Uoua Tengaa Taani Buaka Aika Kairake, iroun Arnold Friberg

Aokati 10–16

Aramwa 53–63

“A Kawakinaki ni Mwaakana ae Moan te Kamimi”

Te karaki n Aramwa 53–63 e kona ni buokiko n noori mwiin maiuakinan koauan te euangkerio ke totokoaia. Ngkai ko wareka Aramwa 53–63, korei am namakin ao iangoi kawai aika ko kona ni maiuakin koaua aika ko reiakin.

Korei Am Namakin

Ngkana e kabotaua ma aia taanga ni buaka Reimwanaite, Ana taanga ni buaka Ereman “ae uarereke” (Aramwa 56:33) aika 2,000 ataeinimwaane aika Nibwaite a na aki reke aia tokanikai. Irarikin uarereken mwaitiia, a na taanga ni buaka Ereman “a bane … ni uarereke ao, ”ao a tuai mani bubuaka” (Aramwa 56:46–47). Ni kawai tabeua, e kona n ae aia kaangaanga e ataaki nakoira aika n tabetai ti namakinna ae ti rangin ni mwaiti ao n rootaki n ara buaka irouia Aika Itiaki ao n ana kairoro te buakaka n te aonaaba.

Ma ana taanga ni buaka Ereman iai rakaia iaoia Reimwanaite ae aki irekereke ma te mwaiti ke te rabakau ni buaka. A rinea Ereman, te burabeti, bwa e na kairiia (Aramwa 53:19); “a bon reireinaki irouia tinaia, bwa ngkana aki nanououa, ao e na kamaiuia te Atua” (Aramwa 56:47); ao e “korakora aia onimakin n te bwai are a tia n reireinaki iai.” Ao n tokina, a kawakinaki man “kamimiin mwaakan te Atua” (Aramwa 57:26). E ngae ngke a bane n ikuaki n tain te bwaka, “akea naba temanna mai i buakoia ae bua maiuna” (Aramwa 57:25). Ngaia are ngkana te maiu e karika te maneka n tamnei iaora n tatabemaniira nako, ti kona ni kaungaaki—n aia rongorongo ana taanga ni buaka Ereman ae e kangai “bwa [iai] te Atua ae momotiraoi, ao anne [e] aki nanokokoraki, [ao] e na bon aki nanokokoraki, ao e na bon kawakinaki ni mwaakana ae moan te kamimi” (Aramwa 57:26).

Iango ibukin Am Kamatebwai I Bon Iroum ni Koroboki Aika Tabu

Aramwa 53:10–22; 56:43–48, 55–56; 57:20–27; 58:39–40

Ngkana I kamwakura te onimaki iroun te Atua, E na kakabwaiaai ni mwaakana ae E kamimi.

Karaki aika kamimi n aron tokanikaia ana taanga ni buaka Ereman aika uarereke e na kaangaanga kabotauana ibukina bwa a taraa n ae a na aki reke. Ma teuana bukina ngkai a karinaki karaki aikai inanon koroboki aika tabu ibukina bwa a na kaotia nakoira bwa ngkana iai ara onimaki, e kona te Atua ni karaoi kakai inanon maiura. Ngkana ko wareka taekaia taan buaka inanon kiibu aikai, tarai rongorongo iaon taekan aron kamwakuran aia onimaki iroun te Atua, tera ae karika aia onimaki bwa a na korakora, ao tera ae kariki kakai bwa a na riki: Aramwa 53:10–22; 56:43–48, 55–56; 57:20–27; ao 58:39–40. Te tiaata aei e kaota te kawai teuana ae ko kona n taua mwiin te bwai ae ko kunea.

Kateiia a na taan buaka Ereman:
Tera te bwai ae a tia n reireinaki iai:
Tera ae a karaoia:
Kakabwaia aika a karekei:

Imwiin kamatebwaian kiibu aikai, tera ae ko kaungaaki iai bwa ko na karaoia ni kamwakura am onimaki?

Ereman e taekin tabeia tiina ni kakorakorai aia onimaki kaain te taanga ni buaka (taraa Aramwa 56:47–48; 57:20–27). A kanga kaain te utu ao tabeman n ibuobuoki nakon am onimaki? Tera ae ko kona ni karaoia ni kakorakorai aia onimaki am utu ao raoraom?

Aki Nanokokoraki, iroun Joseph Brickey

Aramwa 58:1–12, 31–37; 61

I kona n rineia n iangoa aia kabanea n tamaroa tabeman ao n aki kanaeng.

