“ວັນທີ 6–12 ເດືອນກໍລະກົດ. ແອວມາ 30–31: ‘ຄຸນນະທຳແຫ່ງພຣະຄຳຂອງພຣະເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 6–12 ເດືອນກໍລະກົດ. ແອວມາ 30–31,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ແອວມາສິດສອນໂຄຣິຫໍ

All Things Denote There Is a God (Alma and Korihor) [ທຸກສິ່ງທຸກຢ່າງຊີ້ໃຫ້ເຫັນວ່າ ມັນມີພຣະເຈົ້າ (ແອວມາ ແລະ ໂຄຣິຫໍ)], ໂດຍ ວາວເຕີ ເຣນ

ວັນທີ 6–12 ເດືອນກໍລະກົດ

ແອວມາ 30–31

“ຄຸນນະທຳແຫ່ງພຣະຄຳຂອງພຣະເຈົ້າ”

ແອວມາໄດ້ເປັນພະຍານເຖິງ “ຜົນທີ່ມີອຳນາດ” ຂອງພຣະຄຳຂອງພຣະເຈົ້າ (ແອວມາ 31:5). ຂະນະທີ່ທ່ານອ່ານ ແອວມາ 30–31, ໃຫ້ບັນທຶກຄວາມປະທັບໃຈຂອງທ່ານ ເມື່ອທ່ານຮູ້ສຶກເຖິງຜົນກະທົບຂອງພຣະຄຳຂອງພຣະເຈົ້າຕໍ່ທ່ານ.

ບັນທຶກຄວາມປະທັບໃຈຂອງທ່ານ

ເລື່ອງລາວຢູ່ໃນ ແອວມາ 30–31 ສະແດງຢ່າງແຈ່ມແຈ້ງເຖິງພະລັງຂອງຖ້ອຍຄຳ—ສຳລັບທາງຊົ່ວ ແລະ ສຳລັບທາງດີ. “ຄວາມຍົກຍ້ອງ” ແລະ “ຄຳເວົ້າທີ່ຮຸນແຮງຫລາຍຂຶ້ນ” ຂອງຄູສອນປອມຊື່ ໂຄຣິຫໍ ໄດ້ເປັນຜົນຮ້າຍທີ່ຈະນຳພາ “ຈິດວິນຍານຫລາຍດວງລົງໄປສູ່ຄວາມພິນາດ” (ແອວມາ 30:31, 47). ຄ້າຍຄືກັນນັ້ນ, ຄຳສອນຂອງຜູ້ຂັດຄ້ານຊາວນີໄຟຄົນໜຶ່ງຊື່ ໂຊຣຳ ກໍໄດ້ນຳພາຄົນທັງກຸ່ມລົງ “ໄປສູ່ຄວາມຜິດພາດອັນໃຫຍ່ຫລວງ” ແລະ “ບິດເບືອນທາງຂອງພຣະຜູ້ເປັນເຈົ້າ” (ແອວມາ 31:9, 11).

