“ວັນທີ 29 ເດືອນມິຖຸນາ–ວັນທີ 5 ເດືອນກໍລະກົດ. ແອວມາ 23–29: ພວກເຂົາ ‘ບໍ່ເຄີຍຕົກໄປ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 29 ເດືອນມິຖຸນາ–ວັນທີ 5 ເດືອນກໍລະກົດ. ແອວມາ 23–29,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
Anti-Nephi-Lehies Bury Their Weapons of War [ຊາວອານໄທ-ນີໄຟ-ລີໄຮຝັງອາວຸດແຫ່ງສົງຄາມຂອງພວກເຂົາ], ໂດຍ ໂຈດີ ລີບວິງສະຕັນ
ວັນທີ 29 ເດືອນມິຖຸນາ–ວັນທີ 5 ເດືອນກໍລະກົດ
ແອວມາ 23–29
ພວກເຂົາ “ບໍ່ເຄີຍຕົກໄປ”
ຂະນະທີ່ທ່ານສຶກສາ ແອວມາ 23–29, ທ່ານພົບເຫັນຂ່າວສານໃດແດ່ສຳລັບຕົວທ່ານເອງ ແລະ ຄອບຄົວຂອງທ່ານ? ທ່ານສາມາດແບ່ງປັນຫຍັງແດ່ຢູ່ໃນຫ້ອງຮຽນຢູ່ໂບດ?
ບັນທຶກຄວາມປະທັບໃຈຂອງທ່ານ
ບາງເທື່ອທ່ານກໍເຄີຍສົງໃສຢູ່ບໍວ່າ ຜູ້ຄົນສາມາດປ່ຽນແປງແທ້ໆ? ບາງທີທ່ານເປັນຫ່ວງກ່ຽວກັບວ່າທ່ານສາມາດເອົາຊະນະການເລືອກທີ່ບໍ່ດີ ທີ່ໄດ້ເຮັດໄປ ຫລື ນິໄສທີ່ບໍ່ດີທີ່ທ່ານໄດ້ພັດທະນາຫລືບໍ່, ຫລື ທ່ານອາດມີຄວາມເປັນຫ່ວງທີ່ຄ້າຍຄືກັນນັ້ນກ່ຽວກັບຄົນທີ່ທ່ານຮັກ. ຖ້າເປັນແນວນັ້ນ, ເລື່ອງເລົ່າກ່ຽວກັບຊາວອານໄທ-ນີໄຟ-ລີໄຮ ສາມາດຊ່ວຍທ່ານໄດ້. ຜູ້ຄົນເຫລົ່ານີ້ໄດ້ສາບານທີ່ຈະເປັນສັດຕູຂອງຊາວນີໄຟ. ເມື່ອອຳໂມນ ແລະ ອ້າຍນ້ອງຂອງລາວໄດ້ຕັດສິນໃຈໄປສິດສອນພຣະກິດຕິຄຸນໃຫ້ແກ່ພວກເຂົາ, ຊາວນີໄຟ “ກໍຫົວເຍາະເຍີ້ຍ [ພວກເຂົາ].” ການຂ້າຊາວເລມັນເບິ່ງຄືເປັນສິ່ງທີ່ໜ້າເຊື່ອຖື ຫລາຍກວ່າທີ່ຈະໃຫ້ພວກເຂົາປ່ຽນໃຈເຫລື້ອມໃສ. (ເບິ່ງ ແອວມາ 26:23–25.)
ແຕ່ຊາວເລມັນໄດ້ປ່ຽນ—ຜ່ານທາງອຳນາດແຫ່ງການປ່ຽນໃຈເຫລື້ອມໃສຂອງພຣະຜູ້ເປັນເຈົ້າ. ເມື່ອຄັ້ງໜຶ່ງພວກເຂົາເຄີຍເປັນທີ່ຮູ້ຈັກກັນວ່າ “ຄົນແຂງກະດ້າງ ແລະ ປ່າເຖື່ອນ” (ແອວມາ 17:14), ພວກເຂົາໄດ້ກັບກາຍເປັນຄົນ “ດີເດັ່ນຂຶ້ນ ຍ້ອນວ່າຄວາມກະຕືລືລົ້ນຂອງພວກເຂົາທີ່ມີຕໍ່ພຣະເຈົ້າ” (ແອວມາ 27:27). ຕາມຈິງແລ້ວ, ພວກເຂົາ “ບໍ່ເຄີຍຕົກໄປ” (ແອວມາ 23:6).
