“ວັນທີ 13–19 ເດືອນກໍລະກົດ. ແອວມາ 32–35: ‘ປູກພຣະຄຳນີ້ໄວ້ໃນໃຈຂອງພວກທ່ານ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 13–19 ເດືອນກໍລະກົດ. ແອວມາ 32–35,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ເມັດພືດຢູ່ໃນມືຂອງເດັກນ້ອຍ

ວັນທີ 13–19 ເດືອນກໍລະກົດ

ແອວມາ 32–35

“ປູກພຣະຄຳນີ້ໄວ້ໃນໃຈຂອງພວກທ່ານ”

ໃຫ້ບັນທຶກຄວາມປະທັບໃຈທາງວິນຍານຂອງທ່ານ ທີ່ທ່ານໄດ້ຮັບຂະນະທີ່ທ່ານສຶກສາ ແອວມາ 32–35. ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ເພາະສິ່ງທີ່ທ່ານໄດ້ຮຽນຮູ້?

ບັນທຶກຄວາມປະທັບໃຈຂອງທ່ານ

ສຳລັບຊາວໂຊຣຳ, ຄຳອະທິຖານແມ່ນເຈາະຈົງໃສ່ຕົວເອງ, ເປັນການປະຕິບັດເປັນປະຈຳທີ່ໄດ້ເກີດຂຶ້ນພຽງແຕ່ໜຶ່ງເທື່ອຕໍ່ອາທິດ. ມັນຮ່ວມດ້ວຍການຢືນຢູ່ບ່ອນທີ່ໃຫ້ທຸກຄົນເຫັນ ແລະ ເວົ້າຊ້ຳຄຳເກົ່າທີ່ບໍ່ມີປະໂຫຍດ ແລະ ຄຳທີ່ໃຫ້ຕົວເອງພໍໃຈ. ບາງທີຮ້າຍກວ່ານັ້ນ, ຊາວໂຊຣຳຍັງຂາດສັດທາໃນພຣະເຢຊູຄຣິດ—ແມ່ນແຕ່ປະຕິເສດການເປັນຢູ່ຂອງພຣະອົງ—ແລະ ໄດ້ຂົ່ມເຫັງຄົນຍາກຈົນ (ເບິ່ງ ແອວມາ 31:9–25). ກົງກັນຂ້າມ, ແອວມາ ແລະ ແອມມິວເລັກໄດ້ສິດສອນຢ່າງກ້າຫານ ວ່າການອະທິຖານມີສ່ວນກ່ຽວຂ້ອງກັບສິ່ງທີ່ເກີດຂຶ້ນຢູ່ໃນໃຈເຮົາຫລາຍກວ່າການຢືນຢູ່ເທິງເວທີ. ແລະ ຖ້າຫາກມັນບໍ່ນຳພາໄປສູ່ການມີຄວາມເຫັນອົກເຫັນໃຈຕໍ່ຄົນທີ່ຂັດສົນ, ແລ້ວມັນກໍ “ບໍ່ມີປະໂຫຍດ, ແລະ ບໍ່ຊ່ວຍອັນໃດ” (ແອວມາ 34:28). ສິ່ງທີ່ສຳຄັນທີ່ສຸດ, ມັນເປັນການສະແດງອອກເຖິງການມີສັດທາໃນພຣະເຢຊູຄຣິດ, ຜູ້ສະເໜີມອບການໄຖ່ໃຫ້ ຜ່ານທາງ “ການເສຍສະລະອັນບໍ່ມີຂອບເຂດ ແລະ ນິລັນດອນ” ຂອງພຣະອົງ (ແອວມາ 34:10). ສັດທາເຊັ່ນນັ້ນ, ແອວມາໄດ້ອະທິບາຍ, ແມ່ນເກີດມາຈາກຄວາມຖ່ອມຕົວ ແລະ “ຄວາມປາດຖະໜາທີ່ຈະເຊື່ອ” (ແອວມາ 32:27). ມັນເຕີບໂຕຂຶ້ນເລື້ອຍໆ, ຄືກັນກັບຕົ້ນໄມ້, ແລະ ຮຽກຮ້ອງການບຳລຸງລ້ຽງເປັນປະຈຳ. ຂະນະທີ່ທ່ານອ່ານ ແອວມາ 32–35, ທ່ານອາດຄິດກ່ຽວກັບສັດທາ ແລະ ຄຳອະທິຖານຂອງຕົວເອງ; ທ່ານເຄີຍຮູ້ສຶກຢູ່ບໍວ່າ ທັດສະນະຄະຕິເໝືອນດັ່ງຊາວໂຊຣຳໄດ້ຄືບຄານເຂົ້າມາໃນຕົວທ່ານ? ທ່ານຈະບຳລຸງລ້ຽງສັດທາຂອງທ່ານໃນພຣະເຢຊູຄຣິດແນວໃດ ເພື່ອວ່າມັນຈະກາຍເປັນ “ຕົ້ນທີ່ງອກງາມໄປສູ່ຊີວິດອັນເປັນນິດ”? (ແອວມາ 32:41).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ແອວມາ 32:1–16