ກົງກັນຂ້າມ, ແອວມາມີສັດທາທີ່ບໍ່ຫວັ່ນໄຫວວ່າ ພຣະຄຳຂອງພຣະເຈົ້າຈະມີ “ຜົນທີ່ມີອຳນາດແກ່ຈິດໃຈຂອງຜູ້ຄົນຍິ່ງກວ່າດາບ, ຫລື ເໜືອກວ່າສິ່ງໃດໆ” (ແອວມາ 31:5)—ລວມທັງຖ້ອຍຄຳຂອງໂຄຣິຫໍ ແລະ ໂຊຣຳ. ຖ້ອຍຄຳຂອງແອວມາສະແດງເຖິງຄວາມຈິງນິລັນດອນ ແລະ ການເອີ້ນຫາອຳນາດແຫ່ງສະຫວັນເພື່ອໃຫ້ລະງັບສຽງຂອງ ໂຄຣິຫໍ (ເບິ່ງ ແອວມາ 30:39–50), ແລະ ມັນໄດ້ເຊື້ອເຊີນພອນຂອງສະຫວັນໃຫ້ມາສູ່ຜູ້ທີ່ໄປກັບເພິ່ນ ເພື່ອພາຊາວໂຊຣຳກັບຄືນມາຫາຄວາມຈິງ (ເບິ່ງ ແອວມາ 31:31–38). ຕໍ່ໄປນີ້ແມ່ນຕົວຢ່າງທີ່ສຳຄັນສຳລັບຜູ້ຕິດຕາມພຣະຄຣິດໃນທຸກວັນນີ້, ເມື່ອ “ຄຳເວົ້າທີ່ຮຸນແຮງຫລາຍຂຶ້ນ” ແລະ “ຄວາມຜິດພາດອັນໃຫຍ່ຫລວງ” ກັບມາມີຜົນກະທົບຢ່າງມີພະລັງຕໍ່ຄວາມຄິດຂອງຜູ້ຄົນຄືນອີກ (ແອວມາ 30:31; 31:9). ແຕ່ເຮົາສາມາດພົບເຫັນຄວາມຈິງ ໂດຍການມີຄວາມໄວ້ວາງໃຈ, ເໝືອນດັ່ງແອວມາໄດ້ມີ, “ຄຸນນະທຳແຫ່ງພຣະຄຳຂອງພຣະເຈົ້າ” (ແອວມາ 31:5).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ແອວມາ 30:6, 12

ຜູ້ຕໍ່ຕ້ານພຣະຄຣິດຄືຫຍັງ?

ຢູ່ໃນ ແອວມາ 30, ໂຄຣິຫໍຖືກເອີ້ນວ່າ “ຜູ້ຕໍ່ຕ້ານພຣະຄຣິດ” (ຂໍ້ທີ 6). ຜູ້ຕໍ່ຕ້ານພຣະຄຣິດ ຄື “ຜູ້ທີ່ວາງທ່າເປັນແບບພຣະຄຣິດ ແຕ່ແທ້ໆແລ້ວ ເຂົາຕໍ່ຕ້ານພຣະຄຣິດ (1 ໂຢຮັນ 2:18–22; 4:3–6; 2 ໂຢຮັນ 1:7). ໃນຄວາມໝາຍກວ້າງ ມັນແມ່ນທຸກຄົນ ຫລື ທຸກສິ່ງທີ່ປອມແປງພຣະກິດຕິຄຸນທີ່ແທ້ຈິງ ຫລື ແຜນແຫ່ງຄວາມລອດ ແລະ ບໍ່ວ່າຈະໃນທາງເປີດເຜີຍ ຫລື ໃນທາງລັບ ໄດ້ສ້າງຕັ້ງການຕໍ່ຕ້ານພຣະຄຣິດ” (Bible Dictionary, “Antichrist”).

ທ່ານສັງເກດເຫັນຫຍັງແດ່ທີ່ “ປອມແປງພຣະກິດຕິຄຸນທີ່ແທ້ຈິງ” ຢູ່ໃນໂລກທຸກວັນນີ້? ຍົກຕົວຢ່າງ, ຊິດສະເຕີ ຈູລີ ບີ ແບັກ, ອະດີດປະທານສະມາຄົມສະຕີສົງເຄາະສາມັນ, ໄດ້ສິດສອນວ່າ, “ບໍ່ວ່າຄຳສອນ ຫລື ຫລັກທຳຂໍ້ໃດ ທີ່ [ເຮົາ] ໄດ້ຍິນຈາກຊາວໂລກ ທີ່ຕໍ່ຕ້ານຄອບຄົວ ກໍຕໍ່ຕ້ານພຣະຄຣິດຄືກັນ” (“Teaching the Doctrine of the Family,” Ensign, Mar. 2011, 15).

Korihor Confronts Alma [ໂຄຣິຫໍປະເຊີນໜ້າກັບແອວມາ], ໂດຍ ຣໍເບີດ ທີ ແບແຣັດ

ແອວມາ 30:6–60

ພຣະຄຳພີມໍມອນສາມາດຊ່ວຍເຮົາໃຫ້ຕໍ່ຕ້ານອິດທິພົນຂອງຜູ້ທີ່ພະຍາຍາມຫລອກລວງເຮົາ.

