“Tuun 22–28. Aramwa 17–22: ‘N Na Karaoi Ngkami bwa Bwaai ni Mwakuri,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Tuun 22–28. Aramwa 17–22,” Nakomai, Iriirai - Ibukiia Aomata n Tatabemaniia ao Utu: 2020
Amon ao te Uea ae Ramonaai, iroun Scott M. Snow
Tuun 22–28
Aramwa 17–22
“N na Karaoi Ngkami bwa Bwaai ni Mwakuri inanon Baiu”
Ngkai ko wareka Aramwa 17–22,, korei iango ake a roko iroum ao karaoi nanoia. Ni karaoana ko kaotia nakon te Uea am tatauraoi ni karekei riki kaotioti i bon ibukim.
Korea Am Namakin
Iangoi ni kabane aia kaeka aomata ake a na anga bukin aki tibwauaan te euangkerio: “E aki bati au atatai” ke “I aki koaua raoi ngkana a bon kan ongoraa” ke tao “Mwina I a kauniia?” Tao ko na bae ni iango n aekaki ni iango aikai n taai tabetai. Taian Nibwaite iai naba bukin ae aki tibwaua te euangkerio ma Reimwanaite: ibukina bwa a “moaanti ma ni matoatoa ma n iowawa, aomata aika kukurein nanoia n tiringakia Nibwaite” (Aramwa 17:14; taara naba Aramwa:26 23-25). Ma natin Motiaea mwaane iai bukina ae e korakora irouia bwa e aera a namakinna bwa a riai n tibwaua te euangkerio ma taian Reimwanaite: “Nanoia e tangiria bwa e na karokoaki taekan te kamaiuiaki nakoia ana kariki bwai aika a maiu ni kabane, bwa a aki kona moan ae e na iai tamnein te aomata temanna ae e na kamaunaaki” (Motiaea 28:3). Te tangira aio are e kaungaa Amon ao tarina a kona naba ni kaungako ni tibwaua te euangkerio ma am utu, raoraom, ao ake ko kinaia—–ao naake kanga a taraa n aki tangiria ni kan butimwaia.
Iango ibukin Oin Am Kamatebwai ni Koroboki Aika Tabu
Ni kakorakoraan au onimaki, I kona ni karakaa riki aron tibwauaan te euangkerio.
Ko a tia ni manga kaitiboaki ma raoraom ngkoa ao ko namakina aron are e namakina Aramwa—te kimwareirei bwa a tia ni matoatoa i nanon te onimaki? (taraa Aramwa 17:1–2). Tera ae ko reiakinna mai irouia natin Motiaea mwaane ibukin aron katukan am onimaki n te euangkerio ao te motinnano nako iai ae e matoatoa? Ngkai ko iangoa korakoran tamneia natin Motiaea mwaane, tera ae ko namakinna bwa ko riai ni karaoia?
E kanga aia katauraoi n tamneia natin Motiaea mwaane n roota aron aia mwakuri ma Reimwanaite? Tao ko na kona ni kabongana te tai aei n taraa aron am kekeiaki n reirei te euangkerio “ma mwaakan ao ana kariaia te Atua” (Aramwa 17:3).
I kona n riki bwa te tia mwakuri ni bain te Atua n uota te kamaiuaki nakoia Natina.
Beretitenti Thomas S. Monson e taku,“I tangiria n tainako bwa e na ataia te Uea bwa ngkana e kainnanoa biriakinan karaoan te mwakuri, Tom Monson e na karaoa te mwakuri anne Ibukina” (“On the Lord’s Errand: The Life of Thomas S. Monson,” witeo, ChurchofJesusChrist.org). Ngkai ko wareka Aramwa Aramwa 17 6-12; kakaea bwa tera ae a karaoia natin Motiaea mwaane bwa a aonga n riki bwa taan mwakuri ni bain te Atua. Ko na kanga n riki bwa te tia mwakuri ni bain te Atua ni kakabwaiaia tabeman? Tera ae ko reiakinna n aia katooto are e anganiko te ninikoria ni karaoa te bwai are e kainnanoiko iai te Uea bwa ko na karaoia?
Taraa naba Dallin H. Oaks, “Sharing the Restored Gospel,” Ensign ke Riaona, Nob. 2016, 57–60.
I kona ni buokiia tabeman n tauraoi ni butimwaea te euangkerio.
Ramonaai bon te tia kairiiri irouia aika a “moaanti ma ni matoatoa ma n iowawa” (Aramwa 17:14), ma e tokanikai iaon katein ririki aika mwaiti ao ni kariaia ana euangkerio Iesu Kristo. Ngkai ko wareka rongorongon aia reitaki Amon ma Ramonaai, nooria bwa tera ae e karaoia Amon are e buoka Ramonaai n tangiria ni kan ongo n ana rongorongo. Ngkana a roko iango iroum bwa tera ae ko kona ni karaoia n tibwaua te euangkerio ma tabeman, koroi namakin akanne.