ບາງທີທ່ານອາດມີປະເພນີບໍ່ຖືກຕ້ອງ ທີ່ຈະປະຖິ້ມ ຫລື ມີ “ອາວຸດແຫ່ງການກະບົດ” ທີ່ຈະວາງລົງ (ແອວມາ 23:7). ຫລື ບາງທີທ່ານພຽງແຕ່ຕ້ອງມີຄວາມອຸທິດຕົນຫລາຍຂຶ້ນໃນປະຈັກພະຍານຂອງທ່ານ ແລະ ມີຄວາມໂນ້ມອ່ຽງທີ່ຈະຕົກໄປໜ້ອຍລົງ. ບໍ່ວ່າທ່ານຕ້ອງປ່ຽນແປງສິ່ງໃດກໍຕາມ, ແອວມາ 23–29 ສາມາດໃຫ້ຄວາມຫວັງແກ່ທ່ານ ຊຶ່ງ, ຜ່ານທາງການຊົດໃຊ້ຂອງພຣະເຢຊູຄຣິດ, ການປ່ຽນແປງອັນຍາວນານສາມາດເປັນໄປໄດ້.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ເມື່ອລູກໆຂອງພຣະເຈົ້າຮັບເອົາພຣະກິດຕິຄຸນ, ພອນອັນຍິ່ງໃຫຍ່ຈະຕິດຕາມມາ.
ເມື່ອກະສັດຂອງຊາວເລມັນໄດ້ປະກາດວ່າ ຄວນ “ບໍ່ໄດ້ມີອັນກີດຂວາງ” ພຣະຄຳຂອງພຣະເຈົ້າໃນບັນດາຜູ້ຄົນຂອງເພິ່ນ (ເບິ່ງ ແອວມາ 23:1–5), ເພິ່ນໄດ້ເຮັດໃຫ້ເປັນໄປໄດ້ສຳລັບພອນອັນຍິ່ງໃຫຍ່ທີ່ຈະມາສູ່ພວກເຂົາ. ຂະນະທີ່ທ່ານອ່ານ ແອວມາ 23–29, ໃຫ້ຊອກຫາພອນເຫລົ່ານີ້. ທ່ານຈະຮັບປະກັນໄດ້ແນວໃດວ່າ ພຣະຄຳຂອງພຣະເຈົ້າ ຈະ “ບໍ່ໄດ້ມີອັນກີດຂວາງ” ໃນຊີວິດຂອງທ່ານ ຫລື ໃນຄອບຄົວຂອງທ່ານ?
ການປ່ຽນໃຈເຫລື້ອມໃສຂອງເຮົາຕໍ່ພຣະເຢຊູຄຣິດ ແລະ ຕໍ່ພຣະກິດຕິຄຸນຂອງພຣະອົງ ປ່ຽນແປງຊີວິດຂອງເຮົາ.
ຊາວເລມັນຜູ້ທີ່ອຳໂມນ ແລະ ອ້າຍນ້ອງຂອງລາວໄດ້ໄປຫາ ເບິ່ງຄືວ່າເປັນບຸກຄົນທີ່ຄົງຊິບໍ່ປ່ຽນໃຈເຫລື້ອມໃສ—ພວກເຂົາໄດ້ຖືກກີດກັນໂດຍປະເພນີຂອງບັນພະບຸລຸດຂອງພວກເຂົາ ແລະ ຄວາມຊົ່ວຮ້າຍຂອງພວກເຂົາເອງ. ແຕ່ພວກເຂົາຫລາຍຄົນໄດ້ຮັບເອົາພຣະກິດຕິຄຸນຂອງພຣະເຢຊູຄຣິດ ແລະ ໄດ້ທຳການປ່ຽນແປງຂັ້ນຕົ້ນໃນຊີວິດຂອງພວກເຂົາ. ເພື່ອເປັນສັນຍາລັກຂອງການປ່ຽນໃຈເຫລື້ອມໃສຂອງພວກເຂົາເອງ, ຊາວເລມັນເຫລົ່ານີ້ ຈຶ່ງເອີ້ນຕົວເອງວ່າ ຊາວອານໄທ-ນີໄຟ-ລີໄຮ. (ຄວາມໝາຍຂອງຄຳວ່າ “ອານໄທ” ໃນກໍລະນີນີ້ ບໍ່ໄດ້ໝາຍເຖິງ “ຜູ້ຕໍ່ຕ້ານ” ເຊັ່ນ “ຜູ້ຕໍ່ຕ້ານ-ພຣະຄຣິດ.”)