ຂະນະທີ່ທ່ານອ່ານ ແອວມາ 30:6–31, ຄຳສອນຂອງໂຄຣິຫໍ ຟັງແລ້ວອາດຄືຄຸ້ນໆຫູ. ມັນເປັນເພາະ, ດັ່ງທີ່ປະທານເອສະຣາ ແທັບ ເບັນສັນ ໄດ້ສິດສອນ, ພຣະຄຳພີມໍມອນເປີດເຜີຍ ແລະ ປົກປ້ອງເຮົາຈາກ “ແບບແຜນທີ່ຊົ່ວຮ້າຍ, ຍຸດທະວິທີ, ແລະ ຄຳສອນຂອງມານ ໃນວັນເວລາຂອງເຮົາ. ແບບແຜນຂອງການປະຖິ້ມຄວາມເຊື່ອຢູ່ໃນພຣະຄຳພີມໍມອນແມ່ນຄ້າຍຄືກັນກັບແບບແຜນ ທີ່ເຮົາມີຢູ່ໃນທຸກວັນນີ້. ພຣະເຈົ້າ, ດ້ວຍຄວາມຮູ້ລ່ວງໜ້າອັນບໍ່ມີຂອບເຂດຂອງພຣະອົງ, ໄດ້ຊີ້ນຳການສ້າງພຣະຄຳພີມໍມອນ ເພື່ອວ່າເຮົາຈະສາມາດເຫັນຄວາມຜິດ ແລະ ຮູ້ຈັກວິທີທີ່ຈະຕໍ່ຕ້ານການສຶກສາ, ການເມືອງ, ສາດສະໜາ, ແລະ ທິດສະດີທີ່ບໍ່ຖືກຕ້ອງ ຂອງວັນເວລາຂອງເຮົາ” (Teachings of Presidents of the Church: Ezra Taft Benson, [2014], 132).

ໃຫ້ຂຽນຄຳສອນທີ່ບໍ່ຖືກຕ້ອງບາງສິ່ງ ທີ່ໂຄຣິຫໍໄດ້ສິດສອນຢູ່ໃນ ແອວມາ 30:6–31. ຜົນສະທ້ອນຂອງການເຊື່ອໃນຄຳສອນເຫລົ່ານີ້ ມີຢ່າງໃດແດ່? ຍົກຕົວຢ່າງ, ແມ່ນຫຍັງຄືຜົນຂອງການເຊື່ອວ່າ “ເວລາຄົນຕາຍໄປ, ມັນເປັນທີ່ສຸດຂອງຊີວິດ”? (ແອວມາ 30:18). ຄຳສອນທີ່ບໍ່ຖືກຕ້ອງໃດແດ່ ທີ່ສິດສອນໂດຍໂຄຣິຫໍ ຄ້າຍຄືກັບຄຳສອນທີ່ບໍ່ຖືກຕ້ອງທີ່ທ່ານສັງເກດເຫັນຢູ່ໃນໂລກທຸກວັນນີ້?

ການອ່ານກ່ຽວກັບປະຕິກິລິຍາລະຫວ່າງ ໂຄຣິຫໍ ແລະ ແອວມາ ສາມາດຊ່ວຍທ່ານກະກຽມສຳລັບສະຖານະການ ເມື່ອຄົນອື່ນພະຍາຍາມທີ່ຈະຫລອກລວງທ່ານ. ມັນອາດເປັນປະໂຫຍດທີ່ຈະສຶກສາ ແອວມາ 30:29–60 ເພື່ອຈະໄດ້ເຂົ້າໃຈວິທີທີ່ໂຄຣິຫໍ ໄດ້ຖືກຫລອກ (ເບິ່ງ ໂດຍສະເພາະ ຂໍ້ທີ 52–53). ທ່ານສາມາດຮຽນຮູ້ຫຍັງແດ່ຈາກການຕອບຮັບຂອງແອວມາ ຕໍ່ການສິດສອນຂອງໂຄຣິຫໍ? (ເບິ່ງ ແອວມາ 30:31–35).

