“Tebetembwa 21–27. 3 Nibwaai 12–16: ‘Ngai Te Tua, Ao te Ota,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Tebetembwa 21–27. 3 Nibwaai 12–16,” Nakomai, Iriirai—Ibukiia Aomata n Tatabemaniia ao Utu: 2020
Te Kateniua n Nibwaai: Naaka Tengaun Ma Uoman, by Gary L. Kapp
Tebetembwa 21–27
3 Nibwaai 12–16
“Ngai Te Tua, Ao te Ota”
A mwaiti reirei aika a na kuneaki n 3 Nibwaai 12–16. Tabeua reirei a kanikinaeaki inanon te kamataata aei, ma kam kona ni kakaai tabeua. Kariaia Tamara are i Karawa, rinanon Tamneina, bwa e na reireiniko te bwai ae ko kainnanoia ngkai naba.
Korea Am Namakin
N te kawai naba ae a karaoia ana reirei Iesu ake a ikotaki n te maunga i Kariraia, aomata aika botaki n te tembora n te Aba ni Mari a tia ni maeka iaan ana tua Moote. A tia n iria ibukina bwa e kaineta tamneia nakon Kristo (taraa Iakoba 4:5), ao ngkai Kristo e tei i mataia, ni katanoata te tua ae rietaata riki. Ma riki ngaira aika ti tuai man maiuakina ana tua Mote a ti kona ni kinaa te kainibaire are e kateia Iesu ibukiia Ana reirei bon te tua ae rietaata riki. “I tangiria bwa kam na kororaoi n arou,” E taekinna (3 Nibwaai 12:48). Ngkana ko namakina te aki tau n te bwai aei, uringnga naba are e taku Iesu, “A kakabwaiaki ake a baki tamneia ake a roko nakoiu, bwa aia bwai uean karawa” (3 Nibwaai 12:3). Te tua ae rietaata riki aei bon te kakao—te kawai teuana n taekina “Nakoiu ao kam na kamaiuaki” (3 Nibwaai 12:20). N aron ana tua Mote, te tua aei e kotea Kristo—ti Temanna ae kona ni kamaiura ao ni kakororaoira. “Nooria,” E taku, “Ngai Te Tua, Ao te Ota. Taraai, ao teimatoa n uaa te toki, ao kam na bon maiu” (3 Nibwaai 15:9).
Iango ibukin Am Kamatebwai I Bon Iroum ni Koroboki Aika Tabu
Ana reirei te Tia Kamaiu e kaotia nakoiu bwa N na kanga n riki bw ana tia reirei ni koaua Iesu.
A mwaiti koaua, taeka n reirei, ao kauring n 3 Nibwaai 12–14. Aio te kawai teuana ni kamatebwaia ao ni karaoa te bwai ae reireia te Tia Kamaiu inanon mwakoro aikai. Rinei kurubu ni kiibu, ao nooria ngkana ko kona ni koroia ni kakimototoa te bwai ae reiakinaki n teuana te tiententi are e moanaki ma “Ana reirei ni koaua Iesu Kristo …” Te katooto, kakimototoan 3 Nibwaai 14:1–5 e kona n ae “Ana reirei ni koaua Iesu Kristo a aki momotikitaeka.” Ko na bae n tangiria n rinea te kibu man mwakoro aikai ae uaana riki nakoim ao kamatenanoa ke karekea katotoona ao katukua n te tabo are ko kona n nonooria iai. Iangoia bwa ko na kanga ni kabongana te bwai ae ko reiakinna nakon oin korakoram n riki bwa ana reirei Iesu Kristo ae nakoraoi riki.
Taraa naba Mataio 5–7; Ruka 6:20–49.
3 Nibwaai 12:1–2; 15:23–24; 16:1–6
A kabwaia akana a onimaki ao a aki nooria.
E kabotauaki ma ikotan mwaitiia ana ataei te Atua, tii tabeman ae a tia n noora te Tia Kamaiu ao n ongo Bwanaana, n aron are a karaoia aomata n te Aba ni Mari. Angiia mai ibuakora bon ti tebo ma aomata ake a kabwarabwaraaki n 3 Nibwaai 12:2; 15:23; ao 16:4–6. Tera berita aika a karaoaki nakoia aekan aomata aikanne inanon kiibu aikai? A kanga n tia ni kakoroaki nanon berita aikai inanon maium?
Taraa naba Ioane 20:26–29; 2 Nibwaai 26:12–13; Aramwa 32:16–18.
3 Nibwaai 12:21–30; 13:1–8, 16–18; 14:21–23
Mwakuri aika a raoiroi aki tau; nanou e na riai naba n itiaki.
