“ວັນທີ 22–28 ເດືອນມິຖຸນາ. ແອວມາ 17–22: ‘ເຮົາຈະເຮັດໃຫ້ພວກເຈົ້າເປັນເຄື່ອງມື,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 22–28 ເດືອນມິຖຸນາ. ແອວມາ 17–22,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
Ammon and King Lamoni [ອຳໂມນ ແລະ ກະສັດລາໂມໄນ], ໂດຍ ສະກາດ ເອັມ ສະໂນ
ວັນທີ 22–28 ເດືອນມິຖຸນາ
ແອວມາ 17–22
“ເຮົາຈະເຮັດໃຫ້ພວກເຈົ້າເປັນເຄື່ອງມື”
ຂະນະທີ່ທ່ານອ່ານ ແອວມາ 17–22, ໃຫ້ບັນທຶກຄວາມປະທັບໃຈທີ່ມາສູ່ທ່ານ ແລະ ໃຫ້ກະທຳຕາມນັ້ນ. ໃນການເຮັດເຊັ່ນນັ້ນ ຈະສະແດງໃຫ້ພຣະຜູ້ເປັນເຈົ້າເຫັນວ່າທ່ານເຕັມໃຈທີ່ຈະຮັບເອົາການເປີດເຜີຍສ່ວນຕົວຕື່ມອີກ.
ບັນທຶກຄວາມປະທັບໃຈຂອງທ່ານ
ໃຫ້ຄິດເຖິງເຫດຜົນທັງໝົດຂອງຜູ້ຄົນ ທີ່ບໍ່ສາມາດແບ່ງປັນພຣະກິດຕິຄຸນ: “ຂ້ອຍບໍ່ຮູ້ຈັກພຽງພໍ” ຫລື “ຂ້ອຍບໍ່ແນ່ໃຈວ່າ ເຂົາເຈົ້າຊິສົນໃຈ” ຫລື ອາດເປັນວ່າ “ຖ້າຂ້ອຍເຮັດໃຫ້ເຂົາເຈົ້າຜິດໃຈ ຊິເປັນຈັ່ງໃດ?” ບາງທີທ່ານພົບເຫັນຕົວເອງວ່າ ກໍຄິດຄ້າຍຄືກັນນີ້ ໃນບາງຄັ້ງ. ຊາວນີໄຟໄດ້ມີເຫດຜົນອື່ນອີກ ທີ່ບໍ່ສາມາດແບ່ງປັນພຣະກິດຕິຄຸນໃຫ້ກັບຊາວເລມັນ: ພວກເຂົາເປັນ “ຄົນປ່າ ແລະ ແຂງກະດ້າງ ແລະ ປ່າເຖື່ອນ, ເປັນຜູ້ຄົນທີ່ເບີກບານໃນການຄາດຕະກຳຊາວນີໄຟ” (ແອວມາ 17:14; ເບິ່ງ ແອວມາ 26:23–25 ນຳອີກ). ແຕ່ພວກລູກຊາຍຂອງໂມໄຊຢາມີເຫດຜົນທີ່ໜັກແໜ້ນກວ່ານັ້ນ ວ່າເປັນຫຍັງພວກເຂົາຈຶ່ງຮູ້ສຶກວ່າ ພວກເຂົາ ຕ້ອງ ແບ່ງປັນພຣະກິດຕິຄຸນໃຫ້ກັບຊາວເລມັນ: “ພວກເຂົາປາດຖະໜາທີ່ຈະປະກາດຄວາມລອດໃຫ້ແກ່ມະນຸດທຸກຄົນ, ເພາະວ່າພວກເຂົາທົນບໍ່ໄດ້ທີ່ຈິດວິນຍານຂອງຜູ້ໜຶ່ງຈະຕ້ອງຕາຍ” (ໂມໄຊຢາ 28:3). ຄວາມຮັກນີ້ ທີ່ດົນໃຈອຳໂມນ ແລະ ອ້າຍນ້ອງຂອງລາວ ກໍສາມາດດົນໃຈທ່ານເພື່ອໃຫ້ແບ່ງປັນພຣະກິດຕິຄຸນໃຫ້ກັບຄອບຄົວຂອງທ່ານ, ໝູ່ເພື່ອນ, ແລະ ຄົນທີ່ທ່ານຮູ້ຈັກນຳອີກ—ແມ່ນແຕ່ໃຫ້ກັບຄົນທີ່ອາດເບິ່ງຄືວ່າ ຈະບໍ່ຮັບເອົາ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ເມື່ອເຮົາເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາເອງ, ແລ້ວເຮົາຈະສາມາດແບ່ງປັນພຣະກິດຕິຄຸນຢ່າງມີປະສິດທິພາບ.