ແອວມາ 31

ພຣະຄຳຂອງພຣະເຈົ້າມີພະລັງທີ່ຈະນຳພາຜູ້ຄົນໄປສູ່ຄວາມຊອບທຳ.

ບັນຫາຂອງຊາວໂຊຣຳ ທີ່ແຍກຕົວອອກໄປຈາກຊາວນີໄຟ ສຳລັບບາງຄົນອາດເບິ່ງຄືວ່າ ມັນຕ້ອງໄດ້ແກ້ໄຂບັນຫາທາງການເມືອງ ແລະ ການທະຫານ (ເບິ່ງ ແອວມາ 31:1–4). ແຕ່ແອວມາໄດ້ຮຽນໄວ້ວາງໃຈໃນ “ຄຸນນະທຳແຫ່ງພຣະຄຳຂອງພຣະເຈົ້າ” (ແອວມາ 31:5). ທ່ານຮຽນຮູ້ຫຍັງແດ່ຈາກ ແອວມາ 31:5 ກ່ຽວກັບພະລັງຂອງພຣະຄຳຂອງພຣະເຈົ້າ? ທ່ານເຄີຍເຫັນພຣະຄຳຂອງພຣະເຈົ້ານຳພາ “ຜູ້ຄົນມາເຮັດໃນສິ່ງທີ່ຖືກຕ້ອງ” ແນວໃດ? (ແອວມາ 31:5). ໃຫ້ໄຕ່ຕອງວິທີທີ່ທ່ານສາມາດ “ພະຍາຍາມ” (ໃຊ້ ຫລື ທົດລອງ) ພຣະຄຳຂອງພຣະເຈົ້າ ເພື່ອຊ່ວຍບາງຄົນທີ່ທ່ານຮັກ.

ເພື່ອເຂົ້າໃຈຫລາຍກວ່າເກົ່າເຖິງການເຂົ້າຫາຂອງແອວມາ ເພື່ອຊ່ວຍກູ້ຄົນອື່ນໆ, ທ່ານສາມາດປຽບທຽບທັດສະນະຄະຕິ, ຄວາມຮູ້ສຶກ, ແລະ ການກະທຳຂອງເພິ່ນ ກັບຜູ້ທີ່ເປັນຊາວໂຊຣຳ, ດັ່ງທີ່ມີບັນຍາຍຢູ່ໃນ ແອວມາ 31. ຕາຕະລາງທີ່ຄ້າຍຄືກັນກັບອັນຢູ່ຂ້າງລຸ່ມນີ້ ອາດຊ່ວຍໄດ້. ທ່ານສັງເກດເຫັນຄວາມແຕກຕ່າງແນວໃດແດ່? ທ່ານຮູ້ສຶກວ່າ ທ່ານສາມາດເປັນຄືກັນກັບແອວມາຫລາຍກວ່າເກົ່າແນວໃດ?

ຊາວໂຊຣຳ	ແອວມາ
ຊາວໂຊຣຳ ໄດ້ເຊື່ອວ່າ ຜູ້ທີ່ຢູ່ນອກກຸ່ມ ຖືກເອົາລົງໄປນະລົກ (ແອວມາ 31:17).	ແອວມາ ໄດ້ເຊື່ອວ່າຊາວໂຊຣຳ ເປັນ “ພີ່ນ້ອງ” ຂອງເພິ່ນ ແລະ ຈິດວິນຍານຂອງພວກເຂົາ “ປະເສີດ” (ແອວມາ 31:35).
ຊາວໂຊຣຳ ໝົກໝຸ້ນຢູ່ກັບສິ່ງຂອງທີ່ມີຄ່າ (ແອວມາ 31:24, 28).	ແອວມາ ປາດຖະໜາທີ່ຈະນຳພາຈິດວິນຍານມາຫາພຣະເຢຊູຄຣິດ (ແອວມາ 31:34).
ຊາວໂຊຣຳ	ແອວມາ