ການສະທ້ອນຄິດກ່ຽວກັບການປ່ຽນໃຈເຫລື້ອມໃສຂອງຊາວເລມັນເຫລົ່ານີ້ ອາດກະຕຸ້ນທ່ານໃຫ້ໄຕ່ຕອງກ່ຽວກັບການປ່ຽນໃຈເຫລື້ອມໃສຂອງຕົວທ່ານເອງ “ໃນພຣະຜູ້ເປັນເຈົ້າ” (ແອວມາ 23:6). ວິທີໜຶ່ງທີ່ຈະສຶກສາບົດເຫລົ່ານີ້ ອາດເປັນການຊອກຫາວິທີທີ່ການປ່ຽນໃຈເຫລື້ອມໃສຂອງຊາວອານໄທ-ນີໄຟ-ລີໄຮ ປ່ຽນແປງຊີວິດຂອງພວກເຂົາແນວໃດ. ຂໍ້ດັ່ງຕໍ່ໄປນີ້ ສາມາດຊ່ວຍທ່ານເລີ່ມຕົ້ນ.
ຂະນະທີ່ທ່ານໄຕ່ຕອງກ່ຽວກັບການປ່ຽນແປງ ໃນຕົວຊາວອານໄທ-ນີໄຟ-ລີໄຮ, ໃຫ້ພິຈາລະນາວິທີທີ່ການປ່ຽນໃຈເຫລື້ອມໃສຂອງທ່ານເອງຕໍ່ພຣະຄຣິດ ໄດ້ປ່ຽນແປງທ່ານແນວໃດ. ທ່ານຄິດວ່າ ທ່ານຍັງມີຫຍັງອີກແດ່ທີ່ຕ້ອງປ່ຽນແປງ ເພື່ອວ່າພຣະກິດຕິຄຸນຈະສາມາດມີພະລັງອັນຍິ່ງໃຫຍ່ກວ່າຢູ່ໃນຊີວິດຂອງທ່ານ?
ພຣະເຈົ້າມີເມດຕາ.
ເຖິງແມ່ນຄວາມຜິດບາບທີ່ອຳໂມນ ແລະ ຊາວອານໄທ-ນີໄຟ-ລີໄຮ ໄດ້ເອົາຊະນະ ແມ່ນແຕກຕ່າງຫລາຍຈາກທຸກສິ່ງໃນຊີວິດຂອງທ່ານ, ແຕ່ເຮົາທຸກຄົນກໍຕ້ອງເພິ່ງຄວາມເມດຕາຂອງພຣະເຈົ້າ. ທ່ານພົບເຫັນຫຍັງແດ່ ຢູ່ໃນ ແອວມາ 24:7–19 ແລະ 26:17–22 ທີ່ຊ່ວຍທ່ານໃຫ້ເຂົ້າໃຈຄວາມເມດຕາຂອງພຣະອົງ? ຂະນະທີ່ທ່ານອ່ານ, ທ່ານອາດຄິດກ່ຽວກັບສິ່ງເຫລົ່ານີ້: ວິທີທີ່ທ່ານໄດ້ຖືກເຊື້ອເຊີນໃຫ້ກັບໃຈ, ປະສົບການຂອງທ່ານກັບການກັບໃຈ, ວິທີທີ່ທ່ານໄດ້ພະຍາຍາມລະເວັ້ນຈາກການເຮັດບາບອີກ, ແລະ ພອນທີ່ໄດ້ມາສູ່ທ່ານ ຜ່ານທາງການກັບໃຈ. ເມື່ອທ່ານອ່ານຂໍ້ເຫລົ່ານີ້ໃນທາງນີ້, ທ່ານຮຽນຮູ້ຫຍັງແດ່ກ່ຽວກັບຄວາມເມດຕາຂອງພຣະເຈົ້າ ຢູ່ໃນຊີວິດຂອງທ່ານ?
ການຮັບໃຊ້ພຣະຜູ້ເປັນເຈົ້ານຳຄວາມສຸກມາໃຫ້.