Ereman ao Bwaoraan iai raoi bukina irouia ngkai a na kanaeng. Ereman e aki karekea te boutoka ae bwanin ibukiia ana taanga ni buaka, ao Bwaoraan e bukinaki n te kewe iroun Moronaai bwa e taua te boutoka anne (taraa Aramwa 58:4–9, 31–32; 60). Tera ae kakawaki nakoim n te bwai ae a karaoia n Aramwa 58:1–12, 31–37 ao Aramwa 61? Ko na kanga n irii aia banna ni katooto ni kaangaanga n aron aikai?

E reirei Unimwaane David A. Bednar: “Ni kawai tabeua ao n taai tabetai, temanna inanon te Ekaretia aei e na karaoa ke e na taekina te bwai teuana ae aki kakukurei nakoia aomata. Aekan waaki aikanne e na kona n riki nakoira n tatabemaniira ao ngaira ni kabane—ao e na bon riki n te tai ae mwaiti. … Ngkoe ao Ngai tiaki kona n tararuai nanoia ao kateia aomata tabeman. E ngae n anne, ti baireia bwa ti na kanga ni karaoia. Taiaoka n uringnga ae ngkoe ao Ngai ti rineaki bwa taan tei ma inaomatara ae riai, ao ti kona n rineia bwa ti na aki un” (“And Nothing Shall Offend Them,” Ensign ke Riaona, Nob. 2006, 91).

Taraa naba Taekan Rabakau 16:32; Moronaai 7:45; David A. Bednar, “Nimamannei ao n Nanorinano Nanona,” Ensign ke Riaona, Meei 2018, 30–33.

Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki

Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.

Aramwa 53:10–17

Taan ni Kakaitaraia-Nibwaai-Riaai a berita bwa a na aki un ke ni kammarakiia tabeman. Tera berita aika tabu aika ti a tia ni karaoi ma te Atua? Tera ae ti warekia n Aramwa 53:10–17 are e kaungaira bwa ti na kakaonimaki riki nakon ara berita aika tabu?

Aramwa 53:20–21

Ti na kanga n riki n aroia ana ataeinimwaane Ereman? E na kona n ibuobuoki ni maroroakin nanon tabeua kibu n taeka inanon kiibu aikai; te katooto, tera ae nanonaki bwa ko na “korakora … ibukin te ninikoria te korakora ma te marurung”? Tera ae nanonaki bwa ti na “kaeta nakonakora i matan te [Atua]”?

Aramwa 58:9–11, 33, 37

N taai ibukin kainnano aika korakora, ti rairaki nakon Tamara are i Karawa, n aron are a karaoia ana tautia Nibwaite? E kanga ni kaekai aia tataro? E kanga ni kaekai ara tataro?

Aramwa 61:2, 9, 19

Tera ae ti reiakinna mairoun Bwaoraan bwa ti na kanga ni kaeka ngkana ti bukinaki n te kewe?

Aramwa 62:39–41

Aio te reirei ma te bwai ni kabootau ae e kona ni buoka am utu n ataia bwa ti kona n rineia ni “kamatoai” ke “ni kamarauii” man katakira: Katuka te buteeta ae tuai mwai ao te bunimoa inanon te bwaata ae iai te ran inanona ae buro. Te buteeta ao te bunimoa a tei ibukira, ao te ran e tei ibukin kataakira aika ti kaitara ma ngaai. Ngkana e buro te buteeta ao te bunimoa, ko kona ni maroroakin tabeua kataaki aika a tia ni kaitarai am utu. Tera kawai tabeua aika kaokoro aika ko na karaoi nakon kataaki n aron aikai? Ni kaineti ma Aramwa 62:41, a kanga ara mwakuri nakon kataaki n rotiira? Imwiin ae a mwai te buteta ao te bunimoa, koreia ni kauka te buteeta ao kauka te bunimoa ni kaotia bwa te “kataaki” n aron anne e kamaraua te buteeta ao e kamatoaa te bunimoa. Tera ae a kona ni karaoia ara utu ni kakoaua ae kataakira a kananorinanoira ao ni uotiira ni kaan riki nakon te Atua?

Ibukin iango riki tabeua ibukin reiakinaia ataei, taraa te kamataata n te wiiki aei n Nakomai, Iriirai—Ibukin te Moanrinan.

Kanakoraoan Ara Anga reirei

Kariaia ataei bwa a na kaoti bwaai ae a karaoi man aia kakauiango. “Ngkana ko kaoia [am] ataei bwa a na karaoi bwaai tabeua aika irekereke ma te reirei n te euangkerio, ko buokiia bwa a na oota raoi riki n te reirei, ao ko anganiia te kauring n te bwai ae a tia n reiakinna. … Kariaiia bwa a na katei, korotamnei, karani, korei, ao ni karaoi” (Reirei n Ana Kawai te Tia Kamaiu, 25).

E Koaua, Naewa, A Bane n Roko ao A Tauaki Mwiia, iroun Clark Kelley Price