ທ່ານເຄີຍພົບກັບໝູ່ເກົ່າບໍ ແລະ ຮູ້ສຶກຄືກັນກັບທີ່ແອວມາໄດ້ຮູ້ສຶກ—ມີຄວາມປິຕິຍິນດີຢ່າງຍິ່ງທີ່ພວກເຂົາໄດ້ໝັ້ນຄົງໃນສັດທາ? (ເບິ່ງ ແອວມາ 17:1–2). ທ່ານຮຽນຮູ້ຫຍັງແດ່ຈາກພວກລູກຊາຍຂອງໂມໄຊຢາ ກ່ຽວກັບວິທີຮັກສາສັດທາຂອງທ່ານຢູ່ໃນພຣະກິດຕິຄຸນ ແລະ ໝັ້ນຄົງໃນຄຳໝັ້ນສັນຍາ? ຂະນະທີ່ທ່ານໄຕ່ຕອງກ່ຽວກັບຄວາມເຂັ້ມແຂງທາງວິນຍານຂອງພວກລູກຊາຍຂອງໂມໄຊຢາ, ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງ?
ການກະກຽມທາງວິນຍານຂອງພວກລູກຊາຍຂອງໂມໄຊຢາ ມີຜົນກະທົບຕໍ່ວຽກງານຂອງພວກເຂົາກັບຊາວເລມັນແນວໃດ? ບາງທີທ່ານສາມາດໃຊ້ໂອກາດນີ້ເພື່ອປະເມີນຄວາມພະຍາຍາມຂອງທ່ານ ທີ່ຈະສິດສອນພຣະກິດຕິຄຸນ “ດ້ວຍອຳນາດ ແລະ ສິດອຳນາດຂອງພຣະເຈົ້າ” (ແອວມາ 17:3).
ເຮົາສາມາດເປັນເຄື່ອງມືໃນພຣະຫັດຂອງພຣະເຈົ້າ ໃນການນຳຄວາມລອດມາໃຫ້ລູກໆຂອງພຣະອົງ.
ປະທານທອມມັສ ແອັສ ມອນສັນ ໄດ້ກ່າວວ່າ, “ຂ້າພະເຈົ້າຢາກໃຫ້ພຣະຜູ້ເປັນເຈົ້າຮູ້ສະເໝີວ່າ ຖ້າຫາກພຣະອົງຕ້ອງການຄົນໄປແລ່ນວຽກໃຫ້ພຣະອົງ, ທອມ ມອນສັນ ຈະໄປແລ່ນວຽກໃຫ້ພຣະອົງ” (“On the Lord’s Errand: The Life of Thomas S. Monson,” ວິດີໂອ, ChurchofJesusChrist.org). ຂະນະທີ່ທ່ານອ່ານ ແອວມາ 17:6–12, ໃຫ້ຊອກຫາສິ່ງທີ່ພວກລູກຊາຍຂອງໂມໄຊຢາໄດ້ເຮັດ ເພື່ອວ່າພວກເຂົາຈະສາມາດເປັນເຄື່ອງມືໃນພຣະຫັດຂອງພຣະເຈົ້າໄດ້. ທ່ານຈະສາມາດເປັນເຄື່ອງມືໃນພຣະຫັດຂອງພຣະເຈົ້າ ເພື່ອເປັນພອນໃຫ້ແກ່ຄົນອື່ນໄດ້ແນວໃດ? ທ່ານຮຽນຮູ້ຫຍັງແດ່ຈາກຕົວຢ່າງຂອງພວກເຂົາ ທີ່ເຮັດໃຫ້ທ່ານກ້າຫານ ທີ່ຈະເຮັດຕາມທີ່ພຣະຜູ້ເປັນເຈົ້າຕ້ອງການໃຫ້ທ່ານເຮັດ?