ເຮົາສາມາດເລືອກທີ່ຈະຖ່ອມຕົວ.

ແອວມາໄດ້ຫລິງເຫັນວ່າ ຊາວໂຊຣຳທີ່ຍາກຈົນ ເປັນຄົນຖ່ອມຕົວ ແລະ “ຢູ່ໃນການຕຽມພ້ອມທີ່ຈະຟັງພຣະຄຳ” (ແອວມາ 32:6). ຂະນະທີ່ທ່ານອ່ານ ແອວມາ 32:1–16, ໃຫ້ຄິດກ່ຽວກັບວິທີທີ່ທ່ານຕຽມພ້ອມທີ່ຈະຟັງພຣະຄຳຂອງພຣະເຈົ້າ.

ປະສົບການໃດແດ່ທີ່ໄດ້ເຮັດໃຫ້ທ່ານຖ່ອມຕົວ? ທ່ານໄດ້ເຮັດສິ່ງໃດ ເພື່ອກາຍເປັນຄົນຖ່ອມຕົວຫລາຍກວ່າເກົ່າ? ຂໍ້ເຫລົ່ານີ້ສາມາດສິດສອນທ່ານເຖິງວິທີທີ່ຈະເລືອກຄວາມຖ່ອມຕົວ ແທນທີ່ຈະຖືກບັງຄັບໃຫ້ຖ່ອມຕົວ. ຍົກຕົວຢ່າງ, ແມ່ນຫຍັງທີ່ແຕກຕ່າງລະຫວ່າງ “ຍາກຈົນທາງໂລກ” ແລະ “ຍາກຈົນໃນໃຈ”? (ຂໍ້ທີ 3). ຄຳວ່າ “ຖ່ອມຕົວ [ທ່ານເອງ] ເພາະພຣະຄຳ” ໝາຍຄວາມວ່າແນວໃດ? (ຂໍ້ທີ 14).

ເບິ່ງ “Humility,” Gospel Topics, topics.ChurchofJesusChrist.org ນຳອີກ.

ແອວມາ 32:17–43; 33–34

ເຮົາໃຊ້ສັດທາໃນພຣະເຢຊູຄຣິດ ໂດຍການປູກ ແລະ ບຳລຸງລ້ຽງພຣະຄຳຂອງພຣະອົງ ຢູ່ໃນໃຈເຮົາ.