ເຖິງແມ່ນປະສົບການຂອງເຂົາເຈົ້າຈະແຕກຕ່າງກັນ, ແຕ່ອຳໂມນ ແລະ ແອວມາ ໄດ້ສະແດງຄວາມຮູ້ສຶກທີ່ຄ້າຍຄືກັນກ່ຽວກັບການອອກແຮງເຜີຍແຜ່ຂອງເຂົາເຈົ້າ. ໃຫ້ຄິດທີ່ຈະອ່ານ ແອວມາ 26 ແລະ 29 ແລະ ປຽບທຽບທັງສອງໃສ່ກັນ. ທ່ານສັງເກດເຫັນຫຍັງແດ່ທີ່ຄ້າຍຄືກັນ? ຄຳໃດ ຫລື ສຳນວນໃດ ທີ່ເນັ້ນຫລາຍເທື່ອ? ທ່ານຮຽນຮູ້ຫຍັງແດ່ຈາກອຳໂມນ ແລະ ແອວມາ ກ່ຽວກັບວິທີທີ່ຈະພົບຄວາມສຸກທີ່ແທ້ຈິງ ເຖິງແມ່ນຈະມີການທ້າທາຍກໍຕາມ? (ເພື່ອທົບທວນການທ້າທາຍທີ່ແອວມາໄດ້ປະເຊີນ, ໃຫ້ເບິ່ງຫົວຂໍ້ບົດ ສຳລັບ ແອວມາ 5–16. ເພື່ອທົບທວນການທ້າທາຍຂອງອຳໂມນ ແລະ ອ້າຍນ້ອງຂອງລາວ, ໃຫ້ເບິ່ງຫົວຂໍ້ບົດ ສຳລັບ ແອວມາ 17–28.)
ຟ່ອນເຂົ້າ ແລະ ເລົ້າ ແມ່ນຫຍັງ?
ໃນລະດູເກັບກ່ຽວ, ເຂົ້າມັກຈະຖືກຮວບຮວມໄວ້ເປັນມັດໆ ເອີ້ນວ່າ ຟ່ອນເຂົ້າ ແລະ ຖືກເກັບໄວ້ຢູ່ໃນສາງ, ບາງເທື່ອເອີ້ນວ່າ ເລົ້າ. ແອວເດີ ເດວິດ ເອ ແບ໊ດນາ ໄດ້ແບ່ງປັນການຕີຄວາມໝາຍທີ່ອາດເປັນໄປໄດ້ ຂອງສັນຍາລັກ ຢູ່ໃນ ແອວມາ 26:5: “ຟ່ອນເຂົ້າຢູ່ໃນຄຳປຽບທຽບນີ້ ເປັນຕົວແທນໃຫ້ແກ່ສະມາຊິກຂອງສາດສະໜາຈັກທີ່ຫາກໍໄດ້ຮັບບັບຕິສະມາ. ເລົ້າຄືພຣະວິຫານທີ່ສັກສິດ” (“Honorably Hold a Name and Standing,” Ensign ຫລື Liahona, May 2009, 97). ໃຫ້ພິຈາລະນາສິ່ງທີ່ຄຳປຽບທຽບ ຢູ່ໃນ ແອວມາ 26:5–7 ສິດສອນທ່ານກ່ຽວກັບຄວາມສຳຄັນຂອງພັນທະສັນຍາຂອງພຣະວິຫານແນວໃດ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
ແອວມາ 24:6–19
ເປັນຫຍັງຊາວອານໄທ-ນີໄຟ-ລີໄຮຈຶ່ງຝັງອາວຸດຂອງພວກເຂົາ “ໃຫ້ເລິກລົງໃນແຜ່ນດິນ”? (ແອວມາ 24:16). ບາງທີສະມາຊິກໃນຄອບຄົວຂອງທ່ານອາດມັກທີ່ຈະຂຽນສິ່ງທີ່ເຂົາເຈົ້າຢາກເອົາຊະນະ ຫລື ປະຖິ້ມ ໃສ່ໃນເຈ້ຍ. ແລ້ວໃຫ້ເຂົາເຈົ້າຂຸດຂຸມ ແລະ ຝັງເຈ້ຍເຫລົ່ານັ້ນ.
