ko kabwarabwara n oin am taeka kaotin te Tia Kamaiu ngke e mangauti nakoia Nibwaite ao Reimwanaite. Wareki kibu aika uarereke man 3 Nibwaai 11 ake a na kona ni buokiia n namakina tabun te waaki aei. Kaoiia bwa a na kamatui mataia ao n iangoa aron ae a na namakinna ngkana a nang noora Iesu. Ke kaota n te moan miniti te witeo “My Joy Is Full” (ChurchofJesusChrist.org). Tuangiia ataei aron am namakin ngke ko wareki ao n iangoi bwaai aikai. Kaota am kakoaua bwa Iesu e tangiriira ni kabane bwa tina nakoina ao n namakina Ana tangira. Katiaa kanoan ana iteraniba te waaki ni kakukurei ma ataei.

3 Nibwaai 10:4–6

Iesu e kamanoia Ana aomata n aron te moaine ae e kamanoia ana kiokio.

Tamnein te moaine ngke e bobotia ana kiokio e kona n reireiniia ataei taekan te karaunano ao te kamanomano are e anga te Tia Kamaiu ngkana ti nakoina.

Waaki ni Kakukurei aika a Kona ni Karaoaki

• Kaota tamnein te moaine ngke e tararuaia bunna kiokio. Wareka 3 Nibwaai 10:6, ao tuangiia ataei aron te moaine ni weweteia bunna kiokio ao ni kataniia iaan baina ngkana a reke n te kaangaanga. Maroroakina aron Iesu kaanga ai aron te moaine ao ngaira kaanga ai aroia kiokio. Ti na kanga n nakoina ni karekea kamanoakira?

• Katoka tamnein Iesu iaon te oo. Kaoiia ataei bwa a na nakonako ni katobibia te umwanreirei ngkai ko wareka 3 NIbwaai 10:4 ni kabaibati. Tuangiia bwa a na kaineta tamnein Iesu ngkana ongo te taeka “ikoikotingkami” ke “ikoikotiia.” Kaokioka te waaki aei ngkai ko wareki kibu 5 ao 6. Tibwaia ma ataei bwa ko kanga n nakon te Tia Kamaiu ibukin te kamanoaki, ao kakoaua bwa E na kawakiniira man kaangaanga n te maiu n tamnei ngkai ti kawakin Ana tua.

3 Nibwaai 11:21–26

Iesu Kristo e tangirai bwa N na bwabetitoaki.

Ataei ake ko reireiniia a katauraoi bwa a na bwabetitoaki. Ana reirei Kristo ni wareware aikai a kona ni buokiia n ataia bwa bukin tera e kakawaki te bwabetito.

Waaki ni Kakukurei aika a Kona ni Karaoaki

• Wareka 3 Nibwaai 11:21–26, ao kaoiia ataei bwa a na teirake ni katoa tai are a ongo iai te taeka “bwabetito.” Kabwarabwara bwa Iesu e reireiniia te kawai ae eti n te bwabetito. Kaota tamein te ataei ngke e bwabetitoaki (taraa Bokin Tamnein te Euangkerio, nambwa. 104). Ngkana a tia n noora te bwabetito ataei mai imwaina, kaoiia bwa a na kabwarabwara te bwai are a nooria. Antai ae karaoa te bwabetito, ao e kanga ni karaoia?

• Mai imwaina, kaoa te karo temanna mai irouia ataei bwa e na ira am kiraati ao tibwaia ma ataei bwa bukin tera e kakaawaki bwa tina bwabetitoaki ni kateboaki n te ran iroun temanna ae iai irouna te nakoanibonga. E kona naba ni kabwarabwara nakoia ataei te bwai ae e na riki ngkana ti bwabetitoaki ao te kakabwaia are a na karekea. Kaungaa bwa e na kabongana 3 Nibwaai 11:23–26 n ana kabwarabwara.

Reirei te Reirei: Ataei aika a Ikawai

3 Nibwaai 8–11

Ngkana I mena n te roo, Iesu Kristo e kona n riki bwa au ota.