ທ່ານຄິດວ່າເປັນຫຍັງແອວມາຈຶ່ງໄດ້ກ່າວກ່ຽວກັບການປູກເມັດພືດ ໃນການຕອບຄຳຖາມຂອງຊາວໂຊຣຳກ່ຽວກັບການນະມັດສະການ? ເມັດພືດທີ່ແອວມາໄດ້ກ່າວເຖິງໝາຍເຖິງຫຍັງ? (ເບິ່ງ ແອວມາ 32:28; 33:22–23). ຂະນະທີ່ທ່ານອ່ານ ແອວມາ 32:17–43, ໃຫ້ສັງເກດເບິ່ງຖ້ອຍຄຳ ແລະ ສຳນວນທີ່ຊ່ວຍທ່ານໃຫ້ເຂົ້າໃຈວິທີທີ່ຈະໃຊ້ສັດທາໃນພຣະເຢຊູຄຣິດ ແລະ ໃນພຣະຄຳຂອງພຣະອົງ. ທ່ານຮຽນຮູ້ຫຍັງແດ່ກ່ຽວກັບສິ່ງທີ່ສັດທາເປັນ ແລະ ບໍ່ໄດ້ເປັນ? ແລ້ວ, ຂະນະທີ່ທ່ານອ່ານ ບົດທີ 33–34, ໃຫ້ຊອກຫາຄຳຕອບຕໍ່ຄຳຖາມຂອງຊາວໂຊຣຳ ທີ່ວ່າ “[ເຮົາ] ຈະປູກເມັດພືດໄດ້ດ້ວຍວິທີໃດ?” (ແອວມາ 33:1).

ຕໍ່ໄປນີ້ແມ່ນອີກວິທີໜຶ່ງ ທີ່ຈະສຶກສາ ແອວມາ 32–34: ແຕ້ມຮູບທີ່ເປັນຕົວແທນໃຫ້ແກ່ສຳນວນທີ່ແຕກຕ່າງກັນ ຂອງການເຕີບໂຕຂອງເມັດພືດ. ແລ້ວຂຽນປ້າຍໃສ່ຮູບແຕ່ລະໃບ ດ້ວຍຖ້ອຍຄຳຈາກ ແອວມາ 32:28–43 ທີ່ຊ່ວຍທ່ານໃຫ້ເຂົ້າໃຈເຖິງວິທີທີ່ຈະປູກ ແລະ ບຳລຸງລ້ຽງພຣະຄຳຢູ່ໃນໃຈທ່ານ.

ເບິ່ງ ມັດທາຍ 13:3–8, 18–23; ເຮັບເຣີ 11; Neil L. Andersen, “Faith Is Not by Chance, but by Choice,” Ensign ຫລື Liahona, Nov. 2015, 65–68; ນຳອີກ.

ແອວມາ 33:2–11; 34:17–29

ເຮົາສາມາດນະມັດສະການພຣະເຈົ້າໃນການອະທິຖານ, ໃນທຸກເວລາ ແລະ ໃນທຸກບ່ອນ.

ຄຳແນະນຳຂອງແອວມາ ແລະ ແອມມິວເລັກ ກ່ຽວກັບການນະມັດສະການ ແລະ ການອະທິຖານ ມີເຈດຕະນາທີ່ຈະແກ້ໄຂຄວາມເຂົ້າໃຈຜິດບາງຢ່າງໃດໜຶ່ງໂດຍສະເພາະ ທີ່ຊາວໂຊຣຳ ມີ (ເບິ່ງ ແອວມາ 31:13–23). ແຕ່ຄວາມຈິງທີ່ພວກເພິ່ນໄດ້ສິດສອນ ສາມາດຊ່ວຍເຮົາແຕ່ລະຄົນໃຫ້ເຂົ້າໃຈກ່ຽວກັບການອະທິຖານ ແລະ ການນະມັດສະການຫລາຍກວ່າເກົ່າ. ບາງທີທ່ານຄວນຂຽນຄວາມຈິງກ່ຽວກັບການອະທິຖານ ທີ່ທ່ານພົບເຫັນຢູ່ໃນ ແອວມາ 33:2–11 ແລະ 34:17–29 ໄວ້. ຢູ່ທາງຂ້າງຂອງຄວາມຈິງທີ່ທ່ານຂຽນໄວ້ນັ້ນ, ໃຫ້ຂຽນສິ່ງທີ່ອາດເຂົ້າໃຈຜິດກ່ຽວກັບການອະທິຖານ ທີ່ຄວາມຈິງເຫລົ່ານີ້ໄດ້ແກ້ໄຂ (ເບິ່ງ ແອວມາ 31:12–23). ສິ່ງທີ່ທ່ານຮຽນຮູ້ຈາກຂໍ້ເຫລົ່ານີ້ ມີຜົນກະທົບຕໍ່ວິທີທີ່ທ່ານອະທິຖານ ແລະ ນະມັດສະການແນວໃດ?