E na bon ibuobuoki naba ngkana ko kanikinaea ke ko korei koaua ake e reirei Amon nakon Ramonaai (taraa Aramwa,18:24-39) ao te koaua are e taekin Aaron nakon taman Ramonaai (taraa Aramwa 22 1-16). Tera ae kaotaki ni kiibu aikai nakoim ibukin te koaua ae ko kona n tibwauaia ma tabeman ni buokiia bwa a na ukera te koaua man te euangkerio?
Minerva K. Teichert (1888-1976), Ammon e Kamaiuiia Ana Nanai te Uea, 1935-1945, te oera iaon te mitionaite, 35 x 48 intiti. Brigham Young University Museum of Art
Au koaua e kona n namakinaki irouia aika a mwaiti.
E boni ngae ngke rongorongon te rairaki are ti warekia ni koroboki aika tabu aki toki n taekinaki ni karakin te bwai ae riki ae e rangi ni kamimi, ma te bwai ae moan te kakawaki n te rongorongo ti na kuneia tabeman ae iai irouia te ninikoria n taetae ao n tibwaua aia kakoaua ma tabeman. Teuana te kawai ae ti na kamatebwaia te bwai ae e riki n Aramwa 18-22 bon tarakin korakoran ana mwakuri temanna n rootiia tabeman man kaotan ana koaua. Tao ko na bae ni korei mwiin bwaai ake ko kunei n te tamnei ae ai aron aei:
|
E tibwaua te euangkerio Amon ma , are e tibwaua te euangkerio ma , ao e otinako mwiina bwa . |
E arora baina te Uea nakoiu ngkana I raira nanou.
Ni kabanean te rongorongo ibukin rairakin Ramonaai, e reirei Moomon te bwai ae e kakawaki ibukin anuan te Uea. Teraa ae taekinna nakoim Aramwa 19:36 ibukin anuan te Uea? Nningai ae ko a tia n namakina bain te Uea bwa e arori nakoim? Ko na kanga ni buokiia naake ko tangiriia n namakina ana nanoanga?
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Aramwa 17–19
Ko na kanga ni karika te rongorongo n taian mwakoro aikai bwa a na rangi ni kakaongora? Ko kona ni karaoa te reirei n te katooto ni Karakinan Amon ngke e kamanoia tiibu ke Karakinan Abiti ngke e botiia aomata bwa a na kakoauaa mwakan te Atua. Tao a kona kain te utu ni korei tamnei ni kabwarabwarai mwakoron te karaki ao ni kabongana te tamnei n taekina te rongorongo. Tera ae a na karaoia am utu bwa a na ira ana katooto Amon ao Abiti?
Aramwa 18:24-39
Tao a na kona kain am utu ni wareka Aramwa 18:24-39 ao n rinea te koaua are e reiakinna Amon nakon Ramonaai. E aera ngkai ti iangoia bwa Amon e moana ana reirei nakon Ramonaai n taian koaua aikai? E aera bwa e kakawaki ibukira bwa a na iai ara kakoaua iaon taian koaua aikai?
Aramwa 20:8-15
Tera ae ti reiakinna bwa e kanga ana kaeka Ramonaai nakon tamana? Ti na kanga ni katotonga Ramonaai n arona n tei ibukin te bwai ae koaua? (Ibukin katooto tabeua, noora te video “Dare to Stand Alone” iaon ChurchofJesusChrist.org.)
Aramwa 22:15-18
Rinanoa Aramwa 20:23 n noria bwa teraa ae e tangiria ni kan kanakoa taman Ramonaai bwa e aonga ni kamauaki. Manga rinanoa ngkanne Aramwa 22:15 n nooria bwa tera ae e tauraoi ni kanakoa bwa e aonga ni karekea te kukurei n te euangkerio. Tera ae e tauraoi ni katinanikui bwa e aonga n ataa te Atua? (taraa te kibu 18). Tao kain te utu n tatabemaniia a na korea te kainibaire ibukin katinanikuan te bwai teuana bwa a aonga ni kinaa te Atua.
Ibukin riki iango ibukin reiakinaia ataei, taraa te kabwarabwara n te wiiki aei inanon Nakomai, Iriirai—Ibukin te Moanrinan.
Kanakoraoan Am Kamatebwai
Kinai raoi ao maiuakin reirei. Tao e na bon aki kaineti kabwarabwaraan rongorongo man koroboki aika tabu nakoim, ma n angiin te tai taian reirei inanon rongorongo akanne a bon kaineti nakoim. N am tai ni wareware n rongorongoia Amon ao Aaron, tera te reirei iaon tibwauaan te euangkerio ae ko kunea?
E teirake ma iaontano kainnaban te Uea ae Ramonaai, n nebonebo nakon Iesu. O, E na kakabwaiaki Iesu, iroun Walter Rane