ແອວມາ 24:7–12
ການສຶກສາຂໍ້ເຫລົ່ານີ້ສາມາດຊ່ວຍສະມາຊິກໃນຄອບຄົວຂອງທ່ານ ໃຫ້ເຂົ້າໃຈຂອງປະທານທີ່ປະເສີດ ແຫ່ງການກັບໃຈໄດ້. ຊາວອານໄທ-ນີໄຟ-ລີໄຮໄດ້ເຮັດຫຍັງແດ່ເພື່ອກັບໃຈຈາກບາບຂອງພວກເຂົາ? ພຣະຜູ້ເປັນເຈົ້າໄດ້ເຮັດສິ່ງໃດແດ່ເພື່ອຊ່ວຍພວກເຂົາໃຫ້ກັບໃຈ? ເຮົາຮຽນຮູ້ຫຍັງແດ່ຈາກຕົວຢ່າງນີ້?
ແອວມາ 24:20–27
ເຮົາໄດ້ເຫັນສິ່ງໃດທີ່ເປັນພະຍານເຖິງຄວາມຈິງ ໃນການປະກາດຂອງມໍມອນ ທີ່ວ່າ: “ພວກເຮົາຈຶ່ງເຫັນວ່າພຣະຜູ້ເປັນເຈົ້າກະທຳໃນຫລາຍວິທີທາງເພື່ອຄວາມລອດຂອງຜູ້ຄົນຂອງພຣະອົງ”? (ແອວມາ 24:27).
ແອວມາ 26:2
ຄອບຄົວຂອງທ່ານຈະຕອບຄຳຖາມຂອງອຳໂມນ ຢູ່ໃນ ແອວມາ 26:2 ແນວໃດ? ບາງທີທ່ານຄວນຂຽນຄຳຕອບໃສ່ເຈ້ຍແຜ່ນໃຫຍ່ ແລະ ຕິດມັນໄວ້ຢູ່ໃນບ່ອນທີ່ທຸກຄົນສາມາດຫລຽວເຫັນ. ຊຸກຍູ້ສະມາຊິກໃນຄອບຄົວໃຫ້ຕື່ມຄຳຕອບໃສ່ນຳ ເມື່ອເຂົາເຈົ້າຄິດເຖິງພອນຢ່າງອື່ນໆທີ່ພຣະເຈົ້າ “ໄດ້ປະທານໃຫ້ແກ່ເຮົາ.”
ແອວມາ 29:9
ອຳໂມນ ແລະ ແອວມາໄດ້ເປັນເຄື່ອງມືໃນພຣະຫັດຂອງພຣະເຈົ້າແນວໃດ? ໃຫ້ຄິດທີ່ຈະຊອກເບິ່ງເຄື່ອງມືຢູ່ໃນບ້ານເຮືອນຂອງທ່ານ ແລະ ສົນທະນາກ່ຽວກັບແຕ່ລະຢ່າງເປັນປະໂຫຍດຕໍ່ຄອບຄົວຂອງທ່ານແນວໃດ. ສິ່ງນີ້ຊ່ວຍເຮົາໃຫ້ເຂົ້າໃຈວິທີທີ່ເຮົາແຕ່ລະຄົນສາມາດເປັນ “ເຄື່ອງມືໃນພຣະຫັດຂອງພຣະເຈົ້າ” ແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສິດສອນຂອງເຮົາ
ໃຊ້ຫລາຍໆຢ່າງ. ການເຂົ້າຫາການສຶກສາພຣະຄຳພີເປັນຄອບຄົວໃນຫລາຍວິທີທາງ ສາມາດຊ່ວຍສະມາຊິກໃນຄອບຄົວຂອງທ່ານ ໃຫ້ມີຄວາມສົນໃຈ ແລະ ມີສ່ວນຮ່ວມ. ຍົກຕົວຢ່າງ, ຫລັງຈາກສະມາຊິກຄົນໜຶ່ງໃນຄອບຄົວອ່ານຂໍ້ໜຶ່ງແລ້ວ, ລາວສາມາດຂໍໃຫ້ສະມາຊິກໃນຄອບຄົວຄົນໜຶ່ງກ່າວຊ້ຳສິ່ງທີ່ຫາກໍໄດ້ອ່ານໄປ ໃນຄຳຂອງຕົວເອງ.
ຮູບພາບຊາວອານໄທ-ນີໄຟ-ລີໄຮຝັງອາວຸດຂອງພວກເຂົາ, ໂດຍ ແດນ ເບີ