ແອວມາ 33:3–17

ຊີນັດ ແລະ ຊີໂນກ ແມ່ນໃຜ?

ຊີນັດ ແລະ ຊີໂນກ ຄືສາດສະດາຜູ້ໄດ້ເປັນພະຍານເຖິງພຣະເຢຊູຄຣິດ ລະຫວ່າງສະໄໝພຣະຄຳພີເດີມ, ແຕ່ຄຳສອນຂອງພວກເພິ່ນບໍ່ມີບັນທຶກໄວ້ ຢູ່ໃນພຣະຄຳພີເດີມ. ຊາວນີໄຟໄດ້ເຫັນຄຳສອນຂອງສາດສະດາເຫລົ່ານີ້, ບາງທີເພາະວ່າຄຳສອນຂອງພວກເພິ່ນລວມຢູ່ໃນແຜ່ນຈາລຶກທອງເຫລືອງ ທີ່ນີໄຟເອົາມາຈາກລາບານ. ຄຳສອນດັ່ງກ່າວກໍຖືກອ້າງເຖິງຢູ່ໃນ 1 ນີໄຟ 19:10–12; ຢາໂຄບ 5:1; ແລະ ຮີລາມັນ 8:19–20 ນຳອີກ.

ແອວມາ 34:30–41

“ນີ້ເປັນເວລາ … ທີ່ຈະຕຽມພ້ອມເພື່ອພົບກັບພຣະເຈົ້າ.”

ຂະນະທີ່ທ່ານອ່ານ ແອວມາ 34:30–41, ໃຫ້ພິຈາລະນາເຖິງວິທີທີ່ທ່ານອາດຈະ “ປັບປຸງເວລາ [ຂອງທ່ານ] ຂະນະທີ່ຢູ່ໃນຊີວິດນີ້” (ຂໍ້ທີ 33). ການກັບໃຈ ແລະ ຄວາມອົດທົນ ຊ່ວຍທ່ານໃຫ້ຕຽມພ້ອມທີ່ຈະພົບພຣະເຈົ້າແນວໃດ? ມີສິ່ງໃດບໍທີ່ທ່ານຕ້ອງປ່ຽນແປງ ຊຶ່ງທ່ານໄດ້ຜັດວັນ? ໃຫ້ແນ່ໃຈວ່າທ່ານເຮັດຕາມການກະຕຸ້ນທາງວິນຍານ ທີ່ທ່ານໄດ້ຮັບ.

ເບິ່ງ ແອວມາ 12:24; Larry R. Lawrence, “What Lack I Yet?” Ensign ຫລື Liahona, Nov. 2015, 33–35 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

ແອວມາ 32:9–11; 33:2–11; 34:38–39

ມັນຈະເປັນຈັ່ງໃດ ຖ້າຫາກເຮົາໄດ້ຮັບອະນຸຍາດໃຫ້ນະມັດສະການ ແລະ ອະທິຖານ ພຽງແຕ່ໃນວັນອາທິດເທົ່ານັ້ນ? ຂະນະທີ່ພວກທ່ານອ່ານຂໍ້ເຫລົ່ານີ້ນຳກັນ, ສະມາຊິກໃນຄອບຄົວສາມາດສົນທະນາວິທີທີ່ເຂົາເຈົ້າສາມາດນະມັດສະການທຸກວັນ ແລະ ເຫດຜົນທີ່ເຂົາເຈົ້າຂອບຄຸນທີ່ເຂົາເຈົ້າສາມາດເຮັດໄດ້.