ເບິ່ງ Dallin H. Oaks, “Sharing the Restored Gospel,” Ensign ຫລື Liahona, Nov. 2016, 57–60 ນຳອີກ.
ເຮົາສາມາດຊ່ວຍຄົນອື່ນໃຫ້ກະກຽມທີ່ຈະຮັບເອົາພຣະກິດຕິຄຸນໄດ້.
ລາໂມໄນໄດ້ເປັນຜູ້ນຳຂອງ “ຄົນປ່າ ແລະ ແຂງກະດ້າງ ແລະ ປ່າເຖື່ອນ” (ແອວມາ 17:14), ແຕ່ເພິ່ນໄດ້ເຊົານັບຖືປະເພນີດັ້ງເດີມ ແລະ ໄດ້ຮັບເອົາພຣະກິດຕິຄຸນຂອງພຣະເຢຊູຄຣິດ. ຂະນະທີ່ທ່ານອ່ານກ່ຽວກັບປະຕິກິລິຍາຂອງອຳໂມນຕໍ່ລາໂມໄນ, ໃຫ້ສັງເກດເບິ່ງສິ່ງທີ່ອຳໂມນໄດ້ເຮັດ ທີ່ຊ່ວຍລາໂມໄນໃຫ້ຍອມຮັບຂ່າວສານຂອງລາວ. ຖ້າຫາກທ່ານມີຄວາມຄິດກ່ຽວກັບສິ່ງທີ່ທ່ານສາມາດເຮັດໄດ້ ເພື່ອແບ່ງປັນພຣະກິດຕິຄຸນກັບຄົນອື່ນ, ໃຫ້ຂຽນການກະຕຸ້ນເຫລົ່ານີ້ໄວ້.
ມັນອາດເປັນປະໂຫຍດທີ່ຈະໝາຍ ຫລື ຂຽນຄວາມຈິງທີ່ອຳໂມນໄດ້ສິດສອນລາໂມໄນ (ເບິ່ງ ແອວມາ 18:24–39) ແລະ ຄວາມຈິງທີ່ອາໂຣນໄດ້ສິດສອນບິດາຂອງລາໂມໄນ (ເບິ່ງ ແອວມາ 22:1–16). ຂໍ້ເຫລົ່ານີ້ແນະນຳທ່ານຫຍັງແດ່ກ່ຽວກັບຄວາມຈິງ ທີ່ທ່ານສາມາດແບ່ງປັນໃຫ້ກັບຄົນອື່ນ ເພື່ອຊ່ວຍເຂົາເຈົ້າໃຫ້ສະແຫວງຫາປະຈັກພະຍານເຖິງພຣະກິດຕິຄຸນ?
ມິເນີວາ ເຄ ໄທເກີດ (1888–1976), Ammon Saves the King’s Flocks [ອຳໂມນປົກປ້ອງຝູງສັດຂອງກະສັດ], 1935–1945, ສີນ້ຳມັນ ເທິງແຜ່ນໄມ້ອັດ, 35 x 48 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລບຣິກຳ ຢັງ.
ປະຈັກພະຍານຂອງເຮົາສາມາດມີອິດທິພົນຢ່າງກວ້າງຂວາງໄດ້.