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

ແອວມາ 30:44

ໃຫ້ຄິດທີ່ຈະອ່ານ ແລະ ສົນທະນາ ແອວມາ 30:44 ນຳກັນ ຂະນະທີ່ພວກທ່ານໄປຍ່າງຫລິ້ນຢູ່ນອກ ຫລື ເບິ່ງຮູບພາບກ່ຽວກັບການສ້າງຂອງພຣະເຈົ້າ. ສະມາຊິກໃນຄອບຄົວສາມາດແບ່ງປັນສິ່ງທີ່ເຂົາເຈົ້າເຫັນ ທີ່ເປັນພະຍານເຖິງພຣະເຈົ້າ. ສິ່ງເຫລົ່ານີ້—ຫລື ປະສົບການອື່ນໆ ທີ່ເຮົາເຄີຍມີ—ຊ່ວຍເຮົາໃຫ້ຮູ້ວ່າ ພຣະເຈົ້າມີຈິງແນວໃດ?

ແອວມາ 30:56–60

ເຮົາຮຽນຮູ້ຫຍັງແດ່ຈາກ ແອວມາ 30:56–60 ກ່ຽວກັບວິທີທີ່ມານກະທຳກັບບໍລິວານຂອງມັນ? ເຮົາສາມາດເຮັດສິ່ງໃດແດ່ເພື່ອປົກປ້ອງບ້ານເຮືອນຂອງເຮົາຈາກອິດທິພົນຂອງມານ?

ແອວມາ 31:20–38

ຫລັງຈາກການອ່ານ ແອວມາ 31:20–38 ກັບຄອບຄົວຂອງທ່ານ, ພວກທ່ານສາມາດສົນທະນາຄຳຖາມດັ່ງຕໍ່ໄປນີ້: ຄຳອະທິຖານຂອງແອວມາແຕກຕ່າງຈາກຄຳອະທິຖານຂອງຊາວໂຊຣຳແນວໃດ? ເຮົາຈະເຮັດຕາມຕົວຢ່າງຂອງແອວມາ ໃນການອະທິຖານເປັນສ່ວນຕົວ ແລະ ເປັນຄອບຄົວແນວໃດ?

ເດັກນ້ອຍສາມາດວາງກ້ອນຫີນໄວ້ກ້ອງໝອນ ເພື່ອເປັນສິ່ງເຕືອນເຂົາໃຫ້ຈື່ຈຳທີ່ຈະອະທິຖານ ທຸກເຊົ້າ ແລະ ແລງ. ພວກເຂົາກໍອາດມັກທີ່ຈະທາສີປະດັບກ້ອນຫີນຂອງພວກເຂົາ.

ແອວມາ 31:23

ເຮົາເຮັດຫຍັງແດ່ທຸກວັນ ຢູ່ໃນບ້ານເຮືອນຂອງເຮົາ ເພື່ອຮຽນຮູ້ ແລະ ເວົ້າລົມກ່ຽວກັບພຣະເຈົ້າ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສຶກສາສ່ວນຕົວ

ກະກຽມສິ່ງທີ່ຢູ່ອ້ອມຮອບ. “ສິ່ງທີ່ຢູ່ອ້ອມຮອບເຮົາສາມາດເປັນຜົນກະທົບທີ່ມີພະລັງຕໍ່ຄວາມສາມາດຂອງເຮົາທີ່ຈະຮຽນຮູ້ ແລະ ຕໍ່ຄວາມຮູ້ສຶກຂອງເຮົາເຖິງຄວາມຈິງໄດ້” (Teaching in the Savior’s Way, 15). ໃຫ້ພະຍາຍາມຊອກຫາສະຖານທີ່ສຶກສາພຣະຄຳພີ ບ່ອນທີ່ຈະເຊື້ອເຊີນອິດທິພົນຂອງພຣະວິນຍານບໍລິສຸດໃຫ້ມາສະຖິດຢູ່ນຳ. ເພງ ແລະ ຮູບພາບທີ່ເຊີດຊູໃຈ ກໍສາມາດເຊື້ອເຊີນພຣະວິນຍານໃຫ້ມາສະຖິດຢູ່ນຳໄດ້ຄືກັນ.