ແອວມາ 32:28–43

ຮູບພາບຕົ້ນໄມ້ກໍມີຢູ່ໃນໂຄງຮ່າງນີ້; ທ່ານສາມາດໃຊ້ມັນເພື່ອສະແດງເຖິງຖ້ອຍຄຳຂອງແອວມາ ຢູ່ໃນຂໍ້ເຫລົ່ານີ້. ຫລື ຄອບຄົວຂອງທ່ານສາມາດໄປຍ່າງຫລິ້ນ ແລະ ຊົມຕົ້ນໄມ້ທີ່ຢູ່ໃນລະດັບຄວາມເຕີບໂຕທີ່ແຕກຕ່າງກັນ ແລະ ອ່ານຂໍ້ພຣະຄຳພີຈາກ ແອວມາ 32 ທີ່ປຽບທຽບການເຕີບໂຕຂອງຕົ້ນໄມ້ກັບສັດທາຂອງເຮົາ. ບາງທີສະມາຊິກໃນຄອບຄົວແຕ່ລະຄົນສາມາດປູກເມັດພືດເມັດໜຶ່ງ ແລະ ສົນທະນາເຖິງສິ່ງທີ່ເຮົາຕ້ອງເຮັດ ເພື່ອຊ່ວຍມັນໃຫ້ເຕີບໂຕ. ໃນອາທິດທີ່ຈະມາເຖິງ ພວກທ່ານສາມາດກວດເບິ່ງເມັດພືດຂອງພວກທ່ານ ແລະ ເຕືອນກັນແລະກັນເຖິງຄວາມຈຳເປັນທີ່ຕ້ອງບຳລຸງລ້ຽງປະຈັກພະຍານຂອງເຮົາໄປຕະຫລອດ.

ແອວມາ 33:2–11; 34:17–29

ຂໍ້ເຫລົ່ານີ້ແນະນຳຫຍັງແດ່ກ່ຽວກັບວິທີທີ່ເຮົາສາມາດພັດທະນາການອະທິຖານເປັນສ່ວນຕົວ ແລະ ເປັນຄອບຄົວຂອງເຮົາ?

ແອວມາ 34:31

ປະສົບການໃດແດ່ທີ່ສະແດງໃຫ້ເຮົາເຫັນວ່າ ເມື່ອເຮົາກັບໃຈ, ເຮົາເລີ່ມຕົ້ນປະສົບກັບພອນຂອງແຜນແຫ່ງການໄຖ່ “ທັນທີ”?

ແອວມາ 34:33–35

ຄອບຄົວຂອງທ່ານຮູ້ບໍວ່າ ການຜັດວັນ ໝາຍຄວາມວ່າແນວໃດ? ບາງທີບາງຄົນສາມາດແບ່ງປັນຕົວຢ່າງຂອງການຜັດວັນ ແລະ ຜົນສະທ້ອນໃນທາງລົບຂອງມັນ. ຄຳວ່າ “ຜັດວັນແຫ່ງການກັບໃຈ [ຂອງເຮົາ]” ໝາຍຄວາມວ່າແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສິດສອນຂອງເຮົາ

ແຕ້ມຮູບ. ທ່ານອາດປ່ອຍໃຫ້ສະມາຊິກໃນຄອບຄົວແຕ້ມຮູບ ຂະນະທີ່ເຂົາເຈົ້າຮຽນຮູ້ຈາກພຣະຄຳພີ. ຍົກຕົວຢ່າງ, ເຂົາເຈົ້າອາດມ່ວນຊື່ນກັບການແຕ້ມຮູບ ກ່ຽວກັບເມັດພືດເຕີບໂຕເປັນຕົ້ນໄມ້ ຂະນະທີ່ເຂົາເຈົ້າສຶກສາ ແອວມາ 32.