Teuana te rongorongo ae korakora n te mwakoro aei bwa Iesu Kristo bon otan te aonaaba, ao E na riki bwa te ota inanon maiura.

Waaki ni Kakukurei aika a Kona ni Karaoaki

• Ikotaki wareka 3 Nibwaai 8:5–7, 11–23, ao 10:9–13 (ngkana e kona, ni karooa nanon te ruu ngkai kam wareware). Katokia n tainako ao titirakiniia ataei bwa e na kanga aron ae a namakinna ngkai a riki aro aikai. Warekia ma ataei tabeua taeka ake e taekin Iesu nakoia aomata ngkai a mena inanon te roo (taraa 3 Nibwaai 9:13–14, 18). Bukin tera e aranna Iesu Kristo bwa Otan te Aonaaba? Bukin tera e kaoiia aomata Iesu, ao ngaira, bwa ngkana ti karaoia E na riki bwa otara? (taraa 3 Nibwaai 9:20–22).

• Kaota mwaben te aonaaba nakoia ataei, ao buokiia ni kakaea Ierutarem ao aban Amerika. Kabwarabwara te urubwai are e kabwarabwaraaki inanon 3 Nibwaai 8 bon te kanikina nakoia aoamta i Amerika bwa Iesu Kristo e a tia n tiringaki i Ierutarem. Ikotaki wareka 3 Nibwaai 11:1–15, ao tuangiia ataei bwa a na tuangko ngkana iai te bwai ae a kunei inanon kibu aikai ake e buokiia n namakina ana tangira te Atua. Tibwa kibu 37, ao kakoaua bwa te Tia Kamaiu e tangiriia ataei ni kabane. Kaota am koaua iaon te koaua are ko warekia.

Temanna imwiin Temanna, iroun Walter Rane

3 Nibwaai 11:1–8

I kona n reiakinna ni kina bwanaan te Atua inanon maiu.

N te moan tai aomata aki ota n te bwana are a ongo mai karawa. Tera ae a kona n reiakinna ataei man te rongorongo ae karekean te kaotioti?

Waaki ni Kakukurei aika a Kona ni Karaoaki

• Wareka 3 Nibwaai 11:1–4 ma ataei, n toki n anga titiraki n aron “Bukin tera ko iangoia aomata aki ota n te bwana?” Ngkanne butiia bwa a na wareka kibu 5–7 ni kakaea bwa tera are a karaoia aomata ni buokiia n ota n te bwana inanoia. Tina kanga ni kataia n ongo iroun te Atua ngkana E taetea inanora rinanon te Tamnei ae Raoiroi?

• Katanga te anene n taromauri ke kunaia ataei ni karaurau bwa e aonga ni kaangaanga te ongora iai. Titirakiniia ataei ngkana a kona n ota n taekan te kuna. Ngkanne buokiia ataei kakaea 3 Nibwaai 11:3 ibukin kabwarabwaraan te bwana mai karawa. Bukin tera ngkai e aki taetae te Atua nakoira n te bwana ae “nene” ke n “rebwetau”? Tera ae ti kona ni karaoia bwa ti na ongo raoi riki Irouna?

Kaungaa te Kamatebwai n te Mweenga

Kaoiia ataei bwa a na tuanga temanna taekan rokon Iesu i Amerika—ngkan e reke taina, temanna ae e tuai ataia mai imwain.

Kanakoraoan Ara Anga reirei

Katoka te kakeru ma te tangira. “N tabetai te ataei e karaoi waaki ake e na uruana iai aia reirei tabeman n te kiraati. Ngkana e riki aei, bwaina te taotaonannano, tangira, ao n ota ni kakaewenako ake e kaitara te ataei. … Ngkana ataei ake a karika te kakeru iai kainnanoia ae riai, maroro nakon te tia rabakau n te uote ke te titeiki ke nakon disabilities.ChurchofJesusChrist.org ni kakaea bwa ko na kanga ni katamaroa riki ni karekei buokan kainnano akanne” (reirei n Ana Kawai te Tia Kamaiu, 26).