ເຖິງແມ່ນວ່າເລື່ອງລາວຂອງການປ່ຽນໃຈເຫລື້ອມໃສ ທີ່ເຮົາໄດ້ອ່ານຢູ່ໃນພຣະຄຳພີ ມັກຈະກ່ຽວຂ້ອງກັບເຫດການທີ່ໜ້າປະທັບໃຈ, ແຕ່ຈຸດສຳຄັນທີ່ສຸດຂອງເລື່ອງເຫລົ່ານັ້ນ ເຮົາຈະພົບເຫັນບຸກຄົນທີ່ມີຄວາມກ້າຫານ ທີ່ຈະເວົ້າ ແລະ ແບ່ງປັນປະຈັກພະຍານຂອງເຂົາເຈົ້າໃຫ້ກັບຄົນອື່ນ. ວິທີໜຶ່ງທີ່ຈະສຶກສາເຫດການ ຢູ່ໃນ ແອວມາ 18–22 ແມ່ນການຊອກຫາຜົນກະທົບຢ່າງກວ້າງຂວາງຂອງບຸກຄົນທີ່ສະແດງປະຈັກພະຍານຂອງຕົນ. ບາງທີທ່ານຄວນບັນທຶກສິ່ງທີ່ທ່ານພົບເຫັນໄວ້ໃນແຜນພາບທີ່ຄືກັນກັບອັນນີ້:
|
ອຳໂມນແບ່ງປັນພຣະກິດຕິຄຸນໃຫ້ກັບ , ຜູ້ທີ່ໄດ້ແບ່ງປັນພຣະກິດຕິຄຸນໃຫ້ກັບ , ແລະ ຜົນຄື . |
ພຣະຜູ້ເປັນເຈົ້າເດ່ພຣະຫັດອອກມາຫາເຮົາ ເມື່ອເຮົາກັບໃຈ.
ໃນທ້າຍຂອງເລື່ອງລາວຂອງການປ່ຽນໃຈເຫລື້ອມໃສຂອງລາໂມໄນ, ມໍມອນໄດ້ສິດສອນບາງສິ່ງທີ່ສຳຄັນກ່ຽວກັບລັກສະນະຂອງພຣະຜູ້ເປັນເຈົ້າ. ແອວມາ 19:36 ແນະນຳທ່ານຫຍັງແດ່ກ່ຽວກັບລັກສະນະຂອງພຣະຜູ້ເປັນເຈົ້າ? ເມື່ອໃດທີ່ທ່ານເຄີຍຮູ້ສຶກວ່າພຣະຜູ້ເປັນເຈົ້າໄດ້ເດ່ພຣະຫັດອອກມາຫາທ່ານ? ທ່ານຈະຊ່ວຍຄົນທີ່ທ່ານຮັກໃຫ້ຮູ້ສຶກເຖິງຄວາມເມດຕາຂອງພຣະອົງໄດ້ແນວໃດ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
ແອວມາ 17–19
ທ່ານຈະສາມາດເຮັດໃຫ້ຕົວລະຄອນໃນເລື່ອງເຫລົ່ານີ້ກາຍເປັນພາບທີ່ມີຊີວິດສຳລັບຄອບຄົວຂອງທ່ານໄດ້ແນວໃດ? ພວກທ່ານສາມາດສະແດງຕາມເລື່ອງ ຕອນທີ່ອຳໂມນໄດ້ປົກປ້ອງຝູງແກະ ຫລື ເລື່ອງລາວຕອນທີ່ນາງເອບິດໄດ້ໃຫ້ຝູງຊົນມາເຕົ້າໂຮມກັນເພື່ອເປັນພະຍານເຖິງອຳນາດຂອງພຣະເຈົ້າ. ບາງທີສະມາຊິກໃນຄອບຄົວຂອງທ່ານສາມາດແຕ້ມຮູບຂອງພາກສ່ວນທີ່ແຕກຕ່າງກັນຂອງເລື່ອງ ແລະ ໃຊ້ຮູບເຫລົ່ານັ້ນເພື່ອເລົ່າເລື່ອງ. ຄອບຄົວຂອງທ່ານຈະເຮັດສິ່ງໃດ ເພື່ອຕິດຕາມຕົວຢ່າງຂອງອຳໂມນ ແລະ ເອບິດ?
ແອວມາ 18:24–39
ບາງທີສະມາຊິກໃນຄອບຄົວຂອງທ່ານສາມາດອ່ານ ແອວມາ 18:24–39 ນຳກັນ ແລະ ຊີ້ບອກຄວາມຈິງທີ່ອຳໂມນໄດ້ສິດສອນລາໂມໄນ. ເປັນຫຍັງເຮົາຈຶ່ງຄິດວ່າ ອຳໂມນຈຶ່ງສິດສອນລາໂມໄນ ໃຫ້ຮູ້ຈັກຄວາມຈິງເຫລົ່ານີ້ກ່ອນ? ເປັນຫຍັງມັນຈຶ່ງສຳຄັນສຳລັບເຮົາທີ່ຈະມີປະຈັກພະຍານເຖິງຄວາມຈິງເຫລົ່ານີ້?
ແອວມາ 20:8–15
ເຮົາຮຽນຮູ້ຫຍັງແດ່ຈາກວິທີທີ່ລາໂມໄນໄດ້ຕອບຮັບຕໍ່ບິດາຂອງເພິ່ນ? ເຮົາຈະສາມາດເຮັດຕາມຕົວຢ່າງຂອງລາໂມໄນ ເພື່ອປົກປ້ອງສິ່ງທີ່ຖືກຕ້ອງໄດ້ແນວໃດ? (ສຳລັບບາງຕົວຢ່າງ, ໃຫ້ເບິ່ງວິດີໂອ “Dare to Stand Alone” ຢູ່ທີ່ ChurchofJesusChrist.org.)
ແອວມາ 22:15–18
ໃຫ້ທົບທວນ ແອວມາ 20:23 ເພື່ອເບິ່ງວ່າ ບິດາຂອງລາໂມໄນເຕັມໃຈທີ່ຈະປະຖິ້ມສິ່ງໃດ ເພື່ອແລກກັບຊີວິດຂອງເພິ່ນ. ແລ້ວໃຫ້ທົບທວນ ແອວມາ 22:15 ເພື່ອເບິ່ງວ່າ ເພິ່ນເຕັມໃຈທີ່ຈະປະຖິ້ມສິ່ງໃດ ເພື່ອແລກກັບຄວາມຜາສຸກໃນພຣະກິດຕິຄຸນ. ເພິ່ນເຕັມໃຈທີ່ຈະປະຖິ້ມສິ່ງໃດ ເພື່ອຈະໄດ້ຮູ້ຈັກພຣະເຈົ້າ? (ເບິ່ງ ຂໍ້ທີ 18). ບາງທີສະມາຊິກໃນຄອບຄົວຂອງທ່ານແຕ່ລະຄົນຄວນຂຽນບາງສິ່ງທີ່ເຂົາເຈົ້າສາມາດປະຖິ້ມ ເພື່ອຈະໄດ້ຮູ້ຈັກພຣະເຈົ້າຢ່າງເຕັມປ່ຽມຫລາຍກວ່າເກົ່າ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສຶກສາສ່ວນຕົວ
ຊີ້ບອກ ແລະ ນຳໃຊ້ຫລັກທຳ. ເຖິງແມ່ນລາຍລະອຽດປີກຍ່ອຍຂອງເລື່ອງລາວໃນພຣະຄຳພີ ອາດບໍ່ກ່ຽວຂ້ອງກັບທ່ານ, ແຕ່ຫລັກທຳຢູ່ໃນເລື່ອງລາວເຫລົ່ານີ້ສ່ວນຫລາຍຈະກ່ຽວຂ້ອງ. ຂະນະທີ່ທ່ານອ່ານກ່ຽວກັບອຳໂມນ ແລະ ອາໂຣນ, ທ່ານພົບເຫັນຫລັກທຳໃດແດ່ກ່ຽວກັບການແບ່ງປັນພຣະກິດຕິຄຸນ?
ມະເຫສີຂອງກະສັດລາໂມໄນລຸກຂຶ້ນຈາກພື້ນ, ສັນລະເສີນພຣະເຢຊູ. Oh, Blessed Jesus [ໂອ້ ພຣະເຢຊູຜູ້ຊົງມີບາລະມີເອີຍ], ໂດຍ ວາວເຕີ ເຣນ