Teuana te botoniango ae ko na riai n ataia inanon mwakoro aikai bon ana kakao te Tia Kamaiu ni maiuakina te tua ae rietaata riki—n raoiroi tiaki tii n ara mwakuri itinaniku ma inanora naba. Taratarai botoniango aikai ngkana e taetae te Tia Kamaiu ibukin te itabarara (3 Nibwaai 12:21–26), kaibwabwaru (3 Nibwaai 12:27–30), tataro (3 Nibwaai 13:5–8), ao te aki mamatam (3 Nibwaai 13:16–18). Tera aekan katooto riki tabeua aika ko kona ni kunei? Tera ae ko kona ni karaoia ni kaitiaki bwaai aika e tangirii nanom nakon ae ko kabanea am iango iaon mwakuri nako ake ko karaoi itinanikum?
Ngkana I ukoukori “bwaai aika a raraoi” mairoun Tamara are i Karawa, N na bon karekei.
E taku Beretitenti Russell M. Nelson: “E koaua bwa e tangiria raoi te Atua ni kan taetae ma ngkoe? Eng! … O, e rangi ni mwaiti riki te bwai ae tangiria Tamara are i Karawa bwa ko na atai” (“Te kaotioti ibukin te Ekaretia, te Kaotioti ibukin Maiura,” Ensign ke Riaona, Meei 2018, 95). Ngkana ko wareka ana kakao te Uea n 3 Nibwaai 14:7–11 n titiraki, ukeuke, ao karebwerebwe, iangoi “bwaai aika a raraoi” ae E tangiriko bwa ko na titiraki ibukina. Koroboki aika tabu riki aikai a kona ni buokiko n ataia bwa ko na kanga n titiraki, ukeuke, ao ni karebwerebwe. A na ibuobuoki naba ni kabwarabwara bwa bukin tera tabeua tataro aki kaekaaki n aron ae ko kantaningaia: Itaia 55:8–9; Ereman 10:5; Moronaai 7:26–27, 33, 37; ao Reirei ao Berita aika Tabu 9:7–9.
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
3 Nibwaai 12:48
E kanga ana rongorongo Unimwaane Jeffrey R. Holland “Be Ye Therefore Perfect—Eventually” (Ensign ke Riaona, Nob. 2017, 40–42) e buokiira ni kaotaira n ana taeka te Tia Kamaiu n te kibu aei? Ko kona naba ni kunea te buoka n Moronaai 10:32–33.
3 Nibwaai 12:9, 38–42; 14:3–5, 12
A kanga kiibu aikai ni kaineti nakon te reitaki imarenaia kaain te utu? A kona kaain am utu ni katei ni bootaki tabeua kouru ni maiuakin reirei aikai n ae kakaonimaki riki.
3 Nibwaai 13:19–21
A kona kiibu aikai ni kawaekoa te marooro iaon te bwai ae kakawaki nakoia kaain am utu. Iai bwaai aika a kakawaki tabeua iaon te aba aika a tauko man kawenean bwaai aika a kakawaki i karawa? Ko kona ni manga kamatataa te iango aei man kairakin te utu n takakaro ni kakaea te kaniwanga ni kakaai bwaai ni mweengam aika a tiku n riki bwa aia bwai kaain te utu aika a kakawaki aika akea tokina.
3 Nibwaai 14:7–11
Ataei aika a uarereke riki a na bae ni kukurei n te takakaro, kaungaaki man 3 Nibwaai 14:8–9, are ngaia ae a bubuti ibukin te bwai teuana ao a karekea te bwai ae rangi ni kaokoro. Tera ae tangiria te Tia Kamaiu bwa ti na ataia ibukin Tamara are i Karawa ngke E tibwaua te katotoo aei?
3 Nibwaai 14:15–20
Tera “uaa aika raraoi” ae a buokiira n ataia bwa Iotebwa Timiti, ke te Beretitenti n te Ekaretia ae ngkai, bon te burabeti ae koaua?
3 Nibwaai 14:24–27
Iangoi kawai aika ko kona ni buokiia kaain te utu ni katamneia n aia iango taeka ni kaikonaki inanon kiibu aikai. A kona kaain te utu ni koroi tamnei, karaoi kaiia, ke katei bwaai aika matoa ao ni bikebike aaia.
Ibukin iango riki tabeua ibukin reiakinaia ataei taraa te kamataata n te wiiki aei n Nakomai, Iriirai—Ibukin te Moanrinan.
Kanakoraoan Ara Anga reirei
Kabongana te reirei ma bwaai ni kabotau. E reirei te Tia Kamaiu koaua aika korakora man kabonganakin bwaai aika e tataneiai te aba iai. Ko kona ni karaoa te bwai ae ti tebo ma aei n aia tai ni wareware am utu 3 Nibwaai 12–16. Te katooto, ngkana ko wareka mwakoro 12, ko kona ni kaoti tabeua taoro, kanre, ao te kooti. E kona n reke naba aei bwa te bwai ae raoiroi n rinanoi waaki ni kakukurei. Imwiin ae kam a tia ni wareki mwakoro aikai, kaota riki te bwai ni kabotau, ao titirakiniia kaain te utu te bwai ae reireia te Tia Kamaiu ibukiia n tatabemaniia.
Te Tia Kamaiu e Kawariia Aomata i Amerika, iroun Glen S